[1] Manjari, peggeꞌ subey ku magabbu, magabbu pe ku bisan ne gaꞌ niyaꞌ kagunahan pagabbukun. Kuweꞌitu akahante kaꞌam sabab meꞌ pinabagala Almasi si akuhin duk meꞌ pinakitaꞌune si akuhin.
[2] Niyaꞌ kataꞌuhanku dambuwaꞌ lella nuhut si Isa Almasi, taboꞌo iye pī si surgaꞌ. Niyaꞌ ne sampūꞌ duk ampat tahun palabey. Gaꞌi kataꞌuhanku bang tapī ke teꞌed iye atawa bang pinabagala ke si iye surgaꞌin. Tuhanin hadja mangataꞌuhan iyehin.
[3] Saguwaꞌ kataꞌuhanku weꞌ asal taboꞌo iye laꞌi si surgaꞌ, laꞌi si palaꞌihan Tuhanin. Tabalikku, gaꞌi kataꞌuhanku bang tapī ke teꞌed iye atawa bang pinabagala ke si iye surgaꞌin. Tuhanin hadja mangataꞌuhan iyehin.
[4] Duk sābune malaꞌihin, niyaꞌ meꞌ bissā takalene gaꞌi tabissā si bissāhan manusiyaꞌ duk gaꞌi makajari bissā manusiyaꞌ.
[5] Patut ku magabbu sabab aꞌa inin saguwaꞌ gaꞌi ku magabbu sabab dikun, luwal sabab meꞌ kalammahankun.
[6] Bang asal mabayaꞌ ku magabbu, dumaꞌin du pagabbukun kuweꞌ pagabbu aꞌa dupang peggeꞌ toꞌo du kēmon pinaꞌinkun. Saguwaꞌ gaꞌi ku magabbu, kaw lumanduꞌ pamahadje meꞌ aꞌa akuhin. Kabayaꞌankun kimmatande ku sabab meꞌ hinanganku takiteden duk meꞌ bissāku takaleden.
[7] Duk supaya ku gaꞌi abbuhan manamal peggeꞌ ekka meꞌ pinabagala weꞌ Tuhanin si aku hāp manamal, hangkan niyaꞌ pinatekka weꞌ ne si aku saki peddiꞌ manamal. Saki inin kuweꞌ daraꞌakan seyitanin ngalubakan aku supaya ku gaꞌi makapagabbu.
[8] Mintellu ku māku-māku pu Almasi pakiꞌānanku si iye sakiku inin.
[9] Saguwaꞌ nambung iye, paꞌinne, “Panabangkun sarang si kēmon talabeynun, peggeꞌ takite teꞌed balakatkun bang lamma ne kew.” Hangkan hep sinna ne ku teꞌed magabbu sabab meꞌ kalammahankun, peggeꞌ bang ku lamma talessaku balakat Almasihin nabangan aku.
[10] Duk iyan jānnen hangkan ku kasulutan ine-ine tekka si aku, bang lamma ke barankun atawa pinaꞌiyaꞌ ku, atawa magtiksaꞌ ku, atawa bininasa ku, atawa dem kasusehan ku. Kēmon inin tasandalku peggeꞌ Isa Almasi ne Panuhutankun. Peggeꞌ bang ku lamma, iye matoꞌohin, basag du ku.
[11] Asal kuweꞌ ku teꞌed aꞌa dupang mahadje diku. Saguwaꞌ kaꞌam sinusunankun peggeꞌ gaꞌ ku miyaꞌan mahadje diku bang pinahadje siꞌ ku weꞌ bi. Peggeꞌ bisan paꞌin meꞌ sinduwehin weꞌ gaꞌ niyaꞌ kagunahanku, gaꞌi du ku kalindihan weꞌ meꞌ aꞌa maluꞌu magmā-mā kawakilan siye weꞌ Almasihin.
[12] Kaluꞌuku si kaꞌam matuꞌuhin, takitebi weꞌ asal bennal ku bakas kawakilan weꞌ Isa Almasi sabab meꞌ hinangankun. Bisan ine-ine saggaꞌ si aku sandalanku hadja, duk takitebi teꞌed meꞌ tandaꞌ hininangkun, meꞌ hinangan makaꞌulaliꞌ duk hinangan balakatan.
[13] Ine duseku si kaꞌamin? Meꞌ hininangku si meꞌ pagtipunan meꞌ masandel pu si Isa Almasi sinduwehin, saliꞌ du isab kuweꞌ hininangku luꞌu si kaꞌamin. Iye hadja pagbiddaꞌannen peggeꞌ gaꞌi kaꞌam kabohatan weꞌ ku sabab gaꞌi ku māku tangdan si kaꞌam. Bang iyan salaꞌkun, ampunun bi ku hadja.
[14] Memes ne ku hap piyu nindew kaꞌam duk kamintellu inin ne ku memes piyu nindew kaꞌam. Saguwaꞌ sa matuꞌuhin masi du ku gaꞌi māku sīn amban kaꞌam. Dumaꞌin sīnbin inapaskun saguwaꞌ lasabin. Dumaꞌin hep meꞌ anakin subey maggastu para si meꞌ matettoꞌaden, saguwaꞌ meꞌ matettoꞌahin subey maggastu para si meꞌ anakden, duk kaꞌam kuweꞌ meꞌ anakku.
[15] Asal sinna ku teꞌed ngurungan kaꞌam kēmon maniyaꞌ si akuhin duk paglillaꞌku sampay barankun basta tatabangte hadja kaꞌam. Pasōng lasaku si kaꞌamin saguwaꞌ kuweꞌ ngakulang lasabi si akuhin.
[16] Na, magbennal ne kaꞌam weꞌ gaꞌ ku bakas māku tangdan amban kaꞌam. Saguwaꞌ niyaꞌ kaꞌam magpaꞌin weꞌ akkalan koꞌ ku duk tapadupang koꞌ kaꞌam weꞌ ku supaya kaꞌam taꞌeddoꞌanku sīn.
[17] Saꞌingge pamadupangku kaꞌamin? Iliba ke kaꞌam weꞌ meꞌ aꞌa dinaꞌakku mapiyuhin?
[18] Bakas dinaꞌak hep weꞌ ku si Titus piyu matuꞌuhin duk niyaꞌ isab daꞌakku pungtinaꞌite bi nuhutan iye. Pinadupang ke kaꞌam weꞌ si Titus supaya taꞌeddoꞌne sīnbin? Gaꞌi tapaꞌinbi weꞌ pinadupang kaꞌam weꞌ ne peggeꞌ saliꞌ kami duwangan bentel duk saliꞌ hinangan kamihin.
[19] Kannalbi hatu weꞌ iye bahan kami inin mēbbegan di kamihin. Saguwaꞌ gaꞌi iyan toꞌo. Missā kami si pagmatahan Tuhan kuweꞌ meꞌ aꞌa sukuꞌ pu Almasi. Kēmon hinangan kami si kaꞌamin, meꞌ bagayku, asal para si kahāpanbi du supaya ngabasag sandelbi pu Almasihin.
[20] Suse ku kaw pagtekkaku luꞌu gaꞌi ku kahāpan si meꞌ kawul-piꞌilbin, manjari kaw isab kaꞌam gaꞌi kahāpan si aku sabab meꞌ hinanganku si kaꞌamin. Suse ku kaw niyaꞌ kaꞌam magsaggaꞌ-sinaggaꞌ, duk magkimbū; kaw niyaꞌ kaꞌam mura astel, duk liskutan, gaꞌi tapikilbi saweꞌbin saguwaꞌ dibin hadja tapikilbin; kaw niyaꞌ kaꞌam ngalimutan saweꞌbi duk magkoto-koto kaꞌam duk magabbu duk sasew ne diyalemanbin.
[21] Suse ku kaw pagluꞌu ne ku si kaꞌam, iyaꞌ ku si Tuhan sabab meꞌ hinanganbi manggaꞌi mahāpin. Duk magdukka ne ku sabab meꞌ maꞌekka bakas magduse matuꞌuhin bu gaꞌ pe pagsusunande duk lebbahande meꞌ dusede magjina duk magbaꞌisin.