[1] Meꞌ kapungtinaꞌihanku masandel pu si Isa Almasihin, kataꞌuhanku weꞌ peggeꞌ asal sandel ne teꞌed kaꞌam pu si Isa Almasi asig ne ateybin. Duk peggeꞌ kataꞌuhanbi weꞌ malasa iye si kaꞌam hangkan gaꞌi kaꞌam suse. Pinagdambuwaꞌ meꞌ ateybin weꞌ Niyawa Tuhanin. Maglasa-ilasa ne kaꞌam duk maꞌaseꞌ kaꞌam si pagkasibi masandel pu si Isahin.
[2] Hangkan hep pākuku si kaꞌam weꞌ subey kaꞌam maglasa-ilasa duk magsulut-sulut kaꞌam duk magdambuwaꞌ pamikil duk magdambuwaꞌ dem atey. Bang hinangbi inin, jukup ne kēgkun.
[3] Ine-ine hinangbi, daꞌa angutun bi mahadje dibi. Saguwaꞌ subey kaꞌam magdiyawaꞌ atey si saweꞌbi duk subey luwal kimmatanbi saweꞌbin langkew amban kaꞌam.
[4] Daꞌa hadja iye tapikilbin kahāpanbin, saguwaꞌ pikilun bi isab kahāpan meꞌ saweꞌbin.
[5] Pagateybin subey kuweꞌ pagatey Isa Almasihin.
[6] Asal ne iye Tuhan saguwaꞌ kuweꞌ gaꞌ miyaꞌan mahalgaꞌ si iye
[7] peggeꞌ amban bayaꞌne inambanan weꞌ ne kēmon sukuꞌ si iyehin duk maglillaꞌ iye manjari banyagaꞌ. Duk manjari iye manusiyaꞌ tuꞌu si dunya.
[8] Pagmanusiyaꞌ ne iye, gaꞌ palangkewne dinen saguwaꞌ diyawaꞌ ateynen duk tinuhut weꞌ ne kēmon pangandaꞌakan Tuhan iyehin bisan pe sampay matey iye ilansang diyataꞌ olom.
[9] Iye hep inin sababnen hangkan iye pinalangkew teꞌed weꞌ Tuhanin duk ginellal iye palangkew amban kēmon,
[10] supaya kēmon malaꞌi si surgaꞌin duk matuꞌu si dunyahin duk sampay kēmon meꞌ pateyin pasujud mudji si Isa.
[11] Duk kēmon siye magbennal du weꞌ Isa Almasi asal tamanan malangkewin. Paꞌinde iyan, “Isa Almasi, iye Panuhutanten bi kēmon.” Duk sabab inin, tapudji du Samaten bi Tuhanin.
[12] Manjari meꞌ bagayku, paluꞌuku si kaꞌamin, luwal tuhutbi usihatkun. Na pasōng ne peggeꞌ gaꞌ ne ku luꞌu si kaꞌam, asal subey teꞌed tuhutbi. Subey kaꞌam talew si Tuhan duk magmātabat si iye duk dangan-dangan kaꞌam maggeꞌes ngubusan hinang tinagnaꞌan Tuhan dem ateybin panimbulne kaꞌamin.
[13] Peggeꞌ Tuhanin luwal kaꞌam tabanganne supaya kaꞌam ngatu nuhut kinabayaꞌannen duk supaya asal tahinangbi kinabayaꞌannen.
[14] Ine-ine subey hinangbi, hinangun bi duk daꞌa kaꞌam ngutuꞌ-ngutuꞌ atawa nganjawab,
[15] supaya gaꞌ niyaꞌ laꞌat luꞌu si kaꞌam duk gaꞌ niyaꞌ nallaꞌ kaꞌam. Kaꞌam meꞌ anak Tuhanin, hangkan subey hāp lunglun kawul-piꞌilbin, bisan kaꞌam tuꞌu si dunya patennaꞌ diyaleman meꞌ aꞌa libed duk laꞌatan. Kaꞌam dalil meꞌ dantaꞌ tuꞌu si dunya.
[16] Subey kaꞌam ngurung dantaꞌ si siye, hātinen akahun bi si siye lapal Tuhan makaꞌurungan siye umul gaꞌ tamanannen. Bang inin hinangbi asal kēgan ku manamal pagtekka ellew pabalik si Isa Almasi mapituhin peggeꞌ kataꞌuhanku du weꞌ hāp kaꞌujudan paghinangku maluꞌu si kaꞌamin.
[17] Sandelbi pu si Isa Almasihin dalil kulubanbi si Tuhan makasulut iyehin. Awwalley aꞌa magkuluban si Tuhanin subey isab muꞌus ininum supaya ganap pagkulubannen. Bang ku upama pinapatey, lahaꞌkun kuweꞌ dalil ininum binuꞌusan miyaꞌan peggeꞌ maglillaꞌ ku matey bang iye kinabayaꞌan Tuhanin. Manjari, bang matey ku kēgan pe ku, duk kēgan ku kuweꞌ kaꞌamin.
[18] Damikkiyan isab, bang saꞌupama ku matey subey kaꞌam kēgan kuweꞌ akuhin.
[19] Bang amban kabayaꞌan Isa Almasi, Panuhutanten bi, daꞌakku saꞌ Timoteo piyu si kaꞌam mura supaya pagbalik iye, kaboꞌohanne ku aka sabab kaꞌam duk asig ateykun.
[20] Si Timoteo du hadja dendangan matuꞌu magagal manamal kuweꞌ akuhin sabab kaꞌam.
[21] Sinduwehin iye hadja tapikilden kahāpanden, dumaꞌin sabab hinangde pu Isa Almasihin.
[22] Saguwaꞌ si Timoteo, kataꞌuhanbi du weꞌ asal kapangandelan iye. Panabangne aku magmahalayak aka-aka mahāpin, kuweꞌ ne panabangne di samanen.
[23] Hangkan daꞌakku du iye piyu si kaꞌam pagkataꞌuhanku ne bang inumeyde si akuhin tuꞌu.
[24] Ngandel ku si Panuhutanten bi si Isa Almasi weꞌ tapiyu du ku isab si kaꞌam mura.
[25] Tapikilku isab weꞌ subey ne daꞌakku balik piyu si kaꞌam pungtinaꞌiten bi si Epaprode. Dinaꞌak hep iye weꞌ bi pitu nabangan aku. Asal iye saweꞌku maghinang si Tuhanin duk saweꞌku mamēbbegan aka-aka mahāpin.
[26] Essebne teꞌed kaꞌam duk batang teꞌed kaꞌam kēmon kitene. Suse iye peggeꞌ takalebi weꞌ saki iye.
[27] Toꞌo, bakas saki iye duk arak ne matey. Saguwaꞌ kaꞌaseꞌan iye weꞌ Tuhanin duk dumaꞌin hadja iye, sampay aku isab, kaꞌaseꞌan du ku weꞌ Tuhanin peggeꞌ bang iye miyaꞌan matey magkatamba kasusehankun.
[28] Hangkan hep kabayaꞌanku teꞌed weꞌ tapiyu ne iye si kaꞌam supaya kaꞌam magkēg bang magkite ne kaꞌam balik. Manjari pakulang ne kasusehankun.
[29] Hangkan bang tekka iye luꞌu sābuhun bi iye, duk magkēg kaꞌam, peggeꞌ iye pungtinaꞌite bi sabab sandel isab iye si Panuhutanten bi Isa Almasi. Subey pagaddatanbi kēmon aꞌa kuweꞌ iyehin,
[30] peggeꞌ arak teꞌed iye matey sabab paghinangne pu si Almasihin. Gaꞌ kayimananne umulnen supaya ku hadja katabanganne peggeꞌ gaꞌi ku katabanganbi masa miyaꞌan.