[1] Kitam mga bodang Diyos. Siyo agpakayawte sa kantam. Na kitam agtolad sa kansiyo.
[2] Ogaliyen in agpakayawte, kataw in Kiristo. Panawen siyo agpakayawte sa kantam, tiyaboy in kansiyo boway andog mala masadap sa Diyos.
[3] Kitam in mga bodang Diyos ayaw wa agsabi sa kantam barogi in mga agpanggaraw, mga marames pag mesa, mga agpanagiri.
[4] Yewed din maal in mga marames osai idapo kabolowan pag panggisoden, in mga agkasolokan. Dayem kitam agkaanggay sa Diyos.
[5] Totoo ngani in mangyan agpanggaraw, agpamangwat makarikoy, agpanagiri (ina agsamba sa yewed Diyos), in agkasadapan sa mga kataw ina daet, ina idbatay piyakan bagiyan sa sakopan Kiristo osai Diyos.
[6] Ayaw kitam padaya sa mga mangyan agsabi in idapo kabolowan. Angkataw panawen asina pag mga piyangwat, in Diyos agkagalit sa mga yewed agpaniwala.
[7] Na kitam ayaw agpabelag sa mga kataw ina.
[8] Tangona kamo in mga yewed Odyo sa lened. Kamay ngona sa mapawa wa angkataw kamo sa Kapwan wa. Na kitam agogali maal kataw in betek sa mga agbalay sa mapawa.
[9] Angkataw in galem mapawa boo wano maal, betek, osai totoo.
[10] Kitam agadar matang atawanan no nakay in makaanggay sa Kapwan.
[11] Kitam ayaw agpabelag sa mga mangyan agpamangwat in idapo mga kabolowan, in mga sa lened. Kantam papangkiten in kadaeten in kansiro mga piyagpangwat.
[12] Angkataw makarikoy kamayba yaawit waget in kansiro mga piyagtago piyagpangwat.
[13] In boo piyapangkit piyagngitan wa gayed no kataw nakay,
[14] osai in riyawaan na agrawa. Matang in piyagsabi keyen, Laki agesek, mipolaw wa, miyorog wa batang sa mga matay, na kao batay piyagrawaan Kiristo.
[15] Na kitam agingat ngani sa kantam mga ogali, no kataw nakay. Ayaw in idapo atawanan pag mga ogali, dayem in mga katawanan.
[16] Ayaw agsidaen in baatte kabetek agpangwat in maal. Angkataw ngona pag betek aronaw in mga daet.
[17] Ayaw kitam idapo bait. Kantam remremen no nakay in beet in Kapwan.
[18] Kitam ayaw agpanlasing. Ina makagolo sa kantam boway. Dayem pasakopen in boote sa Abyan Diyos.
[19] Kitam malsisagotan awit, mga baren pansamba. In boo kantam remrem agbaren agmaal sa Kapwan.
[20] Osai baatte agkaanggay sa Diyos Amang sa boote, panawen IsoKiristo kantam Kapwan.
[21] Kitam malsipasakopan. Ina tanda kitam sakop kay Kiristo.
[22] Kamo in mga babai, kamo pasakop sa kanyo mga lalaki, kataw daan kamo agpasakop sa Kapwan.
[23] Angkataw in lalaki in mabwat sa kansiyo babai, kataw din Kiristo in mabwat sa barkadaan mga bodang Diyos. In barkadaan in kansiyo bilog. Siyo in olo. Siyo din in agpaboway.
[24] No nangkataw in barkadaan sakop kay Kiristo, na kataw daan din ina kamo in mga babai pasakop gayed maal sa kanyo mga lalaki.
[25] Kamo in mga lalaki, kanyo pagpakayawteen in kanyo mga babai, kataw daan in Kiristo agpakayawte sa barkadaan mga bodang Diyos. Panawen asin kansiyo tiyaboy in kansiyo boway.
[26] Matang in barkadaan, paka kansiyo liinis, piyaogas sa sapa osai sa Agiplaong Diyos, na kansiyo piyatalaga sa Diyos.
[27] Ina kansiyo piyangwat matang in barkadaan piyasabangen sa kansiyo, maalno, idapo wano lebag, idapo kepes, idapo wano kamay nakayte, no yewed maalen wano gayed, idapo kalakoy ina.
[28] Kailangan in mga lalaki agpakayawte sa kansiro mga babai kataw daan in agpakayawte sa kansiro bilog. No in lalaki agpakayawte sa kansiyo babai na in beet siyabi siyo agpakayawte sa kansiyo daan bilog.
[29] Idapo mangyan agkagalit sa kansiyo bilog. Dayem piyagpakoman daan, piyagalapet, kataw daan din in Kiristo agalapet sa barkadaan mga bodang Diyos.
[30] Angkataw kitam mga galem kansiyo bilog.
[31] Siyabi in Agisolat keyen, Panawen ina piyagbaliwan in kaliyakiyan in kansiyo mga koyay, agpaysarig in taybalang. Siro dowai mibaloy wa osai waget.
[32] Ina lakonaw pag beet siyabi. Kangay remrem ina Kiristo osai in kansiyo barkadaan mga bodang Diyos.
[33] Kamay kamo in mga lalaki, kamo din in beet siyabi ina. Kanyo pakayawteen in kanyo mga babai, kataw daan in kanyo bilog. Osai kamo in mga babai, kamo pasakop sa kanyo mga lalaki.