[1] جَوَابْ مِنْ الشَّيْخ لِحَبِيبْنَا غَايُسْ النِّحِبَّكْ فِي الْحَقّ.
[2] يَا حَبِيبِي، نَسْأَلْ اللّٰهْ أَشَانْ كُلَّ شَيْء يَبْقَى لَيْك عَدِيلْ وَ أَشَانْ صِحَّتَكْ تُكُونْ طَيْبَةْ مِثِلْ نَعَرِفْ قَلْبَكْ دَايْماً طَيِّبْ.
[3] أَنَا فِرِحْت بِزِيَادَةْ وَكِتْ أَخْوَانْ وَاحِدِينْ جَوْا مِنْ بَكَانَكْ وَ أَوْرَوْنَا إِنْتَ قَاعِدْ ثَابِتْ فِي الْحَقّ وَ إِنْتَ دَايْماً تِتَابِعْ الْحَقّ عَدِيلْ.
[4] مَا فِي شَيْء يِفَرِّحْنِي زِيَادَةْ مِنْ الْخَبَرْ الْبُقُولْ عِيَالِي قَاعِدِينْ يِتَابُعُوا الْحَقّ.
[5] يَا حَبِيبِي، أَكِيدْ إِنْتَ أَخُو صَادِقْ أَشَانْ وَكِتْ الْأَخْوَانْ جَوْا لَيْك، إِنْتَ مَا عِرِفْتُهُمْ كُلَ وَ لَاكِنْ سَاعَدْتُهُمْ.
[6] هُمَّنْ قَبَّلَوْا وَ شَهَدَوْا بِمَحَبَّتَكْ قِدَّامْ جَمَاعَةْ الْمُؤْمِنِينْ. وَ كَانْ تَنْطِيهُم بَتَّانْ زَادْ لِسَفَرْهُمْ مِثِلْ مَا اللّٰهْ يَرْضَى بَيَّهْ دَا يُكُونْ سَمَحْ بِلْحَيْن.
[7] هُمَّنْ قَمَّوْا مِنْ هِنِي أَشَانْ يَخْدُمُوا فِي شَانْ أُسُمْ الْمَسِيحْ وَ هُمَّنْ مَا يِدَوْرُوا شَيْء مِنْ النَّاسْ الْمَا مُؤْمِنِينْ.
[8] وَاجِبْ أَنِحْنَ نِضَيُّفُوا نَاسْ مِثِلْ دَوْل وَ بِمِثِلْ دَا، نَخْدُمُوا مَعَاهُمْ فِي شَانْ الْحَقّ.
[9] أَنَا رَسَّلْت جَوَابْ لِجَمَّاعَتَكْ لَاكِنْ دِتْرِيفِي يِرِيدْ يِسْتَكْبَرْ وَ سَوَّى نَفْسَهْ كَبِيرْهُمْ وَ هُو مَا يِدَوْر يَسْمَعْ كَلَامْنَا
[10] وَ وَكِتْ نَجِيكْ، نِوَضِّحْ لِلْأَخْوَانْ الشَّيْء الْهُو قَاعِدْ يُقُولْ فَوْقنَا. هُو قَاعِدْ يَقْطَعْنَا بِكَلَامْ فَسِلْ. وَ دَا كُلَ مَا تَمَّهْ. هُو ذَاتَهْ أَبَى مَا ضَيَّفْ الْأَخْوَانْ الرَّسَّلْنَاهُمْ. وَ النَّاسْ الدَّوَّرَوْا يِضَيُّفُوهُمْ، هُو دَحَرَاهُمْ كُلَ وَ طَرَدَاهُمْ مِنْ جَمَاعَةْ الْمُؤْمِنِينْ.
[11] يَا حَبِيبِي، مَا تِتَابِعْ مَثَلْ هَنَا النَّاسْ الْبِسَوُّوا الشَّرّ. تَابِعْ مَثَلْ هَنَا النَّاسْ الْبِسَوُّوا الْخَيْر. النَّادُمْ الْيِسَوِّي الْخَيْر، هُو بَسْ نَادُمْ هَنَا اللّٰهْ. وَ النَّادُمْ الْيِسَوِّي الشَّرّ مَا عِرِفْ اللّٰهْ.
[12] كُلَّ الْأَخْوَانْ يَشْهَدَوْا لِدِمِتْرِي هُو نَادُمْ عَدِيلْ وَ الْحَقّ الْبِنْشَافْ فَوْقَهْ كُلَ يَشْهَدْ لَيَّهْ. أَنِحْنَ كُلَ نَشْهَدُوا لَيَّهْ وَ تَعَرِفْ شَهَادَتْنَا صَحِيحَةْ.
[13] فِي كَلَامْ كَتِيرْ نِدَوْر نِأَوْرِيكْ بَيَّهْ وَ لَاكِنْ مَا نِدَوْر نِأَوْرِيكْ بِجَوَابْ.
[14] أَنَا قَرِيبْ نِدَوْر نَمْشِي لَيْك وَ نُلُمُّوا وَ نِحَجُّوا أَمْبَيْنَاتْنَا.
[15] عَلَيْكُمْ السَّلَامْ. الرُّفْقَانْ الْمَعَايِ يِسَلُّمُوكْ. وَ سَلِّمْ الرُّفْقَانْ الْمَعَاكْ كُلُّهُمْ كَيْ وَاحِدْ وَاحِدْ.