[1] Sa barkadaan mga bodang Diyos sa Antiyokya apo mga poropita, apo din mga agpatoldo. Siro in osai Birnabi, in kadowai Simyon in piyagawit Maitem, in katolo Losyo taga Sirini, in kaopat Manaen in pagbelag Irodis in gobirnador, in kalima Saolo.
[2] Sa betek siro yewed agpamangan matang siro agpakadogay agmaal sa Kapwan, siyabi in Betek pag Abyan keyen, In dokalaki Birnabi osai Saolo pabokoden wa. Siro kangay biyerya, kangay piyagsogo sa osai ka panawen.
[3] Paka kalbas wa siro yewed agpamangan, osai agpandalangin, in dokalaki kansiro yaatang, kalbas piyapanaw wa.
[4] In dokalaki siyogo in Betek pag Abyan, matang siro mongali pataboy sa Silyosya. Asin siro somakay sa parkado, panaw, rateng sa kobat Sipri.
[5] Paka rateng sa bayan Salamina, siro agpatoldo in agiplaong Diyos sa mga balay pagpaniponan mga Odyo. Apo din Owan Markos agtolong sa kansiro.
[6] Diyalan wa in boo kobat Sipri anggan sa bayan Papos. Ista siro kangitan mangyan salimangkaan, in ngaran Barisos. Siyo Odyo agpakagwali poropita.
[7] Siyo pagbelag Gobirnador Sirgiyo Paolo. Apo katawanan in gobirnador. Kalbas in dokalaki Birnabi osai Saolo piyaberya in gobirnador, angkataw siyo agkaparengey sa agiplaong Diyos.
[8] Kamay lomaban in salimangkaan. In kansiyo ngaran no piyaaling sa agiplaong Girigo na Ilimas. In kansiyo beet ayaw maniwala kay Isos in gobirnador.
[9] Kalbas Saolo, piyagawit din Pablo, lakonaw in remrem batang sa Betek pag Abyan, siyo agterek sa salimangkaan,
[10] keyen, Kao bodang Katanas. Kao aglaban sa boo betek, kao agpamadaya wano, agpanampalas wano. Baatte kaimo piyagpabaribid in totoo pag barita panawen sa Kapwan.
[11] Baina, kao ngona piyagparosa in Kapwan, kao batay beleg, kao dogay idbatay kangitan ibeng. Kalbas toloy libowen in kansiyo mata, kadogayte lened wa, agpangapkap nges siyo, agpamangkit agakay.
[12] In gobirnador, paka kangitan in mibaloy, siyo maniwala wa kay Isos, angkataw siyo agsoyo sa baritaen panawen sa Kapwan.
[13] Kalbas in dokalakiyan Pablo somakay wa sa parkado, panaw wa sa Papos, rateng sa bayan Pirga sa kobat Pampilya. Kalbas siro biyaliwan wa Owan Markos, siyo moli wakay sa Irosalim.
[14] Kalbas siro panaw wakay sa Pirga, rateng sa bayan Antiyokya sa kobat Pisidya. Sa Ibeng Pamainga siro misoroy sa balay pagpaniponan mga Odyo, tomokkaw.
[15] Apo in agbasa sa mga siyolat Mowisis, osai in mga poropita. Paka kalbas wa ina, in mga poon sa balay pagpaniponan agpasogo sa dokalaki keyen, Laki mga kabelagan mga kasokponan Israil, no kamo apo piyagpatoldo barita pampaeyat sa remrem mga mangyan, na manggisodan wa.
[16] Kalbas Pablo tomaydek, keyen, Ayaw aglalae, Laki mga kasokponan Israil, osai kamo in mga yewed Odyo pag mga agmaal sa Diyos, mamarengey wa.
[17] In Diyos in piyagsamba in mga kasokponan Israil, siyo in omidang sa kantam mga kakoyayan. Siro kansiyo piyakarowan in siro panyawan waget sa kobat Iipto, kalbas sa kansiyo lakoy kabaloyan siro kansiyo piyalpas asin pag kobat.
[18] Mga apatnapo ka dagon sa moyod kansiyo piyagtiis in kansiro mga riklamo.
[19] Kalbas paka siida wa Diyos pito ka sakopan sa kobat Kanaan, ina pag kobat kansiyo wakay tiyaboy sa mga kasokponan Israil, matang kansiro pagbalayan mga 450 ka dagon.
[20] Paka kalbas wa ina, siro piyakan Diyos mga tanongan anggan sa kabetek Samwil in poropita.
[21] Kalbas in siro omayay poon lakoy, Saolo piyatoldo Diyos sa kansiro. Siyo in bodang Kiis sa kasokponan Binamin. Siyo agpoon lakoy apatnapo ka dagon.
[22] Paka siyo kiyowa wakay Diyos, Dabid wakay in kansiyo piyatoldo, matang agpoon sa kansiro. Siyabi in Diyos keyen, Kangay ngiitan Dabid, in bodang Isi makaanggay sa kangay. Siyo batay maniwala kamayba nakay in kangay beet.
[23] Batang sa kasokponan Dabid Isos, in piyangwat Diyos Agpamaboway sa mga kasokponan Israil, kataw daan din in kansiyo piyangako.
[24] Paka Isos batay wa agparakay agpanawen Owan agpatoldo wa sa boo mga kasokponan Israil keyen, Benglayen wa in daet, pabaotismo wa.
[25] Paka batay wa lobos in kay Owan panawen siyo miplaong keyen, Kanyo lames remrem nakay ako? Yewed ako in kanyo piyagpanaya Agpamaboway, kamay siyo agrateng sa kangay paoriyan, ako yewed sibay kamayba agorak waget kansiyo tapatos.
[26] Agiplaong kay Pablo keyen, Laki mga belag, mga kasokponan Abraam, kadayo din mga yewed Odyo agmaal sa Diyos, kitam in piyagparatengan anda pag barita in agpamaboway.
[27] Angkataw in mga taga Irosalim, kadayo in kansiro mga poon, siro yewed katawan Isos in Agpamaboway, yewed din katawan in beet siyabi in mga poropita, in piyagbasa baatte Ibeng Pamainga. Kamay ina pag siyabi in mga poropita kansiro ngani piyangwat, in siro agkasondo keyen, Isos bonowen.
[28] Kamayba siro idapo ngiitan daet sa kansiyo siro omayay kay Pilato keyen, Pabonowen.
[29] Paka mipangwat wa sa kansiyo in boo siyolat, siyo kiyowa wakay sa kodos, siyangat wa.
[30] Siyo matay, kamay siyo piyaboway wakay Diyos.
[31] Kalbas karowan wakay ibeng apo ibeng siyo ngiitan in mga tangona agsarig sa kansiyo batang sa Galiliya anggan rateng sa Irosalim. Siro wa in agpabarita sa mga kasokponan Israil.
[32] Keyen Pablo, Kanyam piyagbaba sa kanyo in Maal pag Barita keyen, In piyangako Diyos tangona sa mga kakoyayan in mga Odyo,
[33] na in Isos piyaboway wakay ina pag pangako mibaloy wa sa kantam, sa kansiro mga kasokponan. Ina kataw daan in siyolat sa kadowai ka awit, keyen, Kao kangay Bodang. Ibat ngona ako kaimo Amang.
[34] Isos batang matay, piyaboway wakay Diyos, idbatay wa tagoli matay. Ina din in siyabi Diyos tangona keyen, Totoo ngani kamo kangay batay piyakan in mga maal wano in kangay mga piyangako kay Dabid.
[35] Kataw daan in siyabi sa osai wakay ka betek keyen, In kaimo Betek pag Sogowan idbatay kaimo piyabayaan matay anggan mabolok.
[36] In Dabid agkaboway kay siyo agpaniwala sa beet Diyos. Kalbas siyo matay, miyanggat wa sa mga kakoyayan. Siyo mabolok.
[37] Kamay yewed mabolok in piyaboway wakay Diyos.
[38] Na, laki mga belag, kailangan kamo katawan wa in kanyam piyagbarita sa kanyo keyen in mga daet piyaglibangaw panawen kay Isos.
[39] No siyo agpasandig kay Isos, na siyo piyalpas wa sa parosa kansiyo daet, liibangaw wa in boo kansiyo daet, in idbatay alibangaw panawen sa mga Batas Mowisis.
[40] Agingat wa ngani kamo, karam isag mibaloy sa kanyo in siyabi in mga poropita keyen,
[41] Laki mga aglibak sa siyabi Diyos, ngona in kangay piyagpangwat lakonaw, idbatay kanyo piyaniwala, kamayba apo agpatoldo sa kanyo in beet siyabi. mangkit wa kamo, agsoyo wa, kalbas matay wa.
[42] Kalbas in Pablo osai Birnabi aglompot wa sa balay pagpaniponan, in mga mangyan omayay keyen, Isag pag Ibeng Pamainga kami patoldowen wakay ina pag barita.
[43] In mga mangyan agipanaw wa, aronaw in miyanggat kay dokalaki, mga Odyo, aronaw din in mga mibaloy wa Odyo. In dokalaki agpanitolan kay, agpatoldo agpakaeyat sa kansiro remrem keyen, Ayaw kamo aglimbang, pasandigen in kanyo remrem sa Diyos in agpakayawte.
[44] Isag pag Ibeng Pamainga agkabangen nges boo bayan agtipon agkaparengey sa agiplaong in Kapwan.
[45] Kamay paka in mga Odyo kangitan karo ina mangyan siro agpanagiri wano, aglaban sa piyagsabi Pablo, aglibak sa kansiyo.
[46] Kamay Pablo osai Birnabi yewed agkalimo miplaong keyen, Kailangan kamo in tokaw riyatengan in agiplaong Diyos, kamay kataw kamo dayo, kataw kanyo remrem keyen kamo yewed sibay piyakan in boway idapo kalobosan, na kami ista wa agbangen sa mga yewed Odyo.
[47] Angkataw kami siyogo in Kapwan, keyen, Kao kangay piyangwat kagwali tinglaw sa mga yewed Odyo, matang kaimo piyatoldo in boway idapo kalobosan sa boo mga mangyan sa boo mga kobat.
[48] Paka karengey ina in mga yewed Odyo, siro agkaanggay agmaal sa agiplaong in Kapwan. In mga iidang Diyos batay piyakan boway idapo kalobosan maniwala wa.
[49] Kalbas in agiplaong Diyos omarabang asin pag boo kobat.
[50] Kamay in mga kaliyakiyan agpapoon asin pag bayan, osai in mga kagbaiyan agsamba piyagmaal mga mangyan, siro piyamaakay in mga Odyo anggan dokalaki Pablo piyagpaidapan wa, kalbas biyoyaw wa asin pag kobat.
[51] Kamay in dokalaki agragrag in bogabo sa kansiro darapa, in beet siyabi in mga asin batay piyarosa Diyos. Kalbas siro ista wa pataboy sa bayan Ikonyo.
[52] In mga agpaniwala sa Antiyokya agkaanggay wano, maeyat in remrem batang sa Betek pag Abyan.