[1] Al-muhaakama al-kallam beeha Allah nazalat fi balad Hadraak wa wagafat fi madiinat Dimachkh. Achaan Allah yichiif kulla Bani Adam, ma gabaayil Bani Israaʼiil bas.
[2] Wa l-muhaakama di taji // le madiinat Hamaat al-gariib le Dimachkh. Wa taji le mudun Suur wa Seeda al-sukkaanhum induhum hikma kabiire.
[3] Sukkaan Suur bano leehum himaaye wa lammo fudda katiire // misil al-turaab wa dahab katiir // misil tiinat al-chawaariʼ.
[4] Wa daahu al-Rabb yaglaʼ minhum kulla cheyy wa yarmi himaayithum fi l-bahar wa l-madiina zaatha, al-naar taakulha.
[5] Madiinat Achgaluun tichiif wa takhaaf wa Khazza tittanna ziyaada // min al-wajaʼ wa Akhruun achamha yingatiʼ. Wa yaktulu malik Khazza wa Achgaluun ma yaskunuuha battaan.
[6] Wa Allah gaal : «Al-ajaanib yaskunu Achduud wa nidammir istikbaar al-Filistiyiin.
[7] Namrug min khachumhum // al-laham al-fatiis wa min sunuunhum // al-laham al-haraam. Al-yifaddulu minhum yabgo hineeyi ana Ilaahhum wa yabgo khachum beet ambeen Bani Yahuuza. Wa naas Akhruun yindammo le chaʼabi misil al-Yabuusiyiin.
[8] Wa ana nukhutt muʼaskari jamb ardi wa nahrisha min al-udwaan al-maachiin wa l-jaayiin. Wa ayyi mudaayig ma yaji foogha battaan achaan hassaʼ eeni foogha.»
[9] «Ya Sahyuun al-misil bineeye, afrahe ziyaada ! Iiti be farah, ya Madiinat al-Khudus al-misil bineeye ! Daahu malikki jaayi leeki. Hu aadil wa munnasir. Hu miskiin wa raakib fi humaar, fi dahach wileed humaara.
[10] Ana nidammir arabaat al-harib // fi turaab Afraayim wa kheel al-duwaas // fi Madiinat al-Khudus wa nikassir nubbaal al-harib. Wa l-malik da yikallim be l-salaam le l-umam wa sultitah tamchi min al-bahar al-Mayyit lahaddi l-bahar al-Abyad wa min bahar al-Furaat lahaddi aakhir al-ard.»
[11] Wa Allah gaal : «Be sabab muʼaahadati al-sawweetha maʼaaku be damm al-dahaaya, ana namrug masaajiinku min al-sijin al-bigi leehum misil nugra bala almi.
[12] Ya l-masaajiin al-induku acham, gabbulu fi l-bakaan al-gawi. Hassaʼ nikhabbirku kadar nikaffiiku taʼabku marrateen.
[13] Bani Yahuuza yabgo leyi nubbaal wa gabiilat Afraayim yabgo leyi nachaachiib. Ya Sahyuun, ana nigawwim rujaalki wa nisawwiihum misil seef al-faaris didd subyaan balad al-Yuunaan.»
[14] Wa Allah yibiin min foog le chaʼabah wa nuchchaabah yabrug // misil barraaga. Allah al-Rabb yadrub al-buug wa yaji be riih chadiide // min al-junuub.
[15] Allah al-Gaadir yahmi chaʼabah wa humman yidammuru wa yakharbu al-adu be hujaar al-miglaaʼ. Wa yacharbo wa yikooruku misil sakkaara. Wa yinmalu be damm udwaanhum misil kaas al-yuruchchu beyah guruun al-madbah.
[16] Wa Allah Ilaahhum yinajji chaʼabah // fi l-yoom da, misil raaʼi yinajji khanamah. Achaan humman yiraaru fi ardah misil hujaar khaaliyiin al-yiraaru // fi taaj.
[17] Aywa, humman yafraho ziyaada wa yabgo jamiiliin marra waahid ! Wa l-gameh yiʼakkil al-subyaan wa l-khamar al-jadiid yikabbir al-banaat.