[1] وَ اللّٰهْ حَجَّى لِمُوسَى وَ قَالْ:
[2] «قُولْ لِبَنِي إِسْرَائِيلْ: ‹أَيِّ نَادُمْ مِنْكُو الْقَلْبَهْ كَرِيمْ خَلِّي يِجِيبْ لَيِّ هَدِيَّةْ.
[3] وَ دَوْل الْهَدَايَا الْإِنْتُو تَقْبَلَوْهُمْ مِنْ بَنِي إِسْرَائِيلْ. هُمَّنْ دَهَبْ وَ فُضَّةْ وَ نَحَاسْ
[4] وَ قُمَاشْ ظَهْرِي وَ قَرَضِي وَ أَحْمَرْ وَ قُمَاشْ كَتَّانْ وَ صُوفْ عِنْزَيْ
[5] وَ فِرَاوْ كُبَاشْ مَدْبُوغِينْ وَ مُلَوَّنِينْ بِلَوْن أَحْمَرْ وَ فَرْوَةْ هِنْت عِجِلْ الْبَحَرْ وَ حَطَبْ هَنَا شَدَرْ السُّنْط
[6] وَ دِهِنْ لِلْفَانُوسْ وَ عِطِرْ لِدِهِنْ الْمَسَحَانْ وَ عِطِرْ لِلْبَخُورْ الْمُعَطَّرْ
[7] وَ حَجَرْ الْأُسْمَهْ عَقِيقْ وَ حُجَارْ آخَرِينْ غَالِيِّينْ لِيِجَمُّلُوا بَيْهُمْ الْفَرْمَلَةْ وَ الصِّدَيْرِيَّةْ هَنَا كَبِيرْ رُجَالْ الدِّينْ.
[8] «‹أَبْنُوا لَيِّ بَكَانْ مُقَدَّسْ لِنَقْعُدْ فِي أُسُطْكُو.
[9] وَ أَصْنَعَوْا الْخَيْمَةْ دِي وَ مُعِدَّاتْهَا سَوَا سَوَا مِنْ النِّظَامْ الْأَنَا نِوَصِّفَهْ لَيْك.
[10] «‹أَصْنَعْ صَنْدُوقْ مِنْ خَشَبْ السُّنْط طُولَهْ دُرَاعَيْن وَ نُصّ وَ عُرْضَهْ دُرَاعْ وَ نُصّ وَ طُولَهْ فَوْق كُلَ دُرَاعْ وَ نُصّ.
[11] وَ أَمْسَحَهْ بِدَهَبْ صَافِي مِنْ دَاخَلْ لَحَدِّي بَرَّا. وَ دَرِّسْ خَشْمَهْ كُلَ بِدَهَبْ.
[12] وَ أَصْنَعْ أَرْبَعَةْ خَوَاتِمْ هَنَا دَهَبْ وَ لَصِّقْهُمْ فِي الْكَوْنجَاتْ الْأَرْبَعَةْ هَنَا الصَّنْدُوقْ. وَ دَا إِتْنَيْن فِي النُّصّ الْوَاحِدْ وَ إِتْنَيْن فِي النُّصّ الْآخَرْ.
[13] وَ عَدِّلْ عِيدَانْ إِتْنَيْن مِنْ حَطَبْ السُّنْط وَ أَمْسَحْهُمْ بِدَهَبْ.
[14] وَ دَخِّلْهُمْ فِي الْخَوَاتِمْ الْأَرْبَعَةْ الْمُلَصَّقِينْ فِي الصَّنْدُوقْ أَشَانْ يِشِيلُوهْ بَيْهُمْ.
[15] وَ الْعِيدَانْ دَوْل خَلِّيهُمْ يَقْعُدُوا فِي الْخَوَاتِمْ، مَا يِسِلُّوهُمْ مِنْهُمْ أَبَداً.
[16] وَ خُطّ فِي لُبّ الصَّنْدُوقْ اللِّيحَانْ الْفَوْقهُمْ كَلِمَاتْ الْمُعَاهَدَةْ الْأَنَا نَنْطِيهُمْ لَيْك.
[17] «‹وَ أَصْنَعْ سِدَادَةْ لِلصَّنْدُوقْ مِنْ دَهَبْ صَافِي. طُولْ السِّدَادَةْ دِي يُكُونْ دُرَاعَيْن وَ نُصّ وَ عُرْضَهَا دُرَاعْ وَ نُصّ.
[18] أَصْنَعْ مِنْ الدَّهَبْ مَخْلُوقِينْ سَمَاوِيِّينْ إِتْنَيْن وَ خُطُّهُمْ أَيِّ وَاحِدْ فِي طَرَفْ السِّدَادَةْ مُلْقَابِلِينْ.
[19] خُطّ أَيِّ وَاحِدْ فِي طَرَفْ السِّدَادَةْ يَعْنِي الْوَاحِدْ بِهِنِي وَ الْآخَرْ بِهِنَاكْ مُلَصَّقِينْ فِي السِّدَادَةْ.
[20] وَ الْمَخْلُوقِينْ السَّمَاوِيِّينْ دَوْل مُمَطِّطِينْ جَنَاحَيْهُمْ قِدَّامْ وَ مُغَطِّيِّينْ بَيْهُمْ السِّدَادَةْ. أَيِّ وَاحِدْ مُقَابِلْ الْآخَرْ وَ مُدَنْقِرِينْ عَلَيْ السِّدَادَةْ.
[21] «‹وَ خُطّ السِّدَادَةْ فِي خَشُمْ الصَّنْدُوقْ. وَ فِي دَاخَلْ الصَّنْدُوقْ، خُطّ اللِّيحَانْ الْفَوْقهُمْ كَلِمَاتْ الْمُعَاهَدَةْ الْأَنَا نَنْطِيهُمْ لَيْك.
[22] وَ هِنَاكْ فَوْق لِسِدَادَةْ الصَّنْدُوقْ أَمْبَيْن الْمَخْلُوقِينْ السَّمَاوِيِّينْ الْإِتْنَيْن، أَنَا نِقَابِلَكْ. وَ نِكَلِّمْ لَيْك بِكُلَّ الْأَوَامِرْ النَّنْطِيهُمْ لِبَنِي إِسْرَائِيلْ.
[23] «‹أَصْنَعْ طَرَبَيْزَةْ بِخَشَبْ السُّنْط. طُولْهَا دُرَاعَيْن وَ عُرْضَهَا دُرَاعْ وَ طُولْهَا فَوْق دُرَاعْ وَ نُصّ.
[24] وَ أَمْسَحْهَا بِدَهَبْ صَافِي. وَ دَرِّسْ خَشُمْهَا بِدَهَبْ.
[25] وَ حَوِّقْ خَشُمْ الطَّرَبَيْزَةْ بِحَطَبْ عُرْضَهْ يُكُونْ أَرْبَعَةْ أُصْبَعْ وَ دَرِّسَهْ بِدَهَبْ.
[26] وَ أَصْنَعْ أَرْبَعَةْ خَوَاتِمْ مِنْ دَهَبْ وَ لَصِّقْهُمْ فِي الْكَوْنجَاتْ الْأَرْبَعَةْ هَنَا الطَّرَبَيْزَةْ. كُلَّ خَاتِمْ يَقْعُدْ مُوَافِقْ لِرِجِلْ وَاحِدَةْ مِنْ الطَّرَبَيْزَةْ.
[27] وَ الْخَوَاتِمْ يَبْقَوْا قَرِيبِينْ لِخَشُمْ الطَّرَبَيْزَةْ. وَ بَيْدَا، يَقْدَرَوْا يِدِسُّوا فَوْقهُمْ عِيدَانْ إِتْنَيْن وَ يِشِيلُوا بَيْهُمْ الطَّرَبَيْزَةْ.
[28] وَ الْعِيدَانْ دَوْل سَوِّيهُمْ بِحَطَبْ السُّنْط وَ أَمْسَحْهُمْ بِدَهَبْ لِيِشِيلُوا بَيْهُمْ الطَّرَبَيْزَةْ.
[29] وَ الطَّرَبَيْزَةْ دِي سَوِّي لَيْهَا صُفَرْ وَ غَرَارِيفْ وَ أَبَارِيقْ وَ كِيسَانْ مِنْ دَهَبْ صَافِي الْيِسْتَعْمَلَوْهُمْ وَكِتْ يِقَدُّمُوا هَدَايَا شَرَابْ.
[30] وَ خُطّ فِي الطَّرَبَيْزَةْ الْخُبْزَةْ الْيِقَدُّمُوهَا لَيِّ. وَ هِي تُكُونْ قِدَّامِي دَايْماً.
[31] «‹وَ أَصْنَعْ لَيِّ فَانُوسْ مِنْ دَهَبْ صَافِي. الْفَانُوسْ دَا وَ قَعَرَهْ وَ سَاقَهْ وَ كِيَيْسَاتَهْ وَ دَكَارْمَهْ وَ زُهُورَهْ كُلَّ كَيْ صُنْعَةْ وَاحِدَةْ بَسْ.
[32] وَ يِلْفَرَّعْ مِنْ سَاقْ الْفَانُوسْ دَا سِتَّةْ فُرُوعْ، تَلَاتَةْ فُرُوعْ مِنْ نُصّ وَاحِدْ وَ تَلَاتَةْ مِنْ نُصّ آخَرْ.
[33] وَ فِي أَيِّ فِرِعْ، سَوِّي تَلَاتَةْ كِيَيْسَاتْ يِشَابُهُوا زَهْرَةْ اللَّوْز بِدُكْرُمِتْهَا وَ وَرَقْهَا. وَ دَا فِي كُلَّ فِرِعْ مِنْ الْفُرُوعْ السِّتَّةْ.
[34] وَ فِي سَاقْ الْفَانُوسْ كُلَ، سَوِّي أَرْبَعَةْ كِيَيْسَاتْ يِشَابُهُوا زَهْرَةْ اللَّوْز بِدُكْرُمِتْهَا وَ وَرَقْهَا.
[35] وَ تِحِتْ أَيِّ مَشْبَكْ هَنَا فُرُوعْ إِتْنَيْن، سَوِّي دُكْرُمَةْ.
[36] وَ كُلَّ الدَّكَارِمْ وَ الْفُرُوعْ يُكُونُوا مَدْقُوقِينْ صُنْعَةْ وَاحِدَةْ بَسْ مِنْ دَهَبْ صَافِي.
[37] وَ سَوِّي سَبْعَةْ طِيَيْسَاتْ لِلنَّارْ وَ خُطُّهُمْ فِي الْفَانُوسْ دَا أَشَانْ وَكِتْ يِوَلُّعُوهُمْ، نِيرَانْهُمْ يِضَوُّوا كُلَّ الْبَكَانْ الْقِدَّامْهُمْ.
[38] سَوِّي كَلَالِيبْ وَ طَفَّايَاتْ مِنْ دَهَبْ صَافِي.
[39] وَ الدَّهَبْ الصَّافِي التَّصْنَعْ بَيَّهْ الْفَانُوسْ وَ كُلَّ مُعِدَّاتَهْ، وَزْنَهْ يَبْقَى 34 كِيلَوْ.
[40] وَ خَلَاصْ، شِيفْ وَ أَصْنَعْ كُلَّ شَيّءْ حَسَبْ النِّظَامْ الْأَنَا وَصَّفْتَهْ لَيْك فِي الْجَبَلْ دَا.