[1] ཡང་དེའི་རྗེས་སུ་གཙོ་བོ་ཡ་ཝཱེས་ཕྱོགས་བཞིའི་དགྲ་རྣམས་ཀྱི་བཙན་འཛུལ་བཟློགས་ནས་རྒྱལ་པོ་ཉིད་ཀྱི་ཕོ་བྲང་དུ་ཞི་བར་སྡོད་པའི་ཚེ།
[2] རྒྱལ་པོས་ལུང་སྟོན་པ་ནཱ་ཐན་ལ། ལྟོས་དང་། བདག་ནི་ཐང་ཤིང་གི་ཕོ་བྲང་ནང་དུ་སྡོད་པ་དང་དཀོན་མཆོག་གི་ཞལ་ཆད་ཀྱི་ཤུར་སྒམ་ནི་གུར་གྱི་ནང་དུ་མཆིས་སོ་ཞེས་སྨྲས་པ་ལ།
[3] ནཱ་ཐན་གྱིས་རྒྱལ་པོ་ལ། གཙོ་བོ་ཡ་ཝཱེ་ཁྱེད་དང་མཉམ་དུ་བཞུགས་པས་ཁྱེད་ཀྱི་ཐུགས་དགོངས་བཞིན་བྱོས་ཤིག་ཅེས་བསྐུལ་ཏོ། །
[4] དེའི་མཚན་མོར་གཙོ་བོ་ཡ་ཝཱེའི་བཀའ་ནི་ནཱ་ཐན་ལ་བྱུང་བ་འདི་སྐད་དུ།
[5] ཁྱོད་སོང་སྟེ་ངའི་ཞབས་ཕྱི་དཱ་བིད་ལ་འདི་ལྟར་སྨྲོས་ཤིག འདི་ནི་གཙོ་བོ་ཡ་ཝཱེའི་བཀའ་ལགས། ཁྱོད་ཀྱིས་བདག་གནས་སའི་ཁང་པ་ཞིག་བཞེང་བར་འདོད་དམ།
[6] ངས་ཡེས་ར་ཨེལ་པ་རྣམས་ཨེ་ཅིབ་ཡུལ་ནས་ཡར་ཁྲིད་པའི་ཉིན་ནས་བཟུང་། དེ་རིང་བར་ཁང་པའི་ནང་དུ་གནས་པ་མ་ཡིན་པར་གུར་གྱི་ནང་དུ་ཕྱོགས་བཞིར་འགྲུལ་བ་ཡིན།
[7] ཡེས་ར་ཨེལ་པ་རྣམས་ཡུལ་གང་དུ་ཕྱིན་ནའང་། བདག་གིས་སྔར་རང་གི་མི་རྒྱུད་སྐྱོང་བར་བྱོས་ཤིག་ཅེས་བཀའ་གནང་བའི་ཡེས་ར་ཨེལ་གྱི་ཚོ་བ་རྣམས་ཀྱི་འགོ་དཔོན་③སུ་ཞིག་ལ་ཁྱོད་ཅག་གིས་ངའི་དོན་དུ་ཐང་ཤིང་གི་ཁང་བཟང་མི་བཞེང་བ་ཅི་ཡིན་ཞེས་སྨྲས་མྱོང་ངམ། ③ འགོ་དཔོན་ཞེས་པར་མ་ཡིག་ལས་ཚོ་ཁག་ཅེས་བཀོད་ཡོད།
[8] དེའི་ཕྱིར་ཁྱོད་ཀྱིས་ངའི་ཞབས་ཕྱི་པ་དཱ་བིད་ལ་འདི་སྐད་བརྗོད་དགོས། དཔུང་ཚོགས་ཀྱི་གཙོ་བོ་ཡ་ཝཱེས་ཁྱོད་རང་ལུག་ཁྱུ་འཚོ་སྐྱོང་གི་ལུག་ར་ནས་བླངས་ཏེ། ང་ཡི་མི་རྒྱུད་ཡེས་ར་ཨེལ་གྱི་མངའ་བདག་ཏུ་བསྐོས་ཤིང་།
[9] ཁྱོད་གང་དུ་སོང་ནའང་ང་རང་ཁྱོད་དང་མཉམ་དུ་གནས། ཡང་དགྲ་ཟླ་ཐམས་ཅད་ཁྱོད་ཀྱི་མདུན་ནས་རྩ་མེད་གཏོང་བ་ཡིན་ཏེ། འཇིག་རྟེན་གྱི་མི་སྙན་གྲགས་ཅན་རྣམས་བཞིན་དུ་ངས་ཁྱོད་ཀྱང་མིང་གྲགས་ཅན་དུ་བྱེད་ངེས་ཡིན་ནོ། །
[10] ངས་རང་གི་མི་རྒྱུད་ཡེས་ར་ཨེལ་གྱི་དོན་དུ་ཡུལ་ཞིག་བདམས་ནས་དེ་དག་དེར་འཇོག་པར་བྱ་སྟེ། དེ་དག་རང་གི་གནས་སུ་གཞིས་ཆགས་ཏེ་གཞན་གྱིས་དཀྲུག་པར་མི་འགྱུར་ཞིང་། མི་ངན་རྣམས་ཀྱིས་ཀྱང་སྔར་བྱས་བཞིན་དེ་དག་ལ་འཚེ་བར་མི་འགྱུར་ཏེ།
[11] ངས་རང་གི་མི་རྒྱུད་ཡེས་ར་ཨེལ་ལ་བདག་སྐྱོང་བྱེད་པའི་ཁྲིམས་དཔོན་རྣམས་བསྐོས་པའི་ཉིན་དང་འདྲ་བར་མི་འབྱུང་བ་ཡིན། ངས་ཁྱོད་ཀྱི་དགྲ་བོ་ཐམས་ཅད་ཀྱི་བཙན་འཛུལ་བཟློགས་ནས་ཞི་བར་སྡོད་དུ་འཇུག་གོ །གཙོ་བོ་ཡ་ཝཱེས་ཁྱོད་ལ་འདི་སྐད་བསྒྲགས་པ་སྟེ། གཙོ་བོ་ཡ་ཝཱེས་དངོས་སུ་ཁྱོད་ལ་རྒྱལ་རབས་ཤིག་འཛུགས་པར་བྱའོ། །
[12] ཁྱོད་ཀྱི་ཚེ་ལོ་མཐར་ཕྱིན་ཏེ་རང་གི་ཕ་མེས་དང་ལྷན་ཅིག་གཉིད་དུ་ཡུར་བའི་ཚེ་ན། བདག་གིས་ཁྱོད་ལས་སྐྱེས་པའི་བུ་རྒྱུད་བསྐྱེད་ནས་ཁྱོད་ཀྱི་རྒྱུན་འཛིན་པར་མ་ཟད། དེའི་རྒྱལ་ཁམས་བརྟན་པོར་འཛུགས་པར་བྱའོ། །
[13] ཡང་དེས་བདག་གི་མིང་གི་ཕྱིར་མཆོད་ཁང་ཞིག་བཞེང་བར་འགྱུར་ཞིང་། བདག་གིས་དེའི་རྒྱལ་ཁྲི་ཇི་སྲིད་བར་དུ་བརྟན་པར་བྱའོ། །
[14] ང་རང་ཁོའི་ཡབ་དང་ཁོ་ངའི་བུ་རུ་འགྱུར་ཞིང་གལ་ཏེ་ཁོས་ཉེས་སྐྱོན་བཟོས་ན། ངས་མི་ཡི་ཁྲིམས་དབྱུག་དང་འཇིག་རྟེན་པའི་རྟ་ལྕག་གིས་ཁོ་ལ་ཡོ་བསྲང་བྱེད་དོ། །
[15] འོན་ཀྱང་ཁྱོད་ཀྱི་མདུན་ནས་བསྐྲད་པའི་སོ་ལོ་དང་བྲལ་བ་བཞིན་དུ་ངའི་བྱམས་བརྩེ་ནི་ནམ་ཡང་ཁོ་དང་མི་འབྲལ་ལོ། །
[16] ཡང་ཁྱོད་ཀྱི་ཁྱིམ་དང་རྒྱལ་སྲིད་①དུས་རྒྱུན་དུ་ངའི་མདུན་དུ་བརྟན་པོར་ཚུགས་ཤིང་ཁྱོད་ཀྱི་རྒྱལ་ཁྲི་ནི་རྒྱུན་ནས་རྒྱུན་དུ་གཡོ་བར་མི་འགྱུར་གསུངས་ཞེས་གསུངས་སོ། ། ① ཁྱོད་ཅེས་པར་འགྱུར་ལ་ལར་ང་ཞེས་བཀོད་ཡོད།
[17] བཀའ་ལུང་དེ་ཐམས་ཅད་དང་ཅི་ལྟར་མངོན་པར་མཛད་པ་བཞིན་དུ་ནཱ་ཐན་གྱིས་དཱ་བིད་ལ་ཞུས་སོ། །
[18] དེ་ནས་རྒྱལ་པོ་དཱ་བིད་ནང་དུ་སོང་སྟེ། གཙོ་བོ་ཡ་ཝཱེའི་དྲུང་དུ་བསྡད་ཅིང་ཁོང་ལ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་བདག་ཚད་འདི་ཙམ་གྱི་བར་དུ་ཁྲིད་པར་མཛད་པས། བདག་ནི་སུ་ཡིན་ནམ། བདག་གི་ཁྱིམ་རྒྱུད་ཅི་ལ་བརྩིའམ།
[19] འདི་ཡང་ཁྱེད་ཀྱི་སྤྱན་སྔར་བྱ་བ་ཆུང་ངུ་ཞིག་ཡིན་ཏེ། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཞབས་ཕྱི་པའི་ཁྱིམ་གྱི་མ་འོངས་འབྱུང་འགྱུར་ཐད་བཀའ་ལུང་གནང་བ་ཡིན། ཀྱེ་གཙོ་བོ་ཡ་ཝཱེ་ལགས། དེ་ནི་མི་རྣམས་དུས་རྒྱུན་འཕྲད་སྲིད་པའི་དོན་ཡིན་ནམ།
[20] ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་ཉིད་ཀྱི་ཞབས་ཕྱི་པ་ཅི་འདྲ་ཡིན་པ་མཁྱེན་པས་དཱ་བིད་བདག་ལ་ལྷག་པར་ཞུ་རྒྱུ་ཅི་ཞིག་ཡོད།
[21] ཁྱེད་ཀྱིས་ཉིད་ཀྱི་ཞལ་བཞེས་ཀྱི་རྐྱེན་དང་ཐུགས་དགོངས་བཞིན་དོན་ཆེན་པོ་དེ་མཛད་ཅིང་། ཁྱེད་ཀྱི་ཞབས་ཕྱི་པ་ལ་རྟོགས་སུ་འཇུག་པའི་ཕྱིར་ཡིན་ནོ། །
[22] ཀྱེ་གཙོ་བོ་ཡ་ཝཱེ་ལགས། དེའི་ཕྱིར་ཁྱེད་ནི་ཆེན་པོ་ལགས། བདག་ཅག་གི་རྣ་བས་ཐོས་པ་བཞིན་ན་ཁྱེད་དང་འདྲ་བ་གང་ཡང་མེད་དེ། ཁྱེད་མ་གཏོགས་དཀོན་མཆོག་གཞན་ནི་མེད་དོ། །
[23] ས་གཞི་རུ་ཁྱེད་ཀྱི་མི་རྒྱུད་ཡེས་ར་ཨེལ་དང་འདྲ་བའི་མི་རྒྱུད་གཞན་གང་དུ་ཡོད། དེ་ནི་དཀོན་མཆོག་གིས་དངོས་སུ་བླུས་ཤིང་། དེ་རྣམས་ཁྱེད་ཉིད་ཀྱི་མི་རྒྱུད་དུ་མཛད་པ་དང་། ཁྱེད་ཉིད་ཀྱི་མཚན་གྱི་ཕྱིར་དེ་རྣམས་ལ་དོན་ཆེན་མཛད་ཅིང་། ཁྱེད་ཉིད་ཀྱི་ཡུལ་གྱི་ཕྱིར་འཇིགས་རུང་གི་དོན་རྣམས་མཛད་པ་ཡིན། ཁྱེད་ཉིད་ཀྱི་བུ་རྒྱུད་དེ་ཁྱེད་ཀྱིས་ཨེ་ཅིབ་ཡུལ་ནས་བསྐྱབས་པའི་མི་རྒྱུད་ཀྱི་མདུན་དུ། མི་རྒྱུད་གཞན་རྣམས་དང་དེ་དག་གི་ལྷ་རྣམས་མཐར་བསྐྲད་དོ། །
[24] ཡང་ཁྱེད་ཀྱིས་ཉིད་ཀྱི་མི་རྒྱུད་ཡེས་ར་ཨེལ་ནི་དུས་ནམ་ཡང་ཉིད་ཀྱི་མི་རྒྱུད་དུ་ལུས་པར་བཙུགས་པ་ཡིན་ཞིང་། ཀྱེ་གཙོ་བོ་ཡ་ཝཱེ་ལགས་ཁྱེད་ནི་དེ་དག་གི་དཀོན་མཆོག་ཏུ་གྱུར་ཏོ། །
[25] ཀྱེ་ཡ་ཝཱེ་དཀོན་མཆོག་ལགས། ཁྱེད་ཀྱིས་རང་གི་ཞབས་ཕྱི་པ་དང་དེའི་ཁྱིམ་ལ་གནང་བའི་ཞལ་བཞེས་དེ་ནི་རྒྱུན་ནས་རྒྱུན་དུ་བརྟན་པོར་བསྲུང་ཞིང་། ཁྱེད་ཀྱིས་གསུངས་པ་བཞིན་དུ་བསྒྲུབ་པར་མཛོད་ཅིག
[26] དེ་ནས་ཁྱེད་ཀྱི་མཚན་ནི་རྒྱུན་ནས་རྒྱུན་དུ་རབ་ཏུ་འཕགས་ཤིང་། མི་རྣམས་ཀྱིས་འདི་ལྟར། དཔུང་ཚོགས་ཀྱི་ཡ་ཝཱེ་ནི་ཡེས་ར་ཨེལ་གྱི་དཀོན་མཆོག་ལགས་སོ་ཞེས་བརྗོད་པར་འགྱུར་ལ། ཁྱེད་ཀྱི་ཞབས་ཕྱི་པ་དཱ་བིད་ཀྱི་ཁྱིམ་དེ་ཡང་ཁྱེད་ཀྱི་སྤྱན་སྔར་བརྟན་པོར་ཚུགས་ངེས་ཡིན།
[27] ཀྱེ་དཔུང་ཚོགས་ཀྱི་ཡ་ཝཱེ། ཡེས་ར་ཨེལ་གྱི་དཀོན་མཆོག་ལགས། ཁྱེད་ཀྱིས་ཉིད་ཀྱི་ཞབས་ཕྱི་པ་ལ། ངས་ཁྱོད་ལ་ཁྱིམ་ཞིག་བཞེང་བར་བྱ་ཞེས་མངོན་པར་མཛད་པས། ཁྱེད་ཀྱི་ཞབས་ཕྱི་པས་རང་གི་སེམས་གཏིང་ནས་ཁྱེད་ལ་གསོལ་བ་འདེབས་པར་བརྩམས་པ་ལགས།
[28] ཀྱེ་གཙོ་བོ་ཡ་ཝཱེ་ལགས། ཁྱེད་ནི་དཀོན་མཆོག་ལགས་ཏེ། ཁྱེད་ཀྱི་གསུང་ཐམས་ཅད་བདེན་ཞིང་ཡིད་རྟོན་རུང་བ་ཡིན། ཁྱེད་ཀྱིས་ཉིད་ཀྱི་ཞབས་ཕྱི་པ་ལ་ཞལ་བཞེས་བཟང་པོ་དེ་མཛད་པ་ཡིན།
[29] ད་ལྟ་ཁྱེད་ཀྱིས་ཞབས་ཕྱི་པའི་ཁྱིམ་ལ་བྱིན་གྱིས་བརླབས་ནས། དོན་དེ་ནམ་ཡང་ཁྱེད་ཀྱི་མདུན་དུ་གནས་པར་མཛོད། ཀྱེ་གཙོ་བོ་ཡ་ཝཱེ་ལགས། ཁྱེད་ཀྱིས་སྔར་ཞལ་བཞེས་གནང་བ་བཞིན་ཞབས་ཕྱི་པ་བདག་གི་ཁྱིམ་ལ་རྒྱུན་ནས་རྒྱུན་དུ་བྱིན་གྱིས་བརླབ་པར་སྨོན་ཞེས་གསོལ་ཏོ། །