[1] شُل گونلِر یِنه بیر اولی جِماغات ییغناندی. اُلارینگ اییمَگه هیچ زاتلاری بُلمانسُنگ، عیسی شَگیرتلِرینی یانینا چاغیریپ، اُلارا:
[2] «بو جِماغاتا یورِگیم آوییار! بولار اوچ گون بَری مِنینگ یانیمدا، اییمَگه هِم هیچ زاتلاری یُق.
[3] بولاری اُیلِرینه آچ گُیبِرسِم، یُلدا ایسغیندان قاچارلار. اُلارینگ کَبیری اوزاق یِردِن گِلیپدیر» دییدی.
[4] شَگیرتلِری اُندان: «بو بُش یِرلیکده اُلاری دُیرار یالی چُرِگی نیرِدِن تاپیپ بُلارقا؟» دییّپ سُرادیلار.
[5] عیسی: «نَچه چُرِگینگیز بار؟» دییّپ، اُلارینگ اُزلِریندِن سُرادی. اُلار: «یِدی سانی» دییّپ جُغاپ بِردیلِر.
[6] اُنسُنگ عیسی جِماغاتا یِرده اُتورماغی تابشیردی. یِدی چُرِگی آلیپ، شوکور اِدِنیندِن سُنگ، بُلوشدیردی-ده، پایلاماق اوچین شَگیرتلِرینه بِردی. اُلار هِم بولاری جِماغاتا پایلادیلار.
[7] اُلارینگ بیرآز بالیقلاری هِم باردی. عیسی شوکور اِدِنیندِن سُنگ، اُلاری هِم پایلاماغی تابشیردی.
[8] هِمّه‌لِر اییّپ دُیدولار و آرتیپ قالان بُلِکلِری ییغناپ، یِدی سِبِدی دُلدوردیلار.
[9] اییِنلِر دُرت مونگه قُلای آدامدی. اُنسُنگ عیسی اُلاری اوغراتدی.
[10] اُزی بُلسا دِرِّو شَگیرتلِری بیلِن قاییقا مینیپ، دَلمانوته شَهرینگ تُوِرِکلِرینه گیتدیلِر.
[11] فَریسی‌لِر گِلیپ، عیسی بیلِن جِدِلِّشمَگه باشلادیلار. اُنی ایمتِحان اِتجِک بُلوپ، آسماندان بیر عالامات گُرکِزمِگینی ایسلِدیلِر.
[12] اُل هِم آخ چِکیپ: «نَمه اوچین بو نِسل عالامات طالاب اِدیَر؟ سیزه دُغروسینی آیدیارین، بو نِسله هیچ بیر عالامات گُرکِزیلجِک دَلدیر» دییدی.
[13] عیسی اُلارینگ یانیندان گیتدی و یِنه قاییقا مینیپ، بِیلِکی کِنارا گِچدی.
[14] شَگیرتلِری چُرِک آلماغی یاددان چیقاردیلار. قاییقدا دینگه یِکِجه چُرِک باردی.
[15] عیسی اُلارا: «خاباردار بُلونگ! فَریسی‌لِر بیلِن هیرودیسینگ خامیرمایاسیندان داش دورونگ» دییّپ، خابار بِردی.
[16] اُلار بُلسا اُزآرا چِکِلِشیپ: «عیسی مونی بیزینگ چُرِگیمیزینگ یُقدوغی اوچین آیدیار» دییّشیَردیلِر.
[17] عیسی اُلارینگ نَمه دییّشیَندیکلِرینی بیلیپ، اُلاردان: «نَمه اوچین چُرِگیمیز یُق دییشیپ چِکِلِشیَرسینگیز؟ سیزینگ هِنیز هِم عاقیلینگیز یِتِنُقمی، دوشونمِیَرسینگیزمی؟ یورِگینگیز شِیله قاتیمی؟
[18] گُزلی بُلوپ، گُرمِیَرسینگیزمی؟ قولاقلی بُلوپ، اِشیتمِیَرسینگیزمی؟ بُلوپ گِچِن زاتلار یادینگیزا دوشمِیَرمی؟
[19] مِن بَش چُرِگی بَش مونگ آداما بُلوپ پایلانیمدا، قالان دُووملِردِن نَچه سِبِد دُلدوریپدینگیز؟» دییّپ سُرادی. اُلار: «اُن ایکی» دییّپ جُغاپ بِردیلِر.
[20] عیسی یِنه: «یِدی چُرِگی دُرت مونگ آداما بُلوپ پایلانیمدا، آرتیپ قالانی نَچه سِبِد بُلوپدی؟» دییّپ سُرادی. اُلار: «یِدی» دییدیلِر.
[21] شُندا عیسی اُلارا: «هِنیز هِم دوشونمِیَرسینگیزمی؟» دییدی.
[22] اُنسُنگ عیسی بیلِن شَگیرتلِری بِیت‌صِیدا گِلدیلِر. اُل یِرده عیسانینگ یانینا بیر کُر آدامی گِتیردیلِر و اُنگا اِلینی دِگیرمِگینی ایسلَپ، اُنگا یالباردیلار.
[23] عیسی کُر آدامینگ اِلیندِن توتوپ، اُنی اُبانینگ داشینا چیقاردی. عیسی اُنونگ گُزلِرینه تویکوریپ، اِل‍لِرینی اُنونگ باشینا قُیوپ: «بیر زات گُریَرسینگمی؟» دییّپ سُرادی.
[24] کُر باشینی قالدیریپ: «آداملاری گُریَرین، اُلار یُریپ باریان باغلار یالی بُلوپ گُرونیَرلِر» دییدی.
[25] عیسی یِنه-ده اِل‍لِرینی اُنونگ گُزلِرینه قُیدی. کُر دیقّاتلی گُزلِدی، شِفا تاپیپ، بار زادی قاوی گُردی.
[26] عیسی: «اُبا گیرمه» دییّپ، اُنی اُیونه ایبِردی.
[27] عیسی شَگیرتلِری بیلِن قیصریه-فیلیپُس شَهرینینگ قُلایینداقی اُبالارا گیتدی. یُلدا عیسی شَگیرتلِریندِن: «آداملار مانگا کیم دییَّرلِر؟» دییّپ سُرادی.
[28] شَگیرتلِری: «کَبیرلِری یحیی تَعمید بِریَنچی، کَبیرلِری اِلیاس، کَبیرلِری-ده پیغامبارلاردان بیری دییَّرلِر» دییّپ جُغاپ بِردیلِر.
[29] عیسی اُلاردان: «سیز مانگا کیم دییَّرسینگیز؟» دییّپ سُرادی. پِطرُس: «سِن مسیحسینگ» دییّپ جُغاپ بِردی.
[30] اُنسُنگ عیسی اُلارا اُزی حاقیندا هیچ کیمه هیچ زات آیتمازلیغی تابشیردی.
[31] سُنگرا عیسی شَگیرتلِرینه اینسان اُغلونینگ کَن عاذاپلار گُرمِلیدیگی، یاشولیلار، یُلباشچی کاهینلار و دین عُلَمالار طارافیندان رِد اِدیلمِلیدیگی، اُلدوریلمِلیدیگی، اوچ گوندِن سُنگ دیرِلمِلیدیگی حاقیندا دوشوندیرمَگه باشلادی.
[32] اُل بو سُزلِری آچیق آیتدی. پِطرُس بُلسا اُنی بیر چِته چِکیپ، اُنونگ آیدانلارینا قارشی چیقماغا باشلادی.
[33] اِمّا عیسی اُورولیپ، شَگیرتلِرینه سِراِتدی و پِطرُسا: «چِکیل اُوومدِن، شِیطان! سِبَبی سِن خودایینگ ایشلِرینی دَل-ده، اینسان ایشلِری حاقدا فیکر اِدیَرسینگ» دییّپ کَیِدی.
[34] عیسی شَگیرتلِری بیلِن بیرلیکده جِماغاتی-دا یانینا چاغیریپ، اُلارا شِیله دییدی: «کیم مِنینگ ایزیما دوشمِک ایسلِیَن بُلسا، اُزونی اینکَر اِتسین-ده، صلیبینی آلیپ ایزیما دوشسون.
[35] هِر کیم جانینی نِجات بِرمِک ایسلِیَن، اُنی ییتیرِر، اِمّا کیم جانینی مِنینگ و خوش خابارینگ خاطیری اوچین ییتیرسه، اُنی نِجات بِرِر.
[36] اینسان هِمّه دونیَه‌نی قازانسا-دا، جانیندان ماحروم بُلسا، اُنگا نَمه پِیداسی بار؟
[37] یا-دا اینسان اُز جانینا دِرِک نَمه بِریپ بیلِر؟
[38] بو زیناکَر و گونَه‌کَر نِسلینگ آراسیندا کیم مِندِن و مِنینگ سُزلِریمدِن اوتانسا، اینسان اُغلی-دا آتاسینینگ بِییکلیگیندَه مُقادِّس پِریشده‌لِری بیلِن گِلِن ماحالی اُندان اوتانار.»