[1] โพล้ง เก เซงคู ซีง ล แพ-เอ้อ แม้ เอะ น ซื๊ง ฆ่อง ท๊อง ท อ เกิ้ง อ แบ อ เมะ อ โต้ ไช้ะ. นาง แบ-อ้ะ น ซื๊ง เซงคู โอ ลู่ง มุ้คู ล แฌ้ ปะ ล้อ.
[2] ชูแพ เท่อ ครึ~ๆ. ชูแพ-อ้ะ ดี๊ เซิง ดี๊ ซ้ะ เต้~ๆ ดี๊ ไจ้ะ บลึ้ กแช่ แยว้ ไช้ะ.
[3] ชูแพ เท่อ ลู่ง ก ฌ่าง ปะ บี่ ซุ้ กแช่ แยว้ ม อุ้พ้ะ ทาง ก เกล้ ลู่ง ก ม โล้ ล้าง อ ไฌะ อ ไฌ่ เมะ เว๊ แด ท คิ้ซูง คิ้บีง แบฆ้ะ ดี๊ กแช่ เยซู คริ้. ลู่ง จ โล้ ล้าง เท่อ อ กย้อง นอ จ แบ โอ ลู่ง พ้อง พ้า.
[4] ท บี่ นอ ชูแพ เท่อ ลู่ง จ ฌ่าง บี่ ซุ้ จ ม โล้ ล้าง ท ไฌ่ อี้ง ท้อง อ ล้างที๊ง ล้างช้ะ พี่ จ เกิ้ง แม้-อ้ะ นอ ล้อ.
[5] น ซื๊ง แบ เจ่ ท โกง ท มอง ดี๊ โพล้ง พี่ อ ล ชู่ง ล นะ เท่อ แบ. เจ่ อ ช๊า อ โท่ กุ้ พ๊า บี่ ซุ้ ม ล้างเปิ่ง ลู่ง อ ฌ่าง.
[6] น ซื๊ง แบ ไคล้ เท่อ ลู่ง คุ้ช๊องแน-อ้ะ มึ ดี๊ แบ ซีงแฌ๊ เว๊ แบ ไคล้ ช๊า โพล้ง กุ้ อ แฌ้ ลู่ง อ เกิ้ง อ แบ นอ ล้อ.
[7] ก ด๊างพื่งวี่ ทีคีโค ลู่ง จ เอ-อ้ะ พี่ อ เก โพล้ง โต้ โพล้ง ล้อง แม้ ซกุ้ กแช่ แยว้ อ เท่อ ดี๊ เฆ้อ นอ ม โล้ เอะ น ซื๊ง ท กุ้ อ เม้ง ลู่ง จ ไฌ่ จ กย้อง.
[8] จ เกม๊า อ ลี้ ลู่ง น โอ บี่ ซุ้ ม อางโล๊ไท้ เอะ น ซื๊ง แบฆ้ะ ดี๊ เฆ้อ กุ้ อ แฌ้. อ นอ ม เกม๊า น ซื๊ง ซ้ะ มึ ทาง พ้า ทาง ไท้.
[9] โพล้ง พี่ อ ม ลี้ ดี๊-อ้ะ ล แฌ้ นอ เมะ เว๊ แด ก ด๊างพื่งวี่ โอเนซีโม ลู่ง จ เอ-อ้ะ. อ เว๊ เก โพล้ง เซิง โต้ ซ้ะ ล้อง ล มู๊ง ฆ่าง ดี๊ น ซื๊ง. อ ซื๊ง เว๊ คี๊ง แฌ้ อี้ง ม อางโล๊ ไท้ เอะ น ซื๊ง แบฆ้ะ ดี๊ ก ไฌ่ ก กย้อง กุ้ อ เม้ง.
[10] อารีทาโค พี่ อ โอ ซกุ้ พ้อง พ้า ดี๊ แย้ อี้ง ท ยื่งซ้ะ ดี๊ น ซื๊ง กุ้ อ แฌ้. บานาบา อ ตแคว๊ มาร้ะกู ท ยื่งซ้ะ ดี๊ น ซื๊ง ปะ. น ซื๊ง ซีงแฌ๊ เย้า มาร้ะกู เมะ ลี้ เว่ น ซื๊ง นอ น แบ ตองช้า ฮะช้า-อ้ะ.
[11] โอ ได้ะ ล แฌ้ โยชูวา พี่ โพล้ง กุ้ เว๊ ยูโท นอ ท ยื่งซ้ะ ดี๊ น ซื๊ง ปะ. อ ซื๊ง เว๊ ซ๊า แฌ้ อี้ง ล้อ เก โพล้ง ยู ลู่ง อ ชู่ง ไท้ นะ ไท้ กแช่ เยซู คริ้ แม้ ซกุ้ เท่อ ดี๊ แย้ ลู่ง กแช่ แยว้ อ มื่ง อ บ้าง อ ฌ่าง. อ ซื๊ง เว๊ แม้ช้า แย้ จ ซ้ะ มึ มะ.
[12] โพล้ง โอ ล แฌ้ ได้ะ ท ยื่ง ซ้ะ ดี๊ น ซื๊ง ปะ เมะ เว๊ แด กแช่ เยซู คริ้ อ เพล่ อ บาง อ เม้ง เอปาฟา เก ล มู๊ง ฆ่าง ดี๊ น ซื๊ง. อ เว๊ ชูแพ เท่อ เมาน่าง ลู่ง น ซื๊ง ฌ่าง ครึ~ๆ อางท่าง กแช่ แยว้ เกม๊า น ซื๊ง ท ชู่ง ท นะ โอ เฌิ่ง โอ ค๊า โอ กู้ง โอ ล๊า ดี๊ นะ เท่อ ล้างเท่ง ล้างชิ้ บี่ ซุ้ ม แม้ กแช่ แยว้ อ ซ้ะ กุ้ อ เม้ง.
[13] แย้ จ แด ปะ ล้อ อ เว๊ แม้ เท่อ น้ะ ลู่ง น ซื๊ง ฌ่าง ดี๊ โพล้ง โอ ลู่ง เฌง โลดีเค ดี๊ เฌง เฮราโปลี อ ฌ่าง.
[14] โม๊ ลูกา พี่ ก เอ-อ้ะ ฌี้ มะ ดี๊ เดมา ท ยื่ง ซ้ะ ดี๊ น ซื๊ง ปะ ล้อ.
[15] ท ยื่ง ซ้ะ ดี๊ ก ด๊างพื่งวี่ พี่ โอ ลู่ง เฌง โลดีเค ดี๊ น่าง นีฟา ดี๊ โพล้ง ทื๊ง ซยอง เท่อ พี่ อ เฌ๊ แบ้ แยว้ ลู่ง อ เด้า พ้า นอ ปะ ล้อ.
[16] น ซื๊ง พ้ะ ไละ ล เบง อี้ง เมะ ฌ้อง นอ แบ พ้ะ ฌ้า เอะ โพล้ง ทื๊ง ซยอง เท่อ ลู่ง เฌง โลดีเค ล พ๊า เด้าะ. ท่อง อ ช๊าง น ซื๊ง ม นี่ พ้ะ ไละ พี่ ก ด๊างพื่งวี่ โอ ลู่ง เฌง โลดีเค ม โซ๊ง ไท้ เอะ น ซื๊ง.
[17] โล้ แบ อาคีโป บี่ อี้ง "พี่ น แม้ เท่อ ลู่ง กแช่ แยว้ อ ฌ่าง นอ น แบ แม้-อ้ะ ท้อง อ ฌ้อง".
[18] ท ไคล้ พี่ อ โอ ก้ะ อี้ง นอ เก จ กแช่ อ จูงล่าง แด ยี๊. แย้ ปาโล ท ยื่งซ้ะ ดี๊ น ซื๊ง. ซ้ะนาง ล ฌี้ ค๊องเนง อี้ง จ โอ พ้อง พ้า ได้ะ ล้อ. เกม๊า กแช่ แยว้ อ โก้ง อ โบ้ง อ บลึ้ อ บลาง โอ ดี๊ น ซื๊ง นอ ล้อ.