[1] sulaimān bin dāūd kī hukūmat mazbūt ho gaī. rab us kā ḳhudā us ke sāth thā, aur wuh us kī tāqat baṛhātā rahā.
[2] ek din sulaimān ne tamām isrāīl ko apne pās bulāyā. un meṅ hazār hazār aur sau sau faujiyoṅ par muqarrar afsar, qāzī, tamām buzurg aur kunboṅ ke sarparast shāmil the.
[3] phir sulaimān un ke sāth jibaūn kī us pahāṛī par gayā jahāṅ allāh kā mulāqāt kā ḳhaimā thā, wuhī jo rab ke ḳhādim mūsā ne registān meṅ banwāyā thā.
[4] ahd kā sandūq us meṅ nahīṅ thā, kyūṅki dāūd ne use qiryat-yārīm se yarūshalam lā kar ek ḳhaime meṅ rakh diyā thā jo us ne wahāṅ us ke lie tayyār kar rakhā thā.
[5] lekin pītal kī jo qurbāngāh bazlī'el bin ūrī bin hūr ne banāī thī wuh ab tak jibaūn meṅ rab ke ḳhaime ke sāmne thī. ab sulaimān aur isrāīl us ke sāmne jamā hue tāki rab kī marzī daryāft kareṅ.
[6] wahāṅ rab ke huzūr sulaimān ne pītal kī us qurbāngāh par bhasm hone wālī 1,000 qurbāniyāṅ chaṛhāīṅ.
[7] usī rāt rab sulaimān par zāhir huā aur farmāyā, “terā dil kyā chāhtā hai? mujhe batā de to maiṅ terī ḳhwāhish pūrī karūṅga.”
[8] sulaimān ne jawāb diyā, “tū mere bāp dāūd par baṛī mehrbānī kar chukā hai, aur ab tū ne us kī jagah mujhe taḳht par biṭhā diyā hai.
[9] tū ne mujhe ek aisī qaum par bādshāh banā diyā hai jo zamīn kī ḳhāk kī tarah beshumār hai. chunāṅche ai rab ḳhudā, wuh wādā pūrā kar jo tū ne mere bāp dāūd se kiyā hai.
[10] mujhe hikmat aur samajh atā farmā tāki maiṅ is qaum kī rāhnumāī kar sakūṅ. kyūṅki kaun terī is azīm qaum kā insāf kar saktā hai?”
[11] allāh ne sulaimān se kahā, “maiṅ ḳhush hūṅ ki tū dil se yihī kuchh chāhtā hai. tū ne na māl-o-daulat, na izzat, na apne dushmanoṅ kī halākat aur na umr kī darāzī balki hikmat aur samajh māṅgī hai tāki merī us qaum kā insāf kar sake jis par maiṅ ne tujhe bādshāh banā diyā hai.
[12] is lie maiṅ terī yih darḳhwāst pūrī karke tujhe hikmat aur samajh atā karūṅga. sāth sāth maiṅ tujhe utnā māl-o-daulat aur utnī izzat dūṅgā jitnī na māzī meṅ kisī bādshāh ko hāsil thī, na mustaqbil meṅ kabhī kisī ko hāsil hogī.”
[13] is ke bād sulaimān jibaūn kī us pahāṛī se utrā jis par mulāqāt kā ḳhaimā thā aur yarūshalam wāpas chalā gayā jahāṅ wuh isrāīl par hukūmat kartā thā.
[14] sulaimān ke 1,400 rath aur 12,000 ghoṛe the. kuchh us ne rathoṅ ke lie maḳhsūs kie gae shahroṅ meṅ aur kuchh yarūshalam meṅ apne pās rakhe.
[15] bādshāh kī sargarmiyoṅ ke bāis chāṅdī patthar jaisī ām ho gaī aur deodār kī qīmtī lakaṛī maġhrib ke nashebī pahāṛī ilāqe kī anjīr-tūt kī sastī lakaṛī jaisī ām ho gaī.
[16] bādshāh apne ghoṛe misr aur qūe yānī kilikiyā se darāmad kartā thā. us ke tājir in jaghoṅ par jā kar unheṅ ḳharīd lāte the.
[17] bādshāh ke rath misr se darāmad hote the. har rath kī qīmat chāṅdī ke 600 sikke aur har ghoṛe kī qīmat chāṅdī ke 150 sikke thī. sulaimān ke tājir yih ghoṛe barāmad karte hue tamām hittī aur arāmī bādshāhoṅ tak bhī pahuṅchāte the.