[1] Dambuwaꞌ ellew, pagtapit ne isab pagkādjaꞌan meꞌ Yahudi inēnande Kādjaꞌan Pangessebanin, palipag si Isa pī si dambiyaꞌ lamew Jalil, inēnan isab lamew Tiberi. Banes teꞌed aꞌa paturul si iye peggeꞌ bakas takitede meꞌ hinanganne makaꞌulaliꞌin pagpakoleꞌne meꞌ aꞌa masakihin. Manjari pataked si Isa duk meꞌ tindegnen pī si punu duk ningkoloꞌ siye laꞌi.
[5] Pagpayam si Isa, banes teꞌed aꞌa takitene hap pī si iye. Hangkan paꞌinne pu si Pilip, dambuwaꞌ tindegnen, “Antag kite melli kinakan pamakan meꞌ aꞌa inin kēmon?”
[6] Paꞌin si Isa inin panuleyanne si Pilip bang ngandel ke iye si balakatnen. Bang si Isa, asal kataꞌuhanne bang ine sōng hininangnen.
[7] Sambungan si Pilip iye, paꞌinne, “Tangdan aꞌa maghinang dem walum bulan gaꞌi umabut pamelli kinakan pamakan meꞌ aꞌa inin, supaya dangan-dangan makaꞌakan tadaꞌahat.”
[8] Manjari nambung dambuwaꞌ tindeg si Isa seddili, si Andariyas. Si Andariyas inin pungtinaꞌi si Simon Petros.
[9] Paꞌinne pu si Isa, “Niyaꞌ tuꞌu nakanak lella-lella, niyaꞌ lime kayuꞌ panne duk duwe kennane. Saguwaꞌ asal gaꞌi umabut pamakan meꞌ aꞌa inin kēmon.”
[10] Manjari paꞌin si Isa si meꞌ tindegnen, “Daꞌakun bi meꞌ aꞌahin ningkoloꞌ.” Laꞌi si antag miyaꞌan luha balilinen. Ningkoloꞌ siye kēmon laꞌi. Meꞌ lellahin hadja, niyaꞌ lime ngibu ekkahanden. Seddili pe meꞌ dendehin duk meꞌ nakanakin.
[11] Manjari ineddoꞌ weꞌ si Isa pan nakanakin bu magpasalamat iye si Tuhan, ubus bu binahagiꞌ-bahagiꞌ weꞌ ne si meꞌ aꞌa magtingkoloꞌin. Damikkiyan isab binahagiꞌ-bahagiꞌ weꞌ ne kennahin duk inurungan siye taman kinabayaꞌanden.
[12] Pagesso ne siye, paꞌin si Isa si meꞌ tindegnen, “Tipunun bi meꞌ lukasin supaya gaꞌ niyaꞌ tapakaꞌat.”
[13] Manjari tinipun ne weꞌ de kēmon lukasin. Amban pan lime kayuꞌ kinakan meꞌ aꞌahin, lukas tinipunden niyaꞌ sampuūꞌ duk duwe bakaꞌ pennoꞌ.
[14] Pagkite meꞌ aꞌa malaꞌihin hinangan makaꞌulaliꞌ tahinang si Isa miyaꞌan, paꞌinde, “Asal inin ne teꞌed nabi inagad-agadte bi mapitu si dunyahin.”
[15] Kataꞌuhan si Isa weꞌ meꞌ aꞌahin sōng pī niggew iye dinaꞌak magsultan si siye, hangkan magtawus iye tahalaꞌ duk pī iye si punu dendang-dendangan.
[16] Pagsōng magalib ne, padurul meꞌ tindegnen pī si higad lamew.
[17] Lindem ne bu gaꞌ pe si Isa pī si siye. Manjari pasakey siye si bangkaꞌ duk palipag siye pī si dambiyaꞌ lamew tudju lahat Kapernaum.
[18] Gaꞌ du tiggel basag ne baliyuhin duk hadje goyakin.
[19] Pagubus ne siye kapamusey lime atawa ennem kilumetro talahannen, takitede si Isa lumengngan diyataꞌ kuwit-kuwit lamew patapit pī si bangkaꞌde. Kadahitan teꞌed siye manamal.
[20] Saguwaꞌ paꞌin si Isa si siye, “Daꞌa kaꞌam tinalew. Aku hep ituꞌ.”
[21] Sinakey weꞌ de si Isa duk pagsumakey ne iye, magtawus siye tekka si lahat tinudjuden.
[22] Pagsasumuhin, meꞌ aꞌa mabanes mapaꞌamban si dambiyaꞌ lamewin, takitede weꞌ dambuwaꞌ du bangkaꞌ bakas malaꞌihin; duk kataꞌuhande weꞌ gaꞌ si Isa pasakey laꞌi nuhut meꞌ tindegnen, saguwaꞌ luwal du meꞌ tindegnen mapatulakin.
[23] Niyaꞌ meꞌ bangkaꞌ bahu tekka amban puweblo Tiberi padungguꞌ tapit si antag bakas pagkakanande panin pagubus si Isa magpasalamat.
[24] Manjari pagkite meꞌ aꞌahin weꞌ gaꞌ hatiꞌ laꞌi si Isa atawa meꞌ tindegnen, pasakey siye si meꞌ bangkaꞌ miyaꞌan miha si Isa pī si Kapernaum.
[25] Pagtakasuwaꞌde si Isa laꞌi si dambiyaꞌ lamew, paꞌinde si iye, “Tuwan, sumiyan papitunun?”
[26] Sambungan si Isa siye, paꞌinne, “Sabennal akahante kaꞌam, hangkan ku pihabi, peggeꞌ esso kaꞌam weꞌ panin. Saguwaꞌ gaꞌ tahātibi hinangan makaꞌulaliꞌ tahinangku si matahanbin.
[27] Daꞌa iye pagtuyuꞌanun bi kinakan mamagkaꞌatin. Saguwaꞌ iye subey pagtuyuꞌanbin kinakan manggaꞌi magkaꞌatin, kinakan makaꞌellum salama-lamahin. Aku, Anak Manusiyaꞌin, mangurungan kaꞌam kinakan inin, peggeꞌ kaꞌurungan ku kapatut weꞌ Samaku Tuhanin.”
[28] Manjari tinilew weꞌ de si Isa, paꞌinde, “Na, ine ne paꞌin subey hinang kami duk tatuhut kami kinabayaꞌan Tuhanin?”
[29] Sambungan si Isa siye, paꞌinne, “Iye inin kabayaꞌan Tuhan subey hininangbin, weꞌ subey kaꞌam kahagad si aku, iye pinapitunen.”
[30] Paꞌinde pu si Isa, “Tandaꞌ ine pinakitehannu si kamihin duk kami kahagad si kaꞌu? Meꞌ kapapuꞌanten bi mangan manna laꞌi dem lahat makagindew-gindew awwalley. Paꞌin kitabin, ‘Inurungan siye weꞌ ne kinakan amban surgaꞌ.’ Na, kaꞌu,” paꞌinde pu si Isa, “ine hinang tahinangnun?”
[32] Paꞌin si Isa si siye, “Sabennal akahante kaꞌam, mannahin, kinakan pinangurung si Musahin, dumaꞌin miyaꞌan kinakan mabennal amban surgaꞌin. Kinakan amban surgaꞌin, iye kinakan pangurung Samaku si kaꞌamin, duk pinangurungne inin, kinakan mabennalin.
[33] Peggeꞌ kinakan pangurung Tuhan inin, iye ne mapitu amban Tuhanin duk ngurung umul iye si manusiyaꞌ.”
[34] Manjari māku meꞌ aꞌa miyaꞌan pu si Isa, paꞌinde, “Tuwan, tiggelan kami ellum, urungun kami kinakan pinaꞌinnu inin.”
[35] Paꞌin si Isa, “Aku ne hep kinakan makaꞌellumin. Sasuku manuhut akuhin gaꞌi ne teꞌed inusan balik. Duk sasuku makahagad si akuhin, gaꞌi ne teꞌed lekkakan balik.
[36] Na, bakas ne kaꞌam akahanku weꞌ bisan ku takitebi, gaꞌi du kaꞌam kahagad.
[37] Kēmon pinasukuꞌ Samaku si akuhin, nuhut du si aku. Duk kēmon manuhut si akuhin, gaꞌi patahalaꞌku,
[38] peggeꞌ pitu ku dumaꞌin ngahinang kinabayaꞌankun saguwaꞌ ngahinang kinabayaꞌan Tuhanin, iye mamapitu akuhin.
[39] Kabayaꞌan Tuhanin weꞌ gaꞌ teꞌed niyaꞌ lepas amban aku meꞌ aꞌa pinasukuꞌne si akuhin. Saguwaꞌ subey pakellumku siye kēmon si ellew dambuli.
[40] Peggeꞌ kabayaꞌan Samaku Tuhanin, weꞌ subey ellum salama-lama kēmon mangite duk makahagad si akuhin, Anaknen. Duk pakellumku siye si ellew dambuli.”
[41] Manjari ngunub-ngunub meꞌ aꞌahin sabab pinaꞌin si Isa miyaꞌan pagpaꞌinne, “Aku kinakan amban surgaꞌin.”
[42] Paꞌinde, “Dumaꞌin ke aꞌa inin si Isa, anak si Yusupin? Kataꞌuhante bi hep saꞌi-samanen. Weꞌey iye magpaꞌin weꞌ amban surgaꞌ iye?”
[43] Nambung si Isa paꞌinne, “Daꞌa kaꞌam magkunub-kunub luꞌu.
[44] Gaꞌ niyaꞌ kapanuhut si aku bang gaꞌi iye urungan Tuhan mamapitu akuhin bayaꞌ nuhut aku. Duk manuhut si akuhin pakellumku du si ellew dambuli.
[45] Niyaꞌ tasulat dem kitab kanabi-nabihanin sa inin, ‘Tinoloꞌan du siye kēmon weꞌ Tuhanin.’ ” Paꞌin si Isa pe, “Kēmon mapakale si panoloꞌ Samaku Tuhanin, siye ne matumuhut si akuhin.
[46] Dumaꞌin hātine inin weꞌ niyaꞌ manusiyaꞌ bakas ngite Samaku Tuhanin. Gaꞌ niyaꞌ bakas ngite Samakun; luwal hadja aku, mapitu amban Tuhanin, bakas mangite iyehin.
[47] Sabennal akahante kaꞌam,” paꞌin si Isa, “sasuku makahagad si akuhin ellum salama-lama.
[48] Aku kinakan makaꞌellumin,” paꞌin si Isa.
[49] “Meꞌ kapapuꞌanbin makaꞌakan manna laꞌi si lahat makagindew-gindew, saguwaꞌ matey du siye.
[50] Saguwaꞌ kinakan amban surgaꞌ inin, bang niyaꞌ aꞌa makaꞌakanne, gaꞌi iye matey.
[51] Aku ne kinakan amban surgaꞌin. Aku ne kinakan makaꞌellumin. Bang niyaꞌ mangan kinakan inin, ellum iye salama-lama. Duk kinakan pamakanku si iyehin isikun. Paglillaꞌku barankun supaya kēmon manusiyaꞌin ellum salama-lama,” paꞌin si Isa.
[52] Manjari magjawab meꞌ Yahudihin sabab binissā si Isa miyaꞌan. Paꞌinde, “Inumey pangurung aꞌa inin isinen pamakanne kite?”
[53] Paꞌin si Isa si siye, “Sabennal akahante kaꞌam, bang gaꞌi du kakanbi isi Anak Manusiyaꞌin, hātinen isikun, duk bang gaꞌi du inumbi lahaꞌkun, gaꞌ niyaꞌ umulbi bennal.
[54] Mamangan isikun duk manginum lahaꞌkun, ellum salama-lama. Duk pakellumku iye si ellew dambuli.
[55] Peggeꞌ isikun asal kinakan teꞌedin duk lahaꞌkun asal ininum teꞌedin.
[56] Sasuku mamangan isikun duk manginum lahaꞌkun, teteg si aku, duk teteg ku si iye.
[57] Samaku Tuhanin, mamapitu akuhin, asal iye poꞌon umulin duk ellum ku sababne. Damikkiyan isab aꞌa mamangan akuhin ellum du sababku.
[58] Inin hep kinakan mapitu amban surgaꞌin,” paꞌin si Isa. “Kinakan inin gaꞌi magsaliꞌ duk kinakan takakan meꞌ kapapuꞌanbin, peggeꞌ bisan kakande kinakan miyaꞌan matey du siye. Bu kinakan amban surgaꞌ inin, sasuku manganne ellum salama-lama.”
[59] Binissā inin weꞌ si Isa sābune magtoloꞌ dem langgal laꞌi si Kapernaum.
[60] Ekka meꞌ tindeg si Isahin makakale panoloꞌne inin duk paꞌinde, “Asal makalanduꞌ pamanoloꞌne inin. Gaꞌ niyaꞌ makasandal pakale si iyan.”
[61] Gaꞌ niyaꞌ ngakahan si Isa saguwaꞌ kataꞌuhanne weꞌ ngunub-ngunub siye sabab panoloꞌne miyaꞌan. Hangkan paꞌinne si siye, “Laꞌat ke ateybin sabab panoloꞌku miyaꞌan?
[62] Na saꞌingge enteꞌ, bang kitebi ku, Anak Manusiyaꞌin, balik pī si lahat bakas palaꞌihanku matuꞌuhin?
[63] Akahante kaꞌam,” paꞌin si Isa, “Niyawa Tuhanin hep makapakellum kitehin bi. Bang kabasag manusiyaꞌin gaꞌ niyaꞌ gunane, gaꞌi makapakellum manusiyaꞌ. Meꞌ bakas panoloꞌku si kaꞌamin makapakellum peggeꞌ paluwas inin amban Niyawa Tuhanin.
[64] Saguwaꞌ niyaꞌ kaꞌam gaꞌi kahagad si aku,” paꞌin si Isa. Paꞌin si Isa miyaꞌan peggeꞌ asal kataꞌuhanne kemuwe tagnaꞌ bang sine manggaꞌi makahagad si iyehin duk bang sine mamuddihan iyehin.
[65] Duk paꞌinne pe, “Iye hep inin sababnen hangkan bakas paꞌinku si kaꞌam weꞌ gaꞌ niyaꞌ tumuhut si aku bang dumaꞌin Samaku Tuhanin mangurung bayaꞌ si iyehin.”
[66] Sabab miyaꞌan ekka meꞌ tindeg si Isahin tahalaꞌ amban iye duk gaꞌi ne nuhut iye.
[67] Hangkan paꞌin si Isa si tindegne sampūꞌ duk duwehin, “Na, kaꞌam, mabayaꞌ ke isab kaꞌam tahalaꞌ?”
[68] Nambung si Simon Petros, paꞌinne, “Tuwan, sine panuhutan kamihin bang dumaꞌin kaꞌu? Luwal du kaꞌu makabissā meꞌ bissā makapakellum salama-lamahin.
[69] Kahagad ne teꞌed kami duk kataꞌuhan kami ne teꞌed weꞌ kaꞌu masutsi mapitu amban Tuhanin.”
[70] Paꞌin si Isa si siye, “Kaꞌam ne iyan sampūꞌ duk duwe meꞌ tindegku tapeneꞌkun. Saguwaꞌ dangan kaꞌam paꞌasekan seyitan.”
[71] Bissā si Isa inin sabab si Judas, anak si Simon Iskariyotin. Peggeꞌ si Judas inin dangan si meꞌ tindeg si Isa sampūꞌ duk duwehin duk iye mamuddihan si Isahin si pasōngan.