[1] وَ بَعَدْ دَا، اللّٰهْ شَوَّفَانِي يَشُوعْ كَبِيرْ رُجَالْ الدِّينْ وَاقِفْ قِدَّامْ مَلَكْ اللّٰهْ. وَ إِبْلِيسْ التَّهَّامْ وَاقِفْ بِنُصّ الزَّيْنَةْ هَنَا يَشُوعْ لِيَتْهَمَهْ.
[2] وَ مَلَكْ اللّٰهْ قَالْ لِإِبْلِيسْ: «خَلِّي اللّٰهْ يِسَكِّتَكْ، يَا إِبْلِيسْ! أَيْوَى، خَلِّي اللّٰهْ يِسَكِّتَكْ، هُو الْعَزَلْ مَدِينَةْ الْقُدُسْ. وَ كَنْ لِلرَّاجِلْ دَا، هُو مَا مِثِلْ مُشْهَابْ الشَّالَوْه مِنْ النَّارْ وَلَّا؟»
[3] وَ يَشُوعْ وَاقِفْ قِدَّامْ الْمَلَكْ وَ لَابِسْ خُلْقَانْ وَسْخَانِينْ.
[4] وَ الْمَلَكْ أَمَرْ وَ قَالْ لِلْوَاقْفِينْ جَنْبَهْ: «سِلُّوا مِنَّهْ خُلْقَانَهْ الْوَسْخَانِينْ.» وَ بَعَدْ دَا، قَالْ لِيَشُوعْ: «شِيفْ، أَنَا نَجَّيْتَكْ مِنْ ذَنْبَكْ. خَلِّي يِلَبُّسُوكْ خُلْقَانْ هَنَا عِيدْ.»
[5] وَ قَالْ بَتَّانْ: «خَلِّي يُخُطُّوا فِي رَاسَهْ كَدْمُولْ طَاهِرْ.» وَ خَلَاصْ، لَبَّسَوْه خُلْقَانْ وَ خَطَّوْا كَدْمُولْ طَاهِرْ فِي رَاسَهْ. وَ مَلَكْ اللّٰهْ وَاقِفْ فِي الْبَكَانْ دَا.
[6] وَ خَلَاصْ، مَلَكْ اللّٰهْ كَلَّمْ لِيَشُوعْ وَ قَالْ:
[7] «دَاهُو اللّٰهْ الْقَادِرْ قَالْ: ‹كَنْ تِشِيلْ دَرْبِي وَ تَحْفَضْ خِدِمْتِي، إِنْتَ بَسْ تَحْكِمْ فِي بَيْتِي وَ تِرَاقِبْ فِي فَضَايْتِي كُلَ. وَ أَنَا نَنْطِيكْ بَكَانْ أَمْبَيْن الْآخَرِينْ الْوَاقْفِينْ هِنِي.›»
[8] «أَسْمَعْ، يَا يَشُوعْ كَبِيرْ رُجَالْ الدِّينْ وَ كُلَّ رُجَالْ الدِّينْ التِّحْتَكْ. إِنْتُو ذَاتْكُو عَلَامَةْ هَنَا الشَّيّءْ الْيُكُونْ. دَاهُو قَرِيبْ أَنَا نِرَسِّلْ عَبْدِي الْبِنَادُوهْ بِذْرَةْ.
[9] شِيفُوا الْحَجَرْ الْغَالِي الْخَطَّيْتَهْ قِدَّامْ يَشُوعْ. وَ فِي الْحَجَرْ، فِي سَبْعَةْ عُيُونْ. وَ دَاهُو أَنَا ذَاتِي نَنْقُشْ فَوْقَهْ نَقِشْ. وَ فِي يَوْم وَاحِدْ بَسْ، نُقُشّ خَطَا الْبَلَدْ دِي. وَ دَا كَلَامْ اللّٰهْ الْقَادِرْ.
[10] وَ فِي الْيَوْم دَا، أَيِّ وَاحِدْ مِنْكُو يَعَزِمْ جَارَهْ لِيَقْعُدْ بِالسَّلَامَةْ فِي لُبّ جِنَيْنِتَهْ هَنَا الْعِنَبْ وَ التِّينْ.» وَ دَا كَلَامْ اللّٰهْ الْقَادِرْ.