[1] Ngona ako Pablo waget in agsolat. In kalaati sa kanyo keyen ako dowagen no sa bangen, kamay matapang no sa adayonaw. Na panawen in Kiristo mabait, yewed matapang, ako apo piyagayay.
[2] In kangay piyagayay sa kanyo, no ako rateng na ako ayaw agpatapangen. Ako tiyak ngani batay matapang sa mga agpansabi in kangay panawen kataw waget in panawen in mga yewed kay kay Kiristo.
[3] Kamayba kami sa bilog daan, in kanyam aglaban yewed waget agalapet sa kanyam sadiri bilog.
[4] In kanyam mga panlaban yewed kataw in panlaban mangyan, dayem in mga panlaban Diyos, apo kabaloyan agsida sa mga marigen pag saogan. Kanyam piyagpaidapo in mga yewed betek pag matiwid.
[5] Kanyam piyagpaempet in boo mga dailan mangyan in piyaglakonaw siro, panawen siro dayo katawan sa Diyos. Osai kanyam piyagkabel in baatte remrem matang piyagpasakop kay Kiristo.
[6] Kalbas paka kamo pasakop wa gayed, na kangay wa batay piyagparosa in baatte yewed agpaniwala.
[7] Kanyo piyagpanremrem in mga piyagngitan sa bilog. No in mangyan agremrem siyo kay Kiristo, na remremen din ako kataw din siyo kay Kiristo.
[8] Ako piyakan in Kapwan kabaloyan sa kanyo, yewed matang agsida sa kanyo paniwala, dayem matang agpaistobo. Na kamayba kangay piyaglakonaw ina pag kabaloyan ako idbatay agkarikoy.
[9] Kamo ayaw manremrem keyen in kangay mga solat sa kanyo panlimlimo waget.
[10] Apo keyen in kangay kono mga solat galeman osai matapang, kamay no ako kono agiplaongan sa kanyo na tomag in kangay bilog mainaente, kadayo in agiplaong idapo kono kabolowan.
[11] Na in mangyan agpansabi kataw ina, kailangan siro katawan no nakay in kangay piyagsabi sa solat ngona in ako adayonaw, na no ako rateng wa na kataw daan ina in kangay batay piyagpangwat.
[12] Kami idbatay mangaas agpatikkalakoy, agpatikkabwat sa mga agpakalakonaw. Siro idapo bait, angkataw siro wakayte agpatikkalakoy sa kansiro sadiri. Siro daan in toladan kansiro sadiri.
[13] Kamay in kami aglakonaw, kami idbatay aglampas sa kabaloyan tiyaboy Diyos sa kanyam. Anggan kamo in piyatoldo Diyos sa kanyam.
[14] Kami in tokaw rateng sa kanyo agbaba in Maal pag Barita panawen kay Kiristo. Na no kami aglakonaw sa kanyo kami yewed aglampas sa kalakoyen piyatoldo Diyos sa kanyam.
[15] Yewed kanyam piyagamin in panawen in amat. Kami yewed agpakalakonaw panawen asin matang kami yewed aglampas sa kabaloyan tiyaboy Diyos sa kanyam. In kanyam pagasa batay mistobo in kanyo paniwala, matang agistobo din in kanyam panawen sa kanyo, kamay idbatay lampas sa piyatoldo Diyos sa kanyam.
[16] Na no kataw ina kami batay kapatoldo in Maal pag Barita sa mga kobat ista kay naw agbangen. Na kami idbatay agpakalakonaw sa panawen in amat sa kansiro agbangen patoldowan.
[17] Keyen in Agisolat, No siyo beet agpakalakonaw, na in panawen in Kapwan in pakalakonawen.
[18] Idapo kabolowan in agmaal sa sadiri. Dayem in makabolowan in piyagmaal in Kapwan.