[1] དེའི་ཚེ་པེན་ཡཱ་མེན་ཚོ་བར་མིང་ལ་ཁི་སི་ཞེས་འབོད་ཅིང་དབང་དང་ཧ༧༧ལྡན་ལ་ཕྱུག་པོ་ཡིན་པའི་མི་ཞིག་ཡོད་པ་དང་། དེ་ནི་ཨ་བེ་ཨེལ་གྱི་བུ་དང་། ཨ་བེ་ཨེལ་ནི་ཙེ་རོར་གྱི་བུ། ཙེ་རོར་ནི་པི་ཀོ་རད་ཀྱི་བུ། པི་ཀོ་རད་ནི་པེན་ཡཱ་མེན་པའི་ཨ་ཕེ་ཨག་གི་བུ་བཅས་ཡིན།
[2] མིང་ལ་སོ་ལོ་ཞེས་འབོད་པ་ནི་ཁི་སིའི་བུ་ཡིན་པ་དང་། དེ་ནི་གཞོན་ནུ་བྱད་གཟུགས་ལེགས་པ་ཞིག་ཡིན་ཏེ། དེ་ལྟ་བུའི་བྱད་གཟུགས་ལེགས་པའི་མི་ཞིག་ཡེས་ར་ཨེལ་པ་རྣམས་ཀྱི་ཁྲོད་དུ་མེད་ཅིང་། ཁོ་རང་མི་རྒྱུད་ཐམས་ཅད་ཀྱི་གཟུགས་ལས་མགོ་གཅིག་གིས་མཐོ་བ་ཡིན།
[3] ཡང་སོ་ལོ་ཡི་ཕ་ཁི་སིའི་བོང་བུ་རྣམས་བོར་བས། ཁི་སི་ཡིས་རང་གི་བུ་སོ་ལོ་ལ། གཡོག་པོ་རྣམས་ལས་གཅིག་ཁྲིད་དེ་བོང་བུ་འཚོལ་བར་སོང་ཞེས་བསྒོས་པས།
[4] དེ་གཉིས་ཨེ་ཕཱར་ཡིམ་རི་བོའི་ཡུལ་དང་ཤཱ་ལི་ཤཱ་ཡུལ་བརྒྱུད་དེ་སོང་ནའང་མ་རྙེད་པ་རེད། དེ་ནས་སཱ་ཨ་ལེམ་ཡུལ་བརྒྱུད་དེ་སོང་བ་ན་བོང་བུ་དེ་རུའང་མེད་པ་དང་། པེན་ཡཱ་མེན་པའི་ཡུལ་བརྒྱུད་དེ་ཕྱིན་ན་ཡང་མ་རྙེད་དོ། །
[5] དེ་གཉིས་ཙུབ་ཡུལ་གྱི་བར་དུ་སླེབས་ཙ་ན། སོ་ལོ་ཡིས་མཉམ་དུ་འགྲོ་བའི་གཡོག་པོ་ལ། ད་ཤོག་དང་ངེད་གཉིས་ཕྱིར་འགྲོ། ཕྱིར་མ་སོང་ན། ཕ་ཡིས་བོང་བུའི་ཆེད་དུ་སེམས་ཁུར་བྱེད་པ་ལས་ལྡོག་སྟེ། ངེད་གཉིས་ཀྱི་ཆེད་དུ་སེམས་ཁུར་བྱེད་པར་འགྱུར་ཞེས་སྨྲས་པ་དང་།
[6] གཡོག་པོས་སོ་ལོ་ལ། གཟིགས་དང་། གྲོང་ཁྱེར་འདི་རུ་དཀོན་མཆོག་གི་སྐྱེས་བུ་ཞིག་བཞུགས། མི་རྣམས་ཀྱིས་དེ་ལ་གུས་བཀུར་བྱེད་ཅིང་། མི་དེས་ཅི་ཞིག་གསུངས་ན་ཡང་བདེན་པར་འགྱུར་ལ། ད་ངེད་གཉིས་དེ་རུ་འགྲོ་སྟེ། མི་དེས་ངེད་གཉིས་ལ་འགྲོ་འོས་པའི་ལམ་སྟོན་ཡང་སྲིད་ཅེས་སྨྲས་ཤིང་།
[7] སོ་ལོ་ཡིས་རང་གི་གཡོག་པོ་ལ། ལྟོས་དང་། ངེད་གཉིས་དེ་རུ་འགྲོ་ན། མི་དེ་ལ་ཅི་དབུལ་ལམ། ངེད་གཉིས་ཀྱི་སྣོད་ཀྱི་ནང་དུ་ཡོད་པའི་བག་ལེབ་ནི་རྫོགས་ཚར་ལ། དཀོན་མཆོག་གི་སྐྱེས་བུ་དེ་ལ་དབུལ་བའི་ནོར་གཅིག་ཀྱང་མེད། ད་དུང་ངེད་གཉིས་ལ་ཅི་ཡོད་དམ་ཞེས་དྲིས་པས།
[8] གཡོག་པོས་སོ་ལོ་ལ་འདི་ལྟར། གཟིགས་དང་། འདིར་བདག་གི་ལག་ཏུ་དངུལ་སྲང་བཞི་ཆའི་གཅིག་ཡོད། དེ་ནི་ངེད་གཉིས་ལ་འགྲོ་འོས་པའི་ལམ་སྟོན་ཕྱིར་དཀོན་མཆོག་གི་སྐྱེས་བུ་དེ་ལ་དབུལ་བར་བྱ་ཞེས་ལན་ཞུས།
[9] སྔོན་ཆད་ཡེས་ར་ཨེལ་པའི་ཁྲོད་དུ་མི་ཞིག་དཀོན་མཆོག་ལ་ཞུ་བ་བྱེད་དུ་འགྲོ་བའི་ཚེ། འདི་ལྟར་སྨྲ་བ་ཡིན་ཏེ། ཤོག་དང་། ངེད་རྣམས་མངོན་ཤེས་པ་དེའི་དྲུང་དུ་འགྲོ་བར་བྱའོ་ཟེར། དེང་སང་ལུང་སྟོན་པ་ཞེས་པ་ལ་སྔར་མངོན་ཤེས་པ་ཞེས་འབོད་དོ། །
[10] དེ་ནས་སོ་ལོ་ཡིས་རང་གི་གཡོག་པོ་ལ། ཁྱོད་ཀྱིས་སྨྲས་པ་ལེགས་སོ། །ཤོག་དང་། ངེད་གཉིས་འགྲོ་བར་བྱ་ཞེས་སྨྲས་པ་དང་། དེ་ལྟར་ཁོ་གཉིས་དཀོན་མཆོག་གི་སྐྱེས་བུ་བཞུགས་སའི་གྲོང་ཁྱེར་དུ་སོང་ངོ་། །
[11] གྲོང་ཁྱེར་དེའི་རི་བོ་ལ་ཡར་འགོས་པ་དང་གཞོན་ནུ་མ་ཆུ་འཆུ་བའི་ཕྱིར་ཡོང་བ་རྣམས་དང་ཐུག་པས། དེ་དག་ལ་མངོན་ཤེས་པ་འདི་རུ་བཞུགས་སམ་ཞེས་དྲིས་པ་ན།
[12] དེ་དག་གིས་ལན་དུ། ཁོང་བཞུགས་ཏེ། ལྟོས་ཤིག ཁོང་ནི་ཁྱེད་ཀྱི་མདུན་དུ་བཞུགས་འདུག་སྟེ། མྱུར་དུ་སོང་དང་། དེ་རིང་གནས་མཐོ་ས་རུ་ཡུལ་མི་རྣམས་ཀྱི་ཆེད་དུ་མཆོད་པ་དབུལ་བའི་ཕྱིར། ཁོང་ནི་གྲོང་ཁྱེར་དུ་ཕེབས་སོ། །
[13] ཁྱེད་གཉིས་གྲོང་ཁྱེར་དུ་སླེབས་པ་ཙམ་གྱིས། ཁོང་གནས་མཐོ་སར་ཞལ་ཟས་བཞེས་སུ་མ་ཕེབས་སྔོན་ལ་ཁོང་དང་འཕྲད་པར་འགྱུར། མི་ཚོགས་ཀྱིས་ཁོང་མ་ཕེབས་བར་དུ་ཁ་ཟས་བཟའ་མི་འོང་། རྗེས་སུ་ཁོང་གིས་མཆོད་པ་ལ་བྱིན་རླབས་གནང་ན། མགྲོན་དུ་བོས་པ་རྣམས་ཀྱིས་བཟའ་བར་འགྱུར། དེའི་ཕྱིར། དུས་འདི་ཉིད་དུ་ཁོང་དང་མཇལ་བར་སོང་ཞིག་ཅེས་སྨྲས།
[14] དེ་ནས་དེ་གཉིས་ཡར་གྲོང་ཁྱེར་ནང་འཛུལ་དུས། སཱ་མུ་ཨེལ་ཁོ་གཉིས་ཀྱི་མདུན་ནས་འོང་བཞིན་པ་དང་། གནས་མཐོ་སའི་ཕྱོགས་སུ་འགྲོ་བཞིན་ཡོད་དོ། །
[15] སོ་ལོ་མ་འོང་བའི་ཉིན་གཅིག་གི་སྔོན་ལ་གཙོ་བོ་ཡ་ཝཱེས་སཱ་མུ་ཨེལ་ལ་མཛུབ་སྟོན་བྱས་ཏེ་འདི་སྐད་དུ།
[16] སང་ཉིན་དུས་ཚོད་འདི་ལ་ངས་ཁྱོད་ཀྱི་མདུན་དུ་པེན་ཡཱ་མེན་ཡུལ་གྱི་མི་ཞིག་མངག་པར་བྱ། ང་རང་གི་མི་རྒྱུད་ཡེས་ར་ཨེལ་ནི་ཕེ་ལེ་ཤེད་པའི་ལག་ནས་སྒྲོལ་བའི་ཕྱིར་ཁྱོད་ཀྱིས་མི་དེ་འགོ་དཔོན་དུ་འབྱུག་དགོས། ངས་རང་གི་མི་རྒྱུད་ལ་གཟིགས་སྐྱོང་བྱས་པ་ཡིན། ཅིའི་ཕྱིར་ཞེ་ན། དེ་དག་གི་ངུ་སྐད་ང་ཡི་མདུན་དུ་སླེབས་པས་སོ་ཞེས་གསུངས་པའོ། །
[17] ཡང་སཱ་མུ་ཨེལ་གྱིས་སོ་ལོ་མཐོང་བ་ཙམ་གྱིས། གཙོ་བོ་ཡ་ཝཱེས་དེ་ལ། དེ་སྔར་ངས་ཁྱོད་ལ་སྨྲས་པའི་མི་འདི་ཡིན། དེས་ནི་ང་རང་གི་མི་རྒྱུད་ལ་སྲིད་སྐྱོང་བར་བྱ་ཞེས་གསུངས་པ་རེད།
[18] དེ་ནས་སོ་ལོ་རྒྱལ་སྒོ་ནང་སཱ་མུ་ཨེལ་གྱི་གམ་དུ་འོངས་སྐབས། ཁོ་ན་རེ། མངོན་ཤེས་པའི་ཁང་པ་གང་དུ་ཡོད་པ་ང་ལ་སྟོན་པར་མཛོད་ཅེས་སྨྲས་པ་དང་།
[19] སཱ་མུ་ཨེལ་གྱིས་སོ་ལོ་ལ་ལན་དུ། མངོན་ཤེས་པ་དེ་ནི་ང་རང་ཡིན། ཁྱོད་རང་ངའི་སྔོན་དུ་གནས་མཐོ་སར་སོང་ཞིག་དང་། དེ་རིང་ཁྱོད་ཀྱིས་ང་དང་མཉམ་དུ་ཁ་ཟས་བཟའ་བར་འགྱུར། ཞོགས་པ་སྔ་མོ་ངས་ཁྱོད་རང་ལ་སྐྱེལ་མ་བྱེད་དེ། ཁྱོད་ཀྱི་སེམས་ལ་གང་ཡོད་པ་ཁྱོད་ལ་འཆད་པར་བྱ།
[20] ཡང་ཁྱོད་ཀྱིས་ཉིན་གསུམ་གྱི་སྔོན་དུ་བོང་བུ་བོར་བ་དེའི་ཕྱིར་སེམས་ཁུར་མ་བྱེད་ཅིག བོང་བུ་དེ་རྣམས་རྙེད་ཟིན། ཡང་ཡེས་ར་ཨེལ་པ་ཐམས་ཅད་ནི་སུའི་ཕྱིར་དགའ་ཟེར་ན། ཁྱོད་རང་དང་ཁྱོད་ཀྱི་ཁྱིམ་རྒྱུད་ཀྱི་ཕྱིར་དགའ་བ་མ་ཡིན་ནམ་ཞེས་སྨྲས་སོ། །
[21] སོ་ལོ་ཡིས་དེའི་ལན་དུ། བདག་ནི་ཡེས་ར་ཨེལ་གྱི་ཚོ་བའི་ཁྲོད་དུ་ཐམས་ཅད་ལས་ཆུང་བའི་པེན་ཡཱ་མེན་གྱི་ཚོ་བའི་མི་ཞིག་མ་ཡིན་ནམ། བདག་གི་ཁྱིམ་རྒྱུད་ནི་པེན་ཡཱ་མེན་གྱི་ཚོ་བའི་ཁྲོད་དུ་ཐམས་ཅད་ལས་དམའ་བ་མ་ཡིན་ནམ། ཁྱེད་ཀྱིས་ཅིའི་ཕྱིར་བདག་ལ་གཏམ་དེ་ལྟ་བུ་སྨྲའམ་ཞེས་ཞུས་པས།
[22] སཱ་མུ་ཨེལ་གྱིས་སོ་ལོ་དང་དེའི་གཡོག་པོ་ཁྲིད་ནས་གསོལ་ཁང་དུ་སོང་བ་དང་། མགྲོན་དུ་བོས་པ་རྣམས་ཀྱི་ཁྲོད་དུ་གྲལ་མགོ་རུ་སྡོད་དུ་བཅུག དེ་དག་གི་མི་གྲངས་ནི་སུམ་ཅུ་ཙམ་ཡིན་ནོ། །
[23] དེ་ནས་སཱ་མུ་ཨེལ་གྱིས་གསོལ་དཔོན་ལ། སྔར་ངས་ཁྱོད་རང་ལ་ཟུར་དུ་ཞོག་ཅེས་བཤད་པའི་ཤ་སྐལ་འདི་རུ་ཁྱེར་ཤོག་ཅེས་བསྐུལ་བས།
[24] གསོལ་དཔོན་གྱིས་བརླ་རྐང་ལ་སོགས་པའི་ཤ་བླངས་ནས་སོ་ལོའི་མདུན་དུ་བཞག་ཅིང་། ཡང་སཱ་མུ་ཨེལ་ན་རེ། ད་ལྟོས་ཤིག འདི་ནི་ཁྱོད་ལ་བཞག་པ་ཡིན། ད་བླངས་ནས་ཟོ་ཞིག བདག་གིས་མི་རྣམས་མགྲོན་དུ་བོས་པ་ཡིན་ཞེས་སྨྲས་པའི་དུས་ནས་ད་ལྟའི་བར་དུ་འདི་ནི་ཁྱོད་ཀྱི་ཕྱིར་བཞག་པ་ཡིན་ཞེས་སྨྲས་པས། དེའི་ཉིན་ལ་སོ་ལོ་ཡིས་སཱ་མུ་ཨེལ་དང་མཉམ་དུ་ཁ་ཟས་སྤྱད་དོ། །
[25] དེ་ནས་ཁོ་ཚོ་གནས་མཐོ་ས་ནས་གྲོང་ཁྱེར་དུ་བབས་པ་དང་། ཡང་སཱ་མུ་ཨེལ་གྱིས་སོ་ལོ་དང་མཉམ་དུ་ཁང་ཐོག་ནས་གཏམ་བྱས་སོ། །
[26] སྐྱ་རེངས་ཀྱི་དུས་སུ་སཱ་མུ་ཨེལ་གྱིས་ཁང་ཐོག་ཏུ་ཉལ་བའི་སོ་ལོ་ལ། ད་ལོངས་ཤིག ངས་ཁྱོད་ལ་སྐྱེལ་མ་བྱ་ཞེས་སྨྲས་པས། སོ་ལོ་ལངས་པ་དང་། ཁོ་དང་སཱ་མུ་ཨེལ་གཉིས་ཕྱི་རོལ་ཏུ་སོང་།
[27] དེ་གཉིས་གྲོང་ཁྱེར་གྱི་མཐའ་ལ་སླེབས་པའི་ཚེ། སཱ་མུ་ཨེལ་གྱིས་སོ་ལོ་ལ། ཁྱོད་ཀྱིས་གཡོག་པོར་ངེད་གཉིས་ཀྱི་སྔོན་དུ་སོང་ཞེས་སྐུལ་ཞིག་སྨྲས་པ་དང་། ཡང་སོ་ལོ་ལ་ད་ལྟ་ཁྱོད་རང་ཅུང་ཟད་སྡོད་དང་། ངས་ཁྱོད་ལ་དཀོན་མཆོག་གི་གསུང་ཞིག་འཆད་པར་བྱ་ཞེས་སྨྲས་སོ། །