[1] དེ་ནས་ཧན་ནཱ་ཡིས་སྨོན་ལམ་བཏབ་ཅིང་འདི་ལྟར་ཞུས་པ་སྟེ། ཡ་ཝཱེ་ལ་ནི་བདག་གི་སེམས་པ་དགའ། ། ད་དུང་ཁོང་གི་ཕྱིར་དུ་རྭ་གླིང་འབུད། ། ཁོང་གིས་ང་རང་བསྐྱབས་པས་སྤྲོ་བ་འཕེལ། ། དགྲ་སྔར་བདག་གི་ཁ་སྟབས་མཐོ་བར་མཛད། །
[2] ཡ་ཝཱེ་ཁོང་ལས་དམ་པ་གང་ཡང་མེད། ། ཁོང་ལས་གཞན་དུ་ཁོང་དང་འདྲ་བ་མེད། ། བདག་གི་དཀོན་མཆོག་ལྟ་བུའི་བྲག་རི་མེད། །
[3] དེའི་ཕྱིར་མི་ཡིས་ང་རྒྱལ་གཏམ་མ་བཤད། ། འུར་དང་སྙེམས་པའི་ཚིག་ངན་མ་བཤད་རོགས། ། ཡ་ཝཱེ་ཁོང་ཉིད་ཐམས་ཅད་མཁྱེན་པ་ལགས། ། བྱ་བ་ཐམས་ཅད་གཟིགས་པའི་དཀོན་མཆོག་ལགས། །
[4] མི་ཡི་དཔའ་བོ་རྣམས་ཀྱི་གཞུ་ཐག་ཆད། ། ཉམ་ཐག་པ་ལ་སྟོབས་ཀྱི་སྐ་རགས་འཕེན། །
[5] སྔོན་ལ་ལོངས་སྤྱོད་ཡོད་པའི་ཕྱུག་པོ་རྣམས། ། རྗེས་སུ་བག་ལེབ་འཚོལ་བའི་གླ་བར་གྱུར། ། སྔོན་ལ་བཀྲེས་སྐོམ་མྱངས་པའི་སྤྲང་པོ་རྣམས། ། རྗེས་སུ་བཅུད་ཟས་བསྟེན་པའི་བདག་པོར་གྱུར། ། རབས་ཆད་རྣམས་ལ་ཕྲུ་གུ་བདུན་ཙམ་སྐྱེས། ། བུ་མང་རྣམས་ཀྱིས་ཁེར་རྐྱང་མྱང་བར་འགྱུར། །
[6] ཡ་ཝཱེ་ཉིད་ཀྱིས་ཚེ་སྲོག་གཅོད་པར་མཛད། ། ཁོང་གིས་ཚེ་སྲོག་ཡང་ནི་གསོན་པར་མཛད། ། ཁོང་གིས་གཤིན་པོའི་གནས་སུ་འཁྲིད་པར་བྱེད། ། ད་དུང་གོང་ནས་གོང་དུ་འཕགས་པར་མཛད། །
[7] ཡ་ཝཱེ་ཉིད་ཀྱིས་མི་ནི་དབུལ་པོར་མཛད། ། ད་དུང་ཁོང་གིས་མི་ནི་ཕྱུག་པོར་མཛད། ། མཐོན་པོ་རྣམས་ནི་གཉའ་ནས་གནོན་པར་བྱེད། ། དམའ་བ་རྣམས་ནི་ཟེ་ནས་འཐེན་པར་བྱེད། །
[8] དབུལ་འཕོངས་རྣམས་ནི་རྡུལ་གྱི་ཁྲོད་ནས་བསློང་། ། དམན་པ་རྣམས་ནི་ཐལ་བའི་གསེབ་ནས་བསློང་། ། དེ་ཚོར་དཔལ་དང་འབྱོར་བ་བསྩལ་བྱས་ཏེ། ། རྒྱལ་པོ་རྣམས་ཀྱི་ཁྲི་ལ་འཛེག་པར་བྱེད། ། ས་གཞིའི་ཀ་བ་རྣམས་ནི་ཁོང་ལ་དབང་། ། དེ་ཡི་དབུས་སུ་ཁོང་གིས་ས་གཞི་སྤར། །
[9] ཁོང་གིས་དམ་པ་རྣམས་ནི་བསྲུང་བར་མཛད། ། ངན་པ་རྣམས་ནི་མུན་པར་རྫོང་བར་བྱེད། ། རང་གི་སྟོབས་ཀྱིས་སུའང་རྒྱལ་མི་འགྱུར། །
[10] ཡ་ཝཱེ་དགྲ་རུ་འཛིན་པའི་མི་རྣམས་ནི། ། ཆག་ཅིང་དུམ་བུ་ཉིད་དུ་གས་པར་འགྱུར། ། དེ་ཚོའི་ཐོག་ཏུ་འབྲུག་སྐད་ལྡིར་བར་བྱ། ། ས་གཞི་མཐའ་མའི་བར་དུ་འདྲི་གཅོད་བྱ། ། ཁོང་གིས་བསྐོས་པའི་རྒྱལ་པོར་སྟོབས་ཤུགས་སྦྱིན། ། ཁོང་གིས་བྱུགས་པའི་རྭ་གླིང་གྱེན་ལ་བསྒྲེངས། ། ཞེས་པའོ། །
[11] དེ་ནས་ཨེལ་ཁ་ནཱ་རང་གི་ཕ་ཡུལ་རཱ་མའི་ཁྱིམ་དུ་ཕྱིན་པ་དང་། སཱ་མུ་ཨེལ་གྱིས་མཆོད་དཔོན་ཨེ་ལིའི་མདུན་དུ་གཙོ་བོ་ཡ་ཝཱེ་ལ་བསྙེན་བཀུར་ཞུས་སོ། །
[12] ཨེ་ལིའི་བུ་གཉིས་ནི་མི་ངན་པ་ཡིན་ཞིང་། ཁོ་གཉིས་ཀྱིས་གཙོ་བོ་ཡ་ཝཱེ་ངོ་མི་ཤེས་སོ། །
[13] ཡང་མཆོད་དཔོན་དེ་གཉིས་ཀྱིས་མི་ཚོགས་ལ་འདི་ལྟར་བྱེད་པ་ཡིན་ཏེ། མི་ཞིག་གིས་མཆོད་པ་འབུལ་བ་དང་ཤ་ཚོས་ཀྱིན་ཡོད་པའི་ཚེ། མཆོད་དཔོན་གྱི་ཞབས་ཕྱི་པ་འོངས་ནས། སོ་གསུམ་ཅན་གྱི་ཚེབ་ཅིག་ཁྱེར་ཏེ།
[14] རྫ་སྣོད་དམ་སླ་ངའམ་ཁྲོ་སྣོད་དམ་ཁོག་མའི་ནང་དུ་བཙུགས་ཏེ། ཚེབ་ཀྱིས་ཐོག་མར་བཏོན་པའི་ཤ་ནི་མཆོད་དཔོན་གྱིས་ལེན་ངེས་ཡིན། ཁོ་ཚོས་ཞི་ལོ་རུ་འོངས་པའི་ཡེས་ར་ཨེལ་གྱི་མི་ཐམས་ཅད་ལ་དེ་ལྟར་བྱེད་ཀྱིན་ཡོད་པ་རེད།
[15] ཡང་ཚི་ལུ་སྲེག་པའི་སྔོན་དུ་མཆོད་དཔོན་གྱི་ཞབས་ཕྱི་པ་འོངས་ནས་འདི་ལྟར། མཆོད་དཔོན་གྱིས་ཤ་ཞིག་བསྲེག་པའི་ཕྱིར་ཤ་ཞིག་བྱིན་ཅིག མཆོད་དཔོན་ལ་ཤ་བཙོས་མ་མི་དགོས་པར་ཤ་རློན་པ་དགོས་ཞེས་སྨྲ་ཞིང་།
[16] གལ་ཏེ་མཆོད་པ་འབུལ་བཞིན་པའི་མི་དེས། དང་པོར་ཚི་ལུ་སྲེག་པ་དང་། དེ་ནས་ཁྱོད་ཀྱིས་ཅི་འདོད་པ་དེ་འཁྱེར་ཆོག་ཅེས་སྨྲས་ན། དེའི་ལན་དུ་ཞབས་ཕྱི་པས། མིན། ད་ལྟ་རང་བྱིན་ཅིག མི་སྟེར་ན་འཕྲོག་པར་བྱ་ཞེས་ཟེར་རོ། །
[17] དེ་ལྟར་གཞོན་ནུ་དེ་གཉིས་ཀྱིས་གཙོ་བོ་ཡ་ཝཱེའི་མཆོད་པ་ལ་ཁྱད་གསོད་བྱས་པས། ཁོ་གཉིས་ཀྱི་སྡིག་པ་གཙོ་བོ་ཡ་ཝཱེའི་སྤྱན་སྔར་ཆེན་པོར་གྱུར་ཏོ། །
[18] སྐབས་དེར་སཱ་མུ་ཨེལ་ནི་ད་དུང་བྱིས་པ་ཞིག་ཡིན་ཏེ། སོ་རས་ཀྱིས་བཟོས་པའི་བེར་ཐུལ་གྱོན་ཏེ་གཙོ་བོ་ཡ་ཝཱེའི་དྲུང་དུ་ཞབས་ཏོག་བསྒྲུབས།
[19] ཡང་ཁོའི་ཨ་མས་ཕྱུ་པ་ཆུང་ངུ་ཞིག་བཟོས་ཏེ། རང་གི་ཁྱོ་ག་དང་མཉམ་དུ་ལོ་རེ་བཞིན་མཆོད་པ་འབུལ་དུ་འོངས་སྐབས་དེ་ནི་མཉམ་དུ་ཁྱེར་ཏོ། །
[20] དེ་ནས་ཨེ་ལི་ཡིས་ཨེལ་ཁ་ནཱ་དང་དེའི་ཆུང་མ་ལ་བྱིན་རླབས་མཛད་ཅིང་འདི་ལྟར། ཕྲུ་གུ་འདི་གཙོ་བོ་ཡ་ཝཱེ་ལ་ཕུལ་བའི་ཚབ་ཏུ་ཁོང་གིས་ཁྱོད་ལ་བུད་མེད་འདི་ནས་རྒྱུད་འཛིན་གནང་བར་གྱུར་ཅིག་ཅེས་བརྗོད་ནས། དེ་དག་རང་རང་གི་གནས་སུ་ཕྱིར་ལོག
[21] གཙོ་བོ་ཡ་ཝཱེས་ཧན་ནཱ་ལ་ཐུགས་རྗེས་གཟིགས་པས། ཁོ་མོ་ཡང་བསྐྱར་མངལ་དང་ལྡན་པར་གྱུར་ཏེ། རིམ་བཞིན་བུ་གསུམ་དང་བུ་མོ་གཉིས་སྐྱེས་པ་དང་། ཡང་སཱ་མུ་ཨེལ་ནི་གཙོ་བོ་ཡ་ཝཱེའི་དྲུང་དུ་འཚར་ལོངས་བྱུང་ངོ་། །
[22] ཨེ་ལི་ཤིན་ཏུ་རྒས་ནས། ཁོའི་བུ་གཉིས་ཀྱིས་ཡེས་ར་ཨེལ་གྱི་མི་ཐམས་ཅད་ལ་ཅི་ཞིག་བྱས་པ་དང་། ཁོ་གཉིས་ཡ་ཝཱེའི་མཇལ་འཕྲད་གུར་མཆོག་གི་སྒོ་འགྲམ་དུ་ལས་བྱེད་མཁན་གྱི་བུད་མེད་དང་འགྲོགས་པའི་སྐད་ཆ་ཐོས་པས།
[23] ཁོས་དེ་གཉིས་ལ་ཅིའི་ཕྱིར་དེ་ལྟར་བྱེད་དམ། ཁྱོད་གཉིས་ཀྱིས་བྱས་པའི་བྱ་བ་ངན་པ་དེ་ངས་མི་ཐམས་ཅད་ནས་ཐོས་བྱུང་།
[24] ཀྱེ་བུ། ངས་ཐོས་པའི་གཙོ་བོ་ཡ་ཝཱེའི་མི་རྒྱུད་ཁྲོད་གྲགས་པའི་གཏམ་དེ་ནི་བཟང་པོ་མིན།
[25] གལ་ཏེ་མི་ཞིག་གིས་མི་གཞན་ལ་འགལ་བའི་སྡིག་པ་བྱེད་ན། དཀོན་མཆོག་གིས་མི་དེ་ལ་ཁྲིམས་ཐག་གཅོད་པ་ཡིན། འོན་ཀྱང་མི་ཞིག་གིས་གཙོ་བོ་ཡ་ཝཱེ་ལ་འགལ་བའི་སྡིག་པ་བྱེད་ན། དེའི་དོན་དུ་སུས་ཞུ་བ་བྱེད་ཐུབ་བམ་ཞེས་སྨྲས་ནའང་། དེ་གཉིས་ཀྱིས་ཕ་ཡི་བཀའ་ལ་མ་ཉན། ཅིའི་ཕྱིར་ཞེ་ན། གཙོ་བོ་ཡ་ཝཱེས་དེ་གཉིས་འཆི་ལམ་དུ་འཇུག་པར་ཐུགས་ཐག་བཅད་དོ། །
[26] ཡང་བུ་ཆུང་སཱ་མུ་ཨེལ་ནི་རིམ་བཞིན་ནར་སོན་ཞིང་། གཙོ་བོ་ཡ་ཝཱེ་ཁོ་ལ་ཐུགས་མཉེས་པ་དང་། མི་རྣམས་ཀྱང་ཁོ་ལ་དགའ་བར་གྱུར་ཏོ། །
[27] ཡང་དཀོན་མཆོག་གི་སྐྱེས་བུ་ཞིག་ཨེ་ལིའི་མདུན་དུ་འོངས་ནས་ན་རེ། གཙོ་བོ་ཡ་ཝཱེས་འདི་སྐད་དུ། ཁྱོད་ཀྱི་ཕ་མེས་ཨེ་ཅིབ་ཡུལ་གྱི་རྒྱལ་པོ་ཕཱར་ཨོལ་གྱི་མདུན་དུ་གཡོག་པོ་ཡིན་པའི་ཚེ། ང་ནི་དེ་དག་ལ་དངོས་སུ་མངོན་པ་མ་ཡིན་ནམ།
[28] ཡེས་ར་ཨེལ་གྱི་ཚོ་ཁག་རྣམས་ལས་བདག་གིས་མཆོད་དཔོན་ཞིག་བདམས་པ་དང་། ཁོས་མཆོད་ཁྲིའི་སྟེང་དུ་མཆོད་པ་འབུལ་བ་དང་། བདུག་སྤོས་བདུག་པ་དང་། བེར་ཐུལ་གྱོན་པ་བཅས་ཀྱི་ཆེད་དུ་བསྐོས་པ་མ་ཡིན་ནམ། ད་དུང་ཡེས་ར་ཨེལ་པ་ཐམས་ཅད་ཀྱིས་དབུལ་པོའི་སྦྱིན་སྲེག་ནི་ཁྱོད་ཀྱི་ཕ་མེས་ལ་གནང་བ་མ་ཡིན་ནམ།
[29] ངའི་བཞུགས་གནས་སུ་དབུལ་འོས་པའི་མཆོད་པ་ལ་ཅིའི་ཕྱིར་རྡོག་རྒྱག་གཞུ་ཞིང་སྨད་དམ། ངའི་མི་རྒྱུད་ཡེས་ར་ཨེལ་པས་ང་ལ་ཕུལ་བའི་མཆོད་རྫས་ཀྱི་ཁག་བཟང་ཤོས་དེ་ཡིས་ཁྱོད་རྣམས་ཀྱི་ལུས་རྒྱགས་པར་བྱས་ཤིང་། ཁྱོད་ཀྱིས་བདག་ལས་རང་གི་བུ་ལ་ལྷག་པར་བཀུར་བསྟི་བྱས་པ་ཅི་ཡིན་ནམ།
[30] དེའི་ཕྱིར་ཡེས་ར་ཨེལ་གྱི་དཀོན་མཆོག་ཡ་ཝཱེས་འདི་སྐད་དུ། ཕ་མེས་ཀྱི་ཁྱིམ་རྒྱུད་དང་ཁྱོད་ཀྱི་མི་རྒྱུད་རྟག་ཏུ་ངའི་མདུན་དུ་བགྲོད་དགོས་ཞེས་སྔོན་ཆད་བཀའ་བསྩལ་ནའང་། ད་ལྟ་དེ་ལྟར་གཏན་ནས་མི་རུང་སྟེ། རྒྱུ་མཚན་ནི། ང་ལ་བཀུར་བསྟི་བྱེད་པའི་མི་ལ་ངས་ཀྱང་བརྩི་འཇོག་བྱེད་ཅིང་། ང་ལ་སྨད་པའི་མི་ལ་ངས་ཀྱང་སྣང་ཆུང་བྱའོ། །
[31] ཀྱེ་ཧོ་ཁྱོད་ཀྱི་སྟོབས་ཤུགས་དང་ཁྱོད་ཀྱི་ཕ་མེས་ཀྱི་སྟོབས་ཤུགས་གཅོད་པའི་ཉིན་མོ་ཞིག་འོང་བར་འགྱུར། ཁྱོད་ཀྱི་ཁྱིམ་དུ་མི་རྒན་པ་གཅིག་ཀྱང་རྙེད་པར་མི་འགྱུར།
[32] ཡ་ཝཱེས་ཡེས་ར་ཨེལ་པ་རྣམས་ལ་ལོངས་སྤྱོད་གནང་བའི་དུས་སུ། ཁྱོད་ཀྱིས་ངའི་བཞུགས་གནས་ཉམས་རྒུད་དུ་འགྲོ་བ་མཐོང་བར་འགྱུར། དེ་ནས་ཁྱོད་ཀྱི་ཁྱིམ་དུ་ནམ་ཡང་མི་རྒན་པ་གཅིག་ཀྱང་རྙེད་པར་མི་འགྱུར།
[33] ཁྱོད་ཀྱིས་མི་གང་ཞིག་ངའི་མཆོད་ཁྲི་ནས་འཕྲལ་བར་མི་བྱེད་པ་དེས། ཁྱོད་ཀྱི་མིག་ཞར་བ་དང་། ཁྱོད་ཀྱི་སེམས་སྡུག་པར་བྱའོ། །ཡང་ཁྱོད་ཀྱི་རིགས་རྒྱུད་ཐམས་ཅད་ལང་ཚོའི་དཔལ་གྱི་དུས་སུ་འཆི་བར་འགྱུར།
[34] ཡང་རྟགས་འདི་ལྟར་འབྱུང་སྟེ། ཁྱོད་ཀྱི་བུ་ཧོ་ཕེ་ནིས་དང་ཕེ་ནེ་ཧཱ་གཉིས་ཀྱི་སྟེང་དུ་འོང་བར་འགྱུར་ལ། དེ་གཉིས་ཀ་ཉིན་གཅིག་ལ་འཆི་བར་འགྱུར་ཞིང་།
[35] ཡང་ངས་མཆོད་དཔོན་བརྟན་པོ་ཞིག་བསླང་བར་བྱ་སྟེ། དེ་ཡིས་བདག་གི་དགོངས་པ་བཞིན་དུ་ལས་བྱེད་དོ། །ངས་དེ་ལ་ཁྱིམ་གཞི་བརྟན་པོ་ཞིག་བཙུགས་ནས། མཆོད་དཔོན་དེ་ནི་ནམ་ཡང་ངས་འབྱུག་སྣུམ་གྱིས་བྱུགས་ས་དེའི་མདུན་དུ་མཆོད་པ་དབུལ་དུ་འགྲོ་བར་འགྱུར།
[36] ཡང་ཁྱོད་ཀྱི་མི་རྒྱུད་ནས་ལུས་པའི་མི་ནི་མཆོད་དཔོན་དེའི་དྲུང་དུ་འོངས་ཏེ། དོང་ཙེའམ་བག་ལེབ་ཀྱི་དུམ་བུ་ཞིག་རྙེད་པའི་ཕྱིར་ཕྱག་འཚལ་གྱིན་འདི་ལྟར། ངས་བག་ལེབ་ཁམ་གང་བཟའ་བའི་ཕྱིར། མཆོད་དཔོན་གྱི་ལས་འགན་ཞིག་གནང་བར་མཛོད་ཅེས་ཞུ་བར་འགྱུར་ཞེས་གསུངས་སོ། །