[1] Manjari inin, dangan amban meꞌ pituꞌ malaꞌikat magboꞌo pingganin pitu si aku. Paꞌinne si aku, “Dayiꞌ kew, pakitehante kew bang saꞌingge pangalegga inēnan dende dupang mabantuhin, hātinen iye puweblo bantu malaꞌi si bihing meꞌ boheꞌin.
[2] Meꞌ kanakuraꞌan si dunyahin bakas magjina duk dende dupang mabantu inin. Duk kēmon aꞌa si dunyahin taboꞌo-boꞌo du isab weꞌ hinangannen, kuweꞌ dalil aꞌa pinalango weꞌ boheꞌ ubas, gaꞌi ne siye iyaꞌ maghinangan laꞌat.”
[3] Manjari inin, paꞌasekan ku weꞌ Niyawa Tuhanin duk binoꞌo ku weꞌ malaꞌikatin pī si lahat makagindew-gindew. Manjari niyaꞌ takiteku laꞌi dende pasakey diyataꞌ sattuwa peyat. Sattuwa miyaꞌan pituꞌ kōknen duk sampūꞌ tanduknen. Lapat barannen sinulatan meꞌ ēn laꞌat bang si Tuhan.
[4] Dende miyaꞌan magsemmek taluk duk peyat, pupus weꞌ pamulawan, meꞌ palmata mahalgaꞌ duk meꞌ mutsaꞌ. Niyaꞌ boꞌone tikung bulawan pennoꞌ weꞌ kasammalan duk kasabulan pagjinanen.
[5] Diyataꞌ lendoꞌne niyaꞌ tasulat ēn, tinapukan hātinen. Iye inin tasulat diyataꞌ lendoꞌnen, “Puweblo Babilon mabantuhin. Poꞌon meꞌ dende dupangin duk tagnaꞌan kēmon masammal dem dunyahin.”
[6] Duk takiteku isab weꞌ dende miyaꞌan lango weꞌ lahaꞌ bakas taꞌinumnen, lahaꞌ meꞌ aꞌa sukuꞌ si Tuhanin, meꞌ bakas pinapateyin peggeꞌ gaꞌi siye palekkat amban si Isa. Pagkiteku dende miyaꞌan, ulaliꞌ ku manamal.
[7] “Weꞌey kew ulaliꞌ?” paꞌin malaꞌikatin. “Akahante kew kuweꞌitu bang ine hāti dende miyaꞌan duk hāti sattuwa pasakeyannen, iye taga kōk pituꞌin duk sampūꞌ tandukin.
[8] Sattuwa takitenu miyaꞌan bakas ellum matuꞌuhin saguwaꞌ kuweꞌitu ubus ne matey. Saguwaꞌ gaꞌi tiggel paguwaꞌ du iye balik amban lowang gaꞌi tatekkadin. Bang ne iye paguwaꞌ, patudju ne iye si tamanannen peggeꞌ magkaꞌat ne teꞌed iye. Manjari, bengngangan teꞌed meꞌ aꞌa si dunyahin, sasuku gaꞌ tasulat ēnden dem libru panulatan ēn meꞌ aꞌa maꞌellum salama-lamahin, sinulat masa gaꞌ pe dunyahin pinapanjari. Bengngangan siye kēmon pagkitede sattuwa miyaꞌan peggeꞌ bakas iye ellum matuꞌuhin, bu matey ne, ubus bu paguwaꞌ du balik.”
[9] Paꞌin malaꞌikatin pe, “Meꞌ pinahātiku kuweꞌitu inin tahāti du weꞌ aꞌa malalem taliꞌannen. Hāti pituꞌ kōk sattuwa miyaꞌan, pituꞌ kūd, iye paningkoloꞌan dende dupang miyaꞌan. Hātinen isab pituꞌ sultan.
[10] Lime meꞌ sultan miyaꞌan gaꞌ ne. Dambuwaꞌin magsultan pe sampay kuweꞌitu duk kapituꞌnen gaꞌ pe magsultan. Saguwaꞌ bang iye magsultan si pasōngan, daddaliꞌ du hadja pagsultannen.
[11] Duk sattuwa bakas maꞌellum matuꞌuhin bu ubus ne matey, iye miyaꞌan kawaluꞌ sultanin. Dangan iye amban meꞌ pituꞌ sultan miyaꞌan duk patudju ne iye si tamanannen.
[12] “Sampūꞌ tanduk takitenun, hātinen sampūꞌ sultan gaꞌ pe kapagsultan. Duk sampūꞌ sultan inin inurungan du kapatut magsultan magsumbayaꞌ duk sattuwahin. Saguwaꞌ daddaliꞌ du hadja pagsultanden.
[13] Meꞌ sampūꞌ sultan inin, magdambuwaꞌ isun siye weꞌ pangurungde basagden duk kapatutden si sattuwahin.
[14] Atuhande inēnan Bili-bilihin saguwaꞌ tadaꞌag du siye weꞌ Bili-bilihin duk meꞌ tindegnen, meꞌ aꞌa tapeneꞌnen duk tinawagnen duk mapateteg si iyehin. Hangkan ngandaꞌag Bili-bilihin peggeꞌ iye Panuhutan meꞌ panuhutanin kēmon duk iye Sultan meꞌ kasultananin kēmon.”
[15] Paꞌin malaꞌikatin pe si aku, “Boheꞌ takitenu lugal paningkoloꞌan dende dupangin, hātine miyaꞌan meꞌ aꞌa amban meꞌ kabangsa-bangsahan duk kalahat-lahatan duk pagsultanan duk amban bayuꞌ-bayuꞌan bissāhan.
[16] Duk sampūꞌ tanduk takitenun, hātinen sampūꞌ sultanin; bunsi du siye duk sattuwahin si dende dupang miyaꞌan. Eddoꞌde du kēmon pangalataꞌnen duk tantangande iye. Kakande sampay isinen duk eggasde iye.
[17] Hangkan inin hinangde peggeꞌ pinapikilan siye weꞌ Tuhanin ngahinang kinabayaꞌannen. Amban bayaꞌ Tuhan du hangkan siye magdambuwaꞌ isun weꞌ pangurungde kapatutden si sattuwahin sampay tuman kēmon bakas pinaꞌin Tuhanin.
[18] “Dende takitenun, hātine miyaꞌan puweblo mabantu magbayaꞌ si kēmon kasultanan si dunyahin.”