[1] «Adurbu al-buug wa jahhuzu nufuusku ! Al-adu yanzil misil al-sagur fi chaʼabi ana Allah. Achaan humman nagado muʼaahadati wa iso churuuti hana l-Tawraat.
[2] Humman yasrakho leyi wa yuguulu : ‹Ilaahna, aniina naʼarfuuk achaan aniina chaʼabak Bani Israaʼiil !›
[3] Wa laakin Bani Israaʼiil abo al-kheer wa hassaʼ aduuhum yitaaridhum.
[4] Humman darrajo muluuk bala izni wa kubaaraat bala muwaafagati. Be fuddithum wa dahabhum, humman sanaʼo leehum asnaam wa da yisabbib damaarhum.
[5] Ya naas madiinat al-Saamira, khallu sanamku al-hu ijil hana dahab ! Ana khidibt ziyaada didduku. Intu ma bariyiin ! Wa tagoodu misil ke lahaddi mata ?
[6] Ijilku da minku intu Bani Israaʼiil bas wa insaan bas sanaʼah. Hu ma Ilaah ! Wa fi chaan da, ijil al-Saamira yilkassar.
[7] Intu zaraʼtu al-riih wa khalaas, tagtaʼo amzoobaʼaane. Al-gameh bala ganduul ma yanti dagiig wa kan anta dagiig kula, al-ajaanib bas yaakuluuh.
[8] «Bani Israaʼiil akaloohum. Wa hassaʼ gaaʼidiin fi ust al-umam misil maaʼuun al-ma yanfaʼ.
[9] Wa wakit macho ale Achuur, bigo misil humaar al-kadaade al-aayich wiheedah. Aywa, gabiilat Afraayim gaaʼide wiheedha hatta kan kaffat ujra // le sudgaanha kula.
[10] Kan ajjarat al-umam le yidaafuʼu leeha kula, ana nilimmuhum kulluhum. Wa baʼad wakit chiyya, humman yatʼabo tihit zulum hana akbar malik.
[11] Naas Afraayim kattaro al-madaabih le dahaaya hana kaffaarat al-zanib. Wa laakin al-madaabih dool sabbabo leehum al-zanib.
[12] Wa kan naktib leehum churuuti hana l-Tawraat alif marra kula, humman yichiifuuhum misil cheyy ajnabi.
[13] Humman yigaddumuuhum leyi dahaaya wa yaakulu al-laham wa laakin ana Allah ma nakhbal dahaayaahum. Nizzakkar khataahum wa niʼaakhibhum be sabab zunuubhum. Khalli yigabbulu Masir !
[14] Bani Israaʼiil niso khaalighum wa bano leehum gusuur. Wa Bani Yahuuza kattaro al-mudun al-gawiyiin. Laakin ana nirassil naar fi mudunhum wa hi taakul gusuurhum.»