<كتاب عُبَدْيا

[1] رُؤْيَةْ عُبَدْيَا. دَاهُو كَلَامْ اللّٰهْ الرَّبّ ضِدّ شَعَبْ أَدَوْم. سِمِعْنَا خَبَرْ جَايِ مِنْ اللّٰهْ، هُو رَسَّلْ رَسُولْ بَيْن الْأُمَمْ // لِيُقُولْ: «يَلَّا قُمُّوا! قُمُّوا حَارُبُوا بَلَدْ أَدَوْم!»

[2] «يَا شَعَبْ أَدَوْم، دَاهُو أَنَا نِسَوِّيكُو أُمَّةْ صَغَيْرَةْ وَ فِي أُسْط الْأُمَمْ، يَحْقُرُوكُو زِيَادَةْ.

[3] وَ إِسْتِكْبَارْكُو بَسْ غَشَّاكُو، يَا إِنْتُو الْقَاعِدِينْ فِي كَرَاكِيرْ الْحُجَارْ. تَسْكُنُوا فِي الْبَكَانَاتْ الْعَالِيِينْ وَ تُقُولُوا فِي نُفُوسْكُو: ‹يَاتُو يِنَزِّلْنَا تِحِتْ؟›

[4] وَ حَتَّى كَانْ تِطِيرُوا مِثِلْ الصُّقُورَةْ وَ تَبْنُوا عُشُّكُو بَيْن النُّجُومْ كُلَ، مِنْ هِنَاكْ أَنَا نِنَزِّلْكُو. وَ دَا كَلَامْ اللّٰهْ.

[5] وَ كَنْ سَرَارِيقْ أَوْ نَهَّابِينْ يَجُوكُو بِاللَّيْل، هُمَّنْ مَا يِشِيلُوا الْيَكْفِيهُمْ بَسْ وَلَّا؟ وَ كَنْ قَطَّاعِينْ الْعِنَبْ يَجُوا لَيْكُو، مَا يِخَلُّوا وَرَاهُمْ الْكِشَّيْب وَلَّا؟

[6] يَا ذُرِّيَّةْ عِيسُو، عُدْوَانْكُو يِفَتُّشُوكُو وَ يَكْشُفُوا كَنْزُكُو.

[7] كُلَّ الرُّجَالْ الْعِنْدُكُو مَعَاهُمْ عَلَاقَةْ يَطُرْدُوكُو غَادِي لِحُدُودْكُو. وَ الرُّجَالْ الْعِنْدُكُو مَعَاهُمْ سَلَامْ يُغُشُّوكُو وَ يَحْكُمُوا فَوْقكُو. وَ رُفْقَانْكُو الْأَكَلَوْا أَكِلْكُو يُكُجُّوا لَيْكُو شَرَكْ تِحِتْ رِجْلَيْكُو. وَ يُقُولُوا: ‹هُمَّنْ دَوْل مَا عِنْدُهُمْ عَقُلْ!›

[8] فِي الْيَوْم دَا بَسْ، أَنَا نِدَمِّرْ كُلَّ الْعُلَمَاءْ // الْفِي أَدَوْم وَ الْفَاهِمِينْ الْفِي جِبَالْ ذُرِّيَّةْ عِيسُو. وَ دَا كَلَامْ اللّٰهْ.

[9] يَا حِلَّةْ تَيْمَانْ، فُرَّاسْكِ يِنْبَهْتُوا وَ بَيْدَا، الْعَدُو يَكْتُلْ أَيِّ نَادُمْ الْقَاعِدْ فِي جِبَالْ ذُرِّيَّةْ عِيسُو.»

[10] «وَ بِسَبَبْ الْعُنُفْ السَّوَّيْتُوهْ لِأَخْوَانْكُو ذُرِّيَّةْ يَعْقُوبْ، الْعَيْب يِغَطِّيكُو وَ تِدَّمَّرَوْا إِلَى الْأَبَدْ.

[11] أَشَانْ فِي يَوْم ضِيقِتْهُمْ، إِنْتُو وَقَفْتُوا بَعِيدْ وَكِتْ الْأَجَانِبْ نَهَبَوْا غُنَاهُمْ وَ الْعُدْوَانْ دَخَلَوْا بِيبَانْ الْمَدِينَةْ وَ سَوَّوْا أَمْ عِيَيْدَاتْ لِيِلْقَاسَمَوْا مَدِينَةْ الْقُدُسْ. وَ فِي الْيَوْم دَا، إِنْتُو كُلَ بِقِيتُوا وَاحِدِينْ // مِنْ عُدْوَانْهُمْ.

[12] مَا وَاجِبْ تَفْرَحَوْا فِي يَوْم دَمَارْ أَخْوَانْكُو، فِي يَوْم مَصِيبِتْهُمْ. وَ مَا وَاجِبْ تَفْرَحَوْا بِسَبَبْ بَنِي يَهُوذَا فِي يَوْم أَدَّمَّرَوْا. وَ مَا وَاجِبْ تَطُلْقُوا لِسَانْكُو فِي يَوْم ضِيقِتْهُمْ.

[13] وَ مَا وَاجِبْ تَدْخُلُوا مَدِينَةْ شَعَبِي فِي يَوْم خَرَابْهُمْ وَ لَا تَفْرَحَوْا بِفَسَالِتْهُمْ فِي يَوْم خَرَابْهُمْ وَ لَا تَنْهَبَوْا غُنَاهُمْ فِي يَوْم خَرَابْهُمْ.

[14] وَ مَا وَاجِبْ تَقْعُدُوا فِي مَشْبَكْ الدُّرُوبْ لِتَكْتُلُوا الْمُعَرِّدِينْ مِنْهُمْ وَ تِسَلُّمُوا الْفَضَّلَوْا حَيِّينْ فِي يَوْم ضِيقِتْهُمْ.

[15] أَشَانْ الْيَوْم الْاللّٰهْ يِحَاكِمْ فَوْقَهْ كُلَّ الْأُمَمْ جَايِ قَرِيبْ. مِثِلْ سَوَّيْت، يِسَوُّوا فَوْقَكْ. وَ عَمَلَكْ السَّوَّيْتَهْ، يِقَبِّلْ لَيْك فِي رَاسَكْ.»

[16] «يَا بَنِي يَهُوذَا، مِثِلْ شِرِبْتُوا مِنْ كَاسْ غَضَبِي فِي جَبَلِي الْمُقَدَّسْ، كُلَّ الْأُمَمْ يَشَرْبَوْا مِنَّهْ دَايْماً. هُمَّنْ يَرْوَوْا مِنْ كَاسْ غَضَبِي مِثِلْ السَّكَّارَى يَرْوَوْا // مِنْ الْمَرِيسَةْ وَ يَبْقَوْا مِثِلْ أَبَداً مَا خَلَقَوْهُمْ.

[17] وَ لَاكِنْ شَعَبْ اللّٰهْ الْفَضَّلَوْا يَلْجَأَوْا فِي جَبَلْ صَهْيُون وَ الْبَكَانْ دَا بَتَّانْ يَبْقَى مُقَدَّسْ. وَ ذُرِّيَّةْ يَعْقُوبْ يَقْلَعَوْا أَرْضُهُمْ مِنْ النَّاسْ الْقَلَعَوْهَا مِنْهُمْ.

[18] وَ ذُرِّيَّةْ يَعْقُوبْ يَبْقَوْا // مِثِلْ نَارْ وَ ذُرِّيَّةْ يُوسُفْ يَبْقَوْا // مِثِلْ أَمْ بَلْبَالَةْ. وَ لَاكِنْ ذُرِّيَّةْ عِيسُو يَبْقَوْا // مِثِلْ قَشّ وَ النَّارْ تُتُشُّهُمْ // وَ تَحْرِقْهُمْ. وَ نَادُمْ وَاحِدْ كُلَ مِنْ ذُرِّيَّةْ عِيسُو مَا يِفَضِّلْ حَيّ أَشَانْ دَا كَلَامْ اللّٰهْ الْهُو قَالَهْ.»

[19] وَ فِي الْجُنُوبْ، بَنِي يَهُوذَا يَقْلَعَوْا جِبَالْ ذُرِّيَّةْ عِيسُو وَ فِي سَهَلَةْ شَفِيلَةْ، يَقْلَعَوْا بَلَدْ الْفِلِسْطِيِّينْ. وَ يَقْلَعَوْا تُرَابْ قَبِيلَةْ أَفْرَايِمْ وَ تُرَابْ مَدِينَةْ السَّامِرَةْ. وَ نَاسْ قَبِيلَةْ بَنْيَامِينْ يَقْلَعَوْا قِلْعَادْ.

[20] وَ بَنِي إِسْرَائِيلْ الْقَبَّلَوْا مِنْ الْغُرْبَةْ يَقْلَعَوْا بَلَدْ كَنْعَانْ لَحَدِّي صَرَفَةْ. وَ سُكَّانْ مَدِينَةْ الْقُدُسْ الْقَبَّلَوْا مِنْ الْغُرْبَةْ فِي سَفَارَدْ يَقْلَعَوْا مُدُنْ الْجُنُوبْ.

[21] وَ الْمُنَجِّيِينْ يَطْلَعَوْا جَبَلْ صَهْيُون وَ يَحْكُمُوا جِبَالْ ذُرِّيَّةْ عِيسُو. وَ الْمُلُكْ يُكُونْ لِلّٰهْ!