[1] Kamo in mga taga Galasya, nakay wa in agpaidapo kanyo bait? Tomag kamo alomay wa. Mapawa wa gayed siyabi sa kanyo in IsoKiristo piyako sa kodos, anggan kagwali kanyo wa daan gayed ngiitan.
[2] Na ako apo tanong sa kanyo. Kaya lames kamo piyakan in Abyan Diyos panawen sa nakay agbangen? In osai panawen sa agpaniwala sa mga Batas Mowisis, in osai panawen sa agpasandig sa Maal pag Barita kanyo arengeyan?
[3] Kamo idapo wano ngani bait. In kanyo bayo boway kanyo piyarakay sa kabaloyan in Abyan Diyos. Kalbas ngona kanyo remrem ina kanyo aparigen sa kanyo waget sadiri kabaloyan.
[4] In boo mga mibaloy sa kanyo, kanyo lames piyagidapo kabolowan? Ayaw. Apo ngani.
[5] Kamo piyakan Diyos in kansiyo Abyan. Siyo in agpangwat in mga makasoyo wano lakoy sa kanyo. Na ina yewed panawen sa kamo agpaniwala sa mga Batas. Dayem panawen sa kamo agpasandig sa Maal pag Barita kanyo arengeyan.
[6] Remremen Abraam. Keyen in mga Agisolat, Panawen siyo agpasandig sa Diyos siyo piyangwat Diyos idapo daet.
[7] Na asin kitam katawan in mga agpasandig sa Diyos, siro agbangen in mga kasokponan Abraam.
[8] Sa mga Agisolat apo siyabi kay Abraam keyen, Panawen sa kaimo in boo mga mangyan batay piyagpakaanggay Diyos. Ina siyabi wa kay Abraam tangona kay naw. Na in galem ina in Maal pag Barita. Ina pag betek kamayba yewed kay mibaloy, atawanan wa batay piyangwat Diyos idapo daet in mga yewed Odyo panawen siro agpasandig sa kansiyo.
[9] Abraam agpasandig sa Diyos kalbas siyo piyakaanggay. Na kataw daan din in boo agpasandig sa Diyos piyagpakaanggay wa din.
[10] In boo agpilit agpaniwala sa mga Batas, na siro sa galem wa parosa Diyos. Angkataw in mga Agisolat keyen, Kamayba wa nakay in yewed maniwala sa kamayba osaite ka batas agisolat atai pag listaan mga Batas, na siyo sa galem wa parosa Diyos.
[11] Kaya mapawa ngani no panawen sa agpaniwala sa mga Batas na idapo batay piyangwat Diyos idapo daet. Angkataw in mga Agisolat keyen, In piyangwat Diyos idapo daet panawen sa agpasandig sa kansiyo, na ina in batay piyaboway.
[12] In piyagayay in mga Batas yewed in agpasandig sa Diyos, no yewed in agpangwat. Angkataw keyen in mga Batas, In agpangwat anda pag boo, ina in agkaboway.
[13] Kitam piyalpas wa Kiristo sa kantam nges batay parosa panawen kitam yewed agpaniwala sa mga Batas. Kaya siyo matay panawen sa kansiyo wa in kantam nges batay parosa. Sa kansiyo katayan kitam biyayadan. Angkataw siyabi in mga Agisolat keyen, In baatte agipasak sa yangaw, in beet siyabi siyo piyagparosa Diyos.
[14] Kaya Kiristo Isos agpakaidap kaloba ina, matang panawen sa kansiyo in kaanggayan tiyaboy Diyos kay Abraam piyarateng wa din anggan sa mga yewed Odyo. Osai matang in Abyan in piyangako Diyos maal wa tiyaboy sa kantam panawen kitam agpasandig kay Kiristo.
[15] Laki mga belag, apo alimbawa sa ogali mga mangyan. Dowai ka mangyan malpangako. Paka kasondowan wa gayed, na idwa mayadi siida kamayba nakay. Idwa din mayadi diyagdagan.
[16] In Diyos mangako kay Abraam osai sa kansiyo kasokponan. In mga Agisolat yewed keyen, Sa kaimo mga kasokponan. No keyen mga, na in beet siyabi karowan. Dayem keyen, Sa kaimo kasokponan. Idapo mga, na in beet siyabi osai waget. Na ina Kiristo.
[17] Anda in kangay beet siyabi. In Diyos mangako kay Abraam. Kansiyo piyakarigen in kasondowan keyen, Batay ngani mibaloy. Na ina pag kasondowan idbatay asida in mga Batas in yewed kay rateng anggan kadalan wa 430 ka dagon.
[18] No nges panawen sa agpaniwala sa mga Batas kitam piyakan in piyagtaboy Diyos, na ina idwa panawen sa pangako Diyos. Kamay kaya Abraam piyakan, angkataw piyagpangwat Diyos in kansiyo pangako.
[19] Na no kataw ina, nakay batang tiyaboy in mga Batas? Kaya ina tiyaboy matang atawanan no nakay in beet siyabi daet. Kamay ina anggan waget rateng in kasokponan Abraam, in piyakan din in pangako. In mga Batas biyaba mga angil kay Mowisis. Kalbas siyo wakay in agsabi sa mga mangyan.
[20] In paywaraan piyagkailangan no dowai ka mangyan in agpalpangako. Kamay in Diyos osai waget.
[21] Na nakay, in mga Batas lames aglaban sa mga pangako Diyos? Yewed ngani. No nges apo batas tiyaboy kabaloy agpamaboway sa mga mangyan, na in mangyan maal nges piyangwat Diyos idapo daet panawen sa agpaniwala asin pag batas.
[22] Kamay keyen in mga Agisolat in boo mga mangyan sakop sa daet. Na idapo batay piyakan in piyangako no yewed in mga agpasandig kay IsoKiristo. In mga waget agpasandig sa kansiyo na ina wa in maal piyakan.
[23] Bayo rateng in kabetek agpasandig kay Kiristo kami in mga Odyo kagwali piyagbilanggo piyagdamay in mga Batas.
[24] Na in mga Batas in agdamay sa kanyam anggan Kiristo rateng wa matang kami piyangwat Diyos idapo daet panawen sa agpasandig kay Kiristo.
[25] Kamay angkataw ngona kami agpasandig wa sa kansiyo, na kami idwa piyagdamay in mga Batas.
[26] Kamo din in mga yewed Odyo mga bodang Diyos panawen sa agpasandig kay Kiristo Isos.
[27] Angkataw in boo biyaotismowan kay Kiristo, ina piyagbalayan wa Kiristo.
[28] Na tikkatawan wa kadayo in Odyo kadayo in yewed Odyo, kadayo in sogowan piyagalapet kadayo in yewed, anggan wa mga kaliyakiyan mga kagbaiyan. Na kitam boo osai waget panawen kitam boo agiyagem wa kay Kiristo Isos.
[29] No kamo kay Kiristo, na kamo miyagem wa din sa mga kasokponan Abraam. Sa kanyo wa din in piyagtaboy Diyos panawen sa kansiyo pangako.