[1] is ke bād isrāīlī moāb ke maidānoṅ meṅ pahuṅch kar daryā-e-yardan ke mashriqī kināre par yarīhū ke āmne-sāmne ḳhaimāzan hue.
[2] moāb ke bādshāh balaq bin safor ko mālūm huā ki isrāīliyoṅ ne amoriyoṅ ke sāth kyā kuchh kiyā hai.
[3] moābiyoṅ ne yih bhī dekhā ki isrāīlī bahut zyādā haiṅ, is lie un par dahshat chhā gaī.
[4] unhoṅ ne midiyāniyoṅ ke buzurgoṅ se bāt kī, “ab yih hujūm us tarah hamāre irdgird kā ilāqā chaṭ kar jāegā jis tarah bail maidān kī ghās chaṭ kar jātā hai.”
[5] tab balaq ne apne qāsid fator shahr ko bheje jo daryā-e-furāt par wāqe thā aur jahāṅ bal'ām bin baor apne watan meṅ rahtā thā. qāsid use bulāne ke lie us ke pās pahuṅche aur use balaq kā paiġhām sunāyā, “ek qaum misr se nikal āī hai jo rū-e-zamīn par chhā kar mere qarīb hī ābād huī hai.
[6] is lie āeṅ aur in logoṅ par lānat bhejeṅ, kyūṅki wuh mujh se zyādā tāqatwar haiṅ. phir shāyad maiṅ unheṅ shikast de kar mulk se bhagā sakūṅ. kyūṅki maiṅ jāntā hūṅ ki jinheṅ āp barkat dete haiṅ unheṅ barkat miltī hai aur jin par āp lānat bhejte haiṅ un par lānat ātī hai.”
[7] yih paiġhām le kar moāb aur midiyān ke buzurg rawānā hue. un ke pās in'ām ke paise the. bal'ām ke pās pahuṅch kar unhoṅ ne use balaq kā paiġhām sunāyā.
[8] bal'ām ne kahā, “rāt yahāṅ guzāreṅ. kal maiṅ āp ko batā dūṅgā ki rab is ke bāre meṅ kyā farmātā hai.” chunāṅche moābī sardār us ke pās ṭhahar gae.
[9] rāt ke waqt allāh bal'ām par zāhir huā. us ne pūchhā, “yih ādmī kaun haiṅ jo tere pās āe haiṅ?”
[10] bal'ām ne jawāb diyā, “moāb ke bādshāh balaq bin safor ne mujhe paiġhām bhejā hai,
[11] ‘jo qaum misr se nikal āī hai wuh rū-e-zamīn par chhā gaī hai. is lie āeṅ aur mere lie un par lānat bhejeṅ. phir shāyad maiṅ un se laṛ kar unheṅ bhagā dene meṅ kāmyāb ho jāūṅ’.”
[12] rab ne bal'ām se kahā, “un ke sāth na jānā. tujhe un par lānat bhejne kī ijāzat nahīṅ hai, kyūṅki un par merī barkat hai.”
[13] aglī subh bal'ām jāg uṭhā to us ne balaq ke sardāroṅ se kahā, “apne watan wāpas chale jāeṅ, kyūṅki rab ne mujhe āp ke sāth jāne kī ijāzat nahīṅ dī.”
[14] chunāṅche moābī sardār ḳhālī hāth balaq ke pās wāpas āe. unhoṅ ne kahā, “bal'ām hamāre sāth āne se inkār kartā hai.”
[15] tab balaq ne aur sardār bheje jo pahle wāloṅ kī nisbat tādād aur uhde ke lihāz se zyādā the.
[16] wuh bal'ām ke pās jā kar kahne lage, “balaq bin safor kahte haiṅ ki koī bhī bāt āp ko mere pās āne se na roke,
[17] kyūṅki maiṅ āp ko baṛā in'ām dūṅgā. āp jo bhī kaheṅge maiṅ karne ke lie tayyār hūṅ. āeṅ to sahī aur mere lie un logoṅ par lānat bhejeṅ.”
[18] lekin bal'ām ne jawāb diyā, “agar balaq apne mahal ko chāṅdī aur sone se bhar kar bhī mujhe de to bhī maiṅ rab apne ḳhudā ke farmān kī ḳhilāfwarzī nahīṅ kar saktā, ḳhwāh bāt chhoṭī ho yā baṛī.
[19] āp dūsre sardāroṅ kī tarah rāt yahāṅ guzāreṅ. itne meṅ maiṅ mālūm karūṅga ki rab mujhe mazīd kyā kuchh batātā hai.”
[20] us rāt allāh bal'ām par zāhir huā aur kahā, “chūṅki yih ādmī tujhe bulāne āe haiṅ is lie un ke sāth chalā jā. lekin sirf wuhī kuchh karnā jo maiṅ tujhe batāūṅgā.”
[21] subh ko bal'ām ne uṭh kar apnī gadhī par zīn kasā aur moābī sardāroṅ ke sāth chal paṛā.
[22] lekin allāh nihāyat ġhusse huā ki wuh jā rahā hai, is lie us kā farishtā us kā muqābalā karne ke lie rāste meṅ khaṛā ho gayā. bal'ām apnī gadhī par sawār thā aur us ke do naukar us ke sāth chal rahe the.
[23] jab gadhī ne dekhā ki rab kā farishtā apne hāth meṅ talwār thāme hue rāste meṅ khaṛā hai to wuh rāste se haṭ kar khet meṅ chalne lagī. bal'ām use mārte mārte rāste par wāpas le āyā.
[24] phir wuh angūr ke do bāġhoṅ ke darmiyān se guzarne lage. rāstā tang thā, kyūṅki wuh donoṅ taraf bāġhoṅ kī chārdīwārī se band thā. ab rab kā farishtā wahāṅ khaṛā huā.
[25] gadhī yih dekh kar chārdīwārī ke sāth sāth chalne lagī, aur bal'ām kā pāoṅ kuchlā gayā. us ne use dubārā mārā.
[26] rab kā farishtā āge niklā aur tīsrī martabā rāste meṅ khaṛā ho gayā. ab rāste se haṭ jāne kī koī gunjāish nahīṅ thī, na dāīṅ taraf aur na bāīṅ taraf.
[27] jab gadhī ne rab kā farishtā dekhā to wuh leṭ gaī. bal'ām ko ġhussā ā gayā, aur us ne use apnī lāṭhī se ḳhūb mārā.
[28] tab rab ne gadhī ko bolne diyā, aur us ne bal'ām se kahā, “maiṅ ne āp se kyā ġhalat sulūk kiyā hai ki āp mujhe ab tīsrī dafā pīṭ rahe haiṅ?”
[29] bal'ām ne jawāb diyā, “tū ne mujhe bewuqūf banāyā hai! kāsh mere hāth meṅ talwār hotī to maiṅ abhī tujhe zabah kar detā!”
[30] gadhī ne bal'ām se kahā, “kyā maiṅ āp kī gadhī nahīṅ hūṅ jis par āp āj tak sawār hote rahe haiṅ? kyā mujhe kabhī aisā karne kī ādat thī?” us ne kahā, “nahīṅ.”
[31] phir rab ne bal'ām kī āṅkheṅ kholīṅ aur us ne rab ke farishte ko dekhā jo ab tak hāth meṅ talwār thāme hue rāste meṅ khaṛā thā. bal'ām ne muṅh ke bal gir kar sijdā kiyā.
[32] rab ke farishte ne pūchhā, “tū ne tīn bār apnī gadhī ko kyūṅ pīṭā? maiṅ tere muqābale meṅ āyā hūṅ, kyūṅki jis taraf tū baṛh rahā hai us kā anjām burā hai.
[33] gadhī tīn martabā mujhe dekh kar merī taraf se haṭ gaī. agar wuh na haṭtī to tū us waqt halāk ho gayā hotā agarche maiṅ gadhī ko chhoṛ detā.”
[34] bal'ām ne rab ke farishte se kahā, “maiṅ ne gunāh kiyā hai. mujhe mālūm nahīṅ thā ki tū mere muqābale meṅ rāste meṅ khaṛā hai. lekin agar merā safar tujhe burā lage to maiṅ ab wāpas chalā jāūṅgā.”
[35] rab ke farishte ne kahā, “in ādmiyoṅ ke sāth apnā safar jārī rakh. lekin sirf wuhī kuchh kahnā jo maiṅ tujhe batāūṅgā.” chunāṅche bal'ām ne balaq ke sardāroṅ ke sāth apnā safar jārī rakhā.
[36] jab balaq ko ḳhabar milī ki bal'ām ā rahā hai to wuh us se milne ke lie moāb ke us shahr tak gayā jo moāb kī sarhad daryā-e-arnon par wāqe hai.
[37] us ne bal'ām se kahā, “kyā maiṅ ne āp ko ittilā nahīṅ bhejī thī ki āp zarūr āeṅ? āp kyūṅ nahīṅ āe? kyā āp ne sochā ki maiṅ āp ko munāsib in'ām nahīṅ de pāūṅgā?”
[38] bal'ām ne jawāb diyā, “baharhāl ab maiṅ pahuṅch gayā hūṅ. lekin maiṅ sirf wuhī kuchh kah saktā hūṅ jo allāh ne pahle hī mere muṅh meṅ ḍāl diyā hai.”
[39] phir bal'ām balaq ke sāth qiryat-husāt gayā.
[40] wahāṅ balaq ne gāy-bail aur bheṛ-bakriyāṅ qurbān karke un ke gosht meṅ se bal'ām aur us ke sāth wāle sardāroṅ ko de diyā.
[41] aglī subh balaq bal'ām ko sāth le kar ek ūṅchī jagah par chaṛh gayā jis kā nām bāmot-bāl thā. wahāṅ se isrāīlī ḳhaimāgāh kā kinārā nazar ātā thā.