[1] Miz baez he, goeng Hihliz, couh dwg goeng dang dieg Gyahliqliq dih daeuzdaeuz he, de dingq daengz gvanhhih Yehsuh sojmiz hih saeh le,
[2] couh doiq doengh boux gaen henz ndang de naeuz: “Gij neix dwg guh sijlij dih Yozhanq dauqlix lah! Dwg de cij ndaej guh doenghgij geizmiuj neix he.”
[3] Vihmaz goeng de yienghneix naeuz nej? Gij yienzyouz de dwg yienghneix: [3b]Gaxgonq, goeng Hihliz aeu meh nuengxsimj de Hihlozdij ma guh yah. [4]Yiengq Yozhanq rox le, couh doiq de naeuz: “Mwngz aeu meh vunz mwnq dwg famqfaz hih vwx.” [3a]Couh vih yienghneix, goeng Hihliz couh aeuqheiq hwj goenj dawz Yozhanq gyaeng haeuj ndaw lauz bae.
[5] Baenjlaiz goeng Hihliz dwg ij gaj Yozhanq hih, hoeng, de lau gij beksingq aeuqheiq, aenvih gij beksingq cungj naeuz Yozhanq dwg boux cenz gij vah Cangqdiq he.
[6] Yiengq miz ngoenz he, dwg goeng Hihliz dih ngoenzseng. Ngoenz mwnq de cingj hek hwj cienfanh nauhyied he. Yiengq dahlwg Hihlozdij ok daeuj diuquj hawj gij vunz daeuj gw haeux gw laeuj he yawj, guh hwj goeng Hihliz cungj angq hwj ij rai bae,
[7] couh doiq dah de baujcingq naeuz, mboujguenj dah de siengj aeu gijmaz, de cungj nyienh'eiq hawj dah de gijmaz.
[8] Daxmeh dah de rox le, couh yungx dahlwg de hawj de naeuz: “Cingj mwngz dawz ndaek raeuj guh sijlij dih Yozhanq coengq youq ndaw buenz hwj dawz ma hawj gou.”
[9] Goeng Hihliz dingq le, cungj roxnginh hoj guh ij rai bae, hoeng, couh aenvih de gaenq yiengq dah de baujcingq goq lo, doenghheij hek de cungj caemh dingqri, yiengq de mbouj ndaej mbouj ciuq gij cawjeiq dah de bae guh.
[10] Couh yienghneix, goeng de couh baij vunz bae ndaw lauz raemj ndaek raeuj Yozhanq,
[11] coengq youq ndaw buenz hwj dawz ma hawj dah de. Dah de raen le, couh dawz bae hawj daxmeh de.
[12] Gajlaeng doenghheij lwgsae Yozhanq dingq naeuz Yozhanq ngaiz rai lo le, couh bae dawz gij seihaiz de bae moek. Moek ndei le, couh bae naeuz Yehsuh ni.
[13] Yehsuh dingq daengz gij saeh neix le, couh gag naengh ruz bae daixlingh mwnq, siengj gag bae daengz mwnq dieg boihgox he bae. Yiengq, gij vunzlai rox le, cungj daj gak mbanj gak singz byaij roen daeuj gaen de.
[14] Hoeng, de liuh mbouj daengz, de ngamq baex hwnj hamq ma he, couh yawjraen miz baenx haujlai vunz daeuj cimh de. De raen yienghneix le, couh hojsik gyoengqde, caemh yw ndei doengh boux miz bingh he.
[15] Daengz yiengqhaemh gyangjngoenz ij doek mwhde, gyoengq lwgsae de raen yienghneix le, couh daeuj doiq de naeuz: “Gyangjngoenz couh ij doek lo, dineix caiq dwg boihgox he; hawj gyoengq vunz sanq lo bax. Hawj gyoengqde bae heij mbanj mwnq cimh gw cimh youq bax.”
[16] Hoeng, de dauq han gyoengqde naeuz: “Mboujyungh hawj gyoengqde sanq bae nej; faenhsou aeu gij gw hawj gyoengqde gw bax!”
[17] Gyoengq lwgsae de dingq le, han naeuz: “Gyoengqraeuz dineix cijngamq miz haj aen bingj caeuq song duz bya sat lo.”
[18] Yehsuh dingq le, naeuz: “Dawz goqdaeuj hawj gou.”
[19] De yienghneix naeuz le, caemh doq hawj gyoengq vunz naengh youq anj nyaengq ndei hwj. Gyoengq vunz naengh ndei le, de couh dawz haj aen bingj caeuq song duz bya mwnq hwnjdaeuj, ngiengx raeuj yawj hwnj mbwn bae docih Cangqdiq. Docih le, couh euj baenx mbiengj baenx gyeh hwj ndenq hawj gyoengq lwgsae de, hawj gyoengq lwgsae de faen hawj gyoengq vunz gw.
[20] Gajlaeng, gyoengq vunz bouxboux cungj ndaej gw, mbouj danhcij naeuz ndaej gw, vanzlij ndaej gw daengz imq, gw daengz lw, lw hwj coux ndaej baenx cibngeih lamz rim.
[21] Mwhde youq mwnq daihgaiq miz hajcien vunzsai baenx lai, vunzbaz caeuq lwgngez mbouj suenq.
[22] Gyoengq vunz gw sat le, Yehsuh couh majcangq coi gyoengq lwgsae de, hawj gyoengqde sien hwnj ruz bae, bae baih hamq huz baih de gaxgonq. Gajlaeng de cij naeuz hawj gyoengq vunzlai sanq maj.
[23] Daengj gyoengq vunz sanq maj le, de couh gag hwnj bya bae gouzhaenh Cangqdiq, itcig daengz doengxhaemh laep.
[24] Couh youq mwh aen ruz gaenq ok bae liz henz hamq gyae'gyae hih mwhde, cingq roeb daengz miz rumz hung, cixcaemh dwg ngig rumz raixcaix he, guh hwj bohlangq cung hawj aen ruz bubbub babbab ngeng bae ngeng dauq bae.
[25] Yiengq daengz ranz ij rongh hih mwhde, Yehsuh youq gwnz huz cingq yiengq gyoengq lwgsae de byaij bae.
[26] De bae hih mwhde, gyoengq lwgsae de raen de le, cungj lau hwj hemq naeuz: “Ox, miz fangz, miz fangz! Miz fangz daeuj huh!”
[27] Yehsuh dingq le, couh doq doiq gyoengqde naeuz: “Gaej lau, gaej lau! Dwg gou lah! Coengqsim!”
[28] Gajlaeng Bijdwz sawq cam naeuz: “Bouxcawj gou hax, hauhnaeuz cingqcaen dwg mwngz nex, couh cingj mwngz hawj gou byaij gwnz raemx bae cimh mwngz bax!”
[29] Yehsuh dingq le, han naeuz: “Mwngz daeuj bax!” Gajlaeng Bijdwz cingqcaen roengz ruz, byaij gwnz raemx ij bae cimh Yehsuh.
[30] Hoeng, de raen rumz daiq gaenj lai, couh lau hwj gaihcij caem roengzbae lo. De raen yienghneix le, cungj lau hwj hemq naeuz: “Bouxcawj gou hax, gouq gou bax!”
[31] Yehsuh raen yienghneix le, couh doq iet fawz rag dawz de, naeuz: “Mwngz sinq daiq noix lai lo! Vihmaz vanzlij mbouj coengqsim nej?”
[32] Couh yienghneix, gajlaeng Yehsuh caeuq Bijdwz cungj hwnj ruz bae lo. Song boux de hwnj ruz bae le, rumz caemh dingz lo.
[33] Yehsuh hwnj ruz bae le, gij lwgsae gwnz ruz cungj baiq de sax de naeuz: “Mwngz cingqcaen dwg lwg Cangqdiq.”
[34] Gyoengqde naengh ruz goq bae daengz baih hamq huz baih de hih mwnq dieg heuh Gwznizsajlwz he le, couh hwnj hamq ma lo.
[35] Yiengq gij vunz mwnq baex rox naeuz dwg Yehsuh he le, couh baij vunz bae doenghheij seiqhenz dieg mwnq, daiq doenghheij vunz miz bingh he daeuj daengz Yehsuh mwnq.
[36] Gyoengqde caenh gouz hawj gij vunz bingh mwnq dek gij dinbuh Yehsuh cungj ndaej lo. Gajlaeng, sojmiz ndaej dek daengz hih vunz bingh cungj ndaej ndei liux lo.