[1] Anggan waget atai, mga belag. Kamo agkaanggay sa Kapwan. Ako yewed agkatorayan agolitolit in kangay wa batang siyabi sa kanyo, angkataw ina batay tolong sa kanyo.
[2] Kamo agingat sa mga mangyan agkasadapan agpamangwat daet, agogali ayop, in mga agtoli.
[3] Kanyo remremen yewed siro agbangen in mga tiyoli, dayem kitam agbangen, angkataw kitam yewed agpasandig sa mga waget ogali. Dayem kitam piyagtolong in Abyan Diyos matang kitam agmaal sa Diyos, osai kay Kiristo Isos in kantam kaanggayan.
[4] No nges in mga waget ogali in sibay pagpasandigan, na ako kapasandig asin. No nges kitam piyangwat Diyos betek panawen waget sa kantam mga ogali, na maal ako agpasandig asin labi kay sa mga roma,
[5] panawen ako tiyoli sa kawalo ka ibeng in ako bodangte kay. Ako kasokponan Israil, sa tiribo Binamin, ako ngani Ibriyo, ako batang Parisiyo agpaniwala ngani sa mga Batas Mowisis,
[6] in kalobaen ako agpaniwala sa mga Batas kangay piyagpaidapan in mga agpaniwala kay Isos. No nges kitam piyangwat Diyos betek panawen sa agpaniwala sa mga Batas, na idapo batay ngiitan daet sa kangay.
[7] Tangona kangay remrem ina pag mga ogali pakinabangan. Kamay ngona panawen kay Kristo ina kangay wakay riyemrem makalogi.
[8] Yewed waget ina, dayem in boote kangay piyagremrem makalogi kapalit in labi kay maal, in katawan kay Kiristo Isos kantam Kapwan. Panawen kay Kiristo in boote malibangaw wa sa kangay, kangay wa iidapo kabolowan, matang Kiristo sa kangay wa gayed,
[9] osai ako paagem wa gayed sa kansiyo. Ngona in kangay atawanan in kangay kaalenen yewed batang sa kangay wakayte, yewed batang sa agpaniwala sa mga Batas, dayem batang sa Diyos panawen sa agpasandig kay Kiristo.
[10] Ngona in kangay wano beet kangay wa gayed atawanan Kiristo, osai in kansiyo kabaloyan in siyo boway wakay tagoli, osai sarig sa kansiyo mga kaidapan, kamayba matay din kataw daan siyo,
[11] matang nges ako piyaboway wakay din tagoli.
[12] Yewed kangay piyagsabi keyen ako kabel wa ina pag boo. Yewed din kangay piyagsabi ngona ako kabaloy wa. Kamay ako agpilit agkabel ina pag kabaloyan, angkataw ina in dailan kaya ako abel Kiristo Isos.
[13] Laki mga belag, yewed kangay piyagremrem in kangay wa abaloyan ina pag boo. In kangay osai waget ka piyagpangwat ngona, piyaglibangaw wa in mga kadalan, agpilit wakay agkabel in mga agrateng.
[14] Ako batay ngani agpilit anggan sa pagratengan matang abel in bayad. Na in bayad in ako piyagberya Diyos panawen kay Kiristo Isos matang ako agkaboway sa langit.
[15] Kataw ina in maal remremen in mga marigen wa sa paniwala. Kamay no sa kanyo apo mangyan yewed kataw ina in remrem, na ina batay piyagpatoldo Diyos sa kanyo.
[16] In piyagkailangan kantam ogaliyen kay in kantam wa atawanan.
[17] Laki mga belag, kamo boo tomolad sa kangay. Kanyo pangkiten in boo mga agtolad sa kanyam mga ogali, kataw ina maal pag toladan.
[18] Kataw in kangay palagi piyagsabi, ngona ako agpanangis wa agolit sa kanyo keyen, Aronaw in apo ogali aglaban sa beet siyabi in katayan Kiristo sa kodos.
[19] Toyongan in batay kansiro riyateng, angkataw in kansiro piyagdiyos in kansiro boyon, kansiro piyagpayabangan in maal nges piyagkarikoyan, kansiro waget piyagpanremrem in mga atai sa kobat.
[20] Kamay kitam agbangen taga langit, kitam agkabiglaan agpanaya in agrateng batang sa langit, in kantam Agpamaboway, IsoKiristo in Kapwan.
[21] Paka rateng ina pag Ibeng, in kantam mga bilog agkasida kansiyo wa batay piyagpalitan, piyagpangwat maal wano kataw daan in kansiyo bilog maal wano, panawen sa kansiyo kabaloyan in agpansakop sa boote.