[1] ค๊องเนง อี้ง จ ม ไคล้ แบฆ้ะ ดี๊ เท่อ ลู่ง น ซื๊ง กวิ้ อางจ้ะ แย้. กแคว๊ ลู่ง ล ทาง แซย่ แบ นอ ฌี้ ลู่ง อ ฌ่าง.
[2] แบ เด้าะ โพล้ง แม้ กแม มืง กแม แคว๊ โอ แอ น้ะ กชุ้. อ กย้อง บี่ นอ ก แคว๊ กุ้ อ แฌ้ แบ โอ ดี๊ อ แม๊ แด เว๊. ฌ้อง กมืง กุ้ อ แฌ้ แบ โอ ดี๊ อ แว้ แด เว๊ ปะ.
[3] กแคว๊ แบ มี๊ง ฆึ ดี๊ อ แม๊ อ แม๊ แบ มี๊ง ฆึ ดี๊ อ แว้. อ ซื๊ง เว๊ คี๊ง แฌ้ อี้ง แบ แม้ เท่อ ลู่ง อ แบ เซิง แบ ซ้ะ โละ อ ซ้ะ.
[4] แม๊ นอ อ ดู้ง อ ยาง ล โอ ลู่ง อ ล้อง แบ อ ดู้ง อ ยาง โอ ดี๊ อ แว้ ล้อ. บี่ นอ อ ซุ้ แว้ นอ อ ดู้ง อ ยาง ล โอ ลู่ง อ ล้อง แบ ปะ อ ดู้ง อ ยาง โอ ดี๊ อ แม๊ ล้อ.
[5] โก้ง โอ ฆึ โละ ซ้ะ ด๊างแม๊ ด๊างแว้ ล ฌี้ เมะ ล อืงล้าง โละ ซ้ะ แบ พี่ ม โอ พ้ะ โละ ซ้ะ ล ชู่ ล ล่าง บี่ ซุ้ ม ชูแพ เท่อ. ฌ้อง เฌ๊ ไท้ โอ ฆึ โละ ไท้ ซ้ะ บี่ อ ล่าง~ๆ บี่ ซุ้ ม้างโค้ไล่ ล อางโล๊ นี่ น ซื๊ง เกม๊า แม้ ท เด้บ้ะ แบ เป๊งนี่ น ซื๊ง โก้ง น ซ้ะ ล นี่ แบ.
[6] พี่ จ โล้ เอะ น ซื๊ง อี้ง ล เมะ ท อางแม้เลา แบ แบ เด้าะ จ เปล้ น ซื๊ง แม้ บี่ นอ ซี.
[7] แม้ เมะ ซี นอ จ แบ ซ้ะ เกม๊า น ซื๊ง แม้ ซ้ะ แบ ด้อง แย้. แบ เด้าะ โพล้ง กุ้ อ แฌ้ นี่ แบ กแช่ แยว้ อ ท เกล๊าง แฌ้ เม้ง แฌ้ เม้ง. ล แฌ้ นี่ แบ เท่อ บี่ อี้ง ล แฌ้ เด้าะ นี่ แบ เท่อ บี่ นอ.
[8] ค๊องเนง อี้ง จ ม โล้ แบ โพล้ง พี่ อ ล ทาง แซย่ ได้ะ แบ ดี๊ โพล้ง โอ เม๊ ล แพ นอ. อ ซื๊ง เว๊ เมะ ล แม้ อ แม๊ อ แว้ แบ โอ ล แฌ้ บี่ ซุ้ แย้ นอ ม ฌี้ ลู่ง อ ฌ่าง ล้อ.
[9] แบ เด้าะ น ซื๊ง โก้ง เซิง โก้ง ซ้ะ เมะ ล เก แบ แม้ แม๊ แม้ แว้ แด เทา. ฌี้ นี่ เซิงไก้ ซ้ะไก้ เท่อ ได้ะ.
[10] ด๊างแม๊แว้ ซีง ล แพ นอ จ โล้ เท่อ บี่ อี้ง. ล เมะ แย้ จ ท อางแม้เลา แบ เมะ กแช่ เยซู คริ้ อ ท อางแม้เลา แด เว๊. แม๊ ล แบ ไจ แด อ แว้ แบ
[11] แบ เด้าะ เมะ ไจ แด-อ้ะ นอ แบ โอ ก้ะ ล แฌ้. เมะ ล เมะ แบ นอ เกม๊า อ เฌ๊ ไท้ โอ ฆึ โละ ไท้ อ ซ้ะ เด้าะ. แว้ นอ ล แบ นย๊อง ไฆวะ อ แม๊ แบ.
[12] เมะ โพล้ง อ แฌ้แพ นอ จ ม ไคล้ บี่ อี้ง จ ไคล้ แด ยี๊ ล เมะ กแช่ เยซู คริ้ ไคล้ แบ. กแคว๊ พี่ อ แบ้ แยว้ อ แม๊ เมะ ล แบ้ แยว้ แบ เมะ แบ ซ้ะ โอ ฆึ ดี๊ อ แว้ ได้ะ นอ อ แว้ ล แบ นย๊อง ไฆวะ-อ้ะ แบ.
[13] กมืง พี่ อ แบ้ แยว้ อ แว้ เมะ ล แบ้ แยว้ แบ เมะ แบ ซ้ะ โอ ฆึ ดี๊ อ แม๊ ได้ะ นอ อ แม๊ ล แบ นย๊อง ไฆวะ-อ้ะ แบ.
[14] อ ไฌ่ บี่ โย้ กแช่ แยว้ แคว่ แว้ พี่ อ ล แบ้ แยว้ แบ นอ เก บี่ ซุ้ อ พู อ ลี้ง ลู่ง แม๊ แบ้ แยว้ อ กย้อง ดี๊ แคว่ แม๊ พี่ ล แบ้ แยว้ แบ นอ เก บี่ ซุ้ อ พู อ ลี้ง ลู่ง แว้ แบ้ แยว้ อ กย้อง. เมะ ล เมะ บี่ นอ แบ อ ซื๊ง เว๊ อ พู ม เก บี่ ซุ้ โพล้ง ล แบ้ แยว้ แบ อ พู. เต้~ๆ นอ กแช่ แยว้ ตองช้า ฮะช้า เว๊ เก อ พู อ ลี้ง ล้อ.
[15] แบ เด้าะ โพล้ง ด๊างแม๊แว้ ล แฌ้ ฌี้ แฌ้ ฌี้ พี่ ล แบ้ แยว้ แบ เมะ แบ ซ้ะ ไจ แด โละ อ ซ้ะ ดี๊ แม๊ ฌี้ แว้ ฌี้ พี่ อ แบ้ แยว้ แม้ บี่ นอ ซี. แม้ อ ซ้ะ บี่ อี้ง โพล้ง พี่ อ แบ้ แยว้ แว้ เมะ ฌี้ แม๊ เมะ ฌี้ แม้ ท เม้ง ฌี้ เม้ง ฌี้ ซี เมะ เว๊ แด กแช่ แยว้ แบ อ ซ้ะ เกม๊า ก โอ ฆู๊ง โอ พุ้.
[16] แม๊ ลู่ง อ แบ้ แยว้-เอ้อ น ซีงแฌ๊ บี่ จะ เล้ น ม แม้ช้า น แว้ เกม๊า อ พ้อง พลิ้ ซี-อ้า ล ซี แบ-อ้า. แว้ ลู่ง อ แบ้ แยว้-เอ้อ น ซีงแฌ๊ บี่ จะ เล้ น ม แม้ช้า น แม๊ เกม๊า อ พ้อง พลิ้ ซี-อ้า ล ซี แบ-อ้า.
[17] โพล้ง โอ ลี้ง บี่ จะ เล้ พี่ กแช่ แยว้ กุ้ นี่-อ้ะ เกม๊า อ ชู่ง ไท้ นะ ไท้ กแช่ เยซู คริ้ นอ แบ โอ บี่ นอ บี่ ซุ้ กแช่ แยว้ อางกี ล้าง เอะ-อ้ะ. อ อี้ง เก ท ไฌะ ท ไฌ่ พี่ จ ซอง เอะ โพล้ง ทื๊ง ซยอง เท่อ กุ้ จอง กุ้ ไจ้ ล้อ.
[18] กแคว๊ ลู่ง แม้ ท ไฌ่ ไร้ะ ไฆวะ ไพ้ะ เย้า พี่ กแช่ แยว้ กุ้ นี่-อ้ะ นอ ล เกิ้ง แม้ ล้างแม่ ไฆวะ ท ไฌ่ ไร้ะ ไฆวะ ไพ้ะ อ โฆ้งล่าง แบ. กแคว๊ ลู่ง ล แม้ ท ไฌ่ ไร้ะ ไฆวะ ไพ้ะ ได้ะ แบ พี่ กแช่ แยว้ กุ้ นี่-อ้ะ นอ ล เกิ้ง แม้ ท ไฌ่ ไร้ะ ไฆวะ ไพ้ะ แบ.
[19] กแคว๊ แม้ ท ไฌ่ ไร้ะ ไฆวะ ไพ้ะ เมะ ฌี้ ล แม้ แบ เมะ ฌี้ ล แบ ท น่าง เม้ง แบ. เท่อ ลู่ง อ ล้างเปิ่ง นอ แม้ โพะ กแช่ แยว้ อ ท อางแม้เลา อ ไค๊ ล โค๊.
[20] โพล้ง กุ้ อ แฌ้ แบ โอ บี่ ซุ้ กแช่ แยว้ กุ้ นี่-อ้ะ อ แค๊ นอ.
[21] พี่ กแช่ แยว้ กุ้ นี่ แน้ นอ น เก ท อ ฆ่อง ได้ะ-อ้า แบคู่ แบโฌ้ ล ฌี้. แบ เด้าะ น เมะ เก โพล้ง พ้อง พลิ้ ซี นอ เก แด เทา.
[22] กแช่ แยว้ เมะ กุ้ นี่ โพล้ง พี่ เก ท อ ฆ่อง นอ โพล้ง ล แฌ้ นอ กแช่ เยซู กูแพล่-อ้ะ บี่ ซุ้ ล เก ท อ ฆ่อง ล้า แบ. บี่ นอ อ ซุ้ กแช่ แยว้ เมะ กุ้ นี่ โพล้ง พี่ ล เก ท อ ฆ่อง แบ นอ โพล้ง ล แฌ้ นอ เก ทาง ก้ะ กแช่ เยซู คริ้ อ ฆ่อง ล้อ.
[23] กแช่ แยว้ ฆวี้ นี่ น ซื๊ง เลา อ ฆวี้ เย้า. อ กย้อง บี่ นอ เก โพล้ง ฌางคู คู อ ท ช๊องมอง อ ฆ่อง ล้า ล ฌี้.
[24] ด๊างพื่งวี่ ซีง-เอ้อ น ซื๊ง กุ้ อ แฌ้ โอ บี่ จะ เล้ พี่ กแช่ แยว้ กุ้ นี่ น ซื๊ง อ แค๊ นอ เกม๊า น ซื๊ง โอ บี่ นอ โอ เบ้า ดี๊ กแช่ แยว้ นอ ล้อ.
[25] ค๊องเนง อี้ง จ ม ไคล้ ช๊า น ซื๊ง ท อางจ้ะ แบฆ้ะ ดี๊ โพล้ง ล ทาง แซย่ ได้ะ แบ. แย้ จ ไคล้ เท่อ อี้ง ล เมะ กแช่ แยว้ อางแม้เลา แย้ แบ. แบ เด้าะ จ ม ไคล้ เท่อ พี่ จ ช๊องมอง-อ้ะ บี่ ซุ้ โพล้ง ล แฌ้ ลู่ง กแช่ แยว้ ย๊างเซิง ย๊างซ้ะ-อ้ะ. ท บี่ นอ น ซื๊ง อางกี ล้าง น ซ้ะ ดี๊ แย้ ซี.
[26] ก เมะ แคว่ ช๊องมอง อ ช๊า อ โท่ ค๊องเนง อี้ง พี่ ท แก ท เฌ้ โอ ทาง เย้า จ ช๊องมอง กแคว๊ เมะ โอ บี่ อ ล่าง~ๆ นอ ฌี้ ลู่ง อ ฌ่าง แด เว๊.
[27] น แม๊ โอ เย้า-อ้า โอ~ๆ แด เว๊ ไจ แด-อ้ะ ล ฌี้. น โอ น่างพล้อง ได้ะ-อ้า เมะ บี่ นอ แม้ น แม๊ ล ฌี้.
[28] แบ เด้าะ น เมะ ทาง แซย่ นอ ล เมะ ท เด้บ้ะ แบ ดี๊ โพล้ง มืงน้าง เมะ ทาง แซย่ นอ ล เมะ ท เด้บ้ะ น่าง เม้ง แบ. เต้~ๆ นอ จ แบ ซ้ะ เกม๊า น ซื๊ง พ้อง พลิ้ ดี๊ ท แก ท เฌ้ พี่ โพล้ง ทาง แซย่ ม ต้องนอง เว๊ กุ้ มื่ง นี้ง.
[29] ด๊างพื่งวี่ ซีง-เอ้อ น ซื๊ง แบ ซีงแฌ๊ ท อ อี้ง. อ ช๊า อ โท่ โอ ล แอ ล้า แบ. ท๊อง อี้ง จู่ง แย๊ กแคว๊ ลู่ง อ แม๊ โอ เย้า ล แพ นอ เกิ้ง โอ บี่ ซุ้ อ แม๊ ล โอ แบ.
[30] โพล้ง ลู่ง อ ฌาง อ ย้า ล แพ นอ เกม๊า แม้ อ ซ้ะ บี่ ซุ้ ล แบ มอง แบ ม้ะ เท่อ แบ. โพล้ง ลู่ง อ นี่ง ล แพ นอ เกม๊า แม้ อ ซ้ะ บี่ ซุ้ อ ซ้ะ ล มึ แบ. โพล้ง ลู่ง อ ฆวี้ เท่อ ล แพ นอ เกม๊า อ แคว่-อ้ะ บี่ ซุ้ ล เมะ อ เท่อ แบ.
[31] โพล้ง พี่ อ เจ่ เท่อ ลู่ง ฌางคู โคล๊ง คู อี้ง นอ เกม๊า แม้ อ ซ้ะ บี่ ซุ้ ล เจ่ เท่อ ลู่ง ฌางคู โคล๊ง คู นาง เม้ง แบ เมะ เว๊ ฌางคู โคล๊ง คู พี่ ก แด-อ้ะ ค๊องเนง อี้ง นอ โอ ล ไยะ ล้า แบ.
[32] แย้ จ ล แบ ซ้ะ เกม๊า น ซื๊ง แบคู่ แบโฌ้ แบ เฆาะ. โพล้ง แบ้ แยว้ ลู่ง อ แม๊ ล โอ แบ นอ อ เว๊ นาง แบ กแช่ แยว้ อ ท ไพ้ะ ท แม้ ลู่ง อ เว๊ เฌา แม้ แบ กแช่ แยว้ อ ซ้ะ.
[33] เมะ โพล้ง ลู่ง อ แม๊ โอ เย้า นอ นาง แบ ท ไพ้ะ ท แม้ ลู่ง ฌางคู โคล๊ง คู ลู่ง อ เว๊ เฌา แม้ แบ อ แม๊ อ ซ้ะ.
[34] อ กย้อง บี่ นอ อ เว๊ อางน้าง พ้ะ อ ซ้ะ คี๊ง แพ้. กมืง ลู่ง อ ล ทาง แซย่ ได้ะ แบ แซย่ ฌี้ บาง ฌี้ เฌาโละ แม้ กแช่ แยว้ อ เท่อ บี่ ซุ้ อ เว๊ ม เก โพล้ง ฌี้ โพล้ง แอว้ เลา ดี๊ อ น่างค๊อง น่างซ้ะ. แบ เด้าะ กมืง ลู่ง อ แว้ โอ เย้า นอ นาง แบ ท ไพ้ะ ท แม้ ลู่ง ฌางคู โคล๊ง คู ล โค๊ ลู่ง อ เว๊ เฌา แม้ แบ อ แว้ อ ซ้ะ.
[35] พี่ จ ไคล้ ท อ อี้ง นอ เมะ เว๊ จ แบ ซ้ะ แม้ช้า น ซื๊ง ล เมะ จ แม้ ไทะทะ น ซื๊ง แบ แบ เด้าะ จ แบ ซ้ะ เกม๊า น ซื๊ง แม้ เท่อ ลู่ง อ ฌี้ อ แบ เจ้บึ้ ซ้ะ ดี๊ กแช่ แยว้ เลา~ๆ เช๊ง~ๆ บี่ ซุ้ ท แม้ ไทะทะ น ซื๊ง ล โอ น่าง เม้ง แบ.
[36] กแคว๊ พี่ อางด้าง โละ อ ซ้ะ ดี๊ กมืง ล แฌ้ ฌ้อง เมะ ช๊องมอง อางกี ล้าง อ ซ้ะ ล เก ล้า แบ ดี๊ แม้ อ ซ้ะ ล เกิ้ง ล แบ แบ ดี๊ ช๊องมอง เกิ้ง ลู่ง ม ทาง แซย่ นอ อ ซื๊ง เว๊ คี๊ง แฌ้ ม ทาง แซย่ ซี อ นอ ล เมะ ท เด้เทา เด้บ้ะ น่าง เม้ง แบ.
[37] แบ เด้าะ กแคว๊ เมะ อางกี ล้าง อ ซ้ะ ล ทาง แซย่ ล้า แบ เฆาะ ล เมะ โพล้ง แคแน-อ้ะ แบ ฌ้อง อ เว๊ โก้ง อ ซ้ะ นี่ เลา ปะ เย้า ดี๊ อางกี ล้าง อ ซ้ะ ลู่ง อ ล ทาง แซย่ ดี๊ กมืง ล แฌ้ อี้ง ล้า แบ ฌี้ ลู่ง อ ฌ่าง ล้อ.
[38] ท บี่ นอ กแคว๊ ลู่ง อ ทาง แซย่ ดี๊ อ ด้าง นอ ฌี้ ลู่ง อ ฌ่าง แบ เด้าะ โพล้ง พี่ ล ทาง แซย่ แบ นอ ม ฌี้ นี่ อ นอ ได้ะ.
[39] กมืง ลู่ง อ แว้ โอ ได้ะ ม แม้ ก้ะ ดี๊ โพล้ง อ แฌ้แพ ล ซี แบ. แบ เด้าะ อ แว้ เมะ ซี๊ง เย้า นอ อ เว๊ ม แม้ ก้ะ ดี๊ กแคว๊ พี่ อ เอ โละ อ ซ้ะ นอ ซี แบ เด้าะ แบ ทาง แซย่ ดี๊ โพล้ง แบ้ แยว้ ล้อ.
[40] ยี๊ แด จ ช๊องมอง กมืง เมะ โอ แด เว๊ ล แฌ้ อ ซ้ะ ม มึ ล โค๊. พี่ จ โล้ เท่อ บี่ อี้ง นอ จ ช๊องมอง กแช่ แยว้ อ วีง ฌี้ แล้ แอว้ โอ ดี๊ แย้ ปะ ล้อ.