[1] Iye hep inin sababnen hangkan ku māku-māku si Tuhan para si kaꞌam. Tiyaꞌ ku kinalabusu sabab pagmahalayakku si kaꞌam meꞌ dumaꞌin Yahudihin pasal Isa Almasi.
[2] Bakas takalebi du weꞌ peggeꞌ malasa duk maꞌaseꞌ Tuhanin, niyaꞌ hinang pinangandel weꞌ ne si aku duk hinang inin para si kahāpanbi du.
[3] Ginaraꞌ Tuhanin, gaꞌ niyaꞌ bakas ngataꞌuhanne matuꞌuhin saguwaꞌ pinakitaꞌu inin weꞌ ne si aku. Bakas akahante kaꞌam kuweꞌahat sabab inin tuꞌu si sulat inin
[4] duk bang batsabi, tahātibi du isab bakas pinakitaꞌu si aku sabab Almasihin.
[5] Gaꞌ inin pinakitaꞌu weꞌ Tuhanin si meꞌ manusiyaꞌ awwalley. Saguwaꞌ kuweꞌitu pinakitaꞌu ne weꞌ Niyawa Tuhanin si meꞌ kawakilannen duk si meꞌ aꞌa magpalataꞌ bissānen.
[6] Iye inin ginaraꞌ Tuhan pinakitaꞌune si kamihin, weꞌ kaꞌam meꞌ dumaꞌin Yahudihin, sumakup ne kaꞌam si kami meꞌ Yahudihin iledjikiꞌan weꞌ Tuhanin duk sakup ne kaꞌam si baran Almasihin, hātinen si meꞌ masandel si iyehin. Duk kēmon sanggup Tuhanin sukuꞌ si kaꞌam isab peggeꞌ kinahagad weꞌ bi aka-aka mahāpin.
[7] Sabab aseꞌ duk balakat Tuhanin pinasukuꞌan ku hinang weꞌ Tuhanin dinaꞌak minahalayak aka-aka mahāp inin.
[8] Amban kēmon meꞌ aꞌa sukuꞌ si Tuhanin, aku tamanan madiyawaꞌ pagaꞌanen. Saguwaꞌ aku pe tapeneꞌ Tuhanin dinaꞌak piyu si meꞌ dumaꞌin Yahudihin, ngakahan siye sabab meꞌ ledjikiꞌ gaꞌi takila-kila pinangurungne si kitehin bi kēmon sabab Almasi.
[9] Duk Tuhan magpapanjari kēmon-kēmonin, dinaꞌak ku isab weꞌ ne magpahāti si kēmon aꞌa bang ine hininangnen supaya magjatu ginaraꞌne tagnaꞌley pe teꞌed duk gaꞌ bakas pinakitaꞌu weꞌ ne matuꞌuhin.
[10] Gaꞌ inin pinakitaꞌu weꞌ Tuhanin matuꞌuhin peggeꞌ kabayaꞌannen weꞌ kataꞌuhan du weꞌ meꞌ malaꞌikat taga kapatut duk balakatin, weꞌ asal lalem kēmon bayuꞌ-bayuꞌan kataꞌu Tuhanin. Kataꞌuhande inin sababte bi meꞌ masandel pu si Isa Almasihin.
[11] Ginaraꞌ Tuhan inin andang ne tapikilne tagnaꞌ awwalley pe duk magjatu ginaraꞌne inin sakaliꞌ ne pinapitu weꞌ ne Isa Almasi, Panuhutanten bi.
[12] Peggeꞌ magdambuwaꞌ ne kite bi duk Almasi duk peggeꞌ sandel kite bi si iye hangkan bahani ne kite bi duk gaꞌi kite bi magalang-alang pī si panaꞌanan Tuhanin.
[13] Hangkan hep junjungku si kaꞌam, paꞌasigun bi ateybin bisan ku ituꞌ magsandal kabinasahan sabab pagmahalayakku si kaꞌamin. Kēmon inin para si kahāpanbi du.
[14] Bang tapikil-pikilku ginaraꞌ inin, asal pasujud ku si Samate bi Tuhanin.
[15] Iye mangurung umul si kēmon magtewtey-anak si surgaꞌ duk si dunyahin.
[16] Pāku-pākuku si Tuhanin, peggeꞌ hadje teꞌed lasanen duk aseꞌnen duk balakatnen, karayaw papagenne teꞌed ateybin sabab Niyawanen.
[17] Karayaw isab weꞌ teteg Almasi luꞌu dem ateybi sabab sandelbi si iyehin. Pāku-pākuku isab karayaw haget teꞌed lasabi si Tuhanin duk si pagkasibin.
[18] Bang haget lasabin, tahātibi teꞌed iyan duk kēmon aꞌa sukuꞌ si Tuhanin, tahātide du isab bang saꞌingge hadje lasa Almasi manggaꞌi takila-kilahin.
[19] Toꞌo asal karayaw kataꞌuhanbi bang saꞌingge hadje lasanen - bisan gaꞌi tahātite kēmon - supaya tipun luꞌu si kaꞌam kēmon addat duk pikilan Tuhanin.
[20] Pudjite bi Tuhanin peggeꞌ sabab balakatne pinapitune dem ateyten bi, mas pasōng pe tahinangnen amban kēmon tapākuten atawa bisan tapikilten.
[21] Pudjite bi Tuhanin, kēmon kite bi meꞌ masandel pu si Isa Almasihin. Pudjite bi Tuhanin sabab Almasi salama-lama gaꞌ tamanan. Amin.