[1] ཀྱེ་མཆོད་དཔོན་རྣམས། ད་ལྟའི་བཀའ་འདི་ནི་ཁྱོད་ཅག་ལ་གསུངས་ཤིང་།
[2] དཔུང་ཚོགས་ཀྱི་ཡ་ཝཱེས་འདི་སྐད་དུ། གལ་ཏེ་ཁྱོད་རྣམས་ཀྱིས་མི་ཉན་ཞིང་། སེམས་སུ་མི་འཛིན་ཞིང་། གཟི་བརྗིད་ཐམས་ཅད་ངའི་མཚན་ལ་མི་འབུལ་ན། ངས་དམོད་མོ་ཁྱོད་ཀྱི་ནང་དུ་ཐེབས་པར་འཇུག་ཅིང་། ངས་ཁྱོད་རྣམས་ལ་ཐོབ་འོས་པའི་བྱིན་རླབས་དེ་ལ་དམོད་མོ་ཐེབས་འཇུག་པ་མ་ཟད། དམོད་མོ་ཐེབས་ཟིན་པ་ཡིན། དེ་ཅིའི་ཕྱིར་ཞེ་ན། ཁྱོད་ཅག་གིས་བཀའ་དེ་ནི་སེམས་སུ་མ་བཟུང་པའི་ཕྱིར།
[3] ངས་ཁྱོད་ཅག་གི་བུ་རྒྱུད་དག་ལ་གཤེ་གཤེ་བཏང་སྟེ། དུས་ནང་གི་མཆོད་པར་ཕུལ་བའི་ཕྱུགས་ཟོག་གི་བཤང་གཅི་དེ་ཁྱོད་རྣམས་ཀྱི་གདོང་ལ་བྱུག་པར་འགྱུར་ཞིང་། མི་ཡིས་ཁྱོད་ནི་ལུད་ཕུང་ནང་དུ་འཁྱེར་ངེས་ཡིན་ཞེས་གསུངས་སོ།།
[4] ཡང་དཔུང་ཚོགས་ཀྱི་ཡ་ཝཱེས་འདི་སྐད་དུ། དེ་ནས་ཁྱོད་ཚོས་བཀའ་འདི་ནི་ངས་ཁྱོད་ཅག་ལ་གནང་བ་ནི། ངས་ལེ་ཝི་པ་དང་བཞག་པའི་ཞལ་ཆད་དེ་གནས་འགྱུར་ཆེད་ཡིན་པ་རྟོགས་པར་འགྱུར།
[5] ངས་དེ་དང་བཞག་པའི་ཞལ་ཆད་ནི་ཚེ་སྲོག་དང་ཞི་བདེའི་ཞལ་ཆད་དེ། ངས་འདི་དག་དེ་ལ་གནང་ངོ་། ངས་དེས་ང་ལ་གུས་ཤིང་འཇིགས་པ་དང་། ཡང་ངའི་མཚན་ལ་འཇིགས་པར་འགྱུར་ཞིང་།
[6] དེའི་ཁ་ནང་ནས་བདེན་པ་ཉིད་ཀྱི་བཀའ་སློབ་ཡོད་ཅིང་། དེའི་ནང་ནས་དྲང་རྫུན་མེད་པ་ཡིན། དེ་ནི་ཞི་བདེ་དང་དྲང་བདེན་གྱི་སྒོ་ནས་ང་དང་འགྲོགས་ཤིང་། མི་མང་པོ་ཕྱིར་བཟློགས་ནས་སྡིག་པ་དང་བྲལ་ཏོ།།
[7] མཆོད་དཔོན་གྱི་ཁ་ནང་དུ་ཤེས་བྱ་འཛིན་འོས་ལ། མི་ཡིས་དེའི་ཁ་ནས་བཀའ་སློབ་འཚོལ་ཞིང་། དེ་ཅིའི་ཕྱིར་ཞེ་ན། དེ་ནི་དཔུང་ཚོགས་ཀྱི་ཡ་ཝཱེའི་ཕོ་ཉ་ཡིན་པའི་ཕྱིར།
[8] ཡིན་ཡང་ཁྱོད་ཅག་ནི་དྲང་ལམ་ལས་བྲལ་ཏེ། མི་མང་པོ་བཀའ་རྒྱ་ནང་དུ་འགྱེལ་བར་བཅུག་སྟེ། ཡང་ཁྱོད་རྣམས་ཀྱིས་ངས་ལེ་ཝི་པ་དང་བཞག་པའི་ཞལ་ཆད་ཀྱང་གཏོར་བས།
[9] ངས་ཁྱོད་ཅག་མི་སྡེ་ཀུན་གྱི་མདུན་དུ་སྣང་ཆུང་དང་། མཐོང་ཆུང་བྱས་བར་བཅུག་སྟེ། གང་ལ་ཞེ་ན། ཁྱོད་ཅག་གིས་ངའི་གཤེགས་ལམ་མ་བསྲུངས་པར། བཀའ་རྒྱ་ནང་དུ་མིའི་ཕྱོགས་འཐེན་བྱས་པའི་ཕྱིར་ཞེས་དཔུང་ཚོགས་ཀྱི་ཡ་ཝཱེས་གསུངས་སོ།།
[10] ངེད་ཐམས་ཅད་ལ་ཡབ་གཅིག་ཡོད་པ་མིན་ནམ། དཀོན་མཆོག་གཅིག་གིས་ངེད་རྣམས་མཛད་པ་མ་ཡིན་ནམ། ངེད་ཅག་མི་རེ་རེས་ཅིའི་ཕྱིར་རང་གི་སྤུན་ཟླ་ལ་བློ་མི་དཀར་ཞིང་། ངེད་ཅག་གི་ཕ་མེས་ཀྱི་ཞལ་ཆད་གཏོར་བ་ཡིན་ནམ།
[11] ཡ་ཧུ་དཱ་པས་གཡོ་སྒྱུ་སྤྱད་དེ་ཡེས་ར་ཨེལ་དང་ཡེ་རུ་སཱ་ལེམ་གྱི་ནང་དུ་ཞེན་ལོག་གི་དོན་སྤྱད་པ་དང་། དེ་ཅིའི་ཕྱིར་ཞེ་ན། ཡ་ཧུ་དཱ་པས་གཙོ་བོ་ཡ་ཝཱེས་ཐུགས་དགྱེས་པའི་ཕོ་བྲང་ལ་བཙོག་པར་བཟོས་ཏེ། ཕྱི་རོལ་པའི་ལྷ་ལ་ཞབས་ཏོག་སྒྲུབ་པའི་བུད་མེད་ཆུང་མར་བླངས་སོ།།
[12] དོན་འདི་ནི་རང་དབང་ངང་དང་། ཡང་ན་གཞན་ལ་བསྟུན་ནས་སྤྱད་པ་གང་རུང་ཡིན་ཡང་། དཔུང་ཚོགས་ཀྱི་ཡ་ཝཱེ་ལ་མཆོད་པ་ཕུལ་མཁན་དང་བཅས་སུ། གཙོ་བོ་ཡ་ཝཱེས་མི་དེ་ནི་ཡ་ཀོབ་ཀྱི་གུར་ལས་ཚར་དུ་གཅོད་པར་འགྱུར།
[13] ཁྱོད་རྣམས་ཀྱིས་ཀྱང་དོན་འདི་སྤྱད་དེ། མིག་ཆུ་དང་། ངུ་འབོད་དང་འཁུན་སྐད་ཀྱིས་གཙོ་བོ་ཡ་ཝཱེའི་མཆོད་ཁྲི་ལ་བཀབ་པར་བཅུག་སྟེ། གང་ལ་ཞེ་ན། གཙོ་བོ་ཡ་ཝཱེས་ཕུལ་བའི་མཆོད་པར་མི་གཟིགས་ཤིང་། ཁྱོད་ཀྱི་ལག་ཏུའང་མཆོད་རྫས་བཞེས་པར་ཐུགས་མི་དགྱེས་སོ།།
[14] ཡང་ཁྱོད་རྣམས་ཀྱིས་ན་རེ། ཅི་ལ་མི་བཞེས་ཞེས་དྲིས་ཤིང་། དེ་ཅིའི་ཕྱིར་ཞེ་ན། གཙོ་བོ་ཡ་ཝཱེས་ཁྱོད་དང་ཁྱོད་ན་གཞོན་དུས་བླངས་པའི་ཆུང་མའི་བར་དུ་བདེན་དཔང་མཛད་དེ། མོ་ནི་ཁྱོད་ཀྱི་གཏན་གྲོགས་དང་། ཁྱོད་ཀྱི་དམ་བཅའ་བཞག་པའི་ཆུང་མ་ཡིན་པས། ཁྱོད་ཀྱིས་ད་དུང་དེ་ལ་བློ་མི་དཀར་རམ།
[15] སེམས་ཡོད་པའི་མི་ཞིག་ཡིན་ན་དེ་ལྟར་མི་བྱ་སྟེ། དེས་ཅི་ལྟར་སྤྱོད་དམ་ཟེར་ན། དེས་དཀོན་མཆོག་གི་བུ་རབས་ཚ་རྒྱུད་འཚོལ་བས། ཁྱོད་ཅག་གིས་རང་གི་སེམས་གཟབ་གཟབ་ངང་སྲུངས་དང་། ན་གཞོན་དུས་ལ་བླངས་པའི་ཆུང་མར་བློ་མི་དཀར་པ་བྱ་མི་རུང་ངོ་།
[16] ཡེས་ར་ཨེལ་གྱི་དཀོན་མཆོག་སྟེ་ཡ་ཝཱེས་འདི་སྐད་དུ། ཆུང་མ་དོར་བ་དང་ཆུང་མར་བཙན་ཤུགས་ཀྱི་སྤྱོད་ཚུལ་འཛིན་པའི་མི་ལ་ང་སྡང་ངོ་ཞེས་དཔུང་ཚོགས་ཀྱི་ཡ་ཝཱེས་གསུངས་ཤིང་། དེ་བས་ཁྱོད་ཅག་གིས་གཟབ་གཟབ་ངང་རང་གི་སེམས་སྲུངས་དང་། གཡོ་སྒྱུ་ཅན་གྱི་དོན་སྤྱོད་མི་རུང་།
[17] ཁྱོད་ཅག་གིས་རང་གི་སྨྲ་བརྗོད་ཀྱིས་གཙོ་བོ་ཡ་ཝཱེའི་ཐུགས་སུན་བཅུག་ཀྱང་། ད་དུང་ན་རེ། ངེད་རྣམས་ཀྱིས་ཁོང་ཅི་ལྟར་སུན་བཅུག་གམ་ཟེར་ཞིང་། དེ་ཅིའི་ཕྱིར་ཞེ་ན། ཁྱོད་རྣམས་ཀྱིས་ན་རེ། ངན་པ་སྤྱོད་མཁན་དག་ཀྱང་གཙོ་བོ་ཡ་ཝཱེས་ལེགས་པར་གཟིགས་པ་མ་ཟད། དེ་དག་ལ་ཐུགས་དགྱེས་པར་འགྱུར་ཞེས་སྨྲས་ཤིང་། ཡང་ན་དྲང་བདེན་ཅན་གྱི་དཀོན་མཆོག་གང་ན་བཞུགས་ཞེས་སྨྲས་པའི་ཕྱིར།