[1] Kailangan ako agyabang kay kamayba idapo batay abel pakinabang. Ngona in kangay piyagkagisod sa kanyo in mga piyapangkit in Kapwan sa kangay in sa mga betek ako agkaanapen.
[2] Osai ka betek agkaanapen, ibat ina anggan ngona labing opat wa ka dagon in diyalan, ako osai ka mangyan piyaagem kay Kiristo biyagit, biyaba anggan sa katolo ka langit. Saken no in bilog wa daan, no yewed. Ako yewed katawan. In Diyos waget in katawan.
[3] Kangay ngani atawanan ako biyaba sa alamanan Diyos. Yewed kangay atawanan no ako agkaanapen no in bilog wa daan. Saken. In Diyos waget in katawan ina.
[4] Ista ako karengey in mga idbatay wano masabi sa mga agiplaong mangyan. Kamay piyagayaw din piyagsabi.
[5] In kataw ina maal piyaglakonaw. Kamay ako idbatay agpakalakonaw, dayem in ako mainaen, ina in kangay piyagpakalakonaw.
[6] Kamaybawa ako agkapayabang, na kalobante din, angkataw totoo in kangay piyagsabi. Kamay ako idbatay wa agpayabang, matang in mga mangyan ayaw agpalakonaw sa kangay dayem sa kansiro waget ngiitan osai arengeyan sa kangay mga ogali.
[7] Ako piyakan maskit sa bilog, matang ako idbatay maloba agpakabwat remrem sa mga makasoyo pag piyapangkit lakoy Diyos sa kangay. Ina pag maskit sogowan Katanas agpaidap sa kangay matang ako ayaw agpalalo.
[8] Makatolo ako mandalangin sa Kapwan keyen, Paorawen.
[9] Kamay in Kapwan keyen, Sibay wa sa kaimo in ako agpakayawte sa kaimo, angkataw in kangay kabaloyan labi kay piyagngitan no kao mainaen. Matang labi kay kangay piyaglakonaw piyagkaanggayan in ako mainaen, matang in kabaloyan Kiristo in agpakaeyat sa kangay.
[10] Na panawen kay Kiristo, maal din sa kangay no ako mainaen, no piyagidapo kabolowan, no piyagpaidapan, no piyagpangwatan daet. Ina pag boo piyagtiis angkataw no betek ako mainaen na ako piyagpakaeyat.
[11] Ako kagwali idapo bait. Kamay ako kanyo piilit agkataw ina. Bago in maal nges kamo in agmaal sa kangay. Angkataw kamayba ako idapo kabolowan ako kalakoy daan ina pag mga agpamarita kanyo piyagmaal.
[12] Baina ako yewed aglimbang agpangwat sa kanyo mga makasoyo lakoy pag panawen. Na ina in tanda sa kanyo ako ngani siyogo agpamarita.
[13] Nakay in kangay piyangwat sa amat mga barkadaan mga bodang Diyos in yewed kangay piyangwat sa kanyo? Idapo, no yewed ina waget in ako yewed mangayay tolong sa kanyo. No in kataw ina daeten sa kanyo na ako agdaing wa.
[14] Ngona wa in katolo ako batay asin sa kanyo. Kamay kamayba ngona ako idbatay daan mangayay sa kanyo. Kamo waget in kangay piyagkabeet, yewed in kanyo mga sangkap. Yewed in mga bodang agbangen in agalapet sa mga koyay, dayem in mga koyay agbangen in agalapet sa mga bodang.
[15] Ako agkaanggay kamayba piyaggastos in boo sa kangay. Kamayba kangay boway piyagtaboy din matang kamo apo pakinabang. Panawen kalakoy ina in ako agpakayawte sa kanyo nakay, ako idwa gayed kanyo piyagpakayawte?
[16] Kanyo atawanan ako idbatang mangayay kamayba kay nakay. Kamay in amat agsabi keyen ako agpansalaod waget agpamadaya sa kanyo.
[17] Nakay batang siro kataw ina? Kanyo lames remrem in ako agsogo mangyan sa kanyo kamo kangay waget piyagbantalaan?
[18] Ako agpilit kay Titos asin pataboy. Osai kangay piyakan sarig osai ka belag. Nakay, kamo yaapi Titos? Yewed mana lames tikkataw in kanyam remrem kadayo in kanyam mga ogali?
[19] Kanyo lames remrem kanyam piyagsagotan in kanyam sadiri? Yewed. Sa pangkit Diyos kami agiplaong kataw kami kay Kiristo. Laki mga belag, in kanyam beet in boo kanyam pagpanawen agpaistobo wa sa kanyo paniwala.
[20] In kangay piyagkalimo no ako rateng wa asin karam ako apo ngiitan sa kanyo yewed kangay piyagkabeet. Osai din kamo apo ngiitan sa kangay yewed din kanyo piyagkabeet. Karam kamo apo agpalawayan, apo mga agpanagiri, mga daet remrem, mga madamot, ayawan, mga agpanlibak, mga agpalsipatoldo, mga agpakabwat remrem, mga agpamangwat golo.
[21] In kangay kay piyagkalimo no ako rateng asina, no apo kay mga agpamangwat daet, mga agpanggaraw, osai mga makarikoy pag panawen, yewed kay kanyo biyenglay, no kataw ina na ako batay manangis panawen sa kanyo. Osai din ako batay piyagrikoy Diyos sa kanyo pangkit.