[1] Paka kami sa bowanginan wa abowayan ngani, kami piyatoldo in ngaran in poro kobat keyen Malta.
[2] In mga taga ista agpakayawte wano sa kanyam, kami kansiro piyabelag, piyoypoy in baya anggan timbonan, angkataw agodan wa, madimla.
[3] Pablo manyangaw wa. Paka kansiyo wa piyagtongo in yangaw, toloy apo lomwas olay aibengan, toloy komayat mibibeleng sa kansiyo bakwaw.
[4] Paka ngiitan in mga taga ista in olay agisokbit sa kay Pablo bakwaw siro agpanggisodan keyen, Totoo ngani ina pag mangyan agpamono mangyan. Kamayba siyo yewed matay sa dagat, in Diyos idwa pomayag siyo agkaboway kay.
[5] Kamay in olay kansiyo riikrik sa baya, siyo idapono kamay nakay.
[6] Siro agpanaya kansiyo bilog mabaktek no yewed maligan toloy matay. Dogay wa siro agpanaya kamay idapono mibaloy sa kansiyo, kalbas bayo wakay kansiro remrem keyen, Siyo mana osai ka diyos.
[7] In poon ista pag poro kobat in ngaran Pobliyo. Bangen asin in kansiyo kobat. Kami kansiyo piyabelag, piyaesek sa kansiyo balay tolo ka yabi.
[8] In amang Pobliyo agibolalang, maibeng in bilog, agpanganggey. Pablo pasabangen sa kansiyo, siyo yaatang, piyandalangin, maoraw wa.
[9] Paka ina atawanan in roma kay pag mga apo maskit asin pag kobat siro pasabangen din kay Pablo, piyaoraw din.
[10] Aronaw in kansiro tiyaboy sa kanyam. Paka dogay wakay in kami batay wakay panaw asin kami piyakan in boo kanyam mga piyagkailangan.
[11] Kami tolo ka bolan mamataw asin kalbas somakay sa osai ka mapor asina kay din agpakalbas in pamagyo pag mga bolan. In ngaran in mapor Malsiing, batang sa Aliyanriya. Kami panaw wa.
[12] Rateng sa bayan Sirakosa, kami mataw tolo ka ibeng ista.
[13] Kami panaw wakay, kalbas rateng sa bayan Rigiyo. Kagoribasan lomwas in kowaya batang sa paoriyan, matang dowai waget ka ibeng kami rateng sa bayanan Potiyoli, lompot wa.
[14] Asin kami apo atagbowan mga belag kay Kiristo. Kami kansiro kay piyagayaw panaw, pito ka ibeng kami mataw. Sogod ina kami panaw wakay, agpataboy sa Roma.
[15] In mga belag sa Roma abaritaan keyen kami agrateng wa, matang siro tomagbo wa sa kanyam sa bayante piyagawit Palingki Apiyo. Apo din sa bayante piyagawit Tolo ka Pagpamanganan. Paka ngiitan Pablo in mga belag, siyo agkaanggay wano sa Diyos, maeyat wakay in kansiyo remrem.
[16] Paka kami rateng sa Roma, Pablo piyayagan mamangkit pagbalayan. Asin siyo agpamataw kamay apo daan sondalo agdamay sa kansiyo.
[17] Paka kadalan tolo ka ibeng piyaberya Pablo in mga poon mga Odyo sa Roma. Paka matipon wa siyabi Pablo keyen, Laki mga kabelagan, kamayba ako idapo piyangwat daet sa amat mga Odyo, idapo din daet sa mga ogali kantam mga kakoyayan, ako diyakep sa Irosalim kalbas tiyaboy sa mga tanongan taga Roma.
[18] In ako yoosap in mga taga Roma siro idapo ngiitan daet sa kangay, yewed maal bonowen, matang kansiro beet ako palpasen wa.
[19] Kamay in ista mga Odyo agayaw, matang ako idapo ngiitan padalan no yewed paadapen atai kay Poon Lakoy Sisar, kamay ako idapo pasaen sa kantam mga mangyan.
[20] Kaya ako piyageket anda pag karakara panawen kay Kiristo, in piyagpanaya kitam in mga kasokponan Israil. Ina wa in dailan kaya kamo kangay biyerya, beet manggisodan sa kanyo.
[21] Siyabi wakay in mga Odyo keyen, Idapo rateng sa kanyam solat batang sa Odiya panawen sa kaimo, kadayo sa kantam mga mangyan batang ista atai agtaboy, siro idapo din agkabaritaan piyagsabi daet panawen sa kaimo.
[22] Kamay kanyam beet arengeyan no nakay in kaimo mga remrem. Angkataw kanyam atawanan sa boo kobat in adar Isos piyagsabiyan daet.
[23] Siro agpangwat tarato keyen kadogay ina pag ibeng. Kalbas sa kabetek tarato aronaw mga Odyo in pataboy sa kay Pablo pagbalayan. Boo ibeng siyo agpatoldo sa kansiro in Maal pag Barita panawen sa Diyos agpapoon. Kansiyo piyagpaliwanag in mga siyolat Mowisis osai in mga poropita, agpilit agakay sa kansiro agpasandig kay Isos.
[24] In kalaati maniwala sa kansiyo siyabi, kamay in kalaati wakay dayo.
[25] In siro batay wa panaw siro agpalsisagotan. Kamay bayo siro panaw Pablo apo kay osai ka siyabi keyen, Maalno in siyabi in Betek pag Abyan sa kanyo mga kakoyayan, in siyolat in poropita Isaiyas keyen,
[26] Kao pataboy asin pag mga mangyan, kaimo sabiyen sa kansiro keyen, Kamayba kamo agparengey, agparengey kamo idbatay katawan. Kamayba kamo agriwa, agriwa kamo idbatay kangitan.
[27] Angkataw marigen wa in remrem ina pag mga mangyan. Kansiro kiyopot in kansiro mga talinga. Pesekan wa in kansiro mga mata. No nges yewed kataw ina na kansiro mata batay kangitan, kansiro talinga batay karengey, osai in kansiro remrem batay katawan. Na siro batay wakay moli sa kangay, matang kangay batay piyakapya. Ina in siyabi in Kapwan.
[28] Pablo keyen kay, Na kailangan kanyo atawanan, piyalowas wa sa mga yewed Odyo anda pag barita keyen in Diyos agpamaboway. Siro agbangen in batay ngani agparengey.
[30] Dowai ka dagon Pablo agpamataw sa bayan Roma sa balay kansiyo piyagbayadan. Kansiyo piyabelag in boo mga pataboy sa kansiyo.
[31] Siyo yewed agkalimo agbarita panawen sa Diyos agpapoon osai agpatoldo panawen kay IsoKiristo in Kapwan. Idapo agayaw sa kansiyo.