[1] ด๊างพื่งวี่ พี่ จ เอ-อ้ะ ซีง-เอ้อ จ ท ยื่ง ซ้ะ ดี๊ น ซื๊ง. น เกม๊า จ เซิง ฆวี๊ง ซ้ะ โย้ เต้~ๆ ดี๊ จ อางปฆ้า น ซื๊ง ลู่ง โพล้ง อ แฌ้แพ อ แน่ พ้า ครึ~ๆ. ด๊างพื่งวี่ พี่ จ เอ-อ้ะ ซีง-เอ้อ เมะ แคว่ ท กุ้ อ เม้ง พี่ จ โล้ เอะ น ซื๊ง เย้า นอ เกิ้ง ม ชู่ง เท่อ นะ เท่อ เฌิ่ง~ๆ ค๊า~ๆ พี่ น โอ ลู่ง กแช่ เยซู คริ้ อ ซุ้ นอ ล้อ.
[2] น่าง ยูโอดี ดี๊ น่าง ซีทีเค-เอ้อ จ อวีงซ้ะชู้ น ซื๊ง เกม๊า แม้ ฆู๊ง แม้ พุ้ โละ ซ้ะ บี่ ซุ้ ด๊างพื่งวี่ ทื๊ง ซยอง กแช่ เยซู คริ้ เกิ้ง ม แม้ เว๊.
[3] ดี๊ ซีซีโกะ ปะ น เก จ ฌุ้พาง แม้ ฆึ เท่อ ดี๊ แย้ ลู่ง เซิง โต้ ซ้ะ โต้. จ แบ ซ้ะ เกม๊า น แม้ช้า โพล้ง มืง คี๊ง แฌ้ นอ เกม๊า อ โอ ฆู๊ง โอ พุ้ โละ อ ซ้ะ อ ไฌ่ บี่ อี้ง อ ซื๊ง เว๊ คี๊ง แฌ้ แม้ ฆึ เท่อ ดี๊ แย้ น้ะ ลู่ง อ โล้ ล้าง กแช่ เยซู คริ้ อ ไฌะ อ ไฌ่ ดี๊ แม้ ซกุ้ เท่อ ดี๊ เคเลเมง ดี๊ จ ฌุ้พาง อ แฌ้แพ กุ้ อ แฌ้ พี่ อ เม้ง โอ ลู่ง ไละ ท ม๊า พ้า.
[4] เกม๊า น ซื๊ง ซ้ะอวีง ซ้ะโทะ ลู่ง กแช่ เยซู คริ้ อ ซุ้ ครึ~ๆ. จ ม โล้ เอะ น ซื๊ง ล พ๊า เด้าะ เกม๊า น ซื๊ง ซ้ะอวีง ซ้ะโทะ ไช้ะ.
[5] พี่ น เซิง ฌี้ ซ้ะ ช้า นอ เกม๊า โพล้ง แด แบ กุ้ อ แฌ้. ล ไยะ ล้า แบ กแช่ เยซู คริ้ ม เฌ๊ ไท้.
[6] แบคู่ ซ้ะอึ้ ท น่าง เม้ง ล ฌี้. แบ เด้าะ กุ้ อ พ๊า พี่ น ซื๊ง ชูแพ เท่อ เกม๊า น อางท่าง ดี๊ กแช่ แยว้ กุ้ อ เม้ง พี่ น แบ ซ้ะ-อ้ะ นอ ดี๊ ไจ้ะ บลึ้ กแช่ แยว้ เลา เซิง เลา ซ้ะ กุ้ อ พ๊า
[7] ฌ้อง กแช่ แยว้ อ ท มึ ท พ้า ลู่ง อ แอ นี่ โพล้ง ฌางคู คู อ ท ซีงแฌ๊ นอ ม ยู่แคว่ น ซื๊ง เซิง ซื๊ง ซ้ะ ดี๊ น ท ช๊องมอง ช๊องม้ะ ลู่ง กแช่ เยซู คริ้ อ ซุ้ นอ ล้อ.
[8] ด๊างพื่งวี่ ซีง-เอ้อ ลู่ง ไค๊ ทึ อี้ง เกม๊า น ซื๊ง ช๊องมอง เท่อ ลู่ง อ ฌี้ ดี๊ เท่อ ลู่ง อ เกิ้ง อางปฆ้า เมะ เว๊ เท่อ ลู่ง อ เมะ อ โต้ เท่อ ลู่ง อ ดู อ โท๊ เท่อ ลู่ง อ เกิ้ง อ แบ เท่อ ลู่ง อ ฌี้ อ แอว้ เท่อ ลู่ง อ ล้างเอ ล้างกวี้ง ดี๊ เท่อ ลู่ง เกิ้ง ทื๊ง แบ นะ แบ-อ้ะ นอ เกม๊า อ โอ ลู่ง น ซื๊ง ซ้ะ พ้า นอ ล้อ.
[9] พี่ จ ซอง น ซื๊ง เมะ เว๊ น ซื๊ง แน่ฌ๊า ดี๊ ฮะ นี่ จ ท ไคล้ ดี๊ แด แบ จ ท แม้ นอ เกม๊า น ซื๊ง แม้ โพะ อ ไค๊ บี่ นอ ปะ. ฌ้อง กแช่ แยว้ พี่ อ เกล๊าง ก ท มึ ท พ้า ล แฌ้ นอ ม โอ ดี๊ น ซื๊ง ครึ~ๆ ล้อ.
[10] จ ซ้ะอวีง ซ้ะโทะ ดู มะ ลู่ง กแช่ เยซู คริ้ อ ซุ้ อ ไฌ่ บี่ อี้ง ลู่ง ไค๊ ทึ น ซื๊ง นาง แบ ไท้ แย้ ดี๊ แม้ช้า แย้ ล พ๊า เด้าะ. ลู่ง อ พ้อง ไฆวะ น ซื๊ง นาง แบ แย้ ปะ แบ เด้าะ อ ช๊า อ โท่ พี่ ม แม้ช้า แย้ ล โอ แบ.
[11] จ ล ไคล้ บี่ อี้ง บี่ ซุ้ จ แบ ซ้ะ ท ล เม้ง~ๆ นอ แบ อ ไฌ่ บี่ อี้ง จ ซีงแฌ๊ ลู่ง จ ท โอ ฆวี๊ อี้ง นอ แบ ลู่ง จ ฌ่าง เย้า.
[12] จ ซีงแฌ๊ พี่ ท ล โอ น่าง เม้ง แบ นอ แม้ อ ซ้ะ บี่ จะ เล้ ดี๊ เท่อ โอ แอ~ๆ นอ แม้ อ ซ้ะ บี่ จะ เล้. จ ซีงแฌ๊ พี่ จ โอ จอง ฌี้ จอง ฌี้ พ๊า ฌี้ พ๊า ฌี้ ม แบ จ ซ้ะ ครึ~ๆ. จ อาง กึ้ ฌี้ จ ซ้ะวี่ง ฌี้ จ ท โอ แอ น้ะ ฌี้ ล โอ แบ ฌี้ ม แบ ลู่ง จ ฌ่าง ล้อ.
[13] กแช่ เยซู คริ้ เกม๊า จ โอ ดี๊ จ ไฌ่ จ แบ้ พี่ จ ต้องนอง ท กุ้ อ เม้ง ซี.
[14] แบ เด้าะ น ซื๊ง แม้ ท อ ฌี้ เย้า พี่ น แม้ช้า แย้ ลู่ง จ แบ น้ะ แบ โน๊ง อ แค๊.
[15] โพล้ง ฟีลิ้ปี ซีง-เอ้อ น ซื๊ง ซีงแฌ๊ ฌี้ เย้า ลู่ง อ ต้องคู พี่ จ ไจ ทาง ไฆวะ มาเซโดนี อ ค่าง เฌ๊ โล้ ล้าง กแช่ เยซู คริ้ อ ไฌะ อ ไฌ่ นอ น ซื๊ง เก โพล้ง ทื๊ง ซยอง เท่อ ล มู๊ง ล้อ พี่ แม้ช้า แย้ ดี๊ กลู ดี๊ จี้.
[16] พี่ จ โอ ลู่ง เว่ง เทซาโลนีเก นอ น ซื๊ง โซ๊ง เอะ แย้ จ เท่อ เก ท แม้ช้า แย้ ตบลึ้ พ๊า เย้า.
[17] เต้~ๆ นอ จ ล แบ ซ้ะ นี่ ที่ เท่อ ล เม้ง แบ. แอ นี่ อ นอ จ แบ ซ้ะ เกม๊า น ซื๊ง นี่ บลึ้ นี่ บลาง แอ ทาง ลู่ง น ซื๊ง แม้ช้า แย้.
[18] อ อี้ง เซ้อ จ ไละ กวิ้ไน กุ้ อ เม้ง พี่ น ซื๊ง เกล๊าง เอะ แย้ ดี๊ โอ แอ นี่ จ แบ ซ้ะ นอ ได้ะ. ค๊องเนง อี้ง จ ท โอ กุ้ อ เม้ง อ ไฌ่ บี่ อี้ง เอปาโฟดีโต เฌ๊ โชะ เอะ แย้ น ซื๊ง ท เกล๊าง กุ้ อ เม้ง. อ นอ เก บี่ ซุ้ ท ลื่ง ทาง ลู่ง อ น๊าม๊า แบ กแช่ แยว้ เก ท โบง ท แบ้ ลู่ง อ แบ กแช่ แยว้ อ ซ้ะ นอ ล้อ.
[19] จ กแช่ แยว้ ม เกล๊าง น ซื๊ง ท กุ้ อ เม้ง พี่ น แบ ซ้ะ-อ้ะ นอ เฌ๊ เว๊ ลู่ง อ ท โอ ท ช๊อง พี่ อ โอ กู้ง โอ ล๊า ลู่ง กแช่ เยซู คริ้ อ กย้อง.
[20] เกม๊า ท อ ฆี๊ง อ แล้ อ โฌ่ง อ พ้าง โอ เว๊ ดี๊ ก แพ่ กแช่ แยว้ ล้างชู้ ล้างแกย อาเมง.
[21] จ ท ยื่ง ซ้ะ ดี๊ กแช่ แยว้ อ พู อ ลี้ง พี่ อ โอ ลู่ง กแช่ เยซู คริ้ อ ซุ้ กุ้ อ แฌ้. จ ด๊างพื่งวี่ พี่ อ โอ ดี๊ แย้ ท ยื่ง ซ้ะ ดี๊ น ซื๊ง ปะ ล้อ.
[22] กแช่ แยว้ อ พู อ ลี้ง พี่ อี้ง กุ้ อ แฌ้ ท ยื่ง ซ้ะ ดี๊ น ซื๊ง เมะ โพล้ง แม้ เท่อ ลู่ง ซีซา อ ล่าง นอ ท ยื่ง ซ้ะ ดี๊ น ซื๊ง แอ ล ปี๊.
[23] เกม๊า กแช่ เยซู คริ้ อ โก้ง อ โบ้ง อ บลึ้ อ บลาง โอ ดี๊ น ซื๊ง กุ้ อ แฌ้ นอ ล้อ.