[1] Na ngani, mga belag, pakarigenen in kanyo boway sa Kapwan. Kamo kangay piyagkalowayan, piyagmaal, kamo makaanggay sa kangay, kamo kangay piyaglakonaw.
[2] Laki dokabai Yodiya osai Sintiki, kangay wano nges piyagsabi sa kanyo keyen, Kamo maybelag wa, kataw kamo tayari sa Kapwan.
[3] Osai kao, laki kangay katolong sa panawen, kangay din piyagsabi sa kaimo keyen kaimo tolongen ina pag dokabai, angkataw siro batang wa tomolong din sa kangay ageyat agpabarita in Maal pag Barita, sarig din Kiliminti osai in roma kay din kangay mga katolong agpamarita. In kansiro mga ngaran agisolat sa aklat listaan in mga agkaboway.
[4] Kitam baatte agkaanggay sa Kapwan. Kangay wakay piyagolit keyen, Kitam agkaanggay.
[5] Kitam agpakabait kamayba sa nakay. In Kapwan sa bangen.
[6] Ayaw kitam agkariyaban kamayba sa nakay. Dayem mandalangin sa Diyos, agkaanggay, ayayen in boo kanyo mga piyagkailangan.
[7] Kalbas in Diyos batay agpakapya sa kanyo galem, sa kanyo remrem panawen kay Kiristo Isos. In kalakoyen ina pag kapyaanan lampas sa atawanan mangyan.
[8] Anggan kay atai, laki mga belag. Kantam remremen gayed in boo maal, osai in maal piyaglakonaw, in mga yewed bosliyen, mga mabait, in mga betek, mga malinis, mga maal pag remrem, mga maal pag ogali, mga maalen sa pangkit.
[9] Kanyo ogaliyen in kangay tiyaboy, piyatoldo sa kanyo, kadayo in kangay siyabi kadayo in mga ogali kangay piyapangkit. No kataw ina na in Diyos agpamataw sa kanyo matang kamo apyaan.
[10] Ako maloba wa agkaanggay sa Kapwan angkataw dogay wa, ngona tagoli wakay ako kangitan kamo agpakayawte sa kangay. Ako katawan ako nges yewed kanyo agkalibangawan. Kaya waget kamo idapo batay agbaba tolong.
[11] Kangay piyagsabi sa kanyo yewed sa ako agayay tolong. Ako beken sanay daan agkaanggay kamayba nangkataw.
[12] Ako batang wa domalan sa korang, batang wa din domalan sa aronaw. Ako sanay wa agkaanggay kamayba nangkataw, kamayba saano, kamayba bosog, kamayba agkayawes, kamayba aronaw, kamayba idapo.
[13] Ako kabaloy kamayba nangkataw panawen sa kabaloyan tiyaboy Kiristo sa kangay.
[14] Kamayba kataw ina, ako agkaanggay sa kanyo piyangwat, in ako piyagpaidapan kamo tomolong sa kangay.
[15] In ako panaw sa Masidonya, bayo agparakay agpabarita in Maalno pag Barita, kanyo atawanan idapo roma barkadaan mga bodang Diyos tomolong agtaboy sa kangay, no yewed kamo waget in mga taga Pilipos.
[16] In ako apo kailangan sa Tisalonika, kamo agpababa kay din tolong sa kangay, yewed waget makaosai.
[17] Kamay yewed in kowarta in kangay piyagkaanggay, dayem in kamo apo midagdag sa listaan kanyo mga maal pag panawen.
[18] Ngona ako boway wa panawen sa kanyo mga piyababa. Labi kay sa kangay piyagkailangan in kanyo tolong piyababa kay Ipaprodito. Ina kagwali andog mala masadap sa Diyos, makaanggay wano sa kansiyo.
[19] In Diyos kangay piyagmaal, siyo in batay agtaboy sa kanyo panawen kay Kiristo Isos in boo kanyo piyagkailangan batang sa kansiyo kayamanan yewed agkalobos.
[20] In kantam Amang Diyos paglakonawen anggan idapo kalobosan. Ina wa ngani.
[21] Kanyo sabiyen sa boo mga iidang Diyos, osai agpasandig kay Kiristo Isos keyen siro kangay piyagpandalangin. Kadayo in kantam mga belag kangay sarig agpandalangin.
[22] In boo mga iidang Diyos atai, labi kay in sa balay lakoy in poon lakoy, siro keyen, Kamo kataw wa nakay?
[23] Kamo boo pakaanggayen IsoKiristo kantam Kapwan.