[1] O RAJ phenďa le Mojžišoske:
[2] „Phen le Izraelitenge kada: ‚Te vareko iľahas vera, hoj oddela varekas te služinel ča le RAJESKE, oda oddino manuš šaj el oslobodzimen andral e vera avke, hoj pes vaš leske počinela kajci love:
[3] Vaš o murš, biše beršendar dži šovardeš berš, pes počinela penda rupune šekli – ajse, save hin andro Svetostankos –
[4] a vaš e džuvľi pes počinela tranda rupune šekli.
[5] Vaš o murš, pandže beršendar dži biš berš, pes počinela biš šekli a vaš e džuvľi deš.
[6] Vaš o muršoro, jekhe čhonestar dži pandž berš, pes počinela pandž šekli a vaš e čhajori trin.
[7] Vaš o murš, saveske hin šovardeš berš a buter, pes počinela dešupandž šekli a vaš e džuvľi deš.
[8] Te oda, ko lel vera, uľahas igen čoro a našťi ajci počinďahas, akor ačhaveha anglo rašaj oles, ko sas oddino le RAJESKE. A o rašaj phenela, keci kampel vaš leste te počinel pal oda, pre soste hin oles, ko iľa vera.
[9] Te vareko iľahas vera, hoj oddela le RAJESKE varesave džviros sar daros, akor oda džviros dino le RAJESKE ačhela sveto.
[10] Našťi les te čerinel aňi našťi te del le nalačhe džviros vaš o lačho abo le lačhe džviros vaš o nalačho. Ale te the avke ela čerimen jekh džviros vaš aver, soduj džviri ena sveta prekal o RAJ.
[11] Te oda ela varesavo nažužo džviros, so pes na anel le RAJESKE pre obeta, akor pes mi ačhavel ole džviros anglo rašaj.
[12] O rašaj phenela, keci hin leskri cena pal oda, savo oda džviros hino, či hino lačho abo na. Ajsi cena, savi o rašaj phenela, ajsi ela.
[13] A te les oda manuš kamela te cinel avri, dothovela paš odi cena biš percent.
[14] Te vareko oddela le RAJESKE peskro kher sar sveto daros, o rašaj phenela, keci hin leskri cena pal oda, savo oda kher hino, či hino lačho abo na. Ajsi cena, savi o rašaj phenela, ajsi ela.
[15] A te oda manuš, savo oddiňa peskro kher le RAJESKE, les kamela te cinel avri, dothovela paš odi cena biš percent a ela pale leskro.
[16] Te vareko oddela le RAJESKE vareso peskra maľatar, savi hiňi andral leskro ďeďictvos, lakri cena pes rachinela pal oda, keci pre late kampel semena te sadzinel: deš šekli pes rachinela vaš o biš kili jačmeňis.
[17] Te peskri maľa le RAJESKE oddela andro Radišagoskro berš, rachinela pes caľi cena.
[18] Te peskri maľa oddela imar pal o Radišagoskro berš, o rašaj leske rachinela e cena pal o berša, so ačhen dži o aver Radišagoskro berš, a odrachinela pes la caľa cenatar.
[19] A te oda manuš kamela te cinel avri peskri ďeďično maľa, so diňa le RAJESKE, akor dothovela paš lakri cena mek biš percent a ela pale leskri.
[20] No te e maľa na cinela pale avri a bikenela la avre manušeske, akor la imar šoha našťi cinela pale.
[21] Pro Radišagoskro berš ačhela odi maľa sveto le RAJESKE; ela oddiňi imar pro furt. Ačhela le rašajenge sar lengro majetkos.
[22] Te vareko oddela le RAJESKE e maľa, savi varekastar cinďa, savi na chudňa peskra famelijatar sar ďeďictvos,
[23] akor o rašaj rachinela e cena vaš e maľa dži o Radišagoskro berš a mek oda džives počinela oda manuš le RAJESKE odi cena sar o sveto daros.
[24] Andro Radišagoskro berš pes e maľa dela pale oleske, kastar sas cinďi a kaske patrinel sar ďeďictvos.
[25] Dojekh cena pes rachinela avri pal ola šekli, save hin andro Svetostankos.
[26] Ale ňiko te na oddel le RAJESKE le džviros, savo uľol ešebno, bo oda the avke patrinel le RAJESKE sar ešebno; či bikos abo bakro, hin oda le RAJESKRO.
[27] Te oda džviros ela nažužo, akor les šaj cinela avri pal oda, savi ela leskri cena, a dothovela paše mek biš percent. Te les na cinela avri, bikenela pes pal oda, savi ela leskri cena.
[28] Ale ňič olestar, so les hin a oddiňa imar pro furt le RAJESKE – či oda hin manuš, džviros vaj ďeďično maľa – našťi pes bikenel aňi cinel avri. Savoro, so hin oddino imar pro furt, hin igen sveto le RAJESKE.
[29] Ňisavo manuš, savo hin oddino imar pro furt, pes našťi cinel avri; mušinel te merel.
[30] O ďesjatki savorestar pal e maľa – o zrnos pal e maľa the o ovocje pal o stromi – patrinen le RAJESKE. Hine sveta le RAJESKE.
[31] Te vareko kamel te cinel avri vareso peskre ďesjatkendar, dothovela paše biš percent.
[32] Savore ďesjatki le dobitkostar the le bakrendar – dojekh dešto džviros, savo predžal prekal e paca le pasťjeriskri – ela sveto le RAJESKE.
[33] Na dikhela pes pre oda, či hin oda džviros lačho abo na, aňi pes našťi čerinel vaš aver. Ale te pes the avke čerinďahas, soduj džviri ena sveta a našťi len te cinel avri.‘ “
[34] Kala hin o prikazaňja, save diňa o RAJ le Mojžišoske pro verchos Sinaj prekal o Izraeliti.