[1] ང་ཡི་སྙིང་སྡུག་ཁྱེད་ཀྱི་ཞལ་གཟུགས་ཡིད་དུ་འོང་། ། གདོང་ཁེབས་འོག་ཏུ་ཕུག་རོན་ལྟ་བུའི་མིག་ཟུང་ལྡན། ། ཁྱེད་ཀྱི་སྐྲ་ལོ་དག་ནི་གིལ་ཨད་རི་བོའི་ངོགས། ། ཐུར་དུ་འབབ་པའི་ར་ཁྱུ་དང་ནི་ཀུན་ནས་མཚུངས། །
[2] ཆ་ནི་འགྲིག་ཅིང་ཁེར་སྐྱེས་མིན་པའི་ཁྱེད་ཀྱི་ཚེམས། ། ལུག་བལ་བྲེགས་པའི་མ་མོ་དཀར་བཀྲུས་ཐོན་པ་འདྲ། །
[3] ཁྱེད་ཀྱི་མཆུ་ནི་མཚལ་གྱི་སྣལ་མ་འདྲ། ། ཁྱེད་ཀྱི་མཆུ་སྒྲོས་མཛེས་ཤིང་ལྟ་ན་སྡུག ། སྐྲ་ལོའི་འོག་གི་ཁྱེད་ཀྱི་མཁུར་ཚོས་ནི། ། དམར་མདངས་བཀྲ་བའི་སེ་འབྲུ་ཕྱེད་ཀ་བཞིན། །
[4] ཁྱེད་ཀྱི་མཇིང་ནི་དཱ་བིད་ཀྱིས་བརྩིགས་པའི། ། བང་རིམ་ལྡན་པའི་དམག་ཆས་མཛོད་ཁང་ལྟར། ། དཔའ་བོའི་ཕུབ་ནི་སྟོང་ཕྲག་སྟེང་དུ་འཕྱར། །
[5] ཁྱེད་ཀྱི་བྲང་ཁའི་ནུ་མ་ཆ་གཅིག་ནི། ། སྟག་གཟིག་མེ་ཏོག་གསེབ་ན་རྩྭ་ཟ་བའི། ། ཡུ་མོའི་ཤྭ་ཕྲུག་མཚེ་མར་ཀུན་ནས་མཚུངས། །
[6] ཉི་མ་ནུབ་སྟེ་བསིལ་རླུང་མ་ལྡང་གོང་། ། བདག་ནི་གུ་གུལ་རི་བོའི་ཕྱོགས་སུ་དང་། དྲི་ཞིམ་སྤོས་དཀར་སྒང་ལ་འགྲོ་བར་བྱ། །
[7] ང་ཡི་སྙིང་སྡུག་ཁྱེད་ནི་ཀུན་མཛེས་ཤིང་། ། ཁྱེད་ཀྱི་ལུས་ལ་དྲི་མ་འགོས་མེད་དོ། །
[8] ཀྱེ་ཀྱེ་ང་ཡི་བག་མ་ལགས། ། ཁྱེད་རང་ང་དང་མཉམ་དུ་ནི། ། ལེ་བ་ནོན་དང་འབྲལ་བར་མཛོད། ། ལེ་བ་ནོན་དང་འབྲལ་བར་མཛོད། ། ཨ་མ་རཱ་དང་སེ་ནིར་དང་། ། ཧེར་མོན་རི་བོའི་རྩེ་མོ་དང་། སེང་གེའི་ཚང་དང་གཟིག་གི་རི། ། གནས་དེ་རྣམས་ལས་གཟིགས་པར་མཛོད། །
[9] ང་ཡི་ལྕམ་དང་བག་མ་ལགས། ། ཁྱེད་ཀྱི་མིག་གིས་བལྟས་ཙམ་དང་། ། མགུལ་ལ་རྒྱན་པའི་སྐེ་འཕྲེང་གིས། ། ང་ཡི་ཡིད་སེམས་ཀུན་ནས་ཕྲོགས། །
[10] ང་ཡི་ལྕམ་དང་བག་མ་ལགས། ། ཁྱེད་ཀྱིས་བཅངས་པའི་བརྩེ་སེམས་ནི། ། རྒུན་ཆང་ལས་ཀྱང་ལྷག་ཏུ་མངར། ། ཁྱེད་ཀྱི་སྤོས་ཆུའི་དྲི་ཞིམ་ནི། ། དྲི་བཟང་རིགས་ཀྱི་མཆོག་ཡིན་ནོ། །
[11] ཀྱེ་ཀྱེ་ང་ཡི་བག་མ་ལགས། ། ཁྱེད་ཀྱི་མཆུ་ལས་སྦྲང་ཚང་བཞིན། ། སྦྲང་རྩི་མངར་མོ་ཐིགས་པ་དང་། ། ལྗགས་འོག་སྦྲང་རྩི་འོ་མ་ཡོད། ། ཁྱེད་ཀྱི་ན་བཟའི་དྲི་བསུང་ནི། ། ལེ་བ་ནོན་གྱི་དྲི་དང་མཚུངས། །
[12] ང་ཡི་ལྕམ་དང་བག་མ་ཁྱེད། ། སྒོ་མོ་བཅད་པའི་སྐྱེད་ཚལ་དང་། ཁུངས་མིག་བཅད་པའི་ཆུ་མིག་དང་། ཐེ་མོ་བརྒྱབ་པའི་ཁྲོན་དང་འདྲ། །
[13] ཁྱེད་ཀྱིས་བཏབ་པའི་སྐྱེད་ཚལ་དུ། ། སེ་འབྲུ་ཤིང་ལ་འབྲས་བུ་ཐོགས། ། ཤིང་ཏོག་མངར་མོ་ཧེན་ནཱ་དང་། ། ཛ་ཊ་མ་སིའི་ཤིང་རྣམས་ཡོད། །
[14] ཛ་ཊ་མ་སི་དང་ནི་གུར་ཀུམ་དང་། ། ཤུ་དག་ཤིང་ཚ་དང་ནི་སྤོས་ཀྱི་ཤིང་། ། གུ་གུལ་ཨ་ག་རུ་བཅས་རིན་ཆེན་པོའི། ། བསུང་རྫས་རིགས་ཀུན་དེ་རུ་འཛོམས་པ་ཡིན། །
[15] ཁྱེད་ནི་སྐྱེད་ཚལ་ནང་གི་ཆུ་མིག་དང་། ། ཆུ་རྒྱུན་བཞུར་བའི་ཁྲོན་པ་ཡིན་པ་དང་། ། ལེ་བ་ནོན་ནས་བཞུར་བའི་ཆུ་ཀླུང་ཡིན། །
[16] ཀྱེ་ཀྱེ་བྱང་རླུང་ལྷོ་རླུང་ལྡང་བར་གྱིས། ། ང་ཡི་སྐྱེད་ཚལ་ནང་དུ་ལྡང་ནས་ནི། ། དྲི་ཞིམ་ཕྱོགས་བཞིར་འཐིབ་ཏུ་འཇུག་པར་མཛོད། ། ང་ཡི་དགའ་གྲོགས་རང་གི་སྐྱེད་ཚལ་དུ། ། བྱོན་ནས་ཤིང་ཏོག་མངར་མོ་བཞེས་གྱུར་ཅིག །