[1] يَا أَخْوَانِي النِّحِبُّكُو، دَاهُو الْجَوَابْ التَّانِي الْكَتَبْتَهْ لَيْكُو. وَ فِي جَوَابَاتِي نِدَوْر نِذَكِّرْكُو بِالْكَلَامْ التَّعَرْفُوهْ خَلَاصْ وَ تِفَكُّرُوا بِفِكِرْ مُخْلِصْ.
[2] فَكُّرُوا فِي الْكَلَامْ الْأَنْبِيَاءْ الصَّالِحِينْ قَالَوْه مِنْ زَمَانْ وَ فِي وَصِيَّةْ عِيسَى رَبِّنَا وَ مُنَجِّينَا السِّمِعْتُوهَا بِوَاسِطَةْ الرُّسُلْ الْمَشَوْا لَيْكُو.
[3] وَ دَاهُو أَوَّلْ شَيْء الْوَاجِبْ تَفْهَمَوْه. فِي الزَّمَنْ الْأَخِيرْ شَمَّاتِينْ يُقُمُّوا وَ يِشَمُّتُوا. وَ يِتَابُعُوا شَهْوَاتْهُمْ بَسْ.
[4] وَ يُقُولُوا «قَالَوْا عِيسَى بَجِي لَاكِنْ مَا جَاءْ. أَبَّهَاتْنَا مَاتَوْا وَ مِنْ بِدَايَةْ الدُّنْيَا شَيْء غَيَّرْ كَيْ مَا فِيهْ».
[5] وَ النَّاسْ دَوْل بِنِيِّتْهُمْ بَسْ نِسَوْا شَيْء وَاحِدْ مَعْرُوفْ وَ دَا هُو. زَمَانْ اللّٰهْ كَلَّمْ كِلْمَةْ وَ بَيْهَا السَّمَاوَاتْ كَانَوْا وَ الْأَرْض أَنْفَصَلَتْ مِنْ الْأَلْمِي وَ الْأَلْمِي أَنْطَاهَا صُورِتْهَا.
[6] وَ بِكِلْمَةْ اللّٰهْ دِي، الْأَلْمِي دَا غَرَقْ الدُّنْيَا الْقَاعِدَةْ فِي الْوَكِتْ دَاكْ دَمَّرَاهَا.
[7] وَ بِكِلْمَةْ اللّٰهْ بَتَّانْ السَّمَاوَاتْ وَ الْأَرْض الْقَاعِدِينْ حَالِياً مَضْمُومِينْ أَشَانْ يَرْجَوْا النَّارْ. اللّٰهْ قَاعِدْ يَحْفَضْهُمْ لَحَدِّي يَوْم الْحِسَابْ الْيَهْلَكَوْا فَوْقَهْ النَّاسْ الْفَسْلِينْ.
[8] يَا أَخْوَانِي النِّحِبُّكُو، فِيَّهْ شَيْء وَاحِدْ مَعْرُوفْ الْوَاجِبْ مَا تَنْسَوْه و دَا هُو. لِلّٰهْ يَوْم وَاحِدْ مِثِلْ أَلِفْ سَنَةْ وَ أَلِفْ سَنَةْ مِثِلْ يَوْم وَاحِدْ.
[9] اللّٰهْ مَا يِأَخِّرْ وَعَدَهْ. النَّاسْ الْبُقُولُوا هُو أَخَّرْ مَا فِهْمَوْا عَدِيلْ. أَخَيْر نُقُولُوا اللّٰهْ صَبُورْ لَيْكُو. هُو مَا يِدَوْر أَيِّ نَادُمْ يَهْلَكْ. هُو يِدَوْر كُلَّ النَّاسْ يُتُوبُوا.
[10] لَاكِنْ لَابُدَّ يَوْم اللّٰهْ يَجِي بِغَفْلَةْ مِثِلْ جَيَّةْ السَّرَّاقْ بِاللَّيْل. وَ عَجَلَةْ كَيْ حَرَكَةْ شَدِيدَةْ تِنْسَمِعْ وَ السَّمَاوَاتْ يَبْقَوْا مَا فِيهُمْ وَ الْكَوَاكِبْ يِنْحَرْقُوا. وَ الْأَرْض وَ كُلَّ شَيْء الْيِسَوُّوهْ فَوْقهَا يِنْكَشِفْ.
[11] كَانْ كُلُّ شَيْء يِدَّمَّرْ مِثِلْ دَا، إِنْتُو وَاجِبْ تِسَوُّوا شُنُو؟ وَاجِبْ تِعِيشُوا وَ بِتَقْوَى وَ حَالْ صَالْحَةْ.
[12] أَرْجَوْا يَوْم اللّٰهْ وَ إِتْمَنُّوا جَيْتَهْ. وَ فِي الْيَوْم دَا، السَّمَاوَاتْ يِنْحَرْقُوا وَ يِدَّمَّرَوْا وَ الْكَوَاكِبْ يُمُوعُوا فِي الْحَمُو.
[13] وَ اللّٰهْ أَنْطَانَا وَعَدْ وَ أَشَانْ دَا نَرْجَوْا السَّمَاوَاتْ الْجَدِيدَةْ وَ الْأَرْض الْجَدِيدَةْ وَ الدُّنْيَا الْجَايَةْ دِيكْ تَبْقَى دَارْ الصَّالِحِينْ.
[14] يَا أَخْوَانِي النِّحِبُّكُو، دَا بَسْ الشَّيْء التَّرْجَوْه مِنْ اللّٰهْ. وَ أَشَانْ دَا، سَوُّوا جُهُدْ أَشَانْ تِعِيشُوا بِالسَّلَامْ قِدَّامَهْ بَلَا خَطَأْ وَ لَا عَيْب.
[15] فَكُّرُوا فِي الرُّوحْ الطَّوِيلَةْ هَنَا رَبِّنَا وَ أَعَرْفُوا كَدَرْ هُو يِأَخِّرْ جَيْتَهْ أَشَانْ النَّاسْ يَنْجَوْا. وَ الْكَلَامْ دَا مِثِلْ الْكَلَامْ الْأَخُونَا بُولُسْ النِّرِيدُوهْ كَتَبَهْ لَيْكُو مِنْ الْحِكْمَةْ الْاللّٰهْ أَنْطَاهَا لَيَّهْ.
[16] وَ هُو يِحَجِّي بِكَلَامْ دَا فِي كُلَّ جَوَابَاتَهْ. وَ فِي كَلَامْ قَاعِدْ فِي جَوَابَاتَهْ التَّفْسِيرَهْ مَا هَيِّنْ. وَ نَاسْ وَاحِدِينْ الْمَا قَرَوْا وَ إِيمَانْهُمْ مَا ثَابِتْ يِعَوُّجُوا كَلَامَهْ وَ يِسَوُّوا نَفْس الشَّيْء لِكُتُبْ اللّٰهْ الْآخَرِينْ. وَ بَيْدَا، يِجِيبُوا فِي نُفُوسْهُمْ الْهَلَاكْ.
[17] وَ لَيْكُو إِنْتُو يَا أَخْوَانِي النِّحِبُّكُو، تَعَرْفُوا الْكَلَامْ دَا مِنْ أَوَّلْ. أَشَانْ دَا، أَوْعُوا بَالْكُو وَ مَا تِخَلُّوا كِدِبْ الْعَاصِيِينْ يِوَدِّيكُو فِي دَرِبْهُمْ وَ يِتَلِّفْ إِيمَانْكُو الثَّابِتْ.
[18] لَاكِنْ أَبْقَوْا قَوِيِّينْ فِي نِعْمَةْ رَبِّنَا عِيسَى الْمَسِيحْ مُنَجِّينَا وَ بِعِرْفِتْكُو لَيَّهْ. وَ الْمَسِيحْ، خَلِّي يِمَجُّدُوهْ فِي الْوَكِتْ الْحَاضِرْ وَ فِي الْآخِرَةْ. آمِينْ.