[1] ཡང་ཟཱ་ཏི་ཁི་ཡཱས་རྒྱལ་སྲིད་བཟུང་ནས་ལོ་དགུ་པའི་ཟླ་བ་བཅུ་པའི་ཚེས་བཅུ་པར། པཱ་པིས་ལུན་གྱི་རྒྱལ་པོ་ནེ་བོ་ཀད་ནེ་ཙར་ནི། རང་གི་དམག་དཔུང་དང་བཅས་ཡེ་རུ་སཱ་ལེམ་ལ་འོངས་པ་དང་། མཁར་ཕྱི་རུ་དམག་སྒར་བརྒྱབ་ཅིང་ལྕགས་རི་བརྩིགས་ནས་མཐའ་བསྐོར་ཏོ། །
[2] རྒྱལ་པོ་ཚིད་ཀི་ཡཱའི་རྒྱལ་སྲིད་ཀྱི་ལོ་བཅུ་གཅིག་པའི་བར་དུ་གྲོང་ཁྱེར་དམག་གིས་བསྐོར།
[3] ཟླ་བ་བཞི་པའི་ཚེས་དགུ་པ་ལ་གྲོང་ཁྱེར་ནང་དུ་མུ་གེ་བྱུང་བ་ཤིན་ཏུ་ཚབས་ཆེ་ཞིང་། ཐ་ན་ཡུལ་མི་རྣམས་ལ་ཁ་ཟས་ཀྱང་མེད་པར་གྱུར།
[4] དེ་ནས་གྲོང་ཁྱེར་གཏོར་བཅོམ་བཏང་སྟེ། དམག་མི་ཐམས་ཅད་རྒྱལ་པོའི་ལྡུམ་རའི་མདུན་དུ་ཡོད་པའི་ལྕགས་རི་གཉིས་བར་གྱི་རྒྱ་སྒོའི་ལམ་ནས་བྲོས། འོན་ཀྱང་། ཀལ་དི་པ་རྣམས་ཀྱིས་གྲོང་ཁྱེར་བསྐོར་ཡོད་པས། ཁོ་ཚོ་ཨ་རབ་པཱའི་ལམ་ནས་སོང་ངོ་། །
[5] དེར་ཀལ་དི་པའི་དམག་དཔུང་གིས་རྒྱལ་པོ་བདས་ནས་ཡེ་རུ་ཀོའི་ཐང་དུ་བཟུང་བ་དང་། ཁོའི་དམག་མི་ཐམས་ཅད་ཁོ་ལས་ཕྱོགས་སུ་གྱེས་པ་རེད།
[6] ཀལ་དི་པའི་དམག་དཔུང་གིས་རྒྱལ་པོ་བཟུང་ནས་པཱ་པིས་ལུན་རྒྱལ་པོའི་དྲུང་དུ་རིབ་ལཱ་རུ་ཡར་འགྲོ་རུ་བཅུག་པ་དང་དེ་རྣམས་ཀྱིས་ཁོ་ལ་ཁྲིམས་ཐག་བཅད།
[7] ཡང་ཚིད་ཀི་ཡཱའི་བུ་རྣམས་ཡབ་ཀྱི་མིག་མདུན་དུ་བསད་ཅིང་། ཚིད་ཀི་ཡཱའི་མིག་གཉིས་ལོང་བར་བྱས་ཏེ་ལི་ཡི་ཐག་པའི་བཅིངས་ནས་པཱ་པིས་ལུན་དུ་ཁྱེར་ཏོ། །
[8] དེ་ཡང་པཱ་པིས་ལུན་གྱི་རྒྱལ་པོ་ནེ་བོ་ཀད་ནེ་ཙར་གྱིས་རྒྱལ་སྲིད་བཟུང་བའི་ལོ་བཅུ་དགུ་པའི་ཟླ་ལྔ་པའི་ཚེས་བདུན་པར། པཱ་པིས་ལུན་གྱི་རྒྱལ་པོའི་བློན་ཆེན་ཏེ་སྐུ་སྲུང་དཔོན་པོ་ནེ་བོ་ཟར་ཨ་དན་བྱ་བ་ཡེ་རུ་སཱ་ལེམ་དུ་འོངས་པ་དང་།
[9] ཁོས་གཙོ་བོ་ཡ་ཝཱེའི་མཆོད་ཁང་དང་། རྒྱལ་པོའི་ཕོ་བྲང་དང་། ཡེ་རུ་སཱ་ལེམ་གྱི་ཁང་པ་ཐམས་ཅད་དང་ཁང་བརྩེགས་ཐམས་ཅད་མེར་བསྲེགས་ཤིང་།
[10] སྐུ་སྲུང་དཔོན་པོ་དང་བཅས་སུ་ཡོད་པའི་ཀལ་དི་པའི་དམག་དཔུང་ཀུན་གྱིས། ཡེ་རུ་སཱ་ལེམ་གྱི་མཐའ་བཞི་རུ་བསྐོར་བའི་ལྕགས་རི་རྣམས་བརླགས་སོ། །
[11] གྲོང་ཁྱེར་གྱི་ནང་དུ་ལུས་ཡོད་པའི་མི་སྡེ་དང་པཱ་པིས་ལུན་རྒྱལ་པོར་མགོ་བཏགས་པ་རྣམས། དེ་མིན་ཡུལ་མི་ལྷག་ལུས་དང་བཅས་པ་སྐུ་སྲུང་དཔོན་པོ་ནེ་བོ་ཟར་ཨ་དན་གྱིས་བཙན་ཁྲིད་བྱས།
[12] འོན་ཀྱང་ཡུལ་མི་དབུལ་ཕོངས་རྣམས་ལས་ཁ་ཤས་སྐུ་སྲུང་དཔོན་པོས་རྒུན་ཚལ་ལ་ལྟ་བ་དང་། སོ་ནམས་བྱེད་དུ་བཞག་གོ །
[13] དེ་ཡང་གཙོ་བོ་ཡ་ཝཱེའི་མཆོད་ཁང་དུ་ཡོད་པའི་ལི་ཡི་ཀ་བ་གཉིས་དང་། གཙོ་བོ་ཡ་ཝཱེའི་མཆོད་ཁང་ནང་ཡོད་པའི་སྟེགས་བུ་རྣམས་དང་ལི་ཡི་རྒྱ་མཚོ་ཞེས་པའི་འཁྲུད་གཞོང་བཅས། ཀལ་དི་པས་དུམ་བུར་བཅག་སྟེ་ལི་རྣམས་པཱ་པིས་ལུན་དུ་ཁྱེར།
[14] དེར་ཡོད་པའི་སྣོད་དང་། མེ་ཁྱེམ་དང་། ཅེམ་ཙེ་དང་། སྡེར་མ་བཅས་དེར་བསྙེན་བཀུར་ཕུལ་བྱའི་ལི་ཡི་མཆོད་ཆས་ཐམས་ཅད་ཁྱེར་ཞིང་།
[15] མེ་ཕོར་དང་གཞོང་པ་ནི་གསེར་དངུལ་གང་ཡིན་ཐམས་ཅད་སྐུ་སྲུང་དཔོན་པོས་ཁྱེར་ཏོ། །
[16] སོ་ལོ་མོན་གྱིས་གཙོ་བོ་ཡ་ཝཱེའི་མཆོད་ཁང་གི་དོན་དུ་བཟོས་པའི་ཀ་བ་གཉིས་དང་། རྒྱ་མཚོ་ཞེས་པའི་འཁྲུད་གཞོང་གཅིག་དང་ཁྲི་རྣམས། ལི་ཡི་ཡོ་བྱད་དང་བཅས་པ་འདི་དག་ཐམས་ཅད་གཞལ་དུ་མེད་པའོ། །
[17] ཀ་བ་གཅིག་གི་མཐོ་ཚད་དུ་ཁྲུ་བཅོ་བརྒྱད་དང་། དེའི་སྟེང་དུ་ཡོད་པའི་ཀ་གཞུ་ཡང་ལི་ཡིན་ཏེ། ཀ་གཞུ་དེའི་མཐོ་ཚད་ལ་ཁྲུ་གསུམ་ཡོད་པ་ཡིན། ཀ་གཞུ་དེའི་དཀྱིལ་འཁོར་དུ་ཡོད་པའི་དྲ་བ་དྲ་ཕྱེད་དང་སེ་འབྲུ་ཀུན་ཡང་ལི་ལས་བཟོས་ཡོད། ཀ་བ་གཉིས་པ་ལ་ཡང་དེ་འདྲའི་དྲ་བ་དྲ་ཕྱེད་ཡོད་པ་ཡིན་ནོ། །
[18] དེ་ཡང་སྐུ་སྲུང་དཔོན་པོས་མཆོད་དཔོན་ཆེན་པོ་སེ་ར་ཡཱ་དང་། དེའི་འོག་གི་མཆོད་དཔོན་ཟེ་ཕན་ཡཱ་ཧོ་དང་། སྒོ་ཐེམ་སྲུང་མཁན་མི་གསུམ་བཅས་བཟུང་།
[19] ཡང་གྲོང་ཁྱེར་དེ་ནས་དམག་འཐབ་སྐབས་ཀྱི་འགོ་དཔོན་བཀོད་འདོམས་པ་གཅིག་དང་། གྲོང་ཁྱེར་དེ་ནས་རྙེད་པའི་རྒྱལ་པོའི་སློབ་སྟོན་པ་ལྔ་དང་། དམག་དཔོན་དེའི་ཡུལ་མི་རྣམས་དཔུང་དུ་བསྡུ་མཁན་གྱི་དྲུང་ཡིག་དང་། གྲོང་ཁྱེར་དུ་རྙེད་པའི་ཡུལ་མི་དྲུག་ཅུ་བཅས་བཟུང་སྟེ།
[20] སྐུ་སྲུང་དཔོན་པོ་ནེ་བོ་ཟར་ཨ་དན་གྱིས་དེ་དག་བཟུང་ནས་རིབ་ལཱ་རུ་པཱ་པིས་ལུན་རྒྱལ་པོའི་དྲུང་དུ་ཁྲིད།
[21] ཧ་མཱད་ཡུལ་གྱི་རིབ་ལཱ་རུ་པཱ་པིས་ལུན་རྒྱལ་པོས་དེ་དག་ལ་བསྣུན་ཅིང་བསད་པ་དང་། དེ་ལྟར་ཡ་ཧུ་དཱ་པ་རྣམས་རང་གི་ཡུལ་ནས་བཙན་གྱིས་གཞན་དུ་བཏང་ངོ་། །
[22] ཡ་ཧུ་དཱའི་ཡུལ་དུ་ལུས་པའི་མི་རྣམས་ཏེ་པཱ་པིས་ལུན་རྒྱལ་པོ་ནེ་བོ་ཀད་ནེ་ཙར་གྱིས་བསྐྱུར་བ་རྣམས་ལ། པཱ་པིས་ལུན་རྒྱལ་པོས་ཤཱ་ཕན་གྱི་ཚ་བོའམ། ཨ་ཧི་ཀམ་གྱི་བུ་གེ་དལ་ཡཱ་བྱ་བ་འགོ་དཔོན་དུ་བསྐོས་སོ། །
[23] དེ་ནས་དམག་དཔོན་ཐམས་ཅད་དང་དེ་དག་གི་དམག་མི་དག་གིས། པཱ་པིས་ལུན་རྒྱལ་པོས་གེ་དལ་ཡཱ་འགོ་དཔོན་དུ་བསྐོ་མངགས་བྱས་པ་ཐོས་རྗེས་སུ། ནེ་ཐན་ཡཱའི་བུ་ཡེས་མ་ཨེལ་དང་། ཀཱ་རེ་ཨའི་བུ་ཡོ་ཧ་ནན་དང་། ནེ་ཏོ་ཕཱ་པ་ཐན་ཧུ་མེད་ཀྱི་བུ་སེ་ར་ཡཱ་དང་། མ་ཨ་ཀཱ་པའི་བུ་ཡ་ཨ་ཟན་ཡཱ་བཅས་རང་གི་དམག་མི་རྣམས་དང་མཉམ་དུ་མཱས་པཱ་རུ་གེ་དལ་ཡཱའི་དྲུང་དུ་འོངས་པ་དང་།
[24] གེ་དལ་ཡཱས་དེ་དག་དང་། དེ་དག་གི་དམག་མི་རྣམས་ལ་མནའ་བསྐྱལ་ཞིང་འདི་ལྟར་དུ། ཀལ་དི་པའི་ཞབས་ཕྱི་པ་བྱེད་དུ་སྐྲག་པར་མ་གྱུར་ཅིག ཡུལ་འདིར་གནས་ཤིང་པཱ་པིས་ལུན་རྒྱལ་པོར་ཞབས་ཕྱི་བསྒྲུབས་ན་ཁྱོད་ཅག་ལེགས་པར་འགྱུར་འོང་ཞེས་སྨྲས་སོ། །
[25] འོན་ཀྱང་། ཟླ་བ་བདུན་པ་ལ་རྒྱལ་རྒྱུད་ཡིན་པ་ཨེ་ལི་ཤཱ་མའི་ཚ་བོའམ། ནེ་ཐན་ཡཱའི་བུ་ཡེས་མ་ཨེལ་གྱིས་མི་བཅུ་ཁྲིད་འོངས་ཏེ། གེ་དལ་ཡཱ་དང་། མཱས་པཱ་རུ་ཁོའི་དྲུང་དུ་ཡོད་པའི་ཡ་ཧུ་དཱ་པ་དང་ཀལ་དི་པ་རྣམས་ལ་བསྣུན་ཅིང་བསད།
[26] དེ་ནས་མི་ཆེ་ཆུང་ཀུན་དང་དམག་དཔོན་རྣམས་ཀལ་དི་པ་ལ་འཇིགས་པར་གྱུར་པས། དེ་དག་ལངས་ནས་ཨེ་ཅིབ་ཡུལ་དུ་བྲོས་སོ། །
[27] དེ་ཡང་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིན་བཙན་ཁྲིད་བྱས་ནས་ལོ་སོ་བདུན་པའི་ཟླ་བ་བཅུ་གཉིས་པའི་ཚེས་ཉེར་བདུན་པ་ལ། པཱ་པིས་ལུན་རྒྱལ་པོ་ཨེ་ཝིལ་མེ་རོ་དག་གིས་རྒྱལ་སྲིད་བཟུང་བའི་ལོ་དང་པོར། ཁོས་ཡ་ཧུ་དཱའི་རྒྱལ་པོ་ཡེ་ཧོ་ཡཱ་ཀིན་བཙོན་ལས་ཕྱུང་སྟེ་གོ་ས་ཆེན་པོ་གནང་།
[28] སེམས་གསོ་མཛད་དེ། ཁོ་དང་མཉམ་དུ་པཱ་པིས་ལུན་དུ་ཡོད་པའི་རྒྱལ་པོ་གཞན་དག་གི་རྒྱལ་ཁྲི་ལས་ཁོའི་རྒྱལ་ཁྲི་མཐོ་བར་མཛད་པ་དང་།
[29] ཡང་ཡེ་ཧོ་ཡཱ་ཀིན་གྱི་བཙོན་གྱི་གོས་རྣམས་བརྗེས་ཏེ། ཁོ་རང་ལ་ཚེ་གང་བོར་ཉིན་རེ་བཞིན་རྒྱལ་པོའི་དྲུང་དུ་ཁ་ཟས་སྤྱོད་པར་གནང་།
[30] ཡང་ཁོའི་ཚེ་གང་བོར་ཉིན་རེའི་དགོས་མཁོ་ལྟར་རྒྱལ་པོས་ཆད་མེད་དུ་ཁོ་ལ་གནང་བའོ། །