[1] แบ ท เล้ ท ดึ้ โละ ชาง โละ ดี๊ ท ไอ โละ จุ้ไคล้ โละ ซ้ะ โอ ทาง ลู่ง น ซื๊ง แกล้. เป๊งนี่ ท ซ้ะกวี้ง ล๊องก้อง นอ ล้อ พี่ อ ดึ้ โละ อ ซ้ะ ลู่ง น ซ้ะ พ้า เมะ-อ้า.
[2] น แบ ซ้ะ อ อี้ง แบ ซ้ะ อ นอ แบ เด้าะ น ล นี่ แบ ฌ้อง น แม้ ซี๊ง โพล้ง. น ซ้ะกวี้ง ล๊องก้อง โพล้ง อ เท่อ แบ เด้าะ น นี่ ซี เอะ ฌ้อง น ดึ้ โละ ชาง โละ ดี๊ ไอ โละ จุ้ไคล้ โละ ซ้ะ. น ล นี่ แบ แบ เป๊งนี่ น ล อางท่าง ดี๊ กแช่ แยว้ แบ.
[3] พี่ น อางท่าง เท่อ ฌ้อง น นี่ แบ เอะ อ นอ เป๊งนี่ น ซ้ะ ช๊องมอง เท่อ ไพ้ะ บี่ ซุ้ น เมะ นี่ นอ น ม เจ่-อ้ะ ลู่ง ท แม้ มึ แม้ พ้า ล้าง น กแช่ อ ซ้ะ นอ ล้อ.
[4] โพล้ง ล โต้ ดี๊ กแช่ แยว้ แบ-เอ้อ น ล ซีงแฌ๊ แบ-อ้า ท แม้ ซกุ้ ฌุ้พาง ดี๊ ฌางคู โคล๊ง คู อี้ง นอ เมะ ท แช๊เมะ ไฌ๊ซ้ะ โละ ซ้ะ ดี๊ กแช่ แยว้. ท บี่ นอ โพล้ง พี่ ล แฌ้ เล้ แบ ซ้ะ อ ซกุ้ ฌุ้พาง โละ อ ซ้ะ ดี๊ ฌางคู โคล๊ง คู อี้ง โพล้ง ล แฌ้ นอ แช๊เมะ ไฌ๊ซ้ะ ดี๊ กแช่ แยว้ นอ ล้อ.
[5] น ซื๊ง ช๊องมอง-อ้ะ ลู่ง ไละ ฌี้ ไละ แอว้ พ้า ไคล้ เท่อ อ แซ ล โอ แบ นอ-อ้า พี่ อ ไจ้ะ เว๊ "ก วีง ก แล้ ลู่ง กแช่ แยว้ ชวี๊ง ล้าง เว๊ ก ซ้ะ พ้า อี้ง นอ โอ ฆวี้ ทะ ดี๊ ท ซ้ะกวี้ง ล๊องก้อง ลู่ง อ ชอง~ๆ นอ ล้อ".
[6] แบ เด้าะ กแช่ แยว้ เกล๊าง อ โก้ง อ โบ้ง อ บลึ้ อ บลาง แอ นี่ นอ ได้ะ. บี่ ซุ้ ไละ ฌี้ ไละ แอว้ ไจ้ะ เว๊ % "กแช่ แยว้ ชาง ล้าง โพล้ง พี่ อ อางกี ทาง โท๊ อ ซ้ะ แบ เด้าะ เกล๊าง อ โก้ง อ โบ้ง อ บลึ้ อ บลาง เอะ โพล้ง ลู่ง อ ชาง ล้าง อ ซ้ะ".
[7] ท บี่ นอ เกม๊า น ซื๊ง นย่อง ช๊องแน กแช่ แยว้ นอ ดี๊ ด้างทะ ม้างโค้ไล่ อ นอ ม ไจ แด น ซื๊ง นอ ล้อ.
[8] เกม๊า น ซื๊ง ซึ้ เบ้า น ซ้ะ ดี๊ กแช่ แยว้ ฌ้อง อ เว๊ ม ซึ้ เบ้า อ ซ้ะ ดี๊ น ซื๊ง. โพล้ง ท เด้บ้ะ ซีง-เอ้อ แม้ เช๊ง แม้ เกล้ง ไฆวะ น จูง นอ. ดี๊ โพล้ง พี่ อ ซ้ะ โอ คี๊ง โพลง ล แพ นอ ซีง-เอ้อ แม้ เช๊ง แม้ เกล้ง น เซิง น ซ้ะ ท้อง อ ฌี้ อ แอว้ ไช้ะ.
[9] เกม๊า น แบ มอง แบ ม้ะ ดี๊ ฌางล้าง ย้าล้าง เท่อ. พี่ น นี่ง ทาง นี่ง ล้าง นอ น แบ ฌางล้าง ย้าล้าง ก้ะ ล โค๊ นอ ล้อ. ดี๊ พี่ น ซ้ะอวีง ซ้ะโทะ เท่อ นอ เกม๊า อ เก ทาง ก้ะ ท แบ มอง แบ ม้ะ ล โค๊ นอ ล้อ.
[10] เกม๊า น ซื๊ง ชาง ล้าง ซ้ะ ลู่ง กแช่ แยว้ อ เมะแซ พ้า ฌ้อง อ เว๊ ม โชะ ทาง น ซื๊ง นอ ล้อ.
[11] ด๊างพื่งวี่ ซีง-เอ้อ ไจ้ะ อ้า โละ น ซื๊ง ซ้ะ ล ฌี้. โพล้ง พี่ อ ไจ้ะ อ้า อ พื่ง อ วี่ ฌี้ ต้ะเซ๊ง อ พื่ง อ วี่ ฌี้ อ นอ ที๊ ซุ้ ดี๊ ไจ้ะ อ้า ไจ้ะ ซ๊าง แบ เซ๊งพ้า ท้างพ้า ดี๊ ต้ะเซ๊ง แบ เซ๊งพ้า ท้างพ้า นอ ล้อ. เมะ ลู่ง น ต้ะเซ๊ง เซ๊งพ้า ท้างพ้า นอ ล เมะ น เก โพล้ง ลู่ง อ แม้ โพะ อ ไค๊ แบ แบ เด้าะ น เก โพล้ง ลู่ง อ ต้ะเซ๊ง-อ้ะ นอ ล้อ.
[12] กแช่ แยว้ ล แฌ้ ล้อ เก โพล้ง ลู่ง อ อางกี ล้าง เซ๊งพ้า ท้างพ้า ดี๊ ต้ะเซ๊ง โพล้ง ซี. กแช่ แยว้ ล แฌ้ ล้อ เก โพล้ง แม้ พ้อง พลิ้ เท่อ ซี ดี๊ ไคล้ ล้าง ท อ เตา อ แต๊ ซี. ท บี่ นอ น ซื๊ง เก โพล้ง เล้ ลู่ง น ต้ะเซ๊ง แบ น ฌุ้เม้ง ฌุ้พาง.
[13] ช๊องแน-อ้ะ โพล้ง พี่ อ ไจ้ะ เท่อ "ล นี้ง แย๊ อี้ง ฌี้ ลู่ง โฌ้ ล นี้ง ฌี้ จ ม ลี้ ลู่ง อู้ ล เว่ง ลู่ง อี้ง ล เว่ง. จ ม โอ-อ้ะ เมาะ ล เนง. จ ม แม้แค้ เท่อ นี่ แบ จี้ แอ~ๆ".
[14] อ นอ น ซื๊ง ล ซีงแฌ๊-อ้ะ แบ ลู่ง โฌ้ ล นี้ง โคะ นอ น ม แม้ น ซ้ะ บี่ จะ เล้. อ ไฌ่ บี่ อี้ง น แบ ด้อง ซุ้ ท ไค้ะ ซวี๊ง ไบล้ะได้ะ อี้ง ล้อ โพล ทาง ล ทีง พู ฌ้อง ล้างแม่ ไฆวะ.
[15] เกิ้ง เว๊ น ซื๊ง ไคล้ บี่ อี้ง ล โค๊ "เมะ ลู่ง ท แบ กแช่ แยว้ อ ซ้ะ นอ ก ล ซี๊ง ได้ะ แบ นอ ล้อ ก ม แม้ ท อ อี้ง แม้ ท อ นอ".
[16] แบ เด้าะ ค๊องเนง อี้ง น อางปฆ้า ล้าง น ซ้ะ ดี๊ น ก้างแก้ พะ ไฆวะ เท่อ น้ะ กชุ้. ลู่ง ท อางปฆ้า ล้าง ซ้ะ อี้ง นอ เมะ ท ไพ้ะ ท แม นอ ล้อ.
[17] ท บี่ นอ โพล้ง พี่ ล แฌ้ เล้ ซีงแฌ๊ เว๊ ท เม้ง เล้ เก ท อ ฌี้ แบ เด้าะ ล แม้ เว๊ แบ โพล้ง ล แฌ้ นอ แม้ ท เด้บ้ะ นอ ล้อ.