[1] เมะ แน้ นอ น แบ โล้ ล้าง เท่อ พี่ อ แบ โละ ซ้ะ ดี๊ ท ซอง ท ซ๊าง ลู่ง อ แบ.
[2] น แบ โล้ โพล้ง แคว๊ พี่ อ โนยะ แซย่ ล แพ นอ เกม๊า อ แม้ อ ซ้ะ เมาน่าง เก โพล้ง ลู่ง อ เกิ้ง ทื๊ง แบ นะ แบ-อ้ะ เก โพล้ง แคแน ล้าง อ ซ้ะ ซี โอ ดี๊ ท ชู่ง ท นะ ท เอ ท กวี้ง ดี๊ โอ โก้ง เท่อ เก เฌิ่ง~ๆ ค๊า~ๆ.
[3] บี่ นอ อ ซุ้ กมืง ลู่ง อ โนยะ แซย่ นอ เกม๊า อ แม้ อ ซ้ะ บี่ ซุ้ โพล้ง มืง แบ้ แยว้ เกิ้ง แม้ เว๊. อ ซื๊ง เว๊ ล แบ ไจ้ะ อ้า ไจ้ะ ซ๊าง โพล้ง อ แฌ้แพ แบ ล แบ จวี้ ไซ้ะ แบ. อ ซื๊ง เว๊ แบ ซอง เท่อ ลู่ง อ ฌี้
[4] ดี๊ ซอง โพล้ง มืงแซย่ ลู่ง อ บาง ได้ะ ล แพ นอ เกม๊า อ ซีงแฌ๊ เอ อ กแช่ อ พู อ แว้ แด เว๊
[5] ซีงแฌ๊ แคแน ล้าง อ ซ้ะ เก โพล้ง ฌี้ โพล้ง แอว้ แฌแซ อ เด้า คู ล่าง พ้า โอ ดี๊ ท ย๊างเซิง ย๊างซ้ะ ดี๊ ชู่ง อ แว้ อ ลู่ง บี่ ซุ้ โพล้ง ล โอ น่าง แฌ้ แบ ม ดึ้เดว กแช่ แยว้ อ ลู่ง อ แท๊ ซี.
[6] โพล้ง แคว๊ ลู่ง อ บาง ได้ะ นอ ปะ น แบ โล้ เอะ-อ้ะ เกม๊า อ แคแน ล้าง อ ซ้ะ.
[7] น แบ แม้ ท อ ฌี้ เก ท อ ด้อง เอะ-อ้ะ กุ้ อ เม้ง. ลู่ง น ซอง เท่อ นอ แบ โอ ดี๊ ท เซิง โต้ ซ้ะ ล้อง ดี๊ ซอง-อ้ะ เมาน่าง ไช้ะ.
[8] เจ่ ท ไคล้ ลู่ง อ เกิ้ง อ แบ พี่ โพล้ง ม ไจ้ะ ม ไคล้-อ้ะ ล ซี แบ บี่ ซุ้ โพล้ง แช๊เมะ ไฌ๊ซ้ะ ดี๊ แน้ นอ ม ฌางแช้ พี่ อ ซื๊ง เว๊ ไจ้ะ เฆ้อ ล ซี น่าง เม้ง แบ.
[9] โล้ เอะ โพล้ง พี่ อ เก ท ฆ่อง นอ เกม๊า อ ชู่ง อ เซงคู ดี๊ แม้ เท่อ ลู่ง ม แบ เซงคู อ ซ้ะ กุ้ อ เม้ง ติ้-อ้ะ ล ฌี้.
[10] อางฌูง เซงคู อ เท่อ ล ฌี้ แบ เด้าะ แม้ ซ้ะ โต้ ๆ ล้อง ๆ ดี๊-อ้ะ กุ้ อ เม้ง ครึ~ๆ บี่ ซุ้ อ ซื๊ง เว๊ อ ท ไพ้ะ ท แม้ กุ้ อ เม้ง นอ ม เกม๊า ท ฌี้ อ ไฌ่ แบฆ้ะ ดี๊ กแช่ แยว้ พี่ อ แม้ พ้อง พลิ้ เฆ้อ ล แฌ้ นอ โอ ดี๊ อ ฆี๊ง อ แล้.
[11] อ ไฌ่ บี่ อี้ง กแช่ แยว้ เนโพล ทาง อ โก้ง อ โบ้ง อ บลึ้ อ บลาง เย้า บี่ ซุ้ ม แม้ช้า โพล้ง กุ้ อ แฌ้ พ้อง พลิ้ ซี.
[12] ท อ โก้ง อ โบ้ง อ บลึ้ อ บลาง อี้ง นอ ซอง เฆ้อ เกม๊า ก นย๊อง ไฆวะ ท ล ฌี้ ล แอว้ แบ ดี๊ ท ซ้ะกวี้ง ล๊องก้อง ลู่ง ฌางคู โคล๊ง คู อี้ง ดี๊ เกม๊า ก แคแน ล้าง ซ้ะ ซี โอ เฌิ่ง โอ ค๊า ดี๊ แบ้ แยว้ ล้างเท่ง ล้างชิ้ ล ชู้ อี้ง
[13] พี่ ก คุ้แท๊ มื่ง ล นี้ง ลู่ง อ มึ อ พ้า พี่ ก มื้งแล่-อ้ะ ม เฌ๊ ท้อง โคะ. ล นี้ง แย๊ นอ ก กแช่ ดู ทึ เมะ เว๊ กแช่ เยซู คริ้ ลู่ง อ แม้ พ้อง พลิ้ เฆ้อ ล แฌ้ นอ ม เฌ๊ ไท้ ดี๊ อ ฆี๊ง อ แล้.
[14] อ เว๊ นย่อง ซี๊ง ลู่ง ก ฌ่าง พี่ ม แม้ พ้อง พลิ้ เฆ้อ ดี๊ ท อ้า ท ซ๊าง กุ้ อ เม้ง ดี๊ แม้ เช๊ง แม้ เกล้ง เฆ้อ เกม๊า ก เก อ กแช่ อ เท่อ ล้อ ดี๊ เกม๊า ก แบ ซ้ะ แม้ ท อ ฌี้ นอ ล้อ.
[15] เกม๊า น ซอง ท ล แพ อี้ง ไช้ะ. เจ่ น ดู้ง น ยาง ท้อง อ เลา พี่ น แม้ ชอง ทาง โพล้ง อ เซิง อ ซ้ะ ดี๊ ไจ้ะ โพล้ง พี่ อ แม้ เท่อ ไพ้ะ. เกม๊า โพล้ง ดึ้เดว แน้ น่าง แฌ้ ล ฌี้.