[1] شُندان سُنگ عیسی جلیل‌ده آیلانماغا باشلادی. یَهودی باشلیغلاری اُنونگ جانینا قاصد اِدِن سُنگرا، اُل یهودیه‌ده گِزمِک ایسلِمِیَردی.
[2] یَهودیلِرینگ چاتما بایرامی قُلایلاپدی.
[3] شُنونگ اوچین عیسانینگ دُغانلاری اُنگا: «بو یِردِن چیقیپ، یهودیه گیت، اِدیَن ایشلِرینگی شَگیرتلِرینگ گُرسون.
[4] اُزونی آچیق تانیتماق ایسلِیَن آدام گوزگین ایش اِدیَن دَلدیر. سِن بو زاتلاری اِدیَن بُلسانگ، اُزونگی دونیَه گُرکِز» دییدیلِر.
[5] اُنگا حتّیٰ دُغانلاری-دا اینانمایاردیلار.
[6] عیسی اُلارا: «مِنینگ واقتیم هِنیز دُلانُق، یُنه سیزینگ اوچین ایسلِندیک واقت حَضیردیر.
[7] دونیَه سیزی ییگرِنیپ بیلمِز، اِمّا مِنی ییگرِنیَر، سِبَبی مِن اُنونگ ایشلِرینینگ تِلِکه‌دیگینه شاهاتلیق اِدیَرین.
[8] سیز بایراما گیدینگ، مِن بو بایراما گیتجِک دَل. سِبَبی مِنینگ واقتیم هِنیز دُلانُق» دییّپ جُغاپ بِردی.
[9] اُلارا شِیله دییّپ، اُل جلیل‌ده قالدی.
[10] اِمّا دُغانلاری بایراما گیدِنلِریندِن سُنگ، عیسی-دا گیتدی، یُنه آچیق دَل-ده، گوزگین گیتدی.
[11] یَهودی باشلیغلاری بایرامچیلیقدا اُنی آغتاریپ: «اُل نیرِده؟» دییّپ سُرایاردیلار.
[12] جِماغاتینگ آراسیندا اُل حاقدا کَن گورّونگ اِدیلدی. کَبیرلِری «اُل قاوی آدام» دییسه، باشغالاری «اُل خالقی آزدیریار» دییَّردیلِر.
[13] یُنه یَهودی یُلباشچیلاریندان قُرقوپ، هیچ کیم اُل حاقدا آچیق گورّونگ اِدیپ بیلمِیَردی.
[14] بایرامچیلیغینگ یاریسی گِچِنده، عیسی عیباداتخانا باریپ، تَعلیم بِرمَگه باشلادی.
[15] یَهودیلِر حایران قالیپ: «بو آدام هیچ یِرده اُقیمادیق بُلسا، مُقادِّس یازغیلاری نیرِدِن بیلیَرکَه؟» دییّشیَردیلِر.
[16] عیسی اُلارا شِیله جُغاپ بِردی: «مِنینگ تَعلیم بِریَنلِریم اُزومینگکی دَل، مِنی ایبِرِنینگکیدیر.
[17] خودایینگ ایسلِگینی بِرجای اِتمِک ایسلِیَن آدام مِنینگ تَعلیم بِریَنلِریمینگ خودایداندیغینا یا-دا اُزومدِندیگینه گُز یِتیرِر.
[18] کیم اُزوندِن آیدیان بُلسا، اُزونی بِییک توتیاندیر. کیم اُزونی ایبِرِنه بِییک توتیان بُلسا، حاقیقاتی آیدیاندیر، اُندا ناحاقلیق یُقدور.
[19] موسی سیزه شِریغاتی بِرمِدیمی نَمه؟ یُنه سیزینگ هیچ بیرینگیز بو شِریغاتی بِرجای اِتمِیَرسینگیز. نَمه اوچین مِنی اُلدورجِک بُلیارسینگیز؟»
[20] جِماغات اُنگا: «سِن جینلی، کیم سِنی اُلدورجِک بُلیار؟» دییدی.
[21] عیسی اُلارا: «مِن بیر مُعجِزه گُرکِزدیم، اُنگا هِمَّه‌نگیز حایران قالیارسینگیز.
[22] موسی سیزه اُغول سونِّتلِمه حُکومی بِردی، شُنونگ اوچین هِم سَبَّت گونی اُغول‍لاری سونِّت اِدیَرسینگیز. آصلیندا اُغول سونِّتلِمَه موسادان دَل-ده، آتا-بابالاردان قالاندیر.
[23] شِیلِلیکده، موسانینگ شِریغاتی پُزولماسین دییّپ هِم، اُزونگیز سَبَّت گونی اُغول سونِّتلِیَنگیز. اُندا نَمه اوچین سَبَّت گونی بیر آدامی کَمیل شِفا بِرِندیگیم اوچین مانگا قاهارلانیارسینگیز؟
[24] داشقی گُرنوشه گُرَه حُکوم چیقارمانگ، حُکومینگیز عادالاتلی بُلسون» دییدی.
[25] بو یِرده اورشلیملیلِرینگ کَبیرلِری: «اُلارینگ اُلدورجِک بُلیان آدامی شو دَلمی؟
[26] اینه، اُل آرقایین گورّونگ بِریپ دور، اُنگا قارشی هیچ کیم هیچ زات دییمِیَر. بیزینگ یُلباشچیلاریمیز اُنونگ مسیحدیگینی حاقیقاتدانام بیلیَن بُلایماسینلار؟
[27] یُنه بیز بو آدامینگ نیرِدِندیگینی بیلیَریس. مسیح گِلِنده بُلسا، اُنونگ نیرِدِندیگینی هیچ کیم بیلمِز» دییّشدیلِر.
[28] اُنسُنگ عیسی عیباداتخانادا تَعلیم بِریپ دورقا، قاتی سِس بیلِن شِیله دییدی: «هاووا، سیز مِنی هِم تانییارسینگیز، نیرِدِندیگیمی هِم بیلیَرسینگیز. اِمّا مِن اُز-اُزومدِن گِلِمُق، مِنی ایبِرِن بار، اُل حاقدیر، سیز اُنی تانیمییارسینگیز.
[29] مِن اُنی تانییارین، سِبَبی مِن اُنونگ یانیندان گِلِندیرین. مِنی ایبِرِن اُلدور.»
[30] شُندان سُنگ اُنی توتجاق بُلدولار، یُنه هیچ کیم اُنگا اِل قالدیرمادی، سِبَبی هِنیز اُنونگ واقتی دُلماندی.
[31] اُندان باشغا جِماغاتینگ کَنسی اُنگا ایمان گِتیریپ: «مسیح گِلِنده، شونونگقیدان کَن عالاماتلار گُرکِزِرمی؟» دییّپ آیتدی.
[32] فَریسی‌لِر خالقینگ عیسی حاقینداقی بو گورلِشیَنلِرینی اِشیتدیلِر. اُنسُنگ یُلباشچی کاهینلار بیلِن فَریسی‌لِر اُنی توتماق اوچین عیباداتخانانینگ ساقچیلارینی ایبِردیلِر.
[33] عیسی: «مِن یِنه آز سالیم سیزینگ یانینگیزدا بُلوپ، سُنگرا اُزومی ایبِرِنینگ یانینا گیدِرین.
[34] سیز مِنی گُزلَرسینگیز، یُنه تاپمارسینگیز. مِنینگ بارجاق یِریمه سیز باریپ بیلمِرسینگیز» دییدی.
[35] اُنسُنگ یَهودی باشلیغلاری بیری-بیرینه: «بو آدام بیز تاپیپ بیلمِز یالی، نیرَه گیتجِکَّه؟ یونانیلارینگ آراسینا دارغاپ گیدِن یَهودیلِرینگ یانینا گیدیپ، یونانیلارا-دا تَعلیم بِرجِکمیکَه؟
[36] مونونگ ”مِنی گُزلَرسینگیز، یُنه تاپمارسینگیز، مِنینگ بارجاق یِریمه سیز باریپ بیلمِرسینگیز“ دییَّنی نَمِکَه؟» دییّشدیلِر.
[37] بایرامینگ سُنگقی و اینگ اِساسی گونی عیسی دیک دوروپ، جِماغاتا: «سوسایانلار مِنینگ یانیما گِلیپ، تِشنه‌لیگینی قاندیرسینلار.
[38] کیم مانگا ایمان گِتیرسه، مُقادِّس یازغیلاردا آیدیلیشی یالی، اُنونگ ایچیندِن یاشاییش سووونینگ چِشمه‌لِری آقار» دییّپ قیغیردی.
[39] اُل مونی اُزونه ایمان گِتیرِنلِرینگ آلجاق مُقادِّس روحی بارادا آیدیاردی. اُلارا هِنیز مُقادِّس روح اینمَندی، سِبَبی عیسی هِنیز بِییکلِنمَپدی.
[40] جِماغاتینگ ایچیندِن کَبیرلِری بو سُزی اِشیدیپ: «بو حاقیقاتدان هِم شُل گِلجِک پیغامباردیر» دییدیلِر.
[41] باشغالاری: «بو مسیحدیر» دییدیلِر، اِمّا کَبیرلِری: «بُلوپ بیلمِز! مسیح، اُندا، جلیل‌دِن گِلِرمی؟
[42] مُقادِّس یازغیلاردا: ”مسیح داوودینگ نِسلیندِن، داوودینگ یاشان بِیت‌لِحِم شَهریندِن گِلِر“ دییّپ یازیلمانمی نَمه؟» دییدیلِر.
[43] شِیلِلیکده، جِماغاتینگ آراسیندا عیسی بارادا آغزیبیرسیزلیق دُرِدی.
[44] اُلاردان کَبیری اُنی توتماق ایسلِدی، یُنه هیچ کیم اُنگا اِل دِگیرمِدی.
[45] آخیریسُنگی عیباداتخانانینگ ساقچیلاری قایدیپ گِلدیلِر و یُلباشچی کاهینلار بیلِن فَریسی‌لِر اُلاردان: «نَمه اوچین اُنی گِتیرمِدینگیز؟» دییّپ سُرادیلار.
[46] ساقچیلار: «هیچ کیم هیچ واقت بو آدامینگ کِپلِیشی یالی کِپلِمَندی» دییّپ جُغاپ بِردیلِر.
[47] فَریسی‌لِر اُلارا: «سیز هِم آلداندینگیزمی؟
[48] یُلباشچیلاردان یا-دا فَریسی‌لِردِن، هی، اُنگا ایمان گِتیرِن بارمی؟
[49] یُقدور! اِمّا شِریغاتی بیلمِیَن بو نادان خالق لَعنِت آشاغیندادیر!» دییدیلِر.
[50] شُندا فَریسی‌لِرینگ آراسیندان بیری، اُوال عیسانینگ یانینا باران نیقودیموس اُلارا:
[51] «شِریغاتیمیزا گُرَه بیر آدامی اَوَّل دینگلِمَن، نَمه اِدِنینی بیلمَن، اُنی مَحکوم اِتمِک دُغرومیدیر؟» دییدی.
[52] اُلار: «سِن هِم جلیل‌لیمی؟ مُقادِّس یازغیلارا سِر اِت، جلیل‌دِن هیچ واقت پیغامبار چیقماجاغینی گُرِرسینگ» دییدیلِر. [
[53] سُنگرا هِمّه‌سی اُیلِرینه قایتدیلار.