[1] དེའང་སོ་ལོ་གྲོངས་རྗེས་དཱ་བིད་ཀྱིས་ཨ་མཱད་ལེག་པ་རྣམས་ཕམ་པར་བརྒྱབ་ནས་ཕྱིར་ལོག་སྐབས། དཱ་བིད་ཉིན་གཉིས་ཀྱི་རིང་ཙིག་ལག་དུ་གནས་སོ། །
[2] ལྟོས་དང་། ཉིན་གསུམ་པར། གྱོན་གོས་གཤགས་ཤིང་མགོ་ལ་ས་རྡུལ་གྱིས་གཡོགས་པའི་མི་ཞིག་སོ་ལོའི་དམག་སྒར་ནས་ལོག་འོངས་ཤིང་དཱ་བིད་ཀྱི་མདུན་དུ་སླེབས་པ་དང་ལུས་སར་བཏུད་ནས་ཕྱག་བཙལ་ཏོ། །
[3] དཱ་བིད་ཀྱིས་དེ་ལ་ཁྱོད་གང་ནས་འོངས་སམ་ཞེས་དྲིས་པར། མི་དེས་ཡེས་ར་ཨེལ་གྱི་དམག་སྒར་ནས་བྲོས་འོངས་པ་ཡིན་ཞེས་ཞུས་སོ། །
[4] ཡང་དཱ་བིད་ཀྱིས་དེ་རུ་ཅི་ཞིག་བྱུང་བ་ང་ལ་ཤོད་ཅིག་ཅེས་སྨྲས་པར་མི་དེས། མི་རྒྱུད་རྣམས་གཡུལ་ས་ནས་བྲོས་ཤིང་དེ་དག་གི་ཁྲོད་ནས་མི་མང་པོ་སར་འགྱེལ་ནས་ཤི་བར་མ་ཟད། སོ་ལོ་དང་དེའི་སྲས་ཡོ་ན་ཐན་གཉིས་ཀྱང་གྲོངས་སོ་ཞེས་ཞུས་པར།
[5] དཱ་བིད་ཀྱིས་འཕྲིན་བཤད་མཁན་གཞོན་ནུ་དེ་ལ་ཁྱོད་ཀྱིས་སོ་ལོ་དང་དེའི་སྲས་ཡོ་ན་ཐན་གཉིས་གྲོངས་པ་ཅི་ལྟར་ཤེས་སམ་ཞེས་དྲིས་པ་ལ།
[6] འཕྲིན་བཤད་མཁན་གཞོན་ནུ་དེས། རི་བོ་གིལ་བོ་ཨ་རུ་ང་རང་སྟེས་དབང་གིས་སོ་ལོ་དང་ཕྲད་དེ་སོ་ལོ་ནི་རང་གི་མདུང་ལ་བརྟེན་ཅིང་ཤིང་རྟ་དང་སྐྱ་དམག་རྣམས་ཀྱིས་ཁོང་གི་རྗེས་འདེད་པ་མཐོང་ངོ་། །
[7] ཡང་ཁོང་གིས་ཕྱི་མིག་བལྟས་ནས་བདག་མཐོང་ཞིང་བོས་པར། བདག་གིས་ང་རང་འདི་རུ་ཡོད་ཞུས་པ་ན།
[8] ཁོང་གིས་བདག་ལ་ཁྱོད་སུ་ཡིན་ཞེས་དྲིས་པས། ང་ཨ་མཱད་ལེག་པ་ཡིན་ཞེས་ཞུས།
[9] དེ་ནས་ཁོང་གིས་བདག་ལ་ངའི་རྩར་ཤོག་དང་། ང་རང་སོད་ཅིག རྒྱུ་མཚན་བདག་གི་སེམས་ཤིན་ཏུ་སྐྱོ་ནའང་འཆི་བའི་ཐབས་མ་བྱུང་ཞེས་སྨྲས་པའོ། །
[10] དེར་བདག་ཁོང་གི་གཞོགས་སུ་ལངས་ནས་ཁོང་བཀྲོངས་པ་ཡིན་ཏེ། ཅིའི་ཕྱིར་ཞེ་ན་གལ་ཏེ་ཁོང་སར་འགྱེལ་ཚེ་ཁོང་གསོན་མི་ནུས་པ་ངས་ཤེས་པའི་ཕྱིར་ཡིན། ཁོང་གི་དབུ་ལ་ཡོད་པའི་ཅོད་པན་དང་ཕྱག་ལ་ཡོད་པའི་གདུ་བུ་གཉིས་བླངས་ནས་འདི་རུ་བདག་གི་ཇོ་བོའི་དྲུང་དུ་ཁྱེར་འོངས་པ་ཡིན་ཞེས་པའི་འཕྲིན་ཐོས་སོ། །
[11] དེ་ནས་དཱ་བིད་ཀྱིས་རང་གི་གོས་བླངས་ནས་གཤགས་ཤིང་ཁོ་དང་ལྷན་དུ་ཡོད་པའི་མི་རྣམས་ཀྱིས་ཀྱང་དེ་བཞིན་བྱས་ཏེ།
[12] སོ་ལོ་དང་དེའི་སྲས་ཡོ་ན་ཐན། གཙོ་བོ་ཡ་ཝཱེའི་མི་རྒྱུད། ཡེས་ར་ཨེལ་གྱི་ཁྱིམ་རྒྱུད་རྣམས་རལ་གྲིའི་ཁ་ནས་གྲོངས་པས། དཱ་བིད་འཁོར་དང་བཅས་པ་སེམས་སྡུག་ནས་ངུས་ཤིང་དགོང་མོའི་བར་དུ་སྨྱུང་གནས་བསྲུངས་སོ། །
[13] ཡང་དཱ་བིད་ཀྱིས་འཕྲིན་སྐྱེལ་མཁན་གཞོན་ནུ་དེ་ལ་ཁྱོད་གང་གི་མི་ཡིན་ཞེས་དྲིས་པར། དེས་བདག་ནི་བྱེས་པ་ཞིག་གི་བུ་སྟེ་ཨ་མཱད་ལེག་པ་ཞིག་ཡིན་ཞུས་ཤིང་།
[14] དཱ་བིད་ཀྱིས་འདི་ལྟར། ཁྱོད་རང་ལག་པ་བརྐྱངས་ནས་གཙོ་བོ་ཡ་ཝཱེས་བྱུགས་པ་དེ་དགྲོང་བར་མི་འཇིགས་སམ་ཞེས་དྲིས་པ་དང་།
[15] དཱ་བིད་ཀྱིས་གཞོན་ནུ་ཞིག་བོས་ཏེ་ཁྱོད་སོང་ལ་མི་དེ་སོད་ཅིག་ཅེས་བཀའ་བསྩལ་པ་ལ། དེས་ཁོ་ལ་བརྡུངས་ནས་བསད་དོ། །
[16] དཱ་བིད་ཀྱིས་མི་དེར། ཁྱོད་རང་གི་ཁ་ནས་ངས་གཙོ་བོ་ཡ་ཝཱེས་བྱུགས་པ་དེ་བཀྲོངས་པ་ཡིན་ཞེས་དཔང་པོ་བྱས་པས་ཁྱོད་ཀྱི་ཁྲག་ནི་རང་གི་མགོ་ལ་འབབ་དགོས་ཞེས་སྨྲས་སོ། །
[17] ཡང་དཱ་བིད་ཀྱིས་སོ་ལོ་དང་དེའི་སྲས་ཡོ་ན་ཐན་གཉིས་ཀྱི་ཕྱིར་སྐྱོ་གླུ་འདི་བྲིས་ཤིང་།
[18] གཞུ་མོ་ཞེས་པའི་མགུར་མ་དེ་ནི་ཡ་ཧུ་དཱ་པ་རྣམས་ཀྱིས་སློབ་དགོས་པར་ཁོང་གིས་བསྐུལ་ཞིང་མགུར་མ་དེ་བདེན་པའི་གླེགས་བམ་ནང་བྲིས་ཡོད་དོ། །
[19] ཡེས་ར་ཨེལ་ཀྱེ་ཁྱོད་ཚོའི་གཟི་བརྗིད་ནི། །མཐོ་སར་བཀྲོངས་འདུག་དཔའ་བོའི་འགྱེལ་ལུགས་ལ། །
[20] ཕེ་ལེ་ཤེད་པའི་མཚན་སྐྱི་མ་བཅད་པའི། །ཚོགས་ལས་བྱུང་བའི་བུ་མོ་རྣམས་ཀྱིས་ནི། །དགའ་མགུ་རང་ཞིང་སྤྲོ་བ་མི་གཏོང་ཕྱིར། །གཱད་ཀྱི་ཡུལ་ལ་བཤད་པར་མི་བྱའོ། །ཨ་ཤཱ་ཀེ་ལོན་སྲང་དུ་སྐད་མ་རྒྱག །
[21] ཀྱེ་མ་གིལ་བོ་ཨ་ཡི་རི་བོ་རྣམས། །ཁྱོད་ལ་ཆར་ཟིལ་འབབ་པར་མ་གྱུར་ཅིག །ཞིང་ལས་མཆོད་རྫས་འཐོན་པར་མ་གྱུར་ཅིག །དཔའ་བོའི་ཕུབ་ནི་དེ་རུ་བརྫད་ཅིང་དོར། །སོ་ལོའི་ཕུབ་ལ་སྣུམ་གྱིས་མ་བྱུགས་ཕྱིར། །
[22] བསད་པའི་ཁྲག་དང་དཔའ་བོའི་ཚིལ་བུ་ལས། །ཡོ་ན་ཐན་གྱི་མདའ་གཞུ་ཕྱིར་མ་འཐེན། །སོ་ལོའི་རལ་གྲི་སྟོང་བར་ལོག་མ་སོང་། །
[23] སོ་ལོ་དང་ནི་ཡོ་ན་ཐན་ཁོང་གཉིས། །གསོན་དུས་གཞན་གྱིས་བྱམས་ཤིང་བློ་ལ་བབས། །གྲོངས་པའི་སྐབས་སུ་ཕན་ཚུན་བྲལ་མ་གྱུར། །ཁོང་གཉིས་གླག་ལས་མགྱོགས་མྱུར་ལྡན་པ་དང་། །སེང་གེ་ལས་ཀྱང་ངར་ཤུགས་ཡོད་པའོ། །
[24] ཀྱེ་ཀྱེ་ཡེས་ར་ཨེལ་གྱི་བུད་མེད་རྣམས། །སོ་ལོ་ཁོང་གི་ཕྱིར་དུ་ངུ་བར་གྱིས། །ཁོང་གིས་ཁྱོད་ལ་གྱོན་གོས་རྒྱ་སྨུག་བསྐོན། །ཁྱོད་ཀྱི་ཕྱི་གོས་གསེར་གྱིས་བརྒྱན་པའོ། །
[25] དཔའ་བོ་དེ་དག་གཡུལ་སར་ཇི་ལྟར་གཤེགས། །ཡོ་ན་ཐན་ནི་མཐོ་སར་ཇི་ལྟར་བཀྲོངས། །
[26] ཀྱེ་ཀྱེ་ང་ཡི་སྤུན་ཟླ་ཡོ་ན་ཐན། །ཁྱོད་ཀྱི་དོན་དུ་ང་ལ་སྡུག་བསྔལ་ཆེ། །ཁྱོད་ལ་ངའི་སེམས་རབ་ཏུ་འཕྲེང་བ་ཡིན། །ཁྱོད་ཀྱིས་ང་ལ་བཅངས་པའི་བརྩེ་བ་ནི། །བུད་མེད་ལས་ཀྱང་ལྷག་པར་ཟབ་པའོ། །
[27] ཀྱི་ཧུད་དཔའ་བོ་ཇི་ལྟར་གཤེགས་པ་དང་། །དམག་ཆས་རྣམས་ནི་ཇི་ལྟར་ཡལ་བ་ཡིན། །ཞེས་པའོ། །