[1] Wa humman jaabo sanduug al-Rabb wa khattooh fi lubb al-kheema al-Dawuud jahhazaaha leyah. Wa baʼad da, gaddamo le l-Rabb dahaaya muharragiin wa dahaaya salaama.
[2] Wa wakit Dawuud gaddam al-dahaaya al-muharragiin wa dahaaya al-salaama dool khalaas, hu baarak al-chaʼab be usum Allah.
[3] Wa baʼad da, Dawuud gassam akil le kulla Bani Israaʼiil, mara wa raajil. Le ayyi waahid antaah khubza wa abbuud hana tamur wa abbuud hana inab.
[4] Wa Dawuud kallaf waahidiin min al-Laawiyiin yagoodu giddaam sanduug Allah le yachkuru wa yahmudu wa yimajjudu Allah Ilaah Bani Israaʼiil.
[5] Wa l-Laawiyiin dool kabiirhum Asaaf wa naaybah Zakariiya wa maʼaahum Yaʼiyiil wa Chamiiramuut wa Yahiyiil wa Mattitya wa Aliyaab wa Banaaya wa Ubeed Adoom wa Yaʼiyiil. Humman dool gaaʼidiin yadurbu aalaat al-musiikha misil al-jigindiiye wa amsibeybe wa Asaaf kamaan gaaʼid yadrub al-nuggaara.
[6] Wa rujaal al-diin Banaaya wa Yahaziyiil gaaʼidiin yadurbu daayman al-burunji giddaam sanduug muʼaahadat al-Rabb.
[7] Wa l-yoom da, awwal marra Dawuud kallaf Asaaf wa l-Laawiyiin al-aakhariin le yachkuru Allah.
[8] Wa daahu khineehum. Achkuru Allah wa atru usmah ! Wa arrufu al-chuʼuub al-aakhariin // be aʼmaalah.
[9] Khannu leyah wa amdahooh wa fakkuru fi kulla ajaaybah.
[10] Anbastu achaan usmah al-mukhaddas wa khalli guluubku yinmalu be farah intu al-gaaʼidiin titaabuʼu Allah.
[11] Fattuchu Allah wa gudurtah wa wajjuhu aleyah daayman
[12] Azzakkaro ajaaybah al-sawwaahum, aywa, ajaaybah wa gawaaniinah // al-amar beehum.
[13] Intu, ya zurriiyit Israaʼiil, intu abiidah. Intu, ya iyaal Yaakhuub, intu al-Allah azalaaku.
[14] Allah hu bas Ilaahna al-yahkim fi kulla l-ard.
[15] Azzakkaro daayman muʼaahadatah wa kalaamah al-amar beyah // le alif zurriiye.
[16] Wa di muʼaahadatah al-sawwaaha // maʼa Ibraahiim wa akkadha be haliife le Ishaakh.
[17] Hu sabbat chart le zurriiyit Yaakhuub wa sawwa muʼaahada daayme // maʼa Bani Israaʼiil.
[18] Wa gaal : «Ana nantiiku balad Kanʼaan wa da gisim al-talgooh misil warasa.»
[19] Wa fi l-zaman da, adadku chiyya, intu chiyya marra waahid wa saakniin fi l-balad di // misil ajaanib.
[20] Intu raaykhiin min umma le umma wa min mamlaka le chaʼab aakhar.
[21] Laakin Allah ma khalla naadum yazlumku wa aakhab muluuk fi chaanku.
[22] Wa gaal : «Ma tilammusu al-naas al-ana masahtuhum wa darrajtuhum wa ma tisawwu al-fasaala // le anbiyaayi.»
[23] Ya sukkaan al-ard, achkuru Allah // be khine wa kulla yoom bachchuru // be najaatah.
[24] Hajju be majdah le kulla l-umam wa be ajaaybah le kulla l-chuʼuub.
[25] Achaan Allah aziim wa waajib leyah al-hamd al-katiir. Hu mukhiif ziyaada wa faayit kulla l-ilaahaat.
[26] Achaan kulla ilaahaat al-chuʼuub // ma naafʼiin wa laakin Allah hu bas khalag al-samaawaat.
[27] Al-majd wa l-azama hineeyah wa fi bakaanah tinlagi al-gudra // wa l-farha.
[28] Majjudu Allah, ya gabaayil al-ard ! Majjudu Allah achaan hu al-Majiid wa l-Gaadir.
[29] Majjudu Allah achaan usmah al-Majiid ! Gaddumu hadaayaaku giddaamah wa asjudu leyah achaan hu al-Khudduus.
[30] Arjufu giddaamah, // ya kulla sukkaan al-ard. Al-aalam yagood saabit, ma yinhazza.
[31] Khalli al-sama tinbasit wa l-ard tafrah wa yuguulu fi ust al-umam : «Allah hu al-malik.»
[32] Khalli al-bahar yidagdig be kulla cheyy al-fi lubbah. Wa khalli al-kadaade tafrah be kulla cheyy al-foogha.
[33] Wa khalli chadar al-khaaba yizakhrutu giddaam Allah achaan Allah yaji yahkim al-ard.
[34] Achkuru Allah achaan hu rahiim wa rahmatah daayme ila l-abad.
[35] Wa guulu leyah : «Ya Ilaah al-naja, najjiina ! Ajmaʼna wa najjiina // min ust al-umam. Wa be da, nahmudu usmak al-mukhaddas wa nimajjuduuk wa nachkuruuk.»
[36] Baarak Allah Ilaah Bani Israaʼiil min zamaan wa ila l-abad. Wa kulla l-chaʼab gaalo : «Aamiin !» Wa chakaro Allah.
[37] Wa Dawuud amar Asaaf wa akhwaanah yagoodu giddaam sanduug muʼaahadat Allah achaan yisawwu khidmithum al-waajib hasab al-churuut al-yoomi.
[38] Wa Ubeed Adoom wileed Yaduutuun wa Huusa wa 68 min akhwaanhum humman hurraas biibaan beet Allah.
[39] Wa Dawuud wakkal Saduukh raajil al-diin wa rujaal diin aakhariin al-min aayiltah be khidmit kheemat Allah al-gaaʼide fi bakaan al-ibaada fi Gibʼuun.
[40] Wa yigaddumu dahiiye muharraga le Allah ayyi yoom, fajur wa achiiye, fi l-madbah hana l-dahaaya. Wa da le yitabbugu kulla cheyy al-maktuub fi kitaab al-Tawraat al-Allah amar beyah Bani Israaʼiil.
[41] Wa maʼaahum Heemaan wa Yaduutuun wa l-naas al-aakhariin al-azaloohum khaassatan le yachkuru Allah achaan rahmatah daayme ila l-abad.
[42] Wa Heemaan wa Yaduutuun humman dool yadurbu al-burunji wa l-nuggaara wa aalaat al-musiikha le yachkuru al-Rabb be khine. Wa awlaad Yaduutuun kamaan yaharsu al-baab.
[43] Wa baʼad da, khalaas kulla l-chaʼab chatto wa ayyi waahid macha beetah. Wa Dawuud gabbal beetah le yibaarik aayiltah.