[1] Na ako agpilit sa kanyo, ako in osai ka piyagbilanggo panawen ako sogowan in Kapwan, kanyo ogaliyen in betek pag ogali sa mga iidang Diyos.
[2] Kailangan kitam agpakabwatte remrem, agpakabait, ayaw aglimbang. Kitam agpalsipakayawtean, pagbantaen in baatte osai.
[3] Kitam piyalageman in Abyan. Na kitam agpilit ayaw agpalawayan, matang yewed masida ina pag agpalageman.
[4] Osai waget in bilog. Osai waget din in Abyan. Kataw din ina kitam biyerya Diyos matang kitam boo osai waget in piyagpanaya.
[5] Osai waget in Kapwan, osai waget in paniwala, osai waget in baotismo.
[6] Osai waget in Diyos in Amang kitam boo. Siyo Kapwan sa boo. Siyo in agpanawen sa boo. Siyo daan din in agbalay sa boo.
[7] Kamay in baatte osai sa kantam piyakan no nakay pag kabaloyan in beet tiyaboy Kiristo.
[8] Kataw in siyabi in Agisolat keyen, In siyo monaik sa langit, siyo apo piyagbaba, siyo aronaw abel mangyan. Osai siyo apo biyagi sa mga mangyan.
[9] Na in siyo monaik sa langit, in beet siyabi lompot siyo atai sa kobat kadogay monaik wakay.
[10] In lompot na siyo daan din in monaik sa ogbos langit, matang in boote kamayba saano piyangwat sibay angkataw apo siyo asina daan.
[11] Kalbas in keyen karai siyo apo biyagi sa mga mangyan, na in beet siyabi in kalaati kansiyo piyangwat mga katiwala, in kalaati wakay mga poropita, in kalaati mga misyoniro, in kalaati mga agalapet, mga agpatoldo.
[12] Kaya ina tiyaboy matang in barkadaan mga bodang Diyos siyandata agpanawen osai agpakaeyat sa bilog Kiristo.
[13] Kataw ina kitam boo agpaniwala osai katawan sa Bodang Diyos, agpalageman anggan kitam koyay wa sa agpaniwala, kakoyay wa daan Kiristo.
[14] Na kitam idbatay wa kataw in mga bodangte agkaakayan sa kamayba nakay pag piyagpatoldo, kataw laing piyaglimeslimes sa sapa, mga piyagparakparak kowaya. Kitam idbatay wa liibangaw in aleleng pag mga mangyan agpaakay daet sa kantam.
[15] Dayem kitam agpakayawte agsabi in betek, batay agistobo in agpaagem kay Kiristo. Siyo in olo.
[16] In Diyos in agtaboy in mga eyat matang in boo bilog agpalkapetan, sakop kay Kiristo. No in baatte osai agpangwat kansiyo panawen, na in boo bilog agistobo osai maeyat kataw agpaybelagan.
[17] Ako siyogo in Kapwan agpilit agayaw sa kanyo keyen, Kamo ayaw wa agogali kataw in mga yewed Odyo. Idapo kabolowan in kansiro mga piyagremrem.
[18] Beleg wa in kansiro mga remrem. Siro idapo in boway piyagtaboy Diyos, panawen siro dayo katawan, marigen in olo.
[19] Siro idapo wa gayed rikoy. Siro agpamangwat in boote mga makarikoy, agkasadapan agpamangwat in boote marames.
[20] Kamay yewed kataw ina in kanyo atawanan kay Kiristo.
[21] Kanyo ngani arengeyan in kansiyo agiplaong, osai kanyo atawanan in betek in piyatoldo Kiristo sa kanyo.
[22] Baliwanen wa in kanyo datiyan mga ogali, in datiyan pag boway. Ina agbono sa kanyo panawen sa kanyo mga daet pag piyagkabeet.
[23] Kamo omilag wakay sa bayo pag remrem bayo pag boway.
[24] In kailangan ngiitan sa kanyo in bayo wakay pag boway in piyangwat kataw daan in Diyos, kataw daan din siyo betek, maal wano.
[25] Na benglayen wa in mga baribid. Kailangan in baatte osai agsabi in totoo sa kansiyo belag, angkataw kitam agiyagem sa bilog Kiristo.
[26] No kitam betek agkagalit na ayaw agpangwat daet. Ayaw kay malabo in ibeng benglayen wa in galit.
[27] Ayaw agpakanen dalan in dimonyo.
[28] In datiyan agpanakaw ayaw wa agtakaw. Dayem agpanawen wa. In kansiyo bakwaw agpanawen maal, matang siyo apo batay mataboy sa maidap.
[29] Ayaw agiplaongan makarikoy. Dayem kitam agpilit agiplaong maal makatolong sa roma, agibetek sa kabetek, osai agpakaeyat remrem. Matang in roma kabel pakinabang.
[30] Ayaw agpamarongkot sa Betek pag Abyan Diyos, angkataw siyo wa in tanda Diyos kitam kansiyo agbangen dogayan sa Ibeng kitam kansiyo wa piyagpalpas sa boote.
[31] Kantam wa benglayen in boo daeten pag remrem, mga agkabais, mga agkagalit. Ayaw wa agpamalimlimo, ayaw aglibak. Ayaw agpanremrem daet sa roma.
[32] Dayem kitam agpaybelagan, agpalsipakayawtean. Kataw in Diyos aglibangaw sa kantam mga daet panawen kay Kiristo, na kataw daan din ina kitam aglibangaw in daet sa roma mga mangyan.