[1] Wa baʼad moot Akhaab, balad Muwaab atmarradat didd Bani Israaʼiil.
[2] Wa yoom waahid fi madiinat al-Saamira, al-malik Akhazya wagaʼ min chubbaak gasrah wa tiʼib ziyaada. Wa khalaas, rassal naas wa gaal leehum : «Amchu asʼalo leyi Baʼal Zabuub ilaah madiinat Akhruun fi balad al-Filistiyiin le naʼarif kan nalga al-aafe walla la.»
[3] Wa laakin malak Allah ja le l-nabi Iliyaas al-min al-Tichbi wa gaal leyah : «Gumm amchi gaabil naas malik mamlakat Israaʼiil al-rassalaahum min madiinat al-Saamira wa guul leehum : ‹Ma fi Ilaah fi balad Israaʼiil walla ? Maala intu maachiin tasʼalo Baʼal Zabuub ilaah madiinat Akhruun ?
[4] Wa fi chaan da, daahu Allah gaal : “Al-sariir al-hu raagid foogah da ma yugumm minnah achaan akiid hu yumuut.”›» Wa baʼad da, Iliyaas macha wa hajja leehum.
[5] Wa tawwaali, al-naas al-rassalaahum al-malik gabbalo jo leyah. Wa l-malik saʼalaahum wa gaal : «Maalku gabbaltu ajala ?»
[6] Wa humman raddo leyah wa gaalo : «Raajil waahid jara lihigna wa gaal leena : ‹Ajala gabbulu le malikku al-rassalaaku wa guulu leyah : Daahu Allah gaal : “Hal ma fi Ilaah fi balad Israaʼiil lahaddi tirassil naas yamchu yasʼalo Baʼal Zabuub ilaah madiinat Akhruun walla ? Wa be sabab da, al-sariir al-inta raagid foogah da ma tugumm minnah achaan akiid inta tumuut.”›»
[7] Wa l-malik saʼalaahum wa gaal : «Al-raajil al-macha lihigku wa gaal leeku al-kalaam da, chabahah kikkeef ?»
[8] Wa humman raddo wa gaalo leyah : «Al-raajil da laabis khalag hana suuf wa mulhazzim be farwa.» Wa tawwaali, al-malik gaal : «Da Iliyaas al-min hillit Tichbi.»
[9] Wa khalaas, al-malik rassal khaayid be khamsiin askar le yakurbu Iliyaas. Wa Iliyaas gaaʼid fi raas al-jabal foog wa l-khaayid gaal leyah : «Ya nabi Allah ! Al-malik buguul anzil !»
[10] Wa laakin Iliyaas gaal le khaayid al-khamsiin : «Kan ana nabi Allah, khalli naar tanzil min al-sama wa taakulak inta wa askarak al-khamsiin.» Wa tawwaali, naar nazalat min al-sama wa akalathum hu wa askarah al-khamsiin.
[11] Wa battaan kula, al-malik rassal khaayid aakhar be khamsiin askar le yakurbu Iliyaas. Wa l-khaayid gaal le Iliyaas : «Ya nabi Allah ! Al-malik buguul anzil ajala !»
[12] Wa Iliyaas radda leyah wa gaal : «Kan ana nabi Allah, khalli naar tanzil min al-sama wa taakulak inta wa askarak al-khamsiin.» Wa tawwaali, naar Allah nazalat min al-sama wa akalathum hu wa askarah al-khamsiin.
[13] Wa le taalit marra battaan, al-malik rassal khaayid be khamsiin askar le yakurbu Iliyaas. Wa l-khaayid al-taalit da gamma macha wa barak giddaam Iliyaas wa chahadah wa gaal : «Ya nabi Allah ! Khalli hayaati wa hayaat khaddaamiinak al-khamsiin dool tabga leek muhimme.
[14] Wa daahu naar nazalat min al-sama wa akalat khuyyaad al-itneen al-awwalaaniyiin wa askarhum. Wa laakin hassaʼ, khalli hayaati tabga leek muhimme.»
[15] Wa fi l-bakaan da, malak Allah hajja le Iliyaas wa gaal leyah : «Anzil wa amchi maʼaayah, ma takhaaf minnah.» Wa khalaas, Iliyaas nazal wa macha maʼa l-khaayid da bakaan al-malik.
[16] Wa Iliyaas gaal le l-malik : «Daahu Allah gaal : ‹Hal ma fi Ilaah fi balad Bani Israaʼiil al-inta tagdar tasʼalah walla ? Achaan inta rassalt naas yasʼalo leek Baʼal Zabuub ilaah madiinat Akhruun. Wa be sabab da, al-sariir al-inta raagid foogah da ma tugumm minnah achaan akiid inta tumuut.›»
[17] Wa l-malik Akhazya maat hasab kalaam Allah al-gaalah al-nabi Iliyaas. Wa Akhazya ma indah wileed. Wa be da, akhuuh Yuuraam hakam fi badalah fi l-sana al-taaniye hana hukum Yahuuraam wileed Yahuuchafat malik mamlakat Yahuuza.
[18] Wa l-baagi min amal Akhazya wa kulla cheyy al-sawwaah maktuubiin fi kitaab taariikh muluuk Bani Israaʼiil.