[1] Fi yoom 13 hana chahri 12 al-usmah Adaar, fi l-yoom da bas, waajib yitabbugu kharaar al-malik wa gaanuunah wa udwaan al-Yahuud yahsubu yinnasru fooghum. Wa laakin al-cheyy da bigi be l-aks, al-Yahuud annasaro fi l-naas al-kirhoohum.
[2] Wa l-Yahuud lammo fi hillaalhum wa fi kulla wulaayaat al-malik Achawiruuch le yugummu didd al-naas al-dawwaro yisawwu leehum al-fasil. Wa naadum ma gidir yagiif giddaamhum achaan kulla l-chaʼab khaayfiin min al-Yahuud.
[3] Wa kulla masaaʼiil al-wulaayaat wa l-muhaafiziin wa l-hukkaam wa khaddaamiin al-malik wagafo wara l-Yahuud achaan khaayfiin min Mardakaay
[4] fi chaan Mardakaay bigi naadum muhimm fi gasir al-malik wa usmah bigi taaliʼ fi kulla l-wulaayaat. Wa Mardakaay gaaʼid daayman yabga naadum chadiid be ziyaada.
[5] Wa l-Yahuud darabo kulla udwaanhum be l-seef wa kataloohum wa dammaroohum. Wa le l-naas al-kirhoohum, humman sawwo fooghum misil yidooruuh.
[6] Wa fi madiinat Chuucha al-gawiiye, al-Yahuud katalo wa dammaro 500 raajil.
[7] Wa katalo Farchandaata wa Dalfuun wa Asfaata
[8] wa Furaata wa Adalya wa Aridaata
[9] wa Farmachta wa Arisaay wa Aridaay wa Wayzaata.
[10] Dool al-awlaad al-achara hana Hamaan wileed Hamdaata adu al-Yahuud wa humman kataloohum wa laakin ma chaalo khumaamhum misil khaniime.
[11] Wa fi nafs al-yoom da, khabbaro al-malik be adad al-naas al-maato fi madiinat Chuucha al-gawiiye.
[12] Wa l-malik gaal le Astiir al-malika : «Fi madiinat Chuucha al-gawiiye, al-Yahuud katalo wa dammaro 500 raajil wa ziyaada min da, katalo al-awlaad al-achara hana Hamaan. Wa chunu al-ma sawwooh fi l-wulaayaat al-aakhariin hana l-mamlaka ? Wa battaan chunu talabki ? Achaan yinnaffaz ! Wa battaan chunu munaaki ? Achaan yilhaggag !»
[13] Wa Astiir raddat wa gaalat leyah : «Kan bigi leek adiil, ya l-malik, khalli al-Yahuud al-fi Chuucha yalgo izin yisawwu ambaakir kula nafs al-cheyy hasab al-gaanuun misil sawwooh al-yoom. Wa khalli yiʼallugu al-awlaad al-achara hana Hamaan fi l-iidaan.»
[14] Wa l-malik amar wa gaal : «Khalli yisawwu misil da.» Wa marago kharaar fi Chuucha wa allagoohum le l-awlaad al-achara hana Hamaan.
[15] Wa l-Yahuud al-gaaʼidiin fi Chuucha lammo battaan fi yoom 14 hana l-chahar Adaar wa katalo 300 raajil fi Chuucha wa laakin ma chaalo khumaamhum misil khaniime.
[16] Wa laakin gabul da, al-Yahuud al-aakhariin al-gaaʼidiin fi wulaayaat al-mamlaka lammo le yidaafuʼu le nufuushum min udwaanhum le yalgo al-jumma. Wa katalo 75 000 min al-naas al-kirhoohum wa laakin ma chaalo khumaamhum misil khaniime.
[17] Wa da bigi fi yoom 13 hana l-chahar al-usmah Adaar. Wa humman anjammo fi yoom 14 wa sawwo al-yoom da, yoom hana iid wa farha.
[18] Wa kan le l-Yahuud al-fi Chuucha al-lammo fi yoom 13 wa 14, humman anjammo yoom 15 wa sawwo al-yoom da, yoom hana iid wa farha.
[19] Wa fi chaan da bas, al-Yahuud al-saakniin barra fi l-hillaal yisawwu yoom 14 hana l-chahar Adaar yoom hana farha wa iid wa yoom halu wa ayyi waahid yigaddim hadiiye le jaarah.
[20] Wa Mardakaay katab kulla l-kalaam da wa rassal jawaabaat le kulla l-Yahuud al-fi kulla wulaayaat al-malik Achawiruuch al-gaaʼidiin gariib aw baʼiid
[21] achaan yiʼassusu leehum iid al-yiʼayyuduuh kulli sana fi yoom 14 wa 15 hana l-chahar al-usmah Adaar.
[22] Achaan dool al-ayyaam al-Yahuud ligo fooghum al-jumma min udwaanhum wa da l-chahar al-foogah haalithum albaddalat, al-diige be l-farha wa l-hizin be l-iid. Wa waajib yiʼayyudu al-ayyaam dool be farha wa yigaddumu hadaaya ambeenaathum wa yantu hadaaya le l-masaakiin.
[23] Wa l-Yahuud khassado be kalaam Mardakaay wa bado yiʼayyudu al-iid wa da bigi leehum aade.
[24] Wa Mardakaay zakkaraahum kadar Hamaan wileed Hamdaata al-min zurriiyit Agaag al-adu hana kulla l-Yahuud khattat le yidammir al-Yahuud. Wa hu sawwa amʼiyeedaat al-usumha Fuuriim le yibarjilhum wa yidammirhum.
[25] Wa laakin wakit al-kalaam da wassal bakaan al-malik, hu katab kharaar kadar al-khitta al-fasle al-Hamaan dawwar yisawwiiha fi l-Yahuud tigabbil fi raasah wa khalli yiʼalluguuh fi uud, hu wa awlaadah.
[26] Wa be sabab da bas, al-ayyaam dool sammoohum ayyaam Fuuriim maʼanaatah amʼiyeedaat. Wa be da bas, al-Yahuud irfo wa fihmo jawaab Mardakaay wa kulla cheyy al-chaafooh wa l-hasal fooghum.
[27] Wa l-Yahuud khassado wa assaso leehum aade al-ma tilkhalla leehum humman wa le zurriiyithum wa le l-naas al-sawwo nufuushum Yahuud. Wa humman yiʼayyudu al-yoomeen dool kulli sana fi l-wakit al-muhaddad misil maktuub.
[28] Wa l-ayyaam dool, yizzakkaroohum wa yiʼayyuduuhum min zurriiye le zurriiye fi ayyi aayila wa ayyi wulaaya wa ayyi madiina. Wa ayyaam al-Fuuriim dool ma bingachcho le l-Yahuud wa l-zikra di ma tiwaddir min zurriiyithum.
[29] Wa l-malika Astiir bineeyit Abihaayil wa Mardakaay al-Yahuudi katabo be kulla izinhum le yihaggugu al-jawaab al-bukhuss iid al-Fuuriim.
[30] Wa rassalo jawaabaat al-salaama wa l-amaan le kulla l-Yahuud al-gaaʼidiin fi 127 wulaaya hana mamlakat al-malik Achawiruuch.
[31] Wa l-jawaabaat dool yatulbu min al-Yahuud yiʼayyudu iid al-Fuuriim fi l-wakit al-muhaddad leyah hasab al-amur al-antooh Mardakaay al-Yahuudi wa l-malika Astiir le kulla l-Yahuud wa zurriiyithum. Wa da bukhuss kharaar al-siyaam wa l-hizin kula.
[32] Wa amur Astiir haggag iid al-Fuuriim. Wa kulla l-cheyy da, katabooh fi l-kitaab.