[1] وَ الرَّبّ قَالْ لِيَعْقُوبْ: «قُمّ أَمْشِي بَيْت إِيلْ. أَسْكُنْ هِنَاكْ وَ أَبْنِي مَدْبَحْ لَيِّ، أَنَا الرَّبّ الْبَيَّنْت نَفْسِي لَيْك وَكِتْ إِنْتَ مُعَرِّدْ مِنْ أَخُوكْ عِيسُو.»
[2] وَ يَعْقُوبْ قَالْ لِعَايِلْتَهْ وَ لِكُلَّ النَّاسْ الْقَاعِدِينْ مَعَايَهْ: «بَعُّدُوا مِنْكُو الْأَصْنَامْ الْأَجْنَبِيِّينْ وَ طَهُّرُوا قُلُوبْكُو وَ غَيَّرَوْا خُلْقَانْكُو.
[3] قُمُّوا! نَمْشُوا بَيْت إِيلْ. وَ أَنَا نَبْنِي مَدْبَحْ لِلرَّبّ. هُو حَلَّانِي وَكِتْ أَنَا فِي الضِّيقَةْ وَ كَانْ مَعَايِ فِي دَرْبِي الْأَنَا مَشَيْت فَوْقَهْ.»
[4] وَ هُمَّنْ أَنْطَوْا لِيَعْقُوبْ كُلَّ الْأَصْنَامْ الْأَجْنَبِيِّينْ الْفِي إِيدَيْهُمْ وَ الْخُرُوس الْفِي أُدْنَيْهُمْ. وَ يَعْقُوبْ دَفَنَاهُمْ فِي تِحِتْ الشَّدَرَةْ الْكَبِيرَةْ الْقَرِيبَةْ لِحِلَّةْ شَكِيمْ.
[5] وَ وَكِتْ قَمَّوْا مَاشِينْ، الرَّبّ نَزَّلْ خَوْف شَدِيدْ فِي نَاسْ الْحِلَّالْ الْمُجَاوِرِينْهُمْ وَ مَا فِي نَادُمْ قِدِرْ مَشَى وَرَاءْ أَوْلَادْ يَعْقُوبْ.
[6] وَ يَعْقُوبْ مَعَ النَّاسْ الْمَعَايَهْ وَصَّلَوْا فِي حِلَّةْ لُوزْ الْهَسَّعْ أُسُمْهَا بَيْت إِيلْ، فِي بَلَدْ كَنْعَانْ.
[7] وَ بَنَى مَدْبَحْ وَ سَمَّى الْبَكَانْ دَا أَيْل بَيْت إِيلْ (مَعَنَاتَهْ رَبّ بَيْت إِيلْ). أَشَانْ فِي الْبَكَانْ دَا بَسْ، الرَّبّ بَانْ لَيَّهْ وَكِتْ هُو مُعَرِّدْ مِنْ أَخُوهْ عِيسُو.
[8] وَ دَا الْبَكَانْ الْمَاتَتْ فَوْقَهْ دَبُورَةْ الرَّبَّتْهَا لِرِفْقَةْ وَكِتْ هِي صَغَيْرَةْ. وَ دَفَنَوْهَا قَرِيبْ لِبَيْت إِيلْ تِحِتْ شَدَرَةْ الْبَلُّوطْ السَّمَّوْهَا بَلُّوطْ الْبَكِي.
[9] وَ بَعَدْ يَعْقُوبْ قَمَّ مِنْ بَلَدْ فَدَّانْ أَرَامْ وَ وَصَّلْ فِي بَيْت إِيلْ، الرَّبّ بَانْ لَيَّهْ بَتَّانْ وَ بَارَكَهْ.
[10] وَ قَالْ لَيَّهْ: «أُسْمَكْ يَعْقُوبْ وَ لَاكِنْ بَعَدْ الْيَوْم مَا يِنَادُوكْ يَعْقُوبْ. خَلِّي أُسْمَكْ يَبْقَى إِسْرَائِيلْ.» وَ بِمِثِلْ دَا، لِيَعْقُوبْ الرَّبّ سَمَّاهْ إِسْرَائِيلْ.
[11] وَ الرَّبّ قَالْ لَيَّهْ: «أَنَا اللّٰهْ الْقَادِرْ. أَلْدَ وَ عِيَالَكْ يَبْقَوْا كَتِيرِينْ. أُمَّةْ وَ أُمَمْ كَتِيرِينْ يَمُرْقُوا مِنَّكْ وَ مِنْ صُلْبَكْ يَمُرْقُوا مُلُوكْ.
[12] وَ الْبَلَدْ الْأَنَا أَنْطَيْتهَا لِإِبْرَاهِيمْ وَ إِسْحَاقْ، نَنْطِيهَا لَيْك إِنْتَ وَ لِذُرِّيّتَكْ التَّجِي مِنْ بَعَدَكْ.»
[13] وَ خَلَاصْ، الرَّبّ مَشَى مِنْ الْبَكَانْ الْحَجَّى لَيَّهْ فَوْقَهْ.
[14] وَ يَعْقُوبْ غَزَّ حَجَرْ فِي الْبَكَانْ الرَّبّ حَجَّى لَيَّهْ وَ صَبَّ فَوْقَهْ هَدِيَّةْ شَرَابْ وَ دِهِنْ لِيِخَصِّصَهْ.
[15] وَ يَعْقُوبْ سَمَّى الْبَكَانْ الرَّبّ حَجَّى لَيَّهْ فَوْقَهْ دَا، بَيْت إِيلْ (مَعَنَاتَهْ بَيْت اللّٰهْ).
[16] وَ خَلَاصْ، يَعْقُوبْ وَ عَايِلْتَهْ قَمَّوْا مِنْ بَيْت إِيلْ. وَ وَكِتْ هُمَّنْ لِسَّاعْهُمْ بَعِيدْ مِنْ حِلَّةْ أَفْرَاتَةْ، رَاحِيلْ طَالَقَتْ. وَ وَالُودِتْهَا بِقَتْ قَاسِيَةْ.
[17] وَ وَكِتْ الطَّلَقَةْ عَصَّرَتْهَا، الْوَلَّادَةْ قَالَتْ لَيْهَا: «مَا تَخَافَيْ، دَاهُو بَتَّانْ وِلِدْتِ وِلَيْد!»
[18] وَ لَاكِنْ رَاحِيلْ قَرَّبَتْ تُمُوتْ. قَبُلْ مَوْتهَا، سَمَّتْ الْوِلَيْد دَا بَنْأُونِي (مَعَنَاتَهْ وِلَيْد حِزْنِي). وَ لَاكِنْ أَبُوهْ سَمَّاهْ بَنْيَامِينْ (مَعَنَاتَهْ وِلَيْد زَيْنَايْتِي).
[19] وَ رَاحِيلْ مَاتَتْ وَ دَفَنَوْهَا فِي دَرِبْ حِلَّةْ أَفْرَاتَةْ الْمَعْرُوفَةْ الْيَوْم بِبَيْت لَحَمْ.
[20] وَ يَعْقُوبْ غَزَّ حَجَرْ فِي رَاسْ قَبُرْهَا. وَ الْحَجَرْ الْفِي قَبُرْ رَاحِيلْ قَاعِدْ لَحَدِّي الْيَوْم.
[21] وَ يَعْقُوبْ الْبِنَادُوهْ إِسْرَائِيلْ حَوَّلْ مِنْ الْبَكَانْ دَا وَ مَشَى بَنَى خَيْمِتَهْ قِدَّامْ مِنْ مِقْدَلْ عِدَرْ.
[22] وَ وَكِتْ إِسْرَائِيلْ سَكَنْ فِي الْبَلَدْ دِي، وِلَيْدَهْ الْبِكِرْ رَأُوبِينْ مَشَى رَقَدْ مَعَ بِلْهَةْ سِرِّيَةْ أَبُوهْ وَ إِسْرَائِيلْ سِمِعْ بِالشَّيّءْ دَا. وَ أَوْلَادْ يَعْقُوبْ هُمَّنْ أَتْنَا عَشَرْ.
[23] لَيْئَةْ جَابَتْ لَيَّهْ رَأُوبِينْ الْبِكِرْ وَ شِمْعُونْ وَ لَاوِي وَ يَهُوذَا وَ يَسَّاكَرْ وَ زَبُلُونْ.
[24] وَ رَاحِيلْ جَابَتْ لَيَّهْ يُوسُفْ وَ بَنْيَامِينْ.
[25] وَ بِلْهَةْ خَدَّامَةْ رَاحِيلْ جَابَتْ لَيَّهْ دَانْ وَ نَفْتَالِي.
[26] وَ زِلْفَةْ خَدَّامَةْ لَيْئَةْ جَابَتْ لَيَّهْ قَادْ وَ أَشِيرْ. دَوْل أَوْلَادْ يَعْقُوبْ الْوِلْدَوْهُمْ لَيَّهْ فِي فَدَّانْ أَرَامْ.
[27] وَ خَلَاصْ، يَعْقُوبْ وَصَّلْ بَكَانْ أَبُوهْ إِسْحَاقْ فِي حِلَّةْ مَمْرَا، قَرِيبْ لِقَرْيَةْ أَرْبَعَةْ الْمَعْرُوفَةْ الْيَوْم بِحِبْرُونْ. وَ دَا الْبَكَانْ الْأَوَّلْ إِبْرَاهِيمْ وَ إِسْحَاقْ سَكَنَوْا فَوْقَهْ.
[28] وَ إِسْحَاقْ عَاشْ 180 سَنَةْ.
[29] وَ مَاتْ وَ لِحِقْ أَبَّهَاتَهْ وَ دَا وَكِتْ شَيَّبْ وَ شِبِعْ مِنْ الدُّنْيَا. وَ خَلَاصْ، أَوْلَادَهْ عِيسُو وَ يَعْقُوبْ دَفَنَوْه.