[1] ก กวิ้ ล้าง เท่อ แบฆ้ะ ดี๊ ท อ ลู่ง อ แท๊ พี่ อ เกล๊าง ท ม๊า. ท อ ลู่ง อ แท๊ อี้ง นอ โอ ล โค๊ ลู่ง อ คางไท้ะ เย้า. ก แน่ฌ๊า แบ-อ้ะ ดี๊ ก แด แบ-อ้ะ ลู่ง ก เมะ. ก แคว่ ล้างที๊ง แบ-อ้ะ ดี๊ ก พอง แบ-อ้ะ ลู่ง ก จูง.
[2] พี่ ท ม๊า เนโพล ทาง อ ซ้ะ นอ ก แด แบ-อ้ะ. ท บี่ นอ ก เก พีงนยาง อางโล๊ ไท้ เอะ น ซื๊ง แบฆ้ะ ดี๊ ท ม๊า ล้างชู้ ล้างแกย นอ อ ไฌ่. ท ม๊า นอ โอ ดี๊ แพ่ แยว้ เนโพล ทาง อ ซ้ะ ดี๊ เฆ้อ.
[3] เท่อ พี่ ก แด แบ ดี๊ แน่ฌ๊า แบ-อ้ะ นอ ก โล้ ล้าง เอะ น ซื๊ง ปะ บี่ ซุ้ น ซื๊ง ม โอ ฆู๊ง โอ พุ้ ฆึ ดี๊ เฆ้อ ด้อง ซุ้ เฆ้อ ก โอ ฆู๊ง โอ พุ้ ฆึ ดี๊ แพ่ แยว้ ดี๊ อ พูแคว๊ กแช่ เยซู คริ้.
[4] เฆ้อ ก กวิ้ ล้าง ท ล แพ อี้ง บี่ ซุ้ ก ท ซ้ะอวีง ซ้ะโทะ ม โอ ล๊า โอ ฆวี้.
[5] ท ซอง ท ซ๊าง พี่ ก แน่ฌ๊า แบ-อ้ะ ดี๊ กแช่ แยว้ อ พูแคว๊ ฌ้อง ก โล้ ล้าง เอะ น ซื๊ง นอ เมะ เว๊ กแช่ แยว้ เก ท โฌ่ง ท พ้าง. ท ไค้ะ ล โอ ดี๊-อ้ะ น่าง เม้ง แบ เฆาะ.
[6] ก เมะ ไจ้ะ ก โอ ฆู๊ง โอ พุ้ ฆึ ดี๊ กแช่ แยว้ เย้า แบ เด้าะ ก โพะ เกล้ ลู่ง ท ไค้ะ แกล้ ได้ะ อ นอ ก คีงอูง เท่อ ล้อ ดี๊ ล โพะ เกล้ ลู่ง อ ที๊ง อ โต้ ล บ้อง นอ แบ.
[7] แบ เด้าะ ก เมะ โพะ เกล้ ลู่ง ท พ้าง บี่ ซุ้ กแช่ แยว้ โอ ลู่ง ท พ้าง อ นอ ก โอ ฆู๊ง โอ พุ้ ฆึ โละ ก ซ้ะ. กแช่ แยว้ อ พูแคว๊ เมะ เว๊ กแช่ เยซู นอ อ ซวีง อางซฌ้ะ ไฆวะ เอะ ก ท เด้บ้ะ กุ้ อ เม้ง.
[8] ก เมะ ไจ้ะ ล้าง ก ซ้ะ ก ท เด้บ้ะ ล โอ แบ อ นอ ก อางโล๊ ล้าง ก ซ้ะ ล้อ. ท อ ที๊ง อ โต้ ล โอ ก ซ้ะ พ้า น่าง เม้ง แบ เฆาะ.
[9] แบ เด้าะ ก เมะ โล้ ล้าง ก ท เด้บ้ะ นอ กแช่ แยว้ เก โพล้ง โต้ โพล้ง ล้อง ดี๊ แม้ ท อ เกิ้ง อ แบ. อ เว๊ ล ทื๊ง นี่ นะ นี่ ก ท เด้บ้ะ ล้า แบ ดี๊ ม อางซฌ้ะ ไฆวะ เอะ ก ท ไพ้ะ ท แม กุ้ อ เม้ง.
[10] ก เมะ ไจ้ะ ล้าง ก ซ้ะ ก ล แม้ ท เด้บ้ะ แบ อ นอ บี่ ซุ้ ดี๊ ก ไจ้ะ กแช่ แยว้ ไคล้ คีงอูง เท่อ ล้อ. อ ลู่ง อ แท๊ ล โอ ลู่ง ก ซ้ะ พ้า แบ เฆาะ.