[1] Wa fi aakhir al-wakit, jabal beet Allah yasbit // fi ruuse al-jibaal wa yabga aali min kulla l-hujaar. Wa l-chuʼuub yaju leyah be katara misil almi al-jaari.
[2] Wa umam katiiriin yaju wa yuguulu : «Taʼaalu natlaʼo fi jabal Allah, fi beet Ilaah Yaakhuub. Hu yiʼallimna derbah wa aniina namchu foogah.» Achaan min Sahyuun yamurgu churuut al-Tawraat wa min Madiinat al-Khudus yamrug kalaam Allah.
[3] Wa Allah yabga gaadi been chuʼuub katiiriin wa yihaakim umam gawiyiin hatta kan baʼiidiin kula. Humman yuduggu suyuufhum jaraari wa yuduggu huraabhum khanaajir. Wa umma ma tarfaʼ suyuufha le umma wa ma fi tadriib le l-harib battaan.
[4] Wa ayyi naadum yagood fi jineentah hana l-inab wa tihit chadaratah hana l-tiin. Wa ma fi naadum yibachtinah achaan Allah al-Gaadir bas kharrarah.
[5] Kulla l-chuʼuub dool yitaabuʼu ilaahaathum. Wa aniina kamaan nitaabuʼu Allah Ilaahna daayman wa ila l-abad.
[6] Daahu kalaam Allah : «Fi l-yoom da, nilimm al-maʼduuriin wa najmaʼ al-muchattatiin wa nilimm al-ana aakhabtuhum.
[7] Wa min al-maʼduuriin, nisawwi waahidiin yifaddulu wa min al-muchattatiin, nisawwi umma gawiiye. Wa fi jabal Sahyuun, ana Allah nabga malikhum min hassaʼ wa ila l-abad.
[8] Ya jabal Sahyuun al-misil bineeye, inta tiraakhib chaʼabak min foog misil gasir al-hurraas hana l-khanam. Sultitak al-awwal tigabbil leek wa battaan Madiinat al-Khudus al-misil bineeye tabga aasimat mamlaka.»
[9] Hassaʼ, maala tiʼawwi ? Achaan ma fi malik foogki walla ? Wa maala al-wajaʼ karabki misil al-mara al-gaaʼide titaalig ? Achaan mustachaarki waddar walla ?
[10] Attanne min al-wajaʼ, ya Sahyuun al-misil bineeye. Aywa, attanne misil al-mara al-gaaʼide titaalig. Achaan hassaʼ, inti tamurgi min al-madiina wa tamchi taskuni fi l-kadaade wa tisaafiri lahaddi Baabil. Wa hinaak inti tanje, hinaak Allah yafdaaki // min iid udwaanki.
[11] Wa hassaʼ, askar hana umam katiiriin lammo wa gammo diddiki. Humman buguulu : «Khalli tagood fi l-najaasa. Wa khalli uyuunna yichiifu damaar Sahyuun !»
[12] Al-naas dool ma yaʼarfu fikir Allah wa la yafhamo niiytah. Wa hu lammaahum sawa misil rubta hana ganaadiil // fi l-madagg.
[13] «Gummi duggi al-ganaadiil, ya Sahyuun al-misil bineeye. Nisawwiiki misil toor al-guruunah // hana hadiid wa dalaafeeyah hana nahaas. Wa be da, inti tarhake chuʼuub katiiriin wa tikhassisi khaniimithum // leyi ana Allah wa khunaahum leyi ana siid al-ard.»