[1] དེ་ཡང་རེ་མལ་ཡཱའི་སྲས་ཕེ་ཀཱ་ཡིས་རྒྱལ་སྲིད་བསྐྱངས་པའི་ལོ་བཅུ་བདུན་པར། ཡ་ཧུ་དཱའི་རྒྱལ་པོ་ཡོ་ཐམ་གྱི་སྲས་ཨ་ཧ་ཟཱ་རྒྱལ་པོར་གྱུར།
[2] ཁོས་རྒྱལ་སྲིད་བཟུང་བའི་ཚེ་ལོ་ཉི་ཤུར་ལོན་ཡོད་དེ་ཡེ་རུ་སཱ་ལེམ་དུ་ལོ་བཅུ་དྲུག་གི་རིང་ལ་རྒྱལ་སྲིད་བསྐྱངས་ཀྱང་། ཁོས་ཡབ་མེས་དཱ་བིད་ལྟར་རང་གི་དཀོན་མཆོག་ཡ་ཝཱེའི་སྤྱན་སྔར་ལེགས་པོ་གང་ཡིན་མ་སྤྱད་པར།
[3] ཁོ་ནི་ཡེས་ར་ཨེལ་གྱི་རྒྱལ་པོ་རྣམས་ཀྱི་ལམ་ནང་འགྲུལ་ཞིང་། གཙོ་བོ་ཡ་ཝཱེས་ཡེས་ར་ཨེལ་པ་རྣམས་ཀྱི་མདུན་ལས་ཕྱི་རུ་ཕྱུང་ཞིང་། མི་རྒྱུད་ཀྱིས་བརྙས་བཅོས་བྱས་པ་བཞིན་དུ། ཁོས་ཐ་ན་རང་གི་བུ་ཡང་མེ་དཀྱིལ་ནས་སྦྱིན་སྲེག་བྱས་པར་མ་ཟད།
[4] མཐོ་གླིང་དང་རི་སྒང་སྟེང་དང་། ལྗོན་ཤིང་སྔོན་པོ་རེ་རེའི་འོག་ཏུ་མཆོད་པ་ཕུལ་ཞིང་བསང་བཏང་ངོ་། །
[5] སྐབས་དེར་ཨ་རམ་གྱི་རྒྱལ་པོ་རེ་ཙིན་དང་། ཡེས་ར་ཨེལ་གྱི་རྒྱལ་པོ་རེ་མལ་ཡཱ་ཡི་བུ་ཕེ་ཀཱ་གཉིས་ཡེ་རུ་སཱ་ལེམ་དུ་དམག་འཁྲུག་རྒྱག་ཏུ་ཡར་འོངས་པ་དང་། ཨ་ཧ་ཟཱ་དམག་གིས་བསྐོར་ནའང་དབང་དུ་བསྒྱུར་མ་ནུས་སོ། །
[6] དེའི་ཚེ་ན། ཨ་རམ་གྱི་རྒྱལ་པོ་རེ་ཙིན་གྱིས་ཨེ་ལིད་ཕྱིར་བླངས་ནས་ཨ་རམ་དུ་བསྲེས་པ་དང་། ཨེ་ལད་ནས་ཡ་ཧུ་དཱ་པ་རྣམས་བཏོན་ཏེ། ཨེ་དོམ་པ་རྣམས་ཨེ་ལད་དུ་འོངས་ནས་ད་ལྟའི་བར་དུ་དེར་གནས་སོ། །
[7] དེ་ནས་ཨ་ཧ་ཟཱ་ཡིས་ཨ་སུར་གྱི་རྒྱལ་པོ་ཐིག་ལད་ཕིལ་ཨེ་སེར་ལ་བང་ཆེན་མངགས་ཏེ་ཁོ་ལ། བདག་ནི་ཁྱེད་ཀྱི་ཞབས་ཕྱི་པ་དང་བུ་ཡིན་ཞིང་། ཁྱེད་རང་ཡར་བྱོན་ཏེ་བདག་ལ་བཙན་རྒོལ་བྱེད་བཞིན་པའི་ཨ་རམ་གྱི་རྒྱལ་པོ་དང་། ཡེས་ར་ཨེལ་གྱི་རྒྱལ་པོའི་ལག་ནས་བདག་སྐྱོབ་པར་མཛོད་ཅིག་ཅེས་ཞུས་ཤིང་།
[8] ཡང་ཨ་ཧ་ཟཱ་ཡིས་གཙོ་བོ་ཡ་ཝཱེའི་མཆོད་ཁང་དང་རྒྱལ་པོའི་གཏེར་མཛོད་དུ་ཡོད་པའི་གསེར་དངུལ་བཅས་བླངས་ཏེ་ཨ་སུར་གྱི་རྒྱལ་པོ་ལ་ཞུ་རྟེན་དུ་ཕུལ་བ་དང་།
[9] ཨ་སུར་གྱི་རྒྱལ་པོས་ཁོ་ལ་ཁས་བླངས་ཤིང་། ཨ་སུར་གྱི་རྒྱལ་པོ་དཱ་མེ་སེག་ལ་ཡར་སོང་ཞིང་ཡུལ་དེ་བཟུང་བ་དང་མི་རྣམས་ཀིར་བྱ་བའི་ཡུལ་དུ་བཙན་ཁྲིད་བྱས་ཤིང་རེ་ཙིན་ཡང་བསད་དོ། །
[10] དེ་ནས་རྒྱལ་པོ་ཨ་ཧ་ཟཱ་ནི་དཱ་མེ་སེག་ལ་ཨ་སུར་གྱི་རྒྱལ་པོ་ཐིག་ལད་ཕིལ་ཨེ་སེར་དང་འཕྲད་དུ་སོང་སྟེ། དཱ་མེ་སེག་ཏུ་ཡོད་པའི་མཆོད་ཁྲི་དེ་མཐོང་བས། རྒྱལ་པོ་ཨ་ཧ་ཟཱ་ཡིས་མཆོད་ཁྲི་དེའི་དཔེ་རིས་དང་། སྒྲིག་གཞི། རྩིག་སྟངས་གསལ་བོ་བཅས་མཆོད་དཔོན་ཨུ་རི་ཡཱ་ལ་བརྫངས།
[11] དེ་ནས་མཆོད་དཔོན་ཨུ་རི་ཡཱས། རྒྱལ་པོ་ཨ་ཧ་ཟཱ་ཡིས་དཱ་མེ་སེག་ནས་བརྫངས་པ་ཀུན་གྱི་མ་དཔེ་ཇི་བཞིན་གྱི་མཆོད་ཁྲི་ཞིག་བཟོས་ཤིང་། རྒྱལ་པོ་ཨ་ཧ་ཟཱ་ནི་དཱ་མེ་སེག་ནས་ཕྱིར་ལོག་པའི་བར་དུ་འགྲུབ་པར་བཅུག་གོ །
[12] དེ་ནས་རྒྱལ་པོ་དཱ་མེ་སེག་ནས་ཕྱིར་བསླེབས་ཏེ་མཆོད་ཁྲི་མཐོང་ཞིང་། རྒྱལ་པོ་མཆོད་ཁྲི་དེའི་འགྲམ་དུ་སོང་ནས་དེའི་ཐོག་ཏུ་ཡར་འགོས་པ་དང་།
[13] རང་གི་དོན་དུ་སྦྱིན་སྲེག་དང་འབྲུ་རིགས་ཀྱི་མཆོད་པ་ཕུལ་ཞིང་རང་གི་གསེར་སྐྱེམས་བཏང་། ཞི་བདེའི་མཆོད་པ་རྣམས་ཀྱི་ཁྲག་ནི་མཆོད་ཁྲིའི་ཁར་གཏོར།
[14] ཁོས་གཙོ་བོ་ཡ་ཝཱེའི་དྲུང་དུ་ཡོད་པའི་ལིའི་མཆོད་ཁྲི་དེ་མཆོད་ཁང་གི་མདུན་ལོགས་སམ། མཆོད་ཁྲི་ཆེན་པོ་དང་གཙོ་བོ་ཡ་ཝཱེའི་མཆོད་ཁང་གི་བར་ནས་གནས་སྤར་ཏེ། མཆོད་ཁྲི་གསར་བ་དེའི་བྱང་ཕྱོགས་སུ་གཏད་དོ། །
[15] དེ་ནས་རྒྱལ་པོ་ཨ་ཧ་ཟཱ་ཡིས་མཆོད་དཔོན་ཨུ་རི་ཡཱ་ལ་བཀའ་བསྩལ་ཏེ་འདི་ལྟར་དུ། མཆོད་ཁྲི་ཆེན་པོ་འདིའི་སྟེང་དུ་ཞོགས་པའི་སྦྱིན་སྲེག་གི་མཆོད་པ་དང་ས་སྲོས་ཀྱི་འབྲུ་རིགས་ཀྱི་མཆོད་པ། རྒྱལ་པོའི་སྦྱིན་སྲེག་གི་མཆོད་པ་དང་ཁོའི་འབྲུ་རིགས་ཀྱི་མཆོད་པ། ཡུལ་མི་ཐམས་ཅད་ཀྱི་སྦྱིན་སྲེག་གི་མཆོད་པ་དང་དེ་རྣམས་ཀྱི་འབྲུ་རིགས་ཀྱི་མཆོད་པ་རྣམས་བསྲེག་དགོས་པ་དང་། ཡང་གསེར་སྐྱེམས་ཀྱི་མཆོད་པ་རྣམས་དང་སྦྱིན་སྲེག་གི་མཆོད་པའི་ཁྲག་དང་། གཞན་དམར་མཆོད་ཀྱི་ཁྲག་ཐམས་ཅད་ནི་དེའི་ཁར་གཏོར་ཅིག འོན་ཀྱང་ལིའི་མཆོད་ཁྲི་ལ་ངས་དཀོན་མཆོག་ནས་འཚོལ་ཞིབ་བྱའོ་ཞེས་སྨྲས་པས།
[16] མཆོད་དཔོན་ཨུ་རི་ཡཱས་རྒྱལ་པོ་ཨ་ཧ་ཟཱ་ཡིས་བསྩལ་པའི་བཀའ་བཞིན་དུ་བསྒྲུབས་སོ། །
[17] དེ་ཡང་རྒྱལ་པོ་ཨ་ཧ་ཟཱ་ཡིས་འཁོར་ལྡན་སྟེགས་བུ་རྣམས་ཀྱི་ཟུར་རྒྱན་བཅད་དེ། དེའི་ཐོག་ཏུ་ཡོད་པའི་འཁྲུད་གཞོང་རྣམས་ཕྱིར་བཏོན་པ་དང་། རྒྱ་མཚོ་བྱ་བ་ནི་དེའི་འོག་ན་ཡོད་པའི་ལིའི་གླང་རྣམས་ཀྱི་ཁ་ནས་ཕབ་སྟེ་རྡོ་ལེབ་ཀྱི་ཁར་བཞག་གོ །
[18] ཡང་ཨ་སུར་གྱི་རྒྱལ་པོའི་རྐྱེན་གྱིས་ངལ་གསོ་བའི་ཉིན་མོའི་ཕྱིར་མཆོད་ཁང་ནང་དུ་བརྩིགས་པའི་གནམ་ཁེབས་ཀྱི་བཀོད་པ་དང་། རྒྱལ་པོ་ཕྱི་ནས་ཐོན་སའི་བགྲོད་ལམ་གཉིས་ནི་གཙོ་བོ་ཡ་ཝཱེའི་མཆོད་ཁང་ནས་གནས་སྤར་ཏོ། །
[19] དེ་ཡང་ཨ་ཧ་ཟཱ་ཡི་དོན་གཞན་རྣམས་དང་། ཁོས་ཅི་བྱས་པ་ཐམས་ཅད་ནི་ཡ་ཧུ་དཱའི་རྒྱལ་པོའི་ལོ་རབས་ནང་དུ་བྲིས་ཡོད་པ་མིན་ནམ།
[20] ཨ་ཧ་ཟཱ་ནི་རང་གི་ཕ་མེས་དང་ལྷན་ཅིག་ཏུ་གཟིམས་པ་དང་། དཱ་བིད་ཀྱི་གྲོང་ཁྱེར་དུ་ཕ་མེས་རྣམས་དང་ལྷན་དུ་དུར་ལ་སྦས། ཁོའི་སྲས་ཧི་ཟི་ཀི་ཡཱ་ནི་དེའི་ཚབ་ཏུ་རྒྱལ་པོར་གྱུར་ཏོ། །