[1] Lasar name eḳzon manush bemar asla. Tan baṛi Baet-Ania gaut, Moriom ar Marta namor tan dui boino ou gaut roita.
[2] Ḳoedin bade ou Moriomeu Isar fao-o kushboeala ator maḳaia, nizor matar suldi fao fusai diba. Ou Moriomor bai oila bemari Lasar.
[3] Erlagi tan boinainte oḳan ḳoia Hozrot Isar gese ḳobor faṭaila, “Huzur, afnar maear manush kub bemar.”
[4] Ḳobor faia Isae ḳoila, “I bemar to tar moutor lagi oise na, borong Allar mohima zairor lagiu oise, zate er mazdi ami Ibnullar mohima-o zair oe.”
[5] Hozrot Isae Bibi Marta, tan boin ar Lasarre kub maea ḳorta.
[6] Lasaror bemaror ḳota hunar badeo Isa ze zagat asla, hono aro duidin roila.
[7] Bade tan sahabi oḳolre ḳoila, “Ao, amra hirbar Ehudia zilat zai.”
[8] Sahabi oḳole ḳoila, “Huzur, ou ḳoedin age honor manshe afnare fattor marta saila, oḳon afne hirbar hono zaita ni?”
[9] Tain ḳoila, “Dinor bela to baro gonṭa ase, ḳeu zudi dinor bela sola-fira ḳore, he usṭa ḳae na, ḳaron he ou duniar for deḳe.
[10] Ar ḳeu zudi raitor bela sola-fira ḳore, he usṭa ḳae, ḳaron tar maze kunu for nai.”
[11] Oḳan ḳoia hari tan sahabi oḳolre ḳoila, “Huno, amrar dust Lasar gumai gesegi, ami tare hozag korat zaiar.”
[12] Ikan hunia sahabi oḳole ḳoila, “Huzur, he zudi gumo taḳe, te to bala oizibo.”
[13] Isae Lasaror moutor ḳota ḳoisla, oile tara mono ḳorla, tain emne gumor ḳota ḳoisoin.
[14] Teu Isae forishkar ḳori ḳoila, “Lasar mara gese.
[15] Oile ami tumrar ḳota mono ḳoria kushi oisi, ami hino aslam na, zate tumra ekin ḳortae faro. Oḳon ao, amra Lasaror gese zai.”
[16] Teu tan sahabi Tumase logor sahabi oḳolre ḳoila, “Ao na, amra-o zai, zate tan loge mortam fari.” Ou Tumasre Zomoz ḳoia ḍaḳa oe.
[17] Hono gia harle Hozrot Isae hunla, tain zaoar sair din ageu Lasarre dafon ḳora oigese.
[18] Zeruzalem ṭaun taki ou Baet-Ania gau onuman dui mail duroi asil.
[19] Lasaror moutor bade tan boin Bibi Marta ar Moriomre buz deoar lagi Ihudi shomazor bout manush aila.
[20] Ermaze Hozrot Isae toshrif anra hunia Bibi Marta tan loge deḳa ḳorat gela, oile Moriom goro boi roila.
[21] Bibi Martae Isare ḳoila, “Huzur, afne zudi ono roita, te amar baigu morlo na one.
[22] Oile erbadeo ami zani, afne Allar gese zeta saiba, tain afnare ota diba.”
[23] Isae ḳoila, “Huno, tumar bai hirbar zinda oia uṭbo.”
[24] Teu Martae ḳoila, “Ji-oe, ami zani kiamotor din zebla murda oḳol zinda oiba, ou shomoe he-o zinda oia uṭbo.”
[25] Isae Martare ḳoila, “Amiu to kiamot ar zindegi. Ze zone amar ufre iman ane he morleo zinda oibo.
[26] Ar ze zone ashol zinda oia amar ufre iman ane, he kunudino morto nae. Tumi ikan ekin ḳoro ni?”
[27] Martae ḳoila, “Ji-oe huzur, ami iman anchi, Allar oada ḳora ze zone duniat toshrif anar ḳota, afneu hou al-Mosi Ibnulla, Allar ḳas maear zon.”
[28] Oḳan ḳoia Martae gia tan boin Moriomre sufte ḍakia nia ḳoila, “Huno, huzur ono asoin, tain tumare ḍakira.”
[29] Teu Moriom zoldi ḳori Isar ḳandat gela.
[30] Isa ou shomoyo gaur bitre hamaisoin na, Martae tan loge zeno deḳa ḳorsla, tain hono-u ubai roisla.
[31] Ar goror bitre zeta Ihudi oḳole Moriomre buz deoat asla, Moriome aḳta-u bare zaoat dekia tara tan ḳore ḳore gela. Tara mono ḳorlo, Moriom ḳoeboror gese ḳanda-ḳaṭi ḳorat zaira.
[32] Isa ze zagat asla, Moriomo hono gela ar Isare dekia tan fao-o foṛia ḳoila, “Huzur, afne zudi ono taḳta, te amar baigu morlo na one.”
[33] Moriom ar tan logor Ihudi oḳolor ḳandon-ahazari dekia Hozrot Isar dilor ruh gorom oigelo, tain ḳator oigela.
[34] Tain erare zikaila, “Lasarre kuai dafon ḳorso?” Tara ḳoila, “Huzur aukka, deki zaukka.”
[35] Ou shomoe Isae ḳandi dila.
[36] Tan ḳandon dekia honor era ḳoila, “Deḳrae ni, tain Lasarre ḳoto maea ḳorta!”
[37] Oile kunu kunu zone ḳoila, “Zein andar souk bala ḳorsoin, tain ila kunta ḳorta farla one na ni, zate Lasargu na more?”
[38] Ita hunia Hozrot Isar dilor ruh hirbar gorom oigelo, tain Lasaror ḳoeboror daro gela. I ḳoebor asil guhar laḳan eḳ gato ar ḳoeboror muko eḳ fattor deoa asil.
[39] Tain manshore ḳoila, “Fattorṭa horao.” Lasaror boin Martae ḳoila, “Huzur, oḳon to lash fosia gond baroigese, tain sair din age mara gesoin.”
[40] Isae enre ḳoila, “Ami to tumare ḳoisi, tumi zudi ekin ḳoro, te Allar kudroti mohima deḳbae.”
[41] Teu manshe ḳoeboror mukor fattorṭa horaila. Isae asmanor bae saia dua ḳorla, “O gaibi baba, tumi amar ḳota huncho, erlagi ami tumar shukria adae ḳori.
[42] Ami zani, tumi hamesha amar ḳota huno. Oile amar sairobae zeta manush asoin, tara zate ekin ḳoroin, tumi amare faṭaiso, erdae-u oḳan ḳoilam.”
[43] Oḳan ḳoia tain zure ḍaḳ dia ḳoila, “Lasar, baroia ao.”
[44] Teu murda Lasar ḳoebor taki baroia aila. Tan at-fao ḳafondi fesail asil, ar muk asil rumal dia banda. Isae manshore ḳoila, “Tar band kulo ar tare zaite deo.”
[45] Bibi Moriomor gese zeta Ihudi manush aisla, Hozrot Isar ou keramoti ḳam dekia erar mazor boute tan ufre iman anla.
[46] Oile ḳeu ḳeu Forishi oḳolor gese gia Isar ou ḳamor ḳota zanailo.
[47] Ita hunia boṛo imam oḳole ar Forishi dolor manshe deshor fotua komiṭire loia ekkano boila, boia ḳoila, “Amra oḳon kita ḳortam? I beṭae to bout keramoti ḳam deḳar.
[48] Amra zudi tare emne solte dei, te hoḳol manshe tar ufre iman anbo, ar ita hunia Ruman shorḳaror manshe amrar ṭikana ar amrar zatireo binash ḳorba.”
[49] Ou mozlisor maze ou bosoror fordan imam, Kaeafa namor eḳzon asla. Tain erare ḳoila, “Tumra to kuntau zano na.
[50] Buzo na ni, asta zati binash oar saite, hoḳolor bodla eḳzonor moron aro bala.”
[51] Imam Kaeafae ashole nizor mon taki ou ḳota ḳoisoin na, tain ou bosoror fordan imam oae gaibi buli tan muk taki baroise ze, Ihudi zatire basanir lagi Isar moron oibo.
[52] Ḳali Ihudi zatir lagi nae, Allar zoto bondain sairobae sitria asoin, tarare dola ḳoria ekkano ḳorar lagio tain zan bilai diba.
[53] Hou din taki tara Isare marar faetara ḳorat lagla.
[54] Erlagi Isae tarar maze kula-mela sola-fira bad dilaila, ar ou zaga saṛia morubumir ḳandat Afraim namor eḳ gaut gia tan sahabi oḳolre loia roila.
[55] Ou shomoe Ihudi oḳolor Azadi Id gonai aisil. Idor age nizore pak-saf ḳorar lagi bout manush gau taki Zeruzalem ṭauno gela.
[56] Hino gia tara Hozrot Isare tukaila. Tara Baetul-Mukaddoso ubaia eḳe-oinne zikaila, “Kita mono ḳoroin, tain i ido aita nae ni?”
[57] Boṛo imam ar Forishi oḳole hukum disla, ḳeu zudi Isar kuz fae, te tarare zananir lagi, zate tara Isare dorta faroin.