[1] وَ اللّٰهْ حَجَّى لِمُوسَى وَ قَالْ:
[2] دَاهُو الْقَانُونْ الْيِطَبِّقَهْ النَّادُمْ الْعِنْدَهْ مَرَضْ الْجِسِمْ فِي يَوْم طِهَارْتَهْ. وَكِتْ يِوَدُّوهْ لِرَاجِلْ الدِّينْ،
[3] رَاجِلْ الدِّينْ يَمْرُقْ بَرَّا مِنْ الْفَرِيقْ وَ يِشِيفْ الْمَرْضَانْ. كَنْ هُو لِقِي الْعَافَيْ مِنْ مَرَضْ الْجِسِمْ دَا،
[4] رَاجِلْ الدِّينْ يَامُرْ لِلنَّادُمْ الْيِطَّهَّرْ يِجِيبْ إِتْنَيْن طُيُورْ حَيِّينْ وَ طَاهِرِينْ وَ عُودْ مِنْ حَطَبْ الْأَرْز وَ خَيْط أَحْمَرْ وَ وَرْشَالْ زُوفَةْ.
[5] وَ رَاجِلْ الدِّينْ يَنْطِي أَمُرْ يَدْبَحَوْا وَاحِدْ مِنْ الطُّيُورْ دَوْل فِي مَاعُونْ هَنَا طِينَةْ مَلَانْ أَلْمِي نَضِيفْ.
[6] وَ يِشِيلْ الطَّيْرَايْ الْحَيَّةْ وَ عُودْ مِنْ حَطَبْ الْأَرْز وَ الْخَيْط الْأَحْمَرْ وَ وَرْشَالْ الزُّوفَةْ. وَ يِدِسُّهُمْ فِي الدَّمّ هَنَا الطَّيْرَايْ الدَّبَحَوْهَا فِي الْأَلْمِي النَّضِيفْ.
[7] وَ رَاجِلْ الدِّينْ يُرُشّ سَبْعَةْ مَرَّاتْ النَّادُمْ الْيِطَّهَّرْ مِنْ مَرَضْ الْجِسِمْ. وَ هُو يِبَلِّغَهْ طَاهِرْ وَ يَطْلِقْ الطَّيْرَايْ الْحَيَّةْ تِطِيرْ فِي الْكَدَادَةْ.
[8] وَ النَّادُمْ الْيِطَّهَّرْ يِغَسِّلْ خُلْقَانَهْ وَ يِزَيِّنْ كُلَّ صُوفَهْ وَ يِلْبَرَّدْ وَ خَلَاصْ، هُو يَبْقَى طَاهِرْ. وَ بَعَدْ دَا، هُو يَقْدَرْ يَدْخُلْ فِي الْفَرِيقْ. وَ لَاكِنْ وَاجِبْ يَقْعُدْ سَبْعَةْ يَوْم بَرَّا مِنْ خَيْمِتَهْ.
[9] وَ فِي الْيَوْم السَّابِعْ، هُو يِزَيِّنْ كُلَّ صُوفْ رَاسَهْ وَ دِقْنَهْ وَ حَدَقَهْ وَ يِزَيِّنْ كُلَّ صُوفْ جِلْدَهْ. وَ يِغَسِّلْ خُلْقَانَهْ وَ يِلْبَرَّدْ وَ هُو يَبْقَى طَاهِرْ.
[10] وَ فِي الْيَوْم التَّامِنْ، هُو يِشِيلْ إِتْنَيْن خَرُوفْ الْمَا عِنْدُهُمْ أَيِّ عَيْب وَ غَنَمَايْ بِنْت سَنَةْ الْمَا عِنْدَهَا أَيِّ عَيْب وَ هَدِيَّةْ هَنَا دَقِيقْ تَلَاتَةْ كَوْرَوْ مُخَلْبَطْ بِدِهِنْ وَ تِلِتْ لِيتِرْ هَنَا دِهِنْ.
[11] وَ رَاجِلْ الدِّينْ الْيِسَوِّي الطِّهَارَةْ يُخُطّ النَّادُمْ الْيِطَّهَّرْ وَ الْهَدَايَا قِدَّامْ اللّٰهْ فِي مَدَخَلْ خَيْمَةْ الْإِجْتِمَاعْ.
[12] وَ رَاجِلْ الدِّينْ يِشِيلْ وَاحِدْ مِنْ الْخُرْفَانْ دَوْل وَ تِلِتْ اللِّيتِرْ هَنَا الدِّهِنْ وَ يِقَدِّمْهُمْ ضَحِيَّةْ لِكَفَّارَةْ الْخَطَا وَ هَدِيَّةْ مَرْفُوعَةْ لِلّٰهْ.
[13] وَ هُو يَدْبَحْ الْخَرُوفْ فِي الْبَكَانْ الْيَدْبَحَوْا فَوْقَهْ الضَّحِيَّةْ لِكَفَّارَةْ الذَّنِبْ وَ الضَّحِيَّةْ الْمُحَرَّقَةْ، فِي بَكَانْ مُقَدَّسْ. أَشَانْ الضَّحِيَّةْ لِكَفَّارَةْ الْخَطَا، هِي لِرَاجِلْ الدِّينْ مِثِلْ ضَحِيَّةْ كَفَّارَةْ الذَّنِبْ. هُمَّنْ مُقَدَّسِينْ مَرَّةْ وَاحِدْ.
[14] وَ رَاجِلْ الدِّينْ يِشِيلْ مِنْ دَمّ الضَّحِيَّةْ لِكَفَّارَةْ الْخَطَا وَ يُخُطَّهْ فِي حَلَمَةْ الْأَدَانْ الزَّيْنَةْ هَنَا النَّادُمْ الْيِطَّهَّرْ وَ فِي أُصْبَعَهْ الْكَبِيرْ هَنَا إِيدَهْ وَ رِجْلَهْ الزَّيْنَةْ.
[15] وَ رَاجِلْ الدِّينْ يِشِيلْ تِلِتْ اللِّيتِرْ هَنَا الدِّهِنْ وَ يُصُبّ مِنَّهْ فِي كَفَّهْ الْإِسْرَايْ.
[16] وَ يِدِسّ أُصْبَعَهْ هَنَا إِيدَهْ الزَّيْنَةْ فِي الدِّهِنْ الْفِي كَفَّهْ الْإِسْرَايْ وَ يُرُشّ بِأُصْبَعَهْ الدِّهِنْ سَبْعَةْ مَرَّاتْ قِدَّامْ اللّٰهْ.
[17] وَ رَاجِلْ الدِّينْ يُخُطّ مِنْ الدِّهِنْ الْفَضَّلْ فِي حَلَمَةْ الْأَدَانْ الزَّيْنَةْ هَنَا النَّادُمْ الْيِطَّهَّرْ وَ فِي أُصْبَعَهْ الْكَبِيرْ هَنَا إِيدَهْ وَ رِجْلَهْ الزَّيْنَةْ، مِنْ فَوْق لِدَمّ هَنَا الضَّحِيَّةْ لِكَفَّارَةْ الْخَطَا.
[18] وَ الْفَضَّلْ مِنْ الدِّهِنْ الْفِي إِيدْ رَاجِلْ الدِّينْ، يُصُبَّهْ فِي رَاسْ النَّادُمْ الْيِطَّهَّرْ. وَ خَلَاصْ، يِسَوِّي لَيَّهْ كَفَّارَةْ قِدَّامْ اللّٰهْ.
[19] وَ رَاجِلْ الدِّينْ يِقَدِّمْ ضَحِيَّةْ كَفَّارَةْ الذَّنِبْ وَ بِمِثِلْ دَا، يِسَوِّي كَفَّارَةْ لِلنَّادُمْ الْيِطَّهَّرْ مِنْ نَجَاسْتَهْ. وَ بَعَدْ دَا، رَاجِلْ الدِّينْ يَدْبَحْ الضَّحِيَّةْ الْمُحَرَّقَةْ.
[20] وَ رَاجِلْ الدِّينْ يِقَدِّمْ فِي الْمَدْبَحْ الضَّحِيَّةْ الْمُحَرَّقَةْ وَ الْهَدِيَّةْ هَنَا الدَّقِيقْ وَ يِسَوِّي كَفَّارَةْ لِلنَّادُمْ دَا. وَ خَلَاصْ، هُو يَبْقَى طَاهِرْ.
[21] وَ كَنْ النَّادُمْ دَا فَقْرِي، مَا يَقْدَرْ يَلْقَى كُلَّ الْأَشْيَاءْ دَوْل، خَلِّي يِشِيلْ خَرُوفْ وَاحِدْ بَسْ لِضَحِيَّةْ كَفَّارَةْ الْخَطَا وَ دَا يِقَدُّمُوهْ هَدِيَّةْ مَرْفُوعَةْ لِيِسَوُّوا لَيَّهْ كَفَّارَةْ. وَ يِشِيلْ كَوْرَوْ هَنَا دَقِيقْ مُخَلْبَطْ بِدِهِنْ لِلْهَدِيَّةْ هَنَا الدَّقِيقْ وَ تِلِتْ لِيتِرْ هَنَا دِهِنْ.
[22] وَ قِمْرِيْ إِتْنَيْن أَوْ حَمَامْ إِتْنَيْن وَ دَا حَسَبْ قُدُرْتَهْ، وَاحِدَةْ لِلضَّحِيَّةْ هَنَا كَفَّارَةْ الذَّنِبْ وَ الْآخَرَةْ لِلضَّحِيَّةْ الْمُحَرَّقَةْ.
[23] وَ فِي الْيَوْم التَّامِنْ، هُو يِجِيبْ كُلَّ الْهَدَايَا هَنَا طِهَارْتَهْ لِرَاجِلْ الدِّينْ فِي مَدَخَلْ خَيْمَةْ الْإِجْتِمَاعْ قِدَّامْ اللّٰهْ.
[24] وَ رَاجِلْ الدِّينْ يِشِيلْ الْخَرُوفْ هَنَا ضَحِيَّةْ كَفَّارَةْ الْخَطَا وَ تِلِتْ لِيتِرْ هَنَا دِهِنْ وَ يِقَدِّمْهُمْ هَدِيَّةْ مَرْفُوعَةْ قِدَّامْ اللّٰهْ.
[25] وَ رَاجِلْ الدِّينْ يَدْبَحْ الْخَرُوفْ هَنَا ضَحِيَّةْ كَفَّارَةْ الْخَطَا. وَ هُو يِشِيلْ مِنْ دَمّ الضَّحِيَّةْ هَنَا كَفَّارَةْ الْخَطَا وَ يُخُطَّهْ فِي حَلَمَةْ الْأَدَانْ الزَّيْنَةْ هَنَا النَّادُمْ الْيِطَّهَّرْ وَ فِي أُصْبَعَهْ الْكَبِيرْ هَنَا إِيدَهْ وَ رِجْلَهْ الزَّيْنَةْ.
[26] وَ رَاجِلْ الدِّينْ يُصُبّ دِهِنْ شِيَّةْ فِي كَفَّهْ الْإِسْرَايْ.
[27] وَ يِشِيلْ مِنْ الدِّهِنْ الْفِي كَفَّهْ بِأُصْبَعَهْ هَنَا إِيدَهْ الزَّيْنَةْ وَ يُرُشَّهْ سَبْعَةْ مَرَّاتْ قِدَّامْ اللّٰهْ.
[28] وَ رَاجِلْ الدِّينْ يُخُطّ دِهِنْ فِي حَلَمَةْ الْأَدَانْ الزَّيْنَةْ هَنَا النَّادُمْ الْيِطَّهَّرْ وَ فِي أُصْبَعَهْ الْكَبِيرْ هَنَا إِيدَهْ وَ رِجْلَهْ الزَّيْنَةْ، مِنْ فَوْق لِدَمّ هَنَا ضَحِيَّةْ كَفَّارَةْ الْخَطَا.
[29] وَ الْفَضَّلْ مِنْ الدِّهِنْ الْفِي إِيدْ رَاجِلْ الدِّينْ يُصُبَّهْ فِي رَاسْ النَّادُمْ الْيِطَّهَّرْ وَ يِسَوِّي لَيَّهْ كَفَّارَةْ قِدَّامْ اللّٰهْ.
[30] وَ هُو يِقَدِّمْ وَاحِدَةْ مِنْ الْقِمْرِيْ أَوْ وَاحِدَةْ مِنْ الْحَمَامْ حَسَبْ قُدُرْتَهْ.
[31] وَ مِنْ الشَّيّءْ الْقِدِرْ لِقِيهْ، هُو يِقَدِّمَهْ، وَاحِدَةْ لِلضَّحِيَّةْ لِكَفَّارَةْ الذَّنِبْ وَ الْآخَرَةْ لِلضَّحِيَّةْ الْمُحَرَّقَةْ وَ مَعَاهُمْ الْهَدِيَّةْ هَنَا الدَّقِيقْ. وَ رَاجِلْ الدِّينْ يِسَوِّي لِلنَّادُمْ الْيِطَّهَّرْ كَفَّارَةْ قِدَّامْ اللّٰهْ.
[32] وَ دَوْل الْقَوَانِينْ الْبُخُصُّوا طِهَارَةْ النَّادُمْ الْعِنْدَهْ مَرَضْ الْجِسِمْ وَ فَقْرِي مَا عِنْدَهْ قُدْرَةْ لِيِطَّهَّرْ.
[33] وَ اللّٰهْ حَجَّى لِمُوسَى وَ هَارُونْ وَ قَالْ:
[34] وَكِتْ تِوَصُّلُوا فِي بَلَدْ كَنْعَانْ النَّنْطِيهَا لَيْكُو وَرَثَةْ، كَنْ أَنَا نُخُطّ بَرْنُوقْ فِي وَاحِدْ مِنْ الْبُيُوتْ هَنَا الْبَلَدْ التَّبْقَى هِنْتُكُو،
[35] وَاجِبْ سِيدْ الْبَيْت دَا يَمْشِي يِأَوْرِي رَاجِلْ الدِّينْ. وَ يُقُولْ لَيَّهْ: «أَنَا شِفْت شَيّءْ بِشَابِهْ بُقْعَةْ فِي لُبّ بَيْتِي.»
[36] وَ رَاجِلْ الدِّينْ يَنْطِي أَمُرْ يِفَضُّوا الْبَيْت قَبُلْ هُو مَا يَجِي يِشِيفْ الْبُقْعَةْ أَشَانْ كُلَّ شَيّءْ فِي لُبّ الْبَيْت، هُو مَا يِبَلِّغْهَا نِجِسْ. وَ بَعَدْ دَا، رَاجِلْ الدِّينْ يَدْخُلْ يِشِيفْ الْبَيْت.
[37] وَ هُو يِشِيفْ الْبُقْعَةْ. وَ كَنْ هُو يِشِيفْ كَدَرْ الْبُقْعَةْ فِي الدُّرْدُرْ هَنَا الْبَيْت عِنْدَهَا نُقَارْ مُخَضِّرِينْ أَوْ مُحَمِّرِينْ وَ كَنْ سَوَّوْا نُقَارْ فِي الدُّرْدُرْ،
[38] خَلَاصْ رَاجِلْ الدِّينْ يَمْرُقْ مِنْ الْبَيْت. وَ وَكِتْ لِحِقْ الْبَابْ، هُو يِسِدّ الْبَيْت لِمُدَّةْ سَبْعَةْ يَوْم.
[39] وَ فِي الْيَوْم السَّابِعْ، رَاجِلْ الدِّينْ يِقَبِّلْ. وَ كَنْ هُو يِشِيفْ الْبُقْعَةْ قَاعِدَةْ تِلْوَسَّعْ فِي الدُّرْدُرْ هَنَا الْبَيْت،
[40] هُو يَامُرْ يَمُرْقُوا الْحُجَارْ الْقَاعِدَةْ فَوْقهُمْ الْبُقْعَةْ وَ يَزْقُلُوهُمْ بَرَّا مِنْ الْمَدِينَةْ فِي بَكَانْ نِجِسْ.
[41] وَ يُحُكُّوا كُلَّ الْبَيْت مِنْ دَاخَلْ وَ يِدَفُّقُوا تُرَابَهْ الْحَكَّوْه بَرَّا مِنْ الْمَدِينَةْ فِي بَكَانْ نِجِسْ.
[42] وَ يِشِيلُوا حُجَارْ آخَرِينْ وَ يُخُطُّوهُمْ فِي قَدّ الْحُجَارْ الْمَرَقَوْهُمْ. وَ يِشِيلُوا تُرَابْ آخَرْ لِيِطَلُّسُوا الْبَيْت مِنْ دَاخَلْ.
[43] وَ كَنْ بَتَّانْ الْبُقْعَةْ قَمَّتْ بَعَدْ مَرَقَوْا الْحُجَارْ وَ بَعَدْ حَكَّوْا الْبَيْت مِنْ دَاخَلْ وَ طَلَّسَوْه،
[44] وَاجِبْ رَاجِلْ الدِّينْ يِقَبِّلْ. وَ كَنْ يِشِيفْ الْبُقْعَةْ زَادَتْ فِي الْبَيْت، خَلَاصْ دَا بَرْنُوقْ مُعْدِي. وَ الْبَيْت دَا نِجِسْ.
[45] وَ يِكَسُّرُوا الْبَيْت. وَ كُلَّ حُجَارَهْ وَ حَطَبَهْ وَ كُلَّ تُرَابَهْ يَمُرْقُوهْ وَ يِدَفُّقُوهْ بَرَّا مِنْ الْمَدِينَةْ فِي بَكَانْ نِجِسْ.
[46] وَ كَنْ نَادُمْ يَدْخُلْ فِي الْبَيْت وَكِتْ هُو مَسْدُودْ، النَّادُمْ دَا يَبْقَى نِجِسْ لَحَدِّي الْعَشِيَّةْ.
[47] وَ كَنْ نَادُمْ يَرْقُدْ فِي الْبَيْت دَا، وَاجِبْ يِغَسِّلْ خُلْقَانَهْ. وَ كَنْ يَاكُلْ فَوْقَهْ كُلَ، وَاجِبْ يِغَسِّلْ خُلْقَانَهْ.
[48] وَ لَاكِنْ كَنْ رَاجِلْ الدِّينْ جَاءْ وَ يِشِيفْ كَدَرْ بَعَدْ طَلَّسَوْا الْبَيْت الْبُقْعَةْ مَا الْوَسَّعَتْ فِي الْبَيْت، خَلَاصْ رَاجِلْ الدِّينْ يِبَلِّغْ الْبَيْت دَا طَاهِرْ أَشَانْ الْبُقْعَةْ أَلْعَالَجَتْ.
[49] وَ لِيِطَهِّرْ الْبَيْت مِنْ الْبُقْعَةْ، هُو يِشِيلْ إِتْنَيْن طُيُورْ وَ حَطَبْ الْأَرْز وَ خَيْط أَحْمَرْ وَ وَرْشَالْ زُوفَةْ.
[50] وَ رَاجِلْ الدِّينْ يَدْبَحْ وَاحِدْ مِنْ الطُّيُورْ دَوْل فِي مَاعُونْ هَنَا طِينَةْ مَلَانْ أَلْمِي نَضِيفْ.
[51] وَ يِشِيلْ عُودْ مِنْ حَطَبْ الْأَرْز وَ وَرْشَالْ الزُّوفَةْ وَ الْخَيْط الْأَحْمَرْ وَ الطَّيْرَايْ الْحَيَّةْ وَ يِدِسُّهُمْ فِي الدَّمّ هَنَا الطَّيْرَايْ الدَّبَحَوْهَا فِي الْأَلْمِي النَّضِيفْ. وَ يُرُشّ بَيَّهْ الْبَيْت سَبْعَةْ مَرَّاتْ.
[52] وَ هُو يِطَهِّرْ الْبَيْت بِدَمّ الطَّيْرَايْ وَ الْأَلْمِي النَّضِيفْ وَ الطَّيْرَايْ الْحَيَّةْ وَ حَطَبْ الْأَرْز وَ وَرْشَالْ الزُّوفَةْ وَ الْخَيْط الْأَحْمَرْ.
[53] وَ يَطْلِقْ الطَّيْرَايْ الْحَيَّةْ تِطِيرْ بَرَّا مِنْ الْمَدِينَةْ فِي الْكَدَادَةْ. وَ بِمِثِلْ دَا، هُو يِسَوِّي كَفَّارَةْ لِلْبَيْت وَ خَلَاصْ، الْبَيْت يَبْقَى طَاهِرْ.
[54] وَ خَلَاصْ، دَوْل الْقَوَانِينْ الْبُخُصُّوا أَيِّ مَرَضْ الْجِسِمْ وَ الْقُوبْ
[55] وَ الْبَرْنُوقْ هَنَا الْخُلْقَانْ وَ الْبُيُوتْ
[56] وَ الْخَرَارِيجْ وَ الْبَهَقْ وَ الْبُقَعْ الْيِرَارُوا.
[57] وَ الْقَوَانِينْ دَوْل يَنْطُوا تَعْلِيمْ فِي حَالَةْ النَّجَاسَةْ وَ فِي حَالَةْ الطِّهَارَةْ. وَ دَوْل قَوَانِينْ الْبُخُصُّوا أَيِّ مَرَضْ هَنَا الْجِسِمْ.