[1] subhsawere uṭh kar yashūa aur tamām isrāīlī shittīm se rawānā hue. jab wuh daryā-e-yardan par pahuṅche to use ubūr na kiyā balki rāt ke lie kināre par ruk gae.
[2] wuh tīn din wahāṅ rahe. phir nigahbānoṅ ne ḳhaimāgāh meṅ se guzar kar
[3] logoṅ ko hukm diyā, “jab āp dekheṅ ki lāwī ke qabīle ke imām rab āp ke ḳhudā ke ahd kā sandūq uṭhāe hue haiṅ to apne apne maqām se rawānā ho kar us ke pīchhe ho leṅ.
[4] phir āp ko patā chalegā ki kahāṅ jānā hai, kyūṅki āp pahle kabhī wahāṅ nahīṅ gae. lekin sandūq ke taqrīban ek kilomīṭar pīchhe raheṅ aur zyādā qarīb na jāeṅ.”
[5] yashūa ne logoṅ ko batāyā, “apne āp ko maḳhsūs-o-muqaddas kareṅ, kyūṅki kal rab āp ke darmiyān hairatangez kām karegā.”
[6] agle din yashūa ne imāmoṅ se kahā, “ahd kā sandūq uṭhā kar logoṅ ke āge āge daryā ko pār kareṅ.” chunāṅche imām sandūq ko uṭhā kar āge āge chal die.
[7] aur rab ne yashūa se farmāyā, “maiṅ tujhe tamām isrāīliyoṅ ke sāmne sarfarāz kar dūṅgā, aur āj hī maiṅ yih kām shurū karūṅga tāki wuh jān leṅ ki jis tarah maiṅ mūsā ke sāth thā usī tarah tere sāth bhī hūṅ.
[8] ahd kā sandūq uṭhāne wāle imāmoṅ ko batā denā, ‘jab āp daryā-e-yardan ke kināre pahuṅcheṅge to wahāṅ pānī meṅ ruk jāeṅ’.”
[9] yashūa ne isrāīliyoṅ se kahā, “mere pās āeṅ aur rab apne ḳhudā ke farmān sun leṅ.
[10] āj āp jān leṅge ki zindā ḳhudā āp ke darmiyān hai aur ki wuh yaqīnan āp ke āge āge jā kar dūsrī qaumoṅ ko nikāl degā, ḳhwāh wuh kan'ānī, hittī, hiwwī, farizzī, jirjāsī, amorī yā yabūsī hoṅ.
[11] yih yūṅ zāhir hogā ki ahd kā yih sandūq jo tamām duniyā ke mālik kā hai āp ke āge āge daryā-e-yardan meṅ jāegā.
[12] ab aisā kareṅ ki har qabīle meṅ se ek ek ādmī ko chun leṅ tāki bārah afrād jamā ho jāeṅ.
[13] phir imām tamām duniyā ke mālik rab ke ahd kā sandūq uṭhā kar daryā meṅ jāeṅge. aur jūṅ hī wuh apne pāoṅ pānī meṅ rakheṅge to pānī kā bahāo ruk jāegā aur āne wālā pānī ḍher ban kar khaṛā rahegā.”
[14] chunāṅche isrāīlī apne ḳhaimoṅ ko sameṭ kar rawānā hue, aur ahd kā sandūq uṭhāne wāle imām un ke āge āge chal die.
[15] fasal kī kaṭāī kā mausam thā, aur daryā kā pānī kināroṅ se bāhar ā gayā thā. lekin jūṅ hī sandūq ko uṭhāne wāle imāmoṅ ne daryā ke kināre pahuṅch kar pānī meṅ qadam rakhā
[16] to āne wāle pānī kā bahāo ruk gayā. wuh un se dūr ek shahr ke qarīb ḍher ban gayā jis kā nām ādam thā aur jo zartān ke nazdīk hai. jo pānī dūsrī yānī bahīrā-e-murdār kī taraf bah rahā thā wuh pūrī tarah utar gayā. tab isrāīliyoṅ ne yarīhū shahr ke muqābil daryā ko pār kiyā.
[17] rab kā ahd kā sandūq uṭhāne wāle imām daryā-e-yardan ke bīch meṅ ḳhushk zamīn par khaṛe rahe jabki bāqī log ḳhushk zamīn par se guzar gae. imām us waqt tak wahāṅ khaṛe rahe jab tak tamām isrāīliyoṅ ne ḳhushk zamīn par chal kar daryā ko pār na kar liyā.