[1] ཀྱེ་ཀྱེ་གུས་པར་འོས་པའི་སྲས་མོ་ལགས། ། ཁྱེད་ཀྱི་ཞབས་ནི་ལྷམ་ནང་ཅི་འདྲ་མཛེས། ། ཁྱེད་ཀྱི་དཔྱི་ནི་བཟོ་བ་མཁས་པ་ཡིས། ། བཟོས་པའི་གཡང་ཊི་ཡིད་འོང་ཞིག་དང་མཚུངས། །
[2] ཁྱེད་ཀྱི་ལྟེ་བ་ཡོལ་གོར་ཟླུམ་པོ་བཞིན། ། དེ་ཡི་ནང་དུ་རྒུན་ཆང་མངར་མོས་གང་། ཁྱེད་ཀྱི་རྐེད་ནི་གྲོ་འབྲུ་སྤུངས་པ་འདྲ། ། ཕྱོགས་བཞིར་སྟག་གཟིག་མེ་ཏོག་བཞད་ནས་ཡོད། །
[3] ཁྱེད་ཀྱི་ནུ་མ་གཉིས་ནི་ཤྭ་ཡུ་མོའི། ། ཤྭ་ཕྲུག་མཚེ་མ་དང་ནི་ཀུན་ནས་མཚུངས། །
[4] ཁྱེད་ཀྱི་མགུལ་ནི་བ་སོའི་ལྕོག་མཁར་བཞིན། ། ཡིད་འོང་སྤྱན་ཟུང་ཧེ་སི་པོན་དང་ནི། ། པཱ་ཐུ་ལ་པིན་སྒོ་འགྲམ་རྫིང་བུ་འདྲ། ། ཁྱེད་ཀྱི་དྲི་འཛིན་དབང་བོ་ནི། ། དཱ་མེ་སེག་ལ་འཁོར་བ་ཡི། ། ལེ་བ་ནོན་གྱི་སྤེའུ་དང་མཚུངས། །
[5] ཁྱེད་ཀྱི་དབུ་ནི་ཀར་མེལ་རི་དང་མཚུངས། ། སྐྲ་ལོ་རྒྱ་སྨུག་ཅན་གྱིས་རྒྱལ་པོ་བཀུག །
[6] ཀྱེ་ཀྱེ་ང་ཡི་སྙིང་སྡུག་མ། ། མི་ལ་དགའ་སྤྲོ་བསྐྱེད་པ་ཁྱེད། ། ཇི་འདྲའི་མཛེས་ཤིང་ཡིད་དུ་འོང་། །
[7] ཁྱེད་ཀྱི་སྐུ་གཟུགས་ཁ་སུར་ཤིང་དང་མཚུངས། ། ནུ་མ་གཉིས་ནི་ཤིང་ཏོག་ཐོགས་པ་འདྲ། །
[8] བདག་ནི་ཁ་སུར་ཤིང་དེར་འགོས་ནས་ནི། ། ཡལ་གར་འཇུ་བར་བྱ་ཞེས་བདག་གིས་སྨྲས། ། ཁྱེད་ཀྱི་ནུ་མ་རྒུན་འབྲུམ་ཆུན་པོ་འདྲ། ། ཤངས་ཀྱི་དྲི་བསུང་ཀུ་ཤུ་ལྟ་བུ་ཡིན། །
[9] ཁྱེད་ཀྱི་ཞལ་ནི་རྒུན་ཆང་མཆོག་གྱུར་བཞིན། ། ང་ཡི་དགའ་གྲོགས་ཞལ་ནང་བཞུར་བ་དང་། ། མནལ་དུ་གཟིམས་པའི་ཞལ་ནང་བཞུར་གྱུར་ཅིག །
[10] ང་ནི་ང་ཡི་དགའ་གྲོགས་ལ་དབང་ཞིང་། ། ཁོང་ཡང་ང་ལ་དགའ་ཞིང་དུངས་པ་ཡིན། །
[11] ཀྱེ་ཀྱེ་ང་ཡི་དགའ་གྲོགས་ཚུར་ཕེབས་དང་། ། ཞིང་ཁར་ཕྱིན་ནས་གྲོང་སྡེ་རུ་བསྡད་ཆོག །
[12] ཞོགས་པ་འུ་གཉིས་རྒུན་ཚལ་དུ་ཕྱིན་ཏེ། ། རྒུན་འབྲུམ་ཤིང་ལ་མྱུ་གུ་འབུས་མིན་དང་། ། རྒུན་འབྲུམ་ཤིང་ལ་མེ་ཏོག་བཞད་མིན་དང་། ། སེ་འབྲུ་ཤིང་ལ་མེ་ཏོག་འབུས་མིན་ལྟ། ། དེ་རུ་ང་ཡིས་བརྩེ་སེམས་ཁྱེད་ལ་འབུལ། །
[13] དཱན་དཱ་ཡིམ་གྱི་དྲི་བསུང་འཐུལ་བ་དང་། ། ཁྱེད་ཀྱི་ཕྱིར་དུ་བསགས་པའི་ཤིང་ཏོག་རྣམས། ། ང་ཚོའི་ཡུལ་གྱི་སྒོ་འགྲམ་དུ་བཞག་ཡོད། །